Onimakinan ana Reirei Kristo
Ngkana ti katea mweengara iaon te kateitei are e aanaki ni berita ae reitaki ma Kristo, ti onimakina ana reirei Kristo.
Ni katamneia n au iango, I noora te burabeti ae Nibwaai ngke e a kara n ana taibora, bwaatua ni koora aika a mena imatana, ma ana kai ni koroboki inanon baina.
Nibwaai ngke e nang roko n tokin ana koroboki iaon taian rekooti. E koreia, “Ao ngkai tariu aika kam tangiraki, N nang katoka au taetae ni kawai ngkai.”1 Ma imwiin naba te tai anne, te Tamnei e kaumaka Nibwaai bwa e na manga okira ana rekooti ao ni korea ana kabanea n rongorongo. Iaan ana kairoro te Tamnei ae Raoiroi, te burabeti ae korakora e a manga moan taua ana kai ni koroboki ni baina ao e koroboki, Ngaia ae e kukurei nanou ni bwaai … ake I a tia ni koroi, ma iai riki taeka tabeua … I kan taekin iaon ana a reirei Kristo.”2
Ti rangi ni kakaitau n aki toki ibukin “taeka tabeua”3 ao ibukin te Tamnei ngke e kairoroa Nibwaai bwa e na koroi. Ana mwakuri Nibwaai ibukin korean ana reirei Kristo bon te kaubwai nakoia naake a warekia ao ni kamatebwaia raoi. Iai inanona te mii ni burabeti ni bwabetitoan te Tia Kamaiu4 ao bwanaan te Nati ngke e kaoiia aomata ni kabane bwa a na Iriiria5 ao “ni karaoi bwaai ake [ti] a tia n noori bwa [E] karaoi.”6 Iai inanona ana kakoaua Nibwaai bwa naake, iai aia onimaki iroun Kristo, n rairinanoia man aia bure ao n ira aia Tia Kamaiu nako nanon te ran ni bwabetito e na “reke irouia te Tamnei ae Raoiroi; eng, ao e na reke iroumi te bwabetitoaki n te ai ma te Tamnei ae Raoiroi.”7 Ti ongo naba bwanaan te Tama ngke e taetae ni kangai, “Eng, a koaua ao a kakaonimaki ana taeka Natiu ae Tangiraki. Te aomata are teimatoa ni karokoa te toki, boni ngaia are e na kamaiuaki.”8
Beretitenti Russell M. Nelson e kamataata kakawakin ana reirei Kristo n tain ana marooro are e anga nakoia taan kairiiri n te mition aika boou: “Ae kakaawaki riki nakon bwaai ni kabane, ti tangiriia ara mitinare … a na korea inanoia ana reirei Kristo—n nim ni matoa … ni maiuia.”9
Taetaekina Au Euangkerio e kakimototoi nimaua bwaai aika a kakawaki ibukin ana reirei Kristo. E taku, “[Ti] kaoiia aomata bwa a na nakon Kristo ni buokiia ni karekea te euangkerio are e kaokaki rinanon onimakinan Iesu Kristo ao Ana Mwakuri ni Kamaiu, rairannano, bwabetito, karekean te Tamnei ae Raoiroi, ao n teimatoa ni karokoa te toki.”10
Ma kakawakin ana reirei Kristo tiaki tii ibukiia mitinare! Ao e nano riki nakon kakimototoan nimaua oin reirei aika a okioki. E kaairaki ma tuan te euangkerio. Bon te babaire ae moan te korakora ibukin te maiu ae akea tokina.
Tariu ao mwaneu, ngkana ti na butimwaea ana kakao Beretitenti Nelson ni karekea ana reirei Kristo bwa e na nim ni matoa inanon maiura, ti riai ni kamatoa rairakira nakon te Atua man te kamatebwai, te tataro, ao te kakaonimaki inanon maiura, ao te rairannano ae teimatoa. Ti riai ni kaoa te Tamnei ae Raoiroi bwa e na korea ana reirei Kristo “i nanoni baaba aika iriko [aika] nano[ra]”11 n te aro ae nano ao e na teimaan n aron are e koreaki iroun Nibwaai iaon bwaatua aika koora.
