Waaki Nako—ma te Onimaki
Man kamwakuran ara onimaki iroun te Tia Kamaiu, Iesu Kristo, e na buokira n tokanikai iaon te bwara n nano ao tabeua riki kanganga ake ti kaitara ma ngaia.
Unimwaane George A. Smith, te abotoro, e karekea te reirei mairoun te burabeti Iotebwa Timiti n tain te kanganga ae korakora. “E tua nakoiu bwa nna riai n aki taenikai man au kaantaninga ni bane, e ngae ngkana i katobibiaki n taian kanganga. Ngkana I inako n te kinono i Nova Scotia ao rabunaki n te maunga ae arana Rocky Mountain, I riai n aki bwarannano ma N na teimatoa, ni kamwakura au onimaki, ao ni kateimatoa te ninikoria ao I riai n tokanikai ni kaitarai kariiri n te kabanea n tai.”1
E aera ngkai e kona n taetae n arona aei te burabeti Iotebwa Timiti nakon temanna ae rotaki n te rawawata? Bukina e ataia bwa e bon koaua. E maiuakinna. E teimatoa n namakina te kangaanga ae rang korakora inanon maiuna Iotebwa. Ma, ngkana e kamwakura ana onimaki iroun Iesu Kristo ma ana mwakuri ni kamaiu, e tabe n waaki nako, ao ni kona ni kaitarai kangaanga ake e taku bwa eaki kona ni kaitaraa.2
N te bong aei ao I kan manga kaoka ana reirei Iotebwa nakoira bwa tina riai n aki katokanikaia te bwara n nano ngkana ti kaaitara ma kangaanga, namakin aika a karawawata, kabwakara I bon iroura, ao ai kakaewenako riki tabeua.
Ngkana I taekina te bwara n nano, I bon aki nanonna ni kan kamamarai ngkami n ami namakin n te nanokaawaki ae korakora, ni maaku, kee aoraki riki tabeua ake a kainanoi bwainaoraki aika onoti.3 I bon taetae ibukin taian bwara n nano ake a roko man ara kekeiaki ao kabwakara ni maiura.
E kaungaki nanou irouia aomata aika rianako aia konabwai ao n teimatoa ni waaki nako—ma te onimaki—n aki tabe ma tera.4 N ana Boki Momon, ao ti wareka rongorongon Tioram, are ana toro Raban. Ngke e a reke iroun Nibwaai bwatua buraati, ao Tioram e rineia bwa e na ira Nibwaai ma tarina nakon te rereuea ke e na tiku ni kamateaki.
Bon te rinerine ae kamimi! N te moan tai ao Tioram e tangiria ni birinako, ma e taua Nibwaai ao ni berita nakoina bwa ngkana e iria, ao e na bon kainaomataki ao n reke ana tabo irarikia aia utu. E unga nanon Tioram ai ngaia are e a iriia.5
E kaitiboo ma kanganga aika bati Tioram ni maiuna ae boou, ma e teimatoa ni waaki nako ma te onimaki. Akea iroura kanikinaean ae Tioram e tabe n tiku n arona ake rimoa ke n aki kukurei n ana babaire te Atua ao temwangina.6 E riki ngaia bwa te rao ni koaua nakon Nibwaai, te burabeti, ao kanoana a bon maeka ma te inaomata ao te maiuraoi n te aba ni berita. Bwaai ake e katutuki inanon kawain Tioram e bon kairia nakon kakabwaia aika mwaiti, e riki aei man ana kakaonimaki ao nanona ni waaki nako—ma te onimaki.7
Tabeua te tai n nako I kakauongo nakon ana taeka ni kaunganano temanna te aine ngke tibwaua arona ni kataia n tokanikai man kanganga.8 Iai tabeua kakaewenakoana, ao n te taabati teuana e tekateka n te Botaki n Aine, ni kakauongo nakon te tia reirei temanna are e taku n ana iango bwa e rang kororaoi—ao ni kaokoro ma ngaia. E roko irouna te kua ao te bwara n nano. E roko irouna te namakin bwa e aki tau—ke n aki riai ni mena ikekei—ngaia are e a teirake ao n nako, ao ni baireia bwa e na aki manga okira te ekaretia. Iaon kawaina nakon ana kaa, ao e roko irouna te namakin ae kangai: “Nakon te tabo n taromauri ao kakauongo nakon te tia taetae n te taromauri n toa.” E aki rang koaua n te wirikiriki ma e namakinna bwa e tabe ni korakora n roko irouna, ngaia are e a nako ni kakioa te botaki n toa.
