Am Kakabwaia n Tamanuea—Kairaki Karekeana iroun Tamara are i Karawa
Au kakabwaia n tamanuea e buokai ni kaotaa nakoiu kinakiu mai karawa—bwa antai raoi ngai ni koaua ao antai ae I kona n riki n ai arona.
I kaikawaaki irouia kaaro aika a rangi n tikiraoi ake a tangira ao a kakaonimaki n reireiniira ngaira, aika natiia, n te euangkerio. Kananokawakina, a rotaaki n te kangaanga tekatekaia n aia mare au karo aika a bati n tangiraki. I bon Buraimwarii ngke I tuangaki bwa a na kona n raure n te taina ao ngai ma tariu ao mwaneu ti na rineia bwa antai ara karo ae ti na maeka ma ngaia. N tokina, inanon ririki I namakina te maaku ma te aki rau; e ngae n anne, te bwaintangira mairoun Tamau are i Karawa e buokai ni biti bwaai ni kabane—au kakabwaia n tamanuea.
Ngke 11 au ririki, e rikirake raraomau ibukin reitakia au karo, I bati ni kainnanoa karekean au kakabwaia n tamanuea. I ataia bwa Tamara are i Karawa e kinaai ni koaua ao e ataa raoi te kangaanga are i mena inanona. Ao I ataia naba bwa N na karekea te kairiiri mai Irouna. Ngke e koro 12 au ririki, I karekea au kakabwaia n tamanuea. E riki anne e raka iaon nimabwi te ririki n nako, ma I bon uringnga raoi aron te taneiai ae tabu anne.
Ma te kakaitau, iai kairara mai karawa ibukin ara kakabwaia n tamanuea n te Ekarektia n te Aeniboki ni Kabuta:
Ni kabane membwa aika tau, ao n tia ni bwabetitoaki a kona ni karekea ana kakabwaia te tamanuea, are e katauraoi kaetieti aika kairaki mairoun Tamara are i Karawa.”
E riai te membwa n “bon ikawai n oota ni kakawakin ao tabun te kakabwaia aio” ao n “oota n moan reirei n te euangkerio”
“E na riai te membwa ni bon tau n ataia bwa a mwaiti babaire aika bongana inanon te maiu are imwaina. … Taan kairiiri n te nakoanibonga a na aki tiana te ririki mai i nano ibukin te membwa ni karekean te kakabwaia mairoun te tamanuea. …
Kakabwaia n te tamanuea n tatabeua a bon tabu, e kainaki rongorongona, ao bon ana bwai temannal. …
Te aomata ane e karekea ana kakabwaia n tamanuea e riai ni kawakin taekana, n iangoia raoi, ao n maiu n ae tamaroa ni karekei berita ake a beritanaki n te maiu aei ao n are akea tokina.”1
E okioki ana reirei Beretitenti Russell M. Nelson ibukin kakawakin te kakabwaia n tamanuea,2 bwa e anga nakon are e karekea “kabwarabwaraan rikim rikaaki mairoun Aberaam, Itaaka, ao Iakoba” ”3 ao bwa ni kabane “kakabwaia bon kanga koroboki aika tabu ibukim.”4
E bon rangi ni bongana au kakabwaia n tamanuea nakoiu ngke I uarereke ni bukina aika a mwaiti. Teuana, rinanon mwaakan te Tamnei ae Raoiroi, au kakabwaia n tamanuea e buokai ni kaotaa nakoiu kinakiu mai karawa—bwa antai raoi ngai ni koaua ao antai ae I kona n riki n ai arona. E buokai n ataia, n aron ana reirei Beretitenti Nelson, bwa Ngai “bon te nati te mwane mairoun te Atua,” “bon “ngai [natina] n te berita,” ao “ana reirei Iesu Kristo.”5 I ataia bwa I kinaaki ao n tangiraki iroun Tamau are i Karawa ao au Tia Kamaiu ao bwa A bon mena i nanon maiu. E buokai aei ni karekea nanou bwa N na kaan Nakoia ao n karikirakea au onimaki ao Onimakinaia.
Te rao ae tangiraki ae kaaina te Ekaretia inanon ana tai ni kairake e tibwa aio: “Ngke e katoka baina te tamanuea iaon atuu ao n taekina arau, a bane ni bitaki bwaai, … tiaki ti n te tai anne ma ni kabanea maiu. I waekoa n namakina anne—rinanon te mwaaka are e taetae iai—I kinaaki raoi man tangiraki. Taeka ake e taekin a roota rabwatau. I ataia bwa Tamara are i Karawa e kinaai ni koaua.”
