Te Mwakuri n te Tembora ao Rongorongon te Utu—Teuana ao te Mwakuri ae Titearona
Te kantaninga are e boboto iaon ana baire Tamara are i Karawa bon katiteuanakiia utu n te maiu aei ao n akea tokina.
I rangi ni kakaitau ibukin katean tembora ae reitinako n “karokoan te mwioko n tararua ni kororaoin bongina” (Reirei ao Berita aika Tabu 128:18). Man boong ake rimoa ni Kaokakin bwai, aomata Aika Itiaki aika kakaonimaki a tia ni karaoi anga karea aika mwaiti ibukin karekean otenanti n te tembora ao berita aika tabu. N irakin aia banna ni katooto ae korakora, n 1975 imwiin angamwane aika a mwaiti ni mwananga mai Mexico City, ngai ma kainabau ae tangiraki, Evelia, n raonaki irouia ara karo aika tangiraki, ti kabaeaki bwa buumwane ao buuaine ae akea tokina n te Mesa Arizona Tembora. Te bong anne, ngkai ti katiteuanaaki man ana kariaia te nakoanibonga n ana auti te Uea, ti a noora raoi karawa.
Te Mwakuri ao te Kaantaninga ibukin taian Tembora
Te namakin anne e anganai te kakaitau ae nakoraoi riki n aron, imwiin teniua te ririki n te mwakuri korakora, Aika Itiaki i Kirtland, Ohio, n tokina a kabobongaa aia tembora ae tamaroa n te tiburing n 1836—te moan ni karokoan te mwioko aei. Ni Maati n te ririki naba anne, e raka iaon nga ma nga aomata aika a ikotaki n te tembora ao n te tabo n rini ibukin te taromauri ni katabu. Te Burabeti Iotebwa Timiti e teirake n anga te tataro ni katabu, are e a tia ni karekea n te kaotioti (taraa Reirei ao Berita aika Tabu 109). Inanona e kabwarabwarai kakabwaia aika rianako nakoia ake a tau n rin n ana tembora et Uea. Imwiina te kuaea e anenea te kuna “Tamnein te Atua” ao kain te taromauri a tei n anga Takaruaean Otanna “ma te [korakora are e] kuri ni … ubaranako taubukin te auti” (Teachings of Presidents of the Church: Joseph Smith [2007], 307).
Te wiiki are imwiina te Burabeti e kabwarabwara kaotin te Uea n te tembora, are taku:
“Bwa nooria, I a tia ni kariaia te auti aei, ao arau e na mena ikai; ao N na kaotai nakoia au aomata n te nanoanga n te auti aei. …
“Ao taekan te auti aei e na butanako nakon aaba aika ianena; ao aio te moan kakabwaia are e na bwaro nako aon atuuia au aomata” (Reirei ao Berita aika Tabu 110:7, 10).
Imwiin aei ao mii ake tabeua, Eria te burabeti, are e uotaki nako karawa n aki boo ma te mate, e kaoti i matan te Burabeti Iotebwa Timiti ao Oliver Cowdery ao e taku:
“Nooria, e a roko raoi te tai, are e taekinaki man wiin Maraki—ni kakoaua bwa ngaia [Eria] [te burabeti] e na kanakoaki, imwain rokon ana bong are e kakannato ma ni kakamaku te Uea—
“N rairi nanoia taama nakoia natiia, ao naati nakoia taama, bwa e kaawa n oreaki te aonaba ni kabuta n te maraia—
“Mangaia are, kiingin te mwioko n tararua aei e katukaki i nanon baimi; ao man aei kam kona n ataia bwa e a kaan ana bong are e kakannato ma ni kakamaku te Uea, eng i rarikin taian mataroa” (Reirei ao Berita aika Tabu 110:14–16).
Te Tembora ao Rongorongon te Utu
Imwiin kaokakin te kiing ni kabaebae iroun te Uea nakon Iotebwa Timiti, te mwakuri ni kamaiuia aomata ake a maiu ao ake a mate inanon koron ara bong (taraa 1 I-Korinto 15:22, 29; Reirei ao Berita aika Tabu 128:8–18).
Beretitenti Boyd K. Packer e reirei bwa “te waaki ae rang kakaawaki aei e aki mutiakinaki n te aonaaba, ma e na riki bwa te kaunganano nakoia aomata nako ake a maiu ke ake ana maeka n te aonaaba. Bwaai a moanna ni karaurau n riki. Te Ekaretia e a boboto iaon katean tembora.
“Bwaai a tabe ni kaoti ni mwakoron nako te aonaaba aika kakaokoro, n te aro are aki kantaningaki, aomata ao bootaki ao baronga a waaki ni kakai aia riki. Aio ae e a tia ni bane n riki imwiin kaotin Eria n te Tembora i Kirtland” (The Holy Temple [1980], 141).
“Man te bong anne, Eberi 3, 1836, a rairaki nanoia naati nakoia taama. Imwiin anne otenanti aikoa kakatai, ma a teimaan. Te mwaaka ni kabaebae e a tiku iroura. Akea te kariaiakaki ae rianako ae kakaawaki riki. Te mwaaka e anga te kakoaua ao te kamatoa ae akea tokina nakon otenanti ni kabane ake a karaoaki man te kariakaki ibukiia aika a maiu ao ake a tia ni mate” (Preparing to Enter the Holy Temple [2002], 28).
