Au Iango E Iangoa Raoi te Koaua Aio iaon Iesu Kristo
Ngkai ko reitinako ni karekea iangoan raoi Iesu Kristo, I berita nakoim tiaki ti ni kairam ma man te mwaaka mai karawa.
N tain te Itita ae tamaroa aei, I a manga taekina taekan te tataro n te anene ae ringa te nano aio, “Guide us, O thou great Jehovah.”1
Te karaki ae tamaroa n Ana Boki Moomon e taekina te ataeinimwaane, man te utu ae kinaaki, ae arana Aramwa, are e kabwarabwaraaki ni booki aika a tabu bwa te tia tataroi boua n anti ae akea ana kakoaua.2 E rangi ni wii raoi ao n anai nano, ni kabonganai taeka ni kababa ni kairoroia tabeman bwa a na iria. Te kamimii, e kaoti te anera nakon Aramwa ao raoraona. E bwaka Aramwa nako aontano ao n aki konamaki n te aro are e a uotaki n akea korakorana nakon ana auti tamana. E tiku n aron ae e a boo n aki kakamwakuri inanon tenibong.3 Imwiina, e kabwarabwaraa bwa ngke e taraa ni mate irouia ake irarikina, ana iango e rangi ni marurung ngkai e nanokawaki tamneina, ni iangoan maiuna ae aki kawakin ana tua te Atua. E kabwarabwara bwa a na iango e a “karawawataaki n uringakin [ana] bure aika a mwaiti”4 ao ni “kamarakaki n te karawawataki ae akea tokina.”5
Inanon rawawatana ae korakora, e uringnga reireiana ni kairakena iaon “rokon Iesu Kristo, are Natin te Atua, bwa e na karaoa te mwakuri ni kamaiu ibukin buren te aonaaba.”6 Imwiina e taekina te taeka ae rangi n riinga te iango: “Ngke au iango e iangoa raoi te koaua aio, I tang inanou: O Iesu, ngkoe Natin te Atua, nanoangaai.”7 Ngke e bubuti ibukin mwaakan te Tia Kamaiu ae tabu, e riki te bwai ae moan te kamimii: “Ngke I iangoa aio, ” e taku, “I aki manga uringa marakiu.”8 N te tai ae waekoa e namakina te rau ao te beebete. “Akea riki te bwai ae [e a tia] n rianako ma ni karewerewe n aron kimwareireiu,”9 e taku.
Aramwa “e iangoa raoi” n koauan Iesu Kristo. Ngkana ti kabonganaa te taeka “iangoa raoi” nakon ae bon nanona ni koaua, ti kona ni kangai, “E iangoa raoi tauan te biti are e kairia ngkai e bwaka,” nanona e kanakoa baina ni waekoa ao n taua ni kamatoaa nakon te bwai ae matoatoa ae nim nakon te aa ae nene.
N ae e riki nakon Aramwa, bon ana iango are e anganna ao ni kamatoa ni kanimwa te koaua ae korakora ni koauan Iana mwakuri ni kamaiu Iesu Kristo. Mwakurian te onmaki n te koaua anne, ao man mwaakan ana nanoanga te Atua, e kamaiuaki man te rawawata ao ni kaonaki n te kaantaninga.
Ngkai tao baike ti rinanona aki rangi ni kakaiaki n aron Aramwa, bon akea tokin naba kakawakiia. Ara iango a tia naba ni “iangoa raoi te koaua aio” iaon Iesu Kristo ao Ana akoi n anga karea, ao nanora a tia n namakina te oota ao te kimwareirei are e reke mai iai.
Karekean Iangoan Iesu Kristo
Au tataro ni bongin te Itita aio bwa ti na iangoia raoi ni katea, kakorakoraa, ao ni kawakina iangoan Iesu Kristo ae rangi ni kakawaki aei10 ni kariaia bwa e na rin n ara iango ni katoatai, bwa kairara ni baike ti iangoi ao ni karaoi, ao n uota te kimwareirei ae karewe n Ana tangira te Tia Kamaiu.11
Kaonan ara iango ma mwaakan Iesu Kristo tiaki nanona bwa ti Ngaia ae mena n ara iango. Ma e nanonaki bwa ni kabane ara iango a nene n Ana tangira, Maiuna ma ana reirei, ao Ana mwakuri ni kamaiu ao mimitongin Mangautina. Iesu e aki mena n te tabo ae na mwanuokinaki, ibukina bwa a memena ara iango irouna n taainako ao “bwaai ni kabane ake [inanora a tangiria]!”12 Ti tataro ni kataia n ara iango waaki are a tia ni kaanira Nakoina. Ti karokoa n ara iango tamnei mai karawa, koroboki aika a tabu, ao anene n taromauri aika a kairaki mairouna ni kawakina iangoana ni katoabong ake a karina n roko iroura ni maiura aika a onrake n te tabetabe. Ara tangira i Bukina e aki kamanoira man te nanokawaki ao te rawawata n te maiu aei, ma e kariaia bwa ti na nakonako rinanon kangaanga ma te kakorakoraaki are iaon riki ara konaa.
