“என் சந்தோஷத்தைப்போல மிக அற்புதமான, இனிமையான வேறெதுவும் இருக்கமுடியாது.”

மூப்பர் கிரேக் சி. கிறிஸ்டென்சன்

எழுபதின்மர்

தினமும் மனந்திரும்பி இயேசு கிறிஸ்துவிடம் வருவதே நம் கற்பனைக்கு அப்பாற்பட்ட மகிழ்ச்சியை அனுபவிக்கும் வழி.

இரட்சகர் தம்முடைய பூலோக ஊழியம் முழுவதும், தேவனுடைய பிள்ளைகள் அனைவரிடத்திலும், குறிப்பாக துன்பத்தில் இருந்தவர்கள் அல்லது வீழ்ந்தவர்களிடம் மிகுந்த இரக்கத்தைக் காட்டினார்., . பாவிகளுடன் பழகுவதையும் அவர்களுடன் சாப்பிடுவதையும் பரிசேயர்கள் விமர்சித்தபோது, இயேசு மூன்று பழக்கமான உவமைகளைக் கற்பிப்பதன் மூலம் பதிலளித்தார்.¹ இந்த உவமைகள் ஒவ்வொன்றிலும், வழிதவறிப் போனவர்களைத் தேடுவதன் முக்கியத்துவத்தையும், அவர்கள் திரும்பி வரும்போது ஏற்படும் மகிழ்ச்சியையும் அவர் வலியுறுத்தினார். உதாரணமாக, காணாமற்போன ஆடுகளின் உவமையில், “மனந்திரும்புகிற ஒரே பாவியினிமித்தம் பரலோகத்தில் மிகுந்த சந்தோஷம் உண்டாயிருக்கும்” என்று அவர் கூறினார்.²

இன்று, மகிழ்ச்சிக்கும் மனந்திரும்புதலுக்கும் உள்ள தொடர்பைப்பற்றி, குறிப்பாக, நாம் மனந்திரும்பும்போது ஏற்படும் மகிழ்ச்சி மற்றும் மனந்திரும்புதல் செயல்முறையின் மூலம் மற்றவர்களுக்கு உதவும்போது நாம் பெறும் மகிழ்ச்சியின் உணர்வுகளைப்பற்றி பேச விரும்புகிறேன்.

நாம் சந்தோஷமாக இருக்கவே நாம் இருக்கிறோம்

வேதங்களில், மகிழ்ச்சி என்ற வார்த்தையானது மனநிறைவின் தருணங்களை அல்லது மகிழ்ச்சியின் உணர்வுகளைக் காட்டிலும் அதிகமானவற்றைக் குறிக்கிறது. இந்தச் சூழலில் மகிழ்ச்சி என்பது ஒரு தெய்வீகப் பண்பு, நாம் தேவனின் சமூகத்தில் வாழத் திரும்பும்போது அதன் முழுமையில் காணப்படுகிறது.³ இந்த உலகம் வழங்கக்கூடிய எந்த இன்பத்தையும் ஆறுதலையும் விட இது மிகவும் ஆழமானது, உயர்த்துவது, நீடித்தது மற்றும் வாழ்க்கையை மாற்றக்கூடியது.

நாம் மகிழ்ச்சியடையவே படைக்கப்பட்டோம். அன்பான பரலோக பிதாவின் பிள்ளைகளாக இது நமது நோக்கமாகும். அவர் தனது மகிழ்ச்சியை நம்முடன் பகிர்ந்து கொள்ள விரும்புகிறார். நம் ஒவ்வொருவருக்கும் தேவனின் திட்டம் நாம் “சந்தோஷமாயிருக்கவே” என்று தீர்க்கதரிசி லேகி போதித்தான்.⁴ நாம் வீழ்ச்சியுற்ற உலகில் வாழ்வதால், நிலையான மகிழ்ச்சி அல்லது நீடித்த மகிழ்ச்சி பெரும்பாலும் நம் எல்லைக்கு அப்பாற்பட்டதாக தோன்றுகிறது. இன்னும் அடுத்த வசனத்தில், “மேசியா [வந்தார்] … [எங்களை] வீழ்ச்சியிலிருந்து மீட்பார்” என்று விளக்கி லேகி தொடர்கிறான்.⁵ இரட்சகராகிய இயேசு கிறிஸ்துவின் மூலமாக மீட்பு, மகிழ்ச்சியை சாத்தியமாக்குகிறது.