Ataakina bwa antai raoi ngai e buokai ni kaotaai ao ni kairai bwa N na karaoa are e tangiria mai irou te Atua.6
E kairai aio nakon kamatebwaian berita aika a tabu are I karaoi ao beritanakin kakabwaia n ana berita te Atua ma Aberaam.7 E anganai te nonoori mai karawa are e kairai bwa N na kawakina raoi riki au berita aika a tabu.
I kamatebwaia au kakabwaia n tamanuea n taai nako ao n au tai ni kairake ni katoabong, are e buokai n namakina te rau, ana kairiiri te Tamnei ae Raoiroi, are e buokai ni kakerikaaka rotakin au iango ngke I iriira Ana wirikiriki. E karikirakea nanou aio ni kaoa riki otana, koaua, ao te Tamnei ae Raoiroi man kamatebwaian au boki aika a tabu ao n tataro ni katoabong ao n nanomwaaka ni kamatebwai ao n iriira aia reirei ana burabeti ao abotoro te Atua. E buokai naba au kakabwaia n tamanuea bwa N na karaoa raoi nanon Tamau are i Karawa, ao karaoan anne e buokai n karekea te kimwareirei ae korakora, n aki ongea aron au kangaanga.8
I karekea korakoran tamneiu ni katoaa te tai are I rinanon au kakabwaia n tamanuea. Ngke a bon raure au karo, au kakabwaia n tamanuea, n aron ae reireia Beretitenti Thomas S. Monson, e riki nakoiu bwa “te kaubwai ae rangi ni kakawaaki ae akea boona,” ao “au Riaona.”9
Ma, tai kaburea otam iai. I aki kororaoi. I karaoi kairua n aekaia nako. Toaua ibukin te maiu ae akea tokina e kona ni kakoauaa ae I bon kakaraoi. Ma au kakabwaia n tamanuea e buokai ao n reitinako ni buokai ni kan karaoa ae tamaroa ao n tamaroa riki.“10 Kamatebwaian au kakabwaia n tamanuea n te tai ae mwaiti e karikirakea nanou ni kaitarai kariiri. E buokai n karekea te nano ao te ninikoria n raira nanou, ao te rairannano e riki bwa te waaki ae kakukurei.
E kakawaki irou karekean au kakabwaia n tamanuea ngke I uarereke ao n rikiraken au kakoaua. Ao I rangi ni kakaitau n taainako bwa au karo ao au bitiobi a ataia bwa nanou e a kaotia bwa I a bon tauraoi.
Ngke 12 au ririki, e bon karako kamangaongaon ma ana kairoro te aonaaba nakon ae riki n boong aikai. E kabwarabwara Beretitenti Nelson bwa boong aikai bon “taai aika a rangi ni kangaanga n rongorongon te aonaaba,” te aonaaba ae “e a irengan iai te bure” ao ni bon ti tabeakinna.”11 A tekeraoi riki ara kairake ngkai bwa a ataibwai riki nakou ngke 12 au ririki ao ngaia naba iai aia babaire aika a kakawaki ake a na karaoi ngkai a tabe n rikirake! A riai naba n ataia bwa antai raoi ngaiia ao bwa e tangiria te Atua ao E bon ataia raoi!
Tiaki ni kabane aika a tangira aia kakabwaia n tamanuea n arou ngkoa. Ma I tataro bwa membwa ake a tuai karekei aia kakabwaia n tamanuea a na tataroakina ukoran ataakina ngkana a tauraoi. I berita bwa ngkana ko katauraoi ma te tamnei, am taneia, n ai arou, e na tabu nakoim. Au tataro naba bwa te koraki ake a tia ni karekea aia kakabwaia n tamanuea a na kamatebwaia ao ni kawakinna raoi. Tangiran au kakabwaia n tamanuea ngke I uarereke e kakabwaiaai ma te ninikoria ngke I bwara n nano, te rau ngke I maroaa, te rau ngke I namakina rootakin au iango n te maaku, kaantaninga ngke I bwara n nano, ao te kimwareirei ngke I rangi ni kainanoia. E buokai au kakabwaia n tamanuea n karikirakea au onimaki ao ni katan iaon Tamau are i Karawa ao au tia Kamaiu. E karikirakea naba au tangira Ibukiia—ao anne ae bon riki naba ngkai.12
I kakoauaa bwa kakabwaia n tamanuea a katauraoa te kairiiri ae mairoun Tamara are i Karawa. I anga au kaotioti n koauan maiun Tamara are i Karawa ao Natina—ara tia Kamaiu ae Iesu Kristo—are e kinaira, ao n tangiriira, ao n tangiriira ni kakabwaiaira. I ataia raoi naba ma te koaua bwa Beretitenti Russell M. Nelson bon ana burabeti te Atua iaon te aba ni boong aikai. N aran Iesu Kristo, amen.