N Okitobwa ae nako, e titiraki Beretitenti Nelson, “Tera ae nanonaki bwa ko na tokanikai iaon te aonaaba?” Irarikin bwaai ake tabeua, e taku, “Nanona bon onimakinan ana reirei Kristo riki nakon rabakauia aomata.”12
Te taeka ae onimakinna e kabwaranakoaki nanona bwa “te kakoaua ae matoa iaon te anua, te konabwai, te korakora, ke kakoauaan temanna ke te bwai teuana.”13 Bwa te aomata anne bon Iesu Kristo, ao te bwai anne bon Ana reirei.
E kanga onimakinan ana reirei Kristo ni bita aron maiura?
Ngkana ti onimakina ana reirei Kristo, ti na onimakina Kristo n te aro ae tau ni maiuakin Ana taeka nako.14 Ti na kamatebwaia inanon maiura taekan Iesu Kristo,15 Ana mwakuri, Ana reirei, ao Ana Mwakuri ni Kamaiu ae akea tokina. Ti na kamatebwaia Ana berita ao aron baika a na riki aika kaineti nakon Ana berita ake e anga.16 Ngkai ti kamatebwai, ti na kaonaki ma te tangira ae korakora ibukin te Uea.
Ngkana ti onimakina ana reirei Kristo, ti na kaaniia Tamara are i Karawa ni katoabong n te nanorinano, tataro ae raba, ike ti kona ni kaota ara kakaitau ibukin te bwaintutuaraoi ae Natina ao ibukin ni kabane kakabwaiara.17 Ti kona n tataro ibukin ana kaotioti ni iraorao te Tamnei ae Raoiro,i18 n tataro ni kaeti nanora ma Ngaia,19 n tataro ni katurui ara iango iaon ara berita aika a tabu ao ni kaboui ara motinnano ao ni kawakinii.20 Ti kona n tataro ni kamatoaia ao ni kaota ara tangira ibukiia ara burabeti, taan mamata ao taan karekei kaotioti;21 n tataro ibukin te mwaaka ni kaitiaki ibukin kabwaraakin buure;22 ao n tataro ibukin te korakora n totokoa te kariiri.23 I kaoi ngkami bwa kam na moanbwaia te tataro inanon maiumi, n ukeuke ni katoa bong ni katamaroa am reitaki ma te Atua.
Ngkana ti onimakina ana reirei Kristo, ti na kona ni kararoai ana kariiri te aonaaba bwa ti aonga ni kabotoi maiura iaon te Tia Kamaiua te aonaaba.24 Ti na tiana ke ni katoka ara tai iaon bwaai n reitaki, takakaro iaon te intanete, bakatae, tangiran ae riao, ke kamataku aika aki riai; te anainano ni kaubwain ao kamoamoan te aonaaba; ao tabeua riki waaki ni kakukurei are a karekea nnen katei aika a kewe ao rabakauia aomata aika a kairua. Bon tii inanon Kristo ae ti kunea te koaua ao ni karekei bwaai aika a teimaan ake ti tangiri.
Te rairannano ae koaua25 e na rangi n kakukurei26 mwakoron maiura—ni kaai ni kabwaraaki ara bure ao ni bitaki ni katotonga Kristo.27 Te rairannano ma te onimaki e anganiira bwa ti na kona ni karekea Ana Mwakuri ni Kamaiu Kristo. E reirei Beretitenti Dallin H. Oaks bwa ngkana E kabwarai buure te Tia Kamaiu, E “karaoa ae mwaiti riki ni kaitiaki [ira] man te bure. E anga [niira] naba te korakora ae boou.”28 Ngaira n tatabemaniira ti kainanoa te korakora aio ni kawakin ana tua te Atua ao ni kakoroa nanon te kaantaninga ae akea tokina ni maiura.
Inanon Iesu ao n Ana reirei, ti kunea te korakora, E taku, “E koaua, e koaua, ae I taekinna nakoimi, bwa aio au reirei, bwa ane e kateitei iaon aio ao e boni kateitei iaon au bwa, ao e na bon aki tokanikai mataroan moone ni kaaitaraa.”29
Ti noora te berita aei ni kakoroaki nanona ni mauia aomata aika a kakaonimaki. Ai bon teuana tabun te ririki n nako ae e reke au tai ni kaitibo ma Travis ao Kacie. A mareaki n te tua n 2007. N te tai anne, Travis e tuai kaaina te Ekaretia. E ngae ngke e ikawarake Kacie, ni mweengaia Aika itiaki ni Boong aika Kaitira, e a tia ni bwaka man ana onimaki ngke tebwi tabun ana ririki ao n aki maiuakin reirei ake e kaikawaaki iai.