சுவிசேஷத்தின் செய்தி என்பது நம்பிக்கையின் செய்தி, “மிகுந்த சந்தோஷத்தை உண்டாக்கும் நற்செய்தி”⁶ மேலும் இந்த வாழ்க்கையில் அனைவரும் அமைதி மற்றும் மகிழ்ச்சியின் சந்தர்ப்பங்களை அனுபவிக்கவும், வரவிருக்கும் வாழ்க்கையில் மகிழ்ச்சியின் முழுமையை பெறவும் வழிவகை செய்கிறது.⁷

நாம் பேசும் மகிழ்ச்சி விசுவாசிகளுக்கு ஒரு பரிசு, ஆனால் அது ஒரு விலையுடன் வருகிறது. மகிழ்ச்சி மலிவானது அல்லது சாதாரணமாக கொடுக்கப்படவில்லை. மாறாக “[இயேசு] கிறிஸ்துவின் விலையேறப்பெற்ற இரத்தத்தினாலே” அது வாங்கப்பட்டது⁸ தெய்வீக மகிழ்ச்சியின் மதிப்பை நாம் உண்மையில் புரிந்து கொண்டால், உலக உடைமைகளை தியாகம் செய்ய அல்லது அதைப் பெறுவதற்கு தேவையான வாழ்க்கையில் மாற்றங்களைச் செய்ய தயங்க மாட்டோம்.

மார்மன் புஸ்தகத்தில் ஒரு வல்லமை வாய்ந்த ஆனால் தாழ்மையுள்ள ராஜா இதைப் புரிந்துகொண்டான். அவன் கேட்டான், “இந்த நித்திய ஜீவனை நான் பெறும்படிக்கு நான் செய்யவேண்டியதென்ன? சந்தோஷத்தால் நிறைக்கப்படும்பொருட்டும், நான் தேவனால் ஜெனிப்பிக்கப்பட்டு, இந்த பொல்லாத ஆவி என் மார்பிலிருந்து வேரோடே பிடுங்கப்பட்டு, அவருடைய ஆவியைப் பெற நான் செய்யவேண்டியதென்ன? அவன் சொன்னான், இதோ, இந்த மிகுந்த சந்தோஷத்தைப் பெற்றுக்கொள்ள நான் வைத்திருக்கிற யாவையும் விட்டு விடுகிறேன். ஆம், என் ராஜ்யத்தையும் துறப்பேன்”⁹

ராஜாவின் கேள்விக்கு பதிலளித்த ஊழியக்காரன் ஆரோன், “நீர் இக்காரியத்தை வாஞ்சிக்கிறதுண்டானால், … நீர் தேவனுக்கு முன்பாக பணிந்துகொண்டால் … உம் பாவங்கள் அனைத்திலுமிலிருந்து மனந்திரும்ப வேண்டும்.”¹⁰ மனந்திரும்புதலே மகிழ்ச்சிக்கான பாதை,¹¹ ஏனெனில் அது இரட்சகராகிய இயேசு கிறிஸ்துவை நோக்கி செல்லும் பாதையாகும்.¹²

உண்மையான மனந்திரும்புதலின் மூலம் மகிழ்ச்சி வருகிறது

மனந்திரும்புதலை மகிழ்ச்சிக்கான பாதையாக நினைப்பது சிலருக்கு முரண்பாடாகத் தோன்றலாம். மனந்திரும்புதல், சில சமயங்களில் வேதனையாகவும் கடினமாகவும் இருக்கலாம். நம்முடைய சில எண்ணங்களும் செயல்களும், நம்முடைய சில நம்பிக்கைகளும்கூட, தவறானவை என்பதை ஒப்புக்கொள்ள வேண்டியதாயிருக்கும். மனந்திரும்புதலுக்கும் மாற்றம் தேவைப்படுகிறது, இது சில சமயங்களில் அசௌகரியமாக இருக்கலாம். ஆனால் மகிழ்ச்சியும் ஆறுதலும் ஒன்றல்ல. பாவம், சுயதிருப்தியின் பாவம் உட்பட நம் மகிழ்ச்சியைக் கட்டுப்படுத்துகிறது.