Iesu, e moanibwai Iroum
Ma karewena ae kaona nanou;
Ma karewena riki ae riaon ae kona n nooraki
Ao e reke te rau irouna.13
Uringnga, ngkoe te nati n tamnei iroun Tamara are i Karawa. N aron ae kabwarabwara te Abotoro ae Bauro, ngaira bon “kanoan te Atua.”14 Ko a tia ni maeka n oin kinaakim ngkoa imwaain ae ko roko n te aonaaba. Tamara are i Karawa e karaoa ana babaire ibukira bwa roko n te aonaaba, n reiakinaki, ao n oki Nakoina. E kanakoa Natina ae ana Riki Temanna rinanon mwaakan Ana mwakuri Ni Kamaiu ao Mangautina ae akea tokina, ti maeka riaon te ruanimate; ao ngkana ti tauraoi ni kakamwakuri n te onimaki Irouna ao n raira nanora n ara bure,15 a kabwaraaki ara bure ao ni karekea kantaningaan te maiu ae akea tokina.16
Tararuaa Ara Iango ao Tamneira n ae Moan te Tamaroa
N te maiu aei, ara iango ao tamneira a kainanoa te tararua ae nakoraoi.17 Ara iango e kariaia bwa ti na maiu, n rinerine, ao ni kona n ata te raoiroi ao te buakaka.18 Tamneira e karekea kamatoaan te kakoaua ae te Atua bon Tamara, ao Iesu Kristo bon Natin te Atua, ao Aia reirei bon kairara nakon te kukurei ikai ao n te maiu are akea tokina imwiin te maiu aei.
Ana iango Aramwa e iaongoa raoi te koaua iaon Iesu Kristo. E bita maiuna. Te maungatabu ni kabuta bon te tai ae tangiria te Uea bwa ti na ataia ao ni karaoia. Bon te tai naba ni katamneia aron rikirakera. Ngkai mwiokoau aei e uotai nakon taabo ni kabuta te aonaaba, I a tia ni kamwataua n taraa rikiraken maiun tamneia ao raoiroia, kaain te Ekaretia ae a rangi ni kakaonimaki.
Nimaua te ririki n nako, ti tuangaki bwa ti na rangi ni katerea te Tia Kamaiu ni bwaai nako ake ti karaoi man kabonganakin raoi te ara ae Ana Ekaretia Iesu Kristo ibukiia Aika Itiaki ni Boong aika Kaitira.19 Ti na taetaekina Arana ma nanora ni koaua.
Aua te ririki n nako, man kauarerekean tain ara Bootaki n Toa, ti karikirakea ara moanibwai iaon kanakin ana toa te Uea. Ti katuumaua ara iango iaon Iesu Kristo ao ti taua raoi ma nanora n ara berita bwa ti na ururingnga n taainako.20
Man kamaenakoara man te buti n aoraki n te aonaaba ao te buoka n Nakomai, Iriirai, reiakinan Iesu e a bon riki bwa te moanibwai ni mweengara, e buoka aron taromaurian te Tia Kamaiu rinanon te wiiki.
Man toauanmwiin ana reirei Beretitenti Russell M. Nelson n “ongo Irouna,”21 ti kabooua ara konabwai ni kinaa ana wirikiriki te Tamnei ae Raoiroi ao n noora bain te Uea inanon maiura.
Ni katanoataakin ao katiaan tembora aika a mwaiti, e a mwaiti riki ara tai n ririn n Ana auti te Uea ao ni karekei kakabwaia ake a beritanaki. Ti a namakina riki te korakora man karikirakean te tamaroa ibukin ara Tia Kamaiu ao te Tia Kabooi Maiura.