Tariu ao mwaneu aika tangiraki, katean ao kabonganaan raoi taian tembora n rooro nako bon te kanikina n ana Ekaretia ni koaua Iesu Kristo. Imwiin katabuan te Tembora i Salt Lake n 1893, Beretitenti Wilford Woodruff e kaungaia membwa n te Ekaretia bwa a na karekei rongorongoia aia bakatibu ao a na kawakin rongorongon rikiia n oki rikaaki n aron are a kona n uoti aara nako nanon te tembora ao ni karaoi otenanti ni kamaiu ao ni karietataaki (taraa Teachings of Presidents of the Church: Wilford Woodruff [2004], 174).
Rongorongon te Utu ao te Mwakuri n te Tembora—Teuana te Mwakuri
Teuana te ririki imwiina (1894), Beretitenti Woodruff e a noora katean te Bootaki ni Kateiriki i Utah. Tebubua te ririki imwiina, inanon 1994 Unimwaane Russell M. Nelson, are te membwa n te tai anne n te Kooram n te Tengaun ma Uoman e taku, “Waaki ake a karaoaki n te ririki ae ururingaki ni kakaean rongorongon te utu ao mwakuri n te tembora bwa te mwakuri ae ti teuana inanon te Ekaretia” (“The Spirit of Elijah,” Ensign, Nobembwa 1994, 85).
Mwakuri n Rongorongon te Utu
Tariu ao mwaneu aika kam tangiraki, te Uea e kaungaira ngaira aika membwa n Ana Ekaretia bwa tina kawakin rongorongoia ara utu, n ataia ara bakatibu, ao ni karaoi babaire aika riai ibukiia ibukin karekean otenanti n te euangkerio inanon tembora bwa tina buokiia n reitinako ni kawain berita aika tabu, are e na kakabwaiaia ma te utu ae akea tokina. Anne te kantaninga are e boboto iaon ana baire Tamara are i Karawa: katiteuanakiia utu n te maiu aei ao n akea tokina.
Nakoia naake a namakinna bwa aki tau ni karaoa te mwakuri aei, kam riai n ataia bwa tiaki tii ngkami. Ti kona ni bane ni kabongana te bwai ni mwakuri are e a tia ni katauraoia te Ekaretia are e reke n tienta n te FamilySearch, are ti ataia bwa taian tienta n rongorongon te utu. FamilySearch tienta aikai a tia ni kaman baireaki bwa e aonga ae aomata nako, ma te ibuobuoki ae ti teutana, a na kona ni karekei rongorongoia aia utu ao ni bairei raoi bwa aong n uoti nakon ana auti te Uea. Taiaoka reitaki ma kontiaotantii n rongorongon te utu n ami uoote ao mwaanga, bwa e na kairiko iaon mwaneka nako ni karaoana.
Ngkai ti iri aia kairi burabeti ao n atai aron karaoan ara kateiriki ao ni karaoi otenanti n te tembora ibukiia ara bakatibu, ti na karekea te kimwareirei ae bati n te aro are ti tangiria bwa tina aki toki ni kakaraoia. Te Tamnei e na kaoni nanora, ni kamwakuri ami konabwai ni karaoia, ao ni kairiira ngkai ti kakaai araia ara bakatibu. Ma tina uringnga bwa rongorongon te utu e mwaiti riki nakon ti noorakin aara, boong, ao taabo. Bon katiteuanakiia utu ao namakinan te kimwareirei are roko man anganakiia otenanti n te euangkerio.
I tangira ana reirei ara burabeti ae tangiraki, Beretitenti Russell M. Nelson, are e a tia n taekinna: “Te tembora e boboto iaon kakorakoraakin ara onimaki ao karakaan tamneira ibukina bwa te Tia Kamaiu ao Ana reirei bon ngaiia boton raoi te tembora. Bwaai ni kabane ake a reiakinaki n te tembora, rinanon kaetieti ao rinanon te Tamnei, e karikirakea ara atatai ibukin Iesu Kristo. Ana otenanti aika a rang kakawaki a kabaeira Nakoina rinanon berita aika tabu n te nakoanibonga. Ngkanne, ngkai ti kawakin ara berita aika tabu, E anganiira te mwaaka n Ana kamaiu, mwaakana ni kakorakora” (“The Temple and Your Spiritual Foundation,” Liahona, Nobembwa 2021, 93–94).
Ni koaua, te mwakuri n te tembora ao rongorongon te utu a katiteuanaaki n te mwakuri ae ti teuana n te Ekaretia.
I kakoaua nakon koaua aikai. I ataia bwa aio ana Ekaretia te Uea Iesu Kristo, ara Tia Kamaiu ao te Tia Kabooira, are ti uringnga ao ni karinea n ae nano n tain te Itita aei. I ataia bwa E tangiriira, ao ngkana ti kawakin ara berita ao ni katuka ara onimaki Irouna, E katabuira ni mwaakana ni kamarurung ao ni kakorakora. N aran Iesu Kristo, amen.