சங்கீதக்காரன் சொன்னதுபோல “சாயங்காலத்தில் அழுகை தங்கும், விடியற்காலத்திலே களிப்புண்டாகும்.”¹³ நம்முடைய பாவங்களுக்காக நாம் மனந்திரும்பும்போது, அதைத் தொடர்ந்து வரும் பெரும் மகிழ்ச்சியில் நாம் கவனம் செலுத்த வேண்டும். இரவுகள் நீண்டதாகத் தோன்றலாம், ஆனால் காலை வருகிறது, இரட்சகரின் பாவநிவர்த்தி நம்மை பாவத்திலிருந்தும் துன்பத்திலிருந்தும் விடுவிக்கும்போது நாம் உணரும் அமைதியும் பிரகாசமும் நிறைந்த மகிழ்ச்சி எவ்வளவு உன்னதமானது.

“இவ்வளவு நேர்த்தியான மற்றும் இனிமையான எதுவும் இருக்க முடியாது”

மார்மன் புஸ்தகத்தில் ஆல்மாவின் அனுபவத்தைக் கவனியுங்கள். அவர் “நித்திய வேதனையால் அலைக்களிக்கப்பட்டு” மேலும் அவருடைய பாவங்களின் காரணமாக அவருடைய ஆத்துமா “மனஸ்தாபப்பட்டது”. ஆனால் இரட்சகரிடம் இரக்கத்திற்காக திரும்பியவுடன், அவர் “[அவனது] வேதனைகளை அதற்கு மேல் நினைவுகூரவே இல்லை”.¹⁴

“என்ன சந்தோஷம், என்ன மகத்துவமான ஒளியை நான் கண்டுகொண்டேன்,” அவன் அறிவித்தான், “என் சந்தோஷத்தைப்போல மிக அற்புதமான, இனிமையான வேறெதுவும் இருக்கமுடியாது.”¹⁵

மனந்திரும்புதலின் மூலம் இயேசு கிறிஸ்துவிடம் வருபவர்களுக்கு இது போன்ற மகிழ்ச்சி கிடைக்கும்.¹⁶ தலைவர் ரசல் எம். நெல்சன் போதித்தார்:

“மனந்திரும்புதல் இயேசு கிறிஸ்துவின் பாவநிவிர்த்தியின் வல்லமையை நாம் பெறுவதற்குத் திறக்கிறது. …

“மனந்திரும்ப நாம் தேர்ந்தெடுக்கும்போது மாறுவதற்கு நாம் தேர்ந்தெடுக்கிறோம்! நம்மை நம்முடைய சிறந்த பதிப்பாக மாற்ற இரட்சகரை அனுமதிக்கிறோம். ஆவிக்குரிய விதமாக வளரவும், அவரில் மீட்பின் சந்தோஷமான சந்தோஷத்தைப் பெறவும் நாம் தேர்ந்தெடுக்கிறோம். நாம் மனந்திரும்ப தேர்ந்தெடுக்கும்போது, அதிகமாக இயேசு கிறிஸ்துவைப் போலாக மாற நாம் தேர்ந்தெடுக்கிறோம்!”¹⁷

மனந்திரும்புதல் மகிழ்ச்சியைத் தருகிறது, ஏனெனில் அது பரிசுத்த ஆவியின் செல்வாக்கைப் பெறுவதற்கு நம் இருதயங்களைத் தயார்படுத்துகிறது. பரிசுத்த ஆவியால் நிரப்பப்படுவதென்றால், மகிழ்ச்சியால் நிரப்பப்படுதல் என்று அர்த்தம். மகிழ்ச்சியால் நிரப்பப்படுவது என்பது பரிசுத்த ஆவியால் நிரப்பப்படுவதைக் குறிக்கிறது.¹⁸ ஆவியானவரை நம் வாழ்வில் கொண்டுவர நாம் தினமும் உழைக்கும்போது நமது மகிழ்ச்சி அதிகரிக்கிறது. தீர்க்கதரிசி மார்மனால் போதிக்கப்பட்டபடி, “அவர்கள் ஆத்துமாக்கள் சந்தோஷத்தாலும், ஆறுதலாலும் நிரப்பப்படும் வரைக்குமாய், அவர்கள் உபவாசமிருந்து, அடிக்கடி ஜெபித்து, தங்கள் தாழ்ச்சியில் மிகுந்த பெலனாயும், கிறிஸ்துவின் விசுவாசத்தில் மிக்க உறுதியாயும் இருந்தார்கள்.”¹⁹ அவரைப் பின்பற்ற பிரயாசப்படும் அனைவருக்கும் கர்த்தர் வாக்களிக்கிறார், “உன் மனதை தெளிவுபடுத்தும், உனது ஆத்துமாவை சந்தோஷத்தால் நிரப்பும் எனது ஆவியை நான் உனக்குக் கொடுப்பேன்”.²⁰