E taku Beretitenti Nelson: “Akea te bwai ae beebete ke ni karina te riki bwa [te] tia [iriira Iesu] ae korakora. Ara taratara e riai ni matoa iaon te Tia Kamaiu ao Ana euangkerio. Bon te iango ae eti ni keiaki n Taraia n taai nako n ara iango.”22
Man katuruan ara taratara iaon Iesu Kristo, bwaai ni kabane aika a katobibiira—aika ngkai naba—a nooraki rinanon ara tangira Ibukina. E na maunanako bwaai aika aki bati ni kakawaki, ao ti kamwaawai bwaai aika aki kaeti nakon Otana ao anuana. Ngkai ko teimatoa ni karekea raoi iangoan Iesu Kristo, n onimakinna, ao ni kawakin Ana tua, I berita nakoim bwa tiaki ti ni kairam ma man te mwaaka mai karawa— te mwaaka are e uota te korakora nakon am berita aika tabu, te mweeraoi nakon am kangaanga, ao te kimwareirei n am kakabwaia.
Ururinga Iesu Kristo
Tabeua te wiiki n nako, Ngai ao Kathy ti kawara mweengan Matt ao Sarah Johnson. Iaon te oo bon tamnein aia utu ae kakawaki irouia, tamnein te Tia Kamaiu ae tamaroa, ao korobannan te tembora.
Natiia aine aika aman, Maddy, Ruby, Claire, ao June, a kukurei ni kaota ae a rangi n tangira tinaia.
N ae riaon teuana te ririki Sarah e aki toki ni bairea ana tai te utu n te Kaonobong bwa a na bane n nakon te tembora bwa aonga natiia aine n ira buakon te bwabetito ibukiia kaain aia utu ake a maiu rimoa.
N Nobembwa te ririki ae nako, e bairea ana tai aia utu Sarah nakon te tembora ibukin te kabanea ni wiiki n Ritembwa n te Kaabong n onea mwiin te Kaonobong. “Au kantaninga bwa e raoiroi anne iroum,” e taku nakon Matt.
E a tia ni kuneaki iroun Sarah te kaentia, ma e kantaningaia te taokita bwa e na tiku ni maiu uoua ke teniua riki te ririki. Ni bootakin te toa mai imwaaina, e kaota ana koaua ae matoatoa Sarah, n taku bwa tao tera mwiina ae e na reke irouna, e bon tangira te Tia Kamaiu ma nanona ni kabane ao bwa “te tokanikai e a tia n reke” mai Irouna. Ngke e a kaan roko Ritembwa, te bwai ae aki kantaningaaki marurungin Sarah e a kekerikaaki, ao e a karinaki n te o n aoraki. Ni moaningabongin te Kaabong, 29 n Ritembwa, e a motirawa ma te rau man te maiu aei. E a tia Matt ni mena irarikin Sarah n te tairiki anne.
Ma uruakin nanona, ao korakain rabwatana ao tamneina, e a roko ni mweengana, n nanokawaki ma natina aine. Ngke e taraa ana tareboon Matt, e noora te kauring n aia tai are e bon tia ni kabaea Sarah ibukin te tembora nakon te bong anne. E taku Matt, “Ngke I moan nooria, I iango, E na aki mwakuri aio.”
Ma imwiina ana iango Matt e iaongoa raoi te koaua aio: “E maiu te Tia Kamaiu. Bon akea riki te tabo ae e riai ni mena iai ara utu nakon riki ae n Ana auti ae tabu.”
Matt, Maddy, Ruby, Claire, ao June a roko n te tembora ibukin aia tai are e kabaea Sarah ibukiia. Ma ranimatana ae wanako iaon tabana, Matt ao natina aine a karaoi bwabetito. A namakina te tangira ae nene ao kabaeakiia ae akea tokina ma Sarah, ao a namakina mwaitin te tangira ao te mweeraoi n te rau mai iroun te Tia Kamaiu. Matt e tibwaia, “Ngkai I namakina te korakai ao te rawawata, I takarua ni kimwareirei, n ata Ana babaire ni kamaiu ae tamaroa te Tama.”
N tain te Itita aio, I kakoauaa bwaninin ao koauan raoi te koaua n ana anga karea ni kamaiu te Tia Kamaiu ae akea kabotauana ao Mangautina ae mimitong. Ngkai ko iangoia raoi ao n taua ni kamatoaa te iango aio n aki toki, ao ngkai ko kabotoa maium iaon te tia Kamaiu, I berita nakoim bwa ko na namakina Ana kantaninga, Ana rau, ao Ana tangira. N aran Iesu Kristo, amen.