Kabanea Nanom iaon Iesu Kristo
Te Uea ae Iesu Kristo bon buokara n ara kangaanga, ma ti riai n euti matara ao ni kabotoi ara iango Irouna.
E aki toki n tuangai tamau, “Tai rang kabanea am iango iaon am kangaanga tokina ko na aki atai katokaia.”
I kakoaua bwa te Uea Iesu Kristo bon ti ngaia ae kona ni katoki ara kangaanga. Ni bon arona, E a tia ni buoki aua kangaanga aika ti a tia ni bane ni kaitara mangaai ao akea mai ibuakora ae e katokia bon irouna.
-
Te moan kangaanga bon te mate n rabwata. Ti kona ni kamaanna riki ke n aki tabeakinna, ma ti aki konaa n tokanikai mai iai n tii ngaira. E ngae n anne, Iesu Kristo, e tokanikai iaon te mate ibukira, ao ibukin aei, ae ngaia ae ti na manga bane n uti n te bong teuana.1
-
Te kauoua ni kangaanga e irekereke ma karawawata ni maiura, kangaanga ake ko rinanoi, te nanokawaki, te maraki ao te motibuaka ake a roko man te aonaaba aei. E tokanikai iaon bwaai aikai ni kabane Iesu Kristo. Ibukiia ake a Iriiria inanon te korakai, e na roko te bong teuana are E na “kaoi rannimatami ni kabane” ao ni manga kaeti aron kairua ni kabane.2 Ma inanon te tai aei, E kona ni kakorakoraira bwa ti na tokanikai iaon kataakira ma te onimaki, te unga n nano ao te rau.3
-
Te kateniua n kangaanga bon tokanikain maten te tamnei man te bure. E tokanikai Iesu Kristo man te kangaanga aei ngke e katokaa Iaona “te booaki are e reke iai ara raoi.”4 Ibukin Ana angakarea ni kamaiu, ao a kona ni kabwaraaki ara bure ngkana ti onimakina te Tia Kamaiu, n rairi nanora ni koaua, ao ni kariaia ana berita te Tama are e a tia n anganiira rinanon ana otenanti aika te bwabetito, ao te teimatoa n uaa te tokio.5
-
Ara kaaua ni kangaanga bon ara konabwai ae tau, ao arora aika aki kororaoi. Bon iai naba katokan te kangaanga aei iroun Iesu Kristo. E aki ti kamaunai ara bure ao ni manga karikiira bwa aomata aika akea aia bure. E kona ni karika te “bitaki ae moan te korakora … inanora, n te aro are akea iai te nano ni kan karaoa ae buakaka, ma te nano ni kan teimatoa ni karaoa ae raoiroi.”6 Ti kona ni kakororaoaki man ana akoi Kristo ao n te bong teuana ti na kona n riki n ai Arona.7
Te kananokawaki, bwa n angiin te tai ao ti tabe riki ma oin ara kangaanga are ti a kabua iai aron katokana, iroun ara Tia Kamaiu, Iesu Kristo. Ti na kanga n totokoa te aeka ni kairua anne? I kakouaa ae reken aikai a bane n reke inanon berita ake ti kaungaaki iai bwa ti na karaoi ma Ngaia ao Tamara are i Karawa.
Kabanean ara iango iaon Iesu Kristo rinanon ara Berita
A buokiira ara berita bwa ti na kabanei ara tai, ara iango, ma ara mwakuri iaon Kristo. Ngkai “ti teimatoa n kawakin ara berita [ake ti a tia] ni karaoi,” ao e na bebete riki arora ni kinai “bwain te aonaaba aei” ake ti riai ni “katikui” ao n ukoukorii riki “bwain te [aonaaba]” ae e raoiroi riki.8
Anne te bwai ae a karaoia ana botannaomata Aamon ake n ana Boki Moomon. Ngke a reiakina rongorongon Iesu Kristo ao ni kabanei aia iango ni maiukina Arona, ao a tibwa ataia ae a riai n taunii aia bwai ni buaka ao n riki bwa taan kakaraoa te koaua ao “ni kinaaki man nanomatoaia nakon te Atua.”9
Kawakinan berita e na kairiira nakon ukoran bwaai ake a na karekea te Tamnei ao n totokoi bwaai ake a na kona ni kanakoi—“ibukina bwa ti ataia bwa ngkana ti tau ni karekea te Tamnei ae Raoiroi, ti kona naba n tau ni maeka ma Tamara are i Karawa ao Natina, Iesu Kristo.”10 E nanonaki ikai bwa ti riai ni bitii tein taeka ake ti kakabonganai, ao ni kabonganai riki taeka n akoi. E kona n nanonaki iai bwa tinang katikui anuara aika bubuaka ao n onei mwiia n anua aika boou ake ana kakorakoraa iai ara reitaki ma te Uea, n aron te tataro ni katoa bong ao kamatebwaian booki aika tabu, ibon iroura ao ma ara utu.