பிறர் மனந்திரும்ப உதவி செய்வதன் மகிழ்ச்சி

நேர்மையான மனந்திரும்புதலால் வரும் மகிழ்ச்சியை நாம் உணர்ந்த பிறகு, இயல்பாகவே அந்த மகிழ்ச்சியை மற்றவர்களுடன் பகிர்ந்து கொள்ள விரும்புகிறோம். நாம் அப்படிச் செய்யும் போது, நமது மகிழ்ச்சி பெருகும். ஆல்மாவுக்கு அதுதான் நடந்தது.

“நான் சில ஆத்துமாக்களை மனந்திரும்புதலுக்குள்ளாகக் கொண்டுவருகிற கருவியாய் கர்த்தரின் கரங்களில் இருக்கக்கூடும் என்பதில் மேன்மை பாராட்டுகிறேன், இதுவே என் மகிழ்ச்சியாயிருக்கிறது.

“இதோ, என் சகோதரரில் அநேகர் மனத்தாழ்ச்சியாய் தங்கள் தேவனிடத்தில் வருகிறதை நான் காணும்போது என் ஆத்துமா சந்தோஷத்தால் நிரம்புகிறது. அப்போது கர்த்தர் எனக்கு செய்தவற்றையும், ஆம், என் ஜெபத்தைக் கேட்டார் என்பதையும் நினைவு கூருகிறேன்; ஆம், எனக்கு நேராய் அவர் நீட்டிய அவருடைய இரக்கமுள்ள புயத்தை நினைவுகூருகிறேன்.”²¹

மற்றவர்கள் மனந்திரும்புவதற்கு உதவுவது இரட்சகருக்கு நாம் காட்டும் நன்றியின் இயல்பான வெளிப்பாடாகும்; மேலும் அது மிகுந்த மகிழ்ச்சியைத் தருகிறது. கர்த்தர் வாக்களித்தார்:

“இந்த ஜனத்துக்கு மனந்திரும்புதலைக் கூக்குரலிட்டு, … என்னிடம் ஒரு ஆத்துமாவை கொண்டு வந்தாலும், என் பிதாவின் ராஜ்யத்தில் உங்கள் மகிழ்ச்சி எவ்வளவு பெரிதாயிருக்கும்!

“இப்போதும், என் பிதாவின் ராஜ்யத்தில் நீங்கள் கொண்டு வந்த ஒரு ஆத்துமாவினிமித்தம் மகிழ்ச்சி அதிகமாயிருந்தால், என்னிடத்தில் அநேக ஆத்துமாக்களை நீங்கள் கொண்டு வந்தால் உங்கள் சந்தோஷம் எவ்வளவு பெரிதாயிருக்கும்!”²²

“மனந்திரும்பும் ஆத்துமாவால் அவருடைய மகிழ்ச்சி எவ்வளவு பெரியது”