N 2018, e a kaitibo Travis ma mitinare, ao e bwabetitoaki n 2019. E riki Travis bwa te mitinare nakon Kacie, are e rinanon naba te rairaki man bitakin maiuna. A kabaeaki n te tembora n Tebetembwa 2020. Tao uoua te ririki imwiin ana bwabetito, e weteaki Travis ao e riki bwa kaain te bitiobiriki.
Iai aorakin Travis ae burenibwai rekena bwa iai baika a kiritibutibu aika a riki inanon rabwatana. E mwaiti ana tai ni korokoro ibukin kanakoan baike a kiritibutibu, ma bon akea katokan te aoraki aei. Tabeua te ririki n nako, e anganaki Travis 10 tabun te ririki maanin maiuna.
Kacie iai aorakin matana ae te retinitis pigmentosa, te aoraki ae burenibwai n riki ae aorakin ataein te mata are e kamabubua am taratara ni karokoa are ko a matakii.
E taetae Kacie nakoiu ibukin maiuna n taai aika a na roko. E kakantaninga te tai, ae e aki nang raroa, ngkana e nang riki bwa te aine ae mate buuna, e matakii, n akea te mwane ni buoka nakoina, ao n tiku n tii ngaia ni kaikawaia rake natina aika aman. I titirakina Kacie bwa e na kanga ni keiakin ana bong aika a na roko aika a taraa ni kabwaranano. E moangare ma te rau ao e taku, “E bon rang korakora kukureiu ke n namakina te kaantaninga inanon maiu. Ti teimatoa ni kakoauai berita ake ti karekei inanon te tembora.”
Ngkai e a riki Travis bwa te bitiobi. Uoua te namwakaina n nako e a manga karaoaki riki teuana ana korokoro. Ma iai namakinan te kantaninga ao te rau. E a rikirake ni buakaka ana taratara Kacie. Iai ngkai ana kamea ae kakaira kawaina ao e a aki kona ni kabuta te kaa. Ma e kukurei, e kaikawaiarake natina ao ni mwakuri bwa te kauntira n te beretitentii n te Bootaki n Ataeinnaine.
Travis ao Kacie a katea aia auti iaon te bwaa. Travis ao Kacie a onimakina ana reirei Kristo ao te berita bwa te Atua “e na onea karawawataki [ra] nakon taian kakabwaia ibuki [ra].”30 N ana babaire ae kororaoi te Atua, te korakai ma te onimaki iroun Kristo e reitiira ni kakororaoira inanon Kristo.31 N aron te mwaane ae wanawana are e katea ana auti iaon te bwaa,32 ngke e bwaka te karau ao e roko te ieka ao e kare te ang ao n orea te auti are a kateia Travis ao Kacie, ma e aki bwaka, ibukina bwa e kateaki iaon te bwaa.33
Iesu e aki taetae ibukin rikin taian kakatai ma kangaanga inanon maiura; E taetae ibukin te koaua are ti na rinanon taian kakatai ao kangaanga inanon maiura. Te kaokoro n te taetae ni kaikonaki aei tiaki tao ibukin rokon te angibuaka ma e na kanga arora ni kaeka nakon Ana kakao n ongo ao ni karaoa are e E a tia n reiakinna.34 Akea riki te kawai teuana ae ti na maiu iai.
Ngkana ti katea mweengara iaon te kateitei are e aanaki ni berita ae reitaki ma Kristo, ti onimakina ana reirei Kristo, ao ngkai ti Nakoina, ti karekea te berita ibukin te maiu ae akea tokina. Aomata ake a onimakina ana reirei Kristo a keiaki ni mwananga ma te teimatoa inanon Kristo ao n teimatoani karokoa te toki. Ao bon akea riki te kawai ae ti kona iai ni kamaiuaki i nanon abanuean te Atua.35
I kaota au koaua ae onoti ni maiun ao utin Iesu Kristo bwa e bon koaua. I kakoaua bwa te Atua e tangiriia kaain aonaaba ni kabane n te aro are E anga Natina bwa e na kamaiura man ara bure36 ao ni kamarurungiira man rawawatara.37 I kakoaua bwa E a tia ni wetea ana burabeti te Atua inanon ara tai, ae Beretitenti Russell M. Nelson, are E taetae mairouna ao e kairiira.
Ma nanou ni kabane, I kaoi ngkami bwa kam na onimakina ana reirei Kristo ao ni katea maiumi iaon te bwaa are te Tia Kabooi Maiura. E na bon aki kaaki taekami. N aran Iesu Kristo, amen.