E taekinna Beretitenti M. Nelson bwa “te aomata are e karaoa ana berita aika tabu inanon raan ni bwabetito ao inanon te tembora—ao ni kateimatoai ni kawakin—e a tia ni kakorakora ni karekea mwaakan Iesu Kristo. …
“Te kaniwanga ibukin kawakinan ara berita ma te Atua bon te mwaaka mai karawa—te mwaaka are e na kakorakoraira ni kaitarai ara kangaanga nako, kariiri, ao ni kabebetei rawawatan nanora.”11
Kabouan ara berita n tain te toa ni katoa Tabati bon te teuana te anga ae ti na kona iai ni manga tarai arora12 ao ni manga kabanea ara iango iaon maiun Iesu Kristo. Man kanakin te toa, ao ti kaotia bwa ti na “aki toki n ururingnga n taainako.”13 Te taeka ae n taainako e bon rang ni kakawaki. E kamwaita ana bitaki te Tia Kamaiu inanon maiura. Ti aki tii Urururinga n tain te taromauri ke n ara tataro ni katoa moan ingabong ke inanon taai ake ti reke iai n te kangaanga ke tao n taai ake ti kainnanoa iai te bwai teuana.
Eng, n tabetai ao e a manga katikaki nako ara iango. Ti a mwaninga. E a bua aron ara iango. Ma kabouan ara berita bon kaotan ae ti tangiria n ururinga ara Tia Kamaiu, ni keiaki ni karaoa aei inanon te wiiki aei, bwa ti aonga ni manga moan kamatoai ao ni kabanei ara iango Ibukina n tain te toa n te wiiki ae e na roko.
Kateimaotaan Ara Iango Iaon Iesu Kristo Inanon Mweengara
E riai n ota, bwa kabotoan ara iango iaon Iesu Kristo bon tiaki tii ni katoa Tabati, ma n tain botakin nako te aro. Ngke e moan katerea Beretitenti Nelson taekan Nakomai, Iriirai n 2018, e taku, “Ai aio ngkai te tai ae ti nang karaoi mwengara bwa n nen te Ekaretia.”14 E taku bwa ti a riai ni “bitii tein [mweengara] bwa nne ni karikirakei ara onimaki” ao “n nera n reiakina te euangkerio.” Ao e karaoi aua aberita nakoira ngkana ti teimatoa ni karaoa aei.15
Te moan berita: “Ana rangi ni kakukurei am bong n Tabati nako.” E na riki bwa te bong are ti na kaan riki iai ma ara Tia Kamaiu. N aron are e taekinna te ataeinnaine mai Peru, “Ana bong te Uea bon te bong are I karekei iai angiin kaeka mai iroun te Uea.”
Te kauoua ni berita: “Am ataei a na rang ni unga nanoia ni kan reiakin ao ni maiuakin ana reirei te Tia Kamaiu.” Ao ibukin aio, “ti kakarabakauakina Kristo, ao ti kimwareirei iroun Kristo, ti tataekina Kristo, … bwa aonga natira n ataia bwa antai ae a na kawaria ibukin kamaunaan aia bure.”16
Ti karaoa aei bwa n te bong teuana, ngkana a nako natira mwaane n nako ni mwakuri ke n tamwarake iaon maunga ke n tiri man i buakonikai, n aron are e karaoia Enoti, e na kona ni uringa te bwai are ti reireinna ibukin Kristo ao kakukurein maiuakinan te euangkerio. Ao antai ae ataia? Tao aio te bong are e na namakina iai kainnanon tamneina are e na manga rairia nakon Iesu Kristo bwa e aonga n ongo bwanaan te Uea nakoina ae kaangai, “A kabwaraaki am bure, ao ko na kakabwaiaaki.”17
Te kateniua ni berita: “Ana kairoro te tia kakaitara ni maium ao ni mweengam a na kerikaaki.” Bukin tera? Bukina bwa ngkana ti kakorakorai riki ara iango iaon Iesu Kristo, ao e na kerikaaki korakoran kan karaoan te bure.18 Ngkai a kaonaki mwengara n otan Kristo, ao e tabe ni kekerikaaki te roo are mai iroun teuare buakaka.