ஒவ்வொரு முறையும் நம் வாழ்வில் அவருடைய பாவநிவாரண பலியின் ஆசீர்வாதங்களைப் பெறும்போது இரட்சகர் உணர வேண்டிய மகிழ்ச்சியை கற்பனை செய்து பார்ப்பது உதவிகரமாக இருக்கிறது.²³ தலைவர் நெல்சன் மேற்கோள் காட்டியபடி,²⁴ அப்போஸ்தலனாகிய பவுல் எபிரேயருக்கு எழுதிய நிருபத்தில் இந்த மென்மையான உள்ளுணர்வைப் பகிர்ந்து கொண்டான்: நம்மைச் சுற்றி நெருங்கி நிற்கிற பாவத்தையும் தள்ளிவிட்டு,… விசுவாசத்தைத் துவக்குகிறவரும் முடிக்கிறவருமாயிருக்கிற இயேசுவை நோக்கி, அவர் தமக்குமுன் வைத்திருந்த சந்தோஷத்தின்பொருட்டு, அவமானத்தை எண்ணாமல், சிலுவையைச் சகித்து, … தேவனுடைய சிங்காசனத்தின் வலதுபாரிசத்தில் வீற்றிருக்கிறார். ²⁵ கெத்செமனே மற்றும் கல்வாரியின் வேதனை மற்றும் துன்பத்தைப்பற்றி நாம் அடிக்கடி பேசுகிறோம், ஆனால் இரட்சகர் தம் உயிரை நமக்காக வழங்கும்போது அவர் எதிர்பார்த்திருக்க வேண்டிய பெரும் மகிழ்ச்சியைப்பற்றி நாம் எப்போதாவது பேசுகிறோம். தெளிவாக, அவருடைய வேதனையும் துன்பமும் நமக்காக இருந்தது, அவருடன் தேவனின் பிரசன்னத்திற்கு திரும்புவதன் மகிழ்ச்சியை நாம் அனுபவிப்பதற்காக.

பண்டைய அமெரிக்காவில் உள்ள மக்களுக்குப் போதித்த பிறகு, இரட்சகர் அவர்கள் மீது மிகுந்த அன்பை வெளிப்படுத்தினார்:

“என் சந்தோஷம் பூரணப்பட்டிருக்குமளவிற்கு மிகுதியாயிருக்கிறது; ஆம், உங்கள் நிமித்தமும், … பிதாவும் பரிசுத்த தூதர்கள் யாவரும் மகிழ்ந்திருக்கிறார்கள். …

“ … உங்களில் என் சந்தோஷம் பூரணப்பட்டிருக்கிறது.”²⁶

கிறிஸ்துவிடம் வாருங்கள், அவருடைய மகிழ்ச்சியைப் பெறுங்கள்

சகோதர சகோதரிகளே, நான் என்னுடைய தனிப்பட்ட சாட்சியைப் பகிர்ந்துகொள்வதன் மூலம் முடிக்கிறேன், அதை நான் ஒரு பரிசுத்த வரமாகக் கருதுகிறேன். இயேசு கிறிஸ்து உலகத்தின் இரட்சகரும் மீட்பரும் என நான் சாட்சியளிக்கிறேன், அவர் நம் ஒவ்வொருவரையும் நேசிக்கிறார் என்பதை நான் அறிவேன். அவருடைய “பணியும் [அவருடைய] மகிமையும்,” ²⁵அவரில் ஒரு முழுமையான மகிழ்ச்சியைப் பெற உதவுவதே அவருடைய தனி கவனம். தினமும் மனந்திரும்பி இயேசு கிறிஸ்துவிடம் வருவதே நம் கற்பனைக்கு அப்பாற்பட்ட மகிழ்ச்சியை அனுபவிக்கும் வழி என்பதற்கு நான் தனிப்பட்ட சாட்சியாக இருக்கிறேன்.²⁸ அதனால்தான் நாம் பூமியில் இருக்கிறோம். அதனால்தான் தேவன் நமக்காக தம்முடைய மகத்தான மகிழ்ச்சியின் திட்டத்தை ஆயத்தப்படுத்தினார். இயேசு கிறிஸ்து உண்மையிலேயே “வழியும் சத்தியமும் ஜீவனுமாயிருக்கிறார்”²⁹ “இதைத்தவிர வானத்தின் கீழே தேவராஜ்யத்தில் மனுஷன் இரட்சிக்கப்படும்படிக்கு வேறெந்த வழியோ நாமமோ கொடுக்கப்படவில்லை.” ³⁰ அப்படியே இயேசு கிறிஸ்துவின் பரிசுத்த நாமத்தில் நான் சாட்சியளிக்கிறேன், ஆமென்.