Bon te rongorongo raoi ae e rangi ni kainanoia. E namakina tamnein te Atua. E ataia bwa e tangiria te Uea bwa e na mena Irarikina, n riki bwa te tia iriiria, n iriira te taromauri, ngaia are e karaoia.
Kam ataia bwa tera te bwai ae kakaitau iai? E aki bwara nanona. E waaki nako— ma te onimaki iroun Iesu Kristo, e ngae ngke e karawawataki, e bon rang mwaiti kakabwaia are e karekea ma ana utu ngkai e tabe ni waaki nako.
E na bon anganiira te tokanikai iaon te bwara n nano Atuan karawa ma aonnaba ao ngkana ti katurua ara taratara iaona e na bon buokira ni kaitarai kanganga ake ti kaitara ma ngaia, ira te wirikiriki are mairoun te Tamnei ae Raoiroi,9 ao ni waaki nako—ma te onimaki.
Ti karabwarabwa, bwa ngkana e roko iroura te mamaara ke te korakai, e kona te Uea ni kakorakora ara onimaki. Ti kona ni karikirakea ara konaa iaon are iroura ngkai. I a tia n noora koauan bwaai aikai. E raka iaon 20 te ririki n nako, I weteaki n akean au atatai bwa te Itingaun n te Aono, ao e roko te namakin irou bwa iaki tau. N iriirakin taian kataneiai ibukin tibwangau, I kantaningaki bwa nna tararua au moan maungatabu n te titeiki.10 Ngai ao te Bereretitenti n te titeiki ti karaurau ni iangoi bwaai ake tina karaoi. Imwain te maungatabu, Beretitenti Boyd K. Packer, n te tai anne—e weteaki bwa te bonomwi n Beretitenti n aia Kooram Abotoro n te Tengaun ma Uoman, e tareboon ngkana e kona n raonai. I kubanako ao, eng, I kariaia. I tuanga bwa tera arona ni waaki ngkai e riki ngaia bwa te tia tararua te waaki. E tua nakoiu bwa tina kakeai ara babaire ao n katauraoira n ira ana kairi te Tamnei. I karabwarabwa, bwa e bon reke naba 10 au bong ni kamatebwai, n tataro, ao n katauraoi.
Ma te akenta ae wene i matara, ti mena i moa 20 te miniti imwain ae waaki aia bowi taan kairiiri. I a kaaniai nako rarikin te beretitenti n te titeiki ao n wirikirikinna, “Bon tetamaroa te titeiki aei.”
E bubuanibaiai Beretitenti Packer ao n karaurau ao n taku, “Akea te kakarabakau.”
I katoka au kakarabakau, ao ana marooro n te maungatabu ni kabuta “Kaotan te Karinerine e Karekea te Kaotioti.”11 e roko n au iango. I kunea bwa Beretitenti Packer e bon korei mwiin kiibu man booki aika tabu. E roko ni kamatoa nakoiu tamnein te Atua bwa e karekei kairi ibukin te maungatabu. I waaki ni moana au kataneiai mai ikanne.
E moana te marooro Beretitenti Packer inanon 15 te miniti ao ni kabwarabwara iaon kakawakin te boowi ae kairaki ma te Tamnei ae Raoiroi.12 Ao e taku imwiina, “ Ti a manga ongora ngkai iroun Unimwaane Cook.”
Iaon kawaiu nakon te tabo n taetae, I tuanga bwa maanra ae tangiria bwa N na kabanea ao ngkana iai atuun te marooro ae tangiria bwa n na marooro iai. E taku, “Kabanea 15 te miniti ao reitinako ngkana ko namakina ana kairiri te tamnei.” I kabanea ae kaania 14 te miniti n tibwai ni kabane bwaai ake a mena n au iango.
E a manga teirake Beretitenti Packer ao n taetae riki 15 te miniti. E tibwa te kibu aei:
“Taekini iango ake N na kaaki I nanomi, ao kam na aki kamangaoaki I mataia aomata;
“Bwa e na kaotaki nakoimi… n te tai raoi anne, te bwai are kam na taekinna.”13
Ao e taetae imwina ni kangai, “Tia ongora ngkai mairoun Unimwaane Cook.”