Te kaua ni berita: “Ko na aki kantaningaia bwa a na teimatoa tenaan bitaki ake a na kaoti inanon am utu.” Bukin tera? Bukina bwa te bitaki are e uotia Iesu Kristo bon “te bitaki ae korakora.”19 E bitii aron teira; ao ti riki bwa “aomata aika boou.”20 Ti rikirake ni katotoonga te Tia Kamaiu, ni kaonaki n Ana tangira ae itiaki ibukiia natin te Atua ni kabane.
Antai ae e na bon aki tangiria bwa a na kakoroaki nanon berita aikai inanon maiuia ao n aia utu? Tera ae ti na karaoia bwa ti aonga ni karekei? Reken aei bon bitakin mweengara bwa te tabo are ti na kona ni karikirakea iai ara onimaki ao n nera n reiakina te euangkerio. Ao ti na kanga ni karaoa anne? Man kabotoan ara iango iaon Tamara are i Karawa ao Iesu Kristo, ni Karaoia bwa boton maiura inanon ara utu, are te kabanea ni kakawaki inanon mweengara.
Tao ko kona ni moanna man maiuakinan ana taeka Kristo, ake a kuneaki inanon booki aika tabu, n riki bwa mwakoron maium ni katoabong? Bon akea angan te kamatebwai iaon booki aika tabu ae tao e na kabwarabwaraaki nakoim. E kona ni kabanea 5 ke 10 te miniti ni katoabong—ke e nako riki ngkana ko konaa. E kona n ae te mwakoro ke irakibu riki kiibu n te bongina. Tabeua utu a tangiria bwa a na kamatebwai n te moaningabong imwain ae a nakon aia reirei ke aia mwakuri. Tabeua utu a tangiria ni wareware n te tairiki imwain ae a matu. A tia n kaongoai tabeman taanga n ataei bwa a kakamatebwai n okoro inanon kawaiia n nako ni mwakuri ao ni kaai n tibwauai otaia rinanon bwaai n reitaki n te tareboon, bwa e aonga n ae a tauaki mwiin aia kabwarabwara ma aia marooro.
Nakomai, Iriirai e katauraoi aanga aika mwaiti ni karaoi waaki ni kakukurei ao bwaai n ibuobuoki ake a na kona ni buokiira n tatabemaniira ma ara utu n reiakin moan n tua n te euangkerio man booki aika tabu. A kona naba ni bongana birim ake a karakina te Baibara ma Ana Boki Moomon bwa bwaai n reirei ibukin booki aika tabu aika a kona ni kaotaki nakoia am utu. A kaungaaki naba te roronrikirake ao ataei ni karaki man booki aika tabu aika a na kona n ururing. Karaki aikai, ao moan tua n te euangkerio ake a anga reirei iaona a na ururingaki n tainako irouia ami ataei, kanga raoraoia aika onimakinaki, ngkana a kainnanoi katooto aika a raoiroi n te mwakuri n ibuobuoki, te tamaroa, te karinerine, te nanorinano, te nano mwaaka, te kaotioti, te tangira ae kororaoi, te taotaonaki n nano, ao te onimaki iroun Iesu Kristo. Inanon taina, ao teimatoami ni kanuai ngkami n ana taeka te Atua e na buokiia ami ataei n rikirake ni kaaniia riki ma te Tia Kamaiu. A na Kinaa riki n aron are mai imwaina.
E maiu te Uea Iesu Kristo n te bong aei. E kona n rang ni mwaiti, rorokona ni katoabong ni maiura. Ngaia bon buokara n ara kangaanga, ma ti riai n euti matara ao ni kabotoi ara iango Irouna. E taku, “Tanimai nakoiu n ami iango n taai nako; tai nanououa, ao tai maaku.”21 Ngkana ti kabotoi ara iango Irouna ao Tamara are i Karawa, ti karaoi ao ni kawakin berita ma Ngaia, ao ni Karaoiia bwa taan reirei aika kakawaki ni mweengara ao n ara utu, ti na riki bwa aekan aomata ake e miia Beretitenti Nelson: “Aomata ake a kona, a tauraoi, ao n tau ni butimwaea te Uea ngkana E a manga roko, aomata ake a tia n rinea Iesu Kristo nakon te aonaaba are e a tia n roko iai te bure, aomata ake a kakatonga n aia rinerine ni maeka ma tuua ake a rietata, ake mairoun Iesu.”22 N aran Iesu Kristo, amen.