I rangin n tounako. I aki bae n ataia ae N na tuangaki bwa N na taetae uoua te tai n teuana te bowi. Akea te bwai ae roko n au iango bwa N na taekinna. I kakorakoraai n tataro ao n mwiokia te Uea bwa e na buokai, e ngae n anne, ao I kakabwaiaki ma iango aika reke, n koroboki aika tabu, are I a kona n taetae riki inanon 15 te miniti. I tekateka ma te korakai ae bati.
E taetae riki imwina Beretitenti Packer inanon 15 te miniti iaon iriiran te tamnei ao n tibwaua ana reirei Bauro are ti riai n aki kabonganai “taeka aika ti karekei man te rabakau n aomata, ma bon tii are ti reiakinaki mairoun te Tamnei ae Raoiroi.”14 N aron ae kam kona n iangoia, I bon rotaki ngke e weteai te kateniua n tai ma te karinerine, “Tia ongora ngkai mairoun Unimwaane Cook.”
Akea mai irou. Ai bon akea. I ataia bwa ai bon te tai ni kamwakuraki riki te onimaki. I karaurau, n toua kawaiu nakon te tabo n taetae, ao ni bubuti ana ibuobuoki te Atua. Ma ngke I a waereke nakon te bwai n taetae, e bon kakabwaiaai ma te kakai te Uea ao n anganai riki te kona n taetae inanon 15 te miniti.15
E a bwara te maungatabu, ma I ataia bwa aia tetere ikawai e na waaki inanon teuana te aoa imwina. O akea ngaira! N ai aron Tioram, I tangiria ni kan birinako, ao n reke inanon bain Nibwaai, I ataia bwa Nna bon reke iroun Beretitenti Packer. E waaki imwina aia boowi ikawai ao bon ti te arona ma are ti a tia n waakinna. I a manga taetae teniua riki te tai. N te bong are imwiina n tain te tetere ni kabuta, I a taetae teuana au tai.
Imiin te maungatabu, e taetae Beretitenti Packer ma te tangira, “Tia karaoia riki n te tai teuana.” I kaota au tangira ao ni kakaitau nakon Beretitenti Boyd K.Packer ibukin bwaai ni kabane ake i a tia n reiakin mairouna.
Kam ataia bwa tera te bwai ae I rang karabwarabwa iai? Bwa e aki bwara nanou—ke n totoko. Ngke arona bwa I iraanako nanou ao man birinako n aki kan irii bowi akekei, e na bon aki kona n reke au tai ni kakorakora au onimaki ao ni karekea te tangira ae bati ma ana boutoka Tamara are i Karawa. I reiakinaki man Ana nanoanga, mwaakan Iesu Kristo ae kamiimi ao ana Mwakuri ni Kamaiu, ao te mwaaka ae nako mairoun te Tamnei ae Raoiroi. Rinanon te kanganga ma te mamaara,16 I reiakinna bwa I kona ni beku ibukina; I kona ni karaoi bwaai nako ngkana e mena irarikiu te Uea ngkana I waaki nako—ma te onimaki.
N aki taraia bwa mwaitira, abwakira, ao rawawatara kakaewenako ake ti kaitarai ni maiura. Iai taai ake ti na tangiria n tei, otinako, birinako, ke n kabwarai nanora. Ma kamwakuran ara onimaki iroun te Tia Kamaiu, Iesu Kristo, e na bon buokira ni karekea te tokanikai iaon te bwara n nano ao tabeua riki kanganga ake ti kaitara ma ngaia.
Kanga ai aron te Tia Kamaiu ngke e katiai tabena ake E anganaki, iai irouna te mwaaka ni kona n buokiira ni katiai ara mwakuri ake ti a tia n anganaki.17 Ti kona ni kakabwaiaki n reitinako inanon ara berita, n aki tabe ma aobuakan te kawai, ao ni karekea te maiu are akea tokina.18
N aron ae taku te burabeti Iotebwa Timiti, “Teimatoa, ngkami ana Aomata te Atua, teimatoa teutana riki te tai, ao angibuaka n te maiu aei ana bon bane n toki, ao e na bon karekea kanuangam te Atua are ngaia ae ko toro irouna.”19 N aran Iesu Kristo, amen.