Para sa Kaayohan sang Imo Kaliwatan
Indi mangin ang mahuyang nga kaw-id sa sining matahom nga kadena sang pagtuo nga imo gin-umpisahan, ukon imo nabaton, bilang panublion. Mangin ang mabakod nga kaw-id.
Pila na ka tuig ang nagligad, sang nagaalagad ako sa South America Northwest Area kag nagapuyo sa Lima, Peru, may manami ako nga eksperiyensia nga luyag ko ipaambit sa inyo.
Natabo ini sang nagapapuli ako matapos ang masako nga semana sang mga asaynment. Sang nakompleto na ang proseso sa airport immigration, nakita ko ang drayber sang taksi halin sa amon suki nga taxi service nga nagahulat sa akon. Ginpasakay niya ako sa iya salakyan, kag nagpungko ako sa likod nga handa magrelaks kag mag-enjoy sang malinong nga biyahe papuli. Paglagpas sa pila ka bangga, ang drayber gintawgan sang iya supervisor kag ginsilingan nga sala nga taksi ang akon nasakyan. Lain nga taksi ang nakareserba sa akon, kag ginpangabay sia sang supervisor nga ibalik ako sa airport kon luyag ko mag-ilis sang salakyan. Siling ko indi na kinahanglan, kag pwede kami makapadayon. Pagkatapos sang pila ka minutos sang kalinong, gintulok niya ako sa rearview mirror kag ginpamangkot, “Mormon ka?”
Pagkatapos sinang nagapangagda nga pamangkot, nahibal-an ko na nga indi na ako makapakalinong. Nakunyag ako sa malab-otan sang amon pag-istoryahanay tungod sang iya pamangkot.
Natukiban ko nga ang iya ngalan si Omar, ang iya asawa si Maria Teresa, kag may duha sila ka bata—si Carolina, edad 14, kag si Rodrigo, edad 10. Si Omar miyembro sang Simbahan halin pa sang bata sia. Aktibo ang iya pamilya, apang naglab-ot sa punto nga ang iya mga ginikanan nag-untat sa pagsimba. Si Omar nadula na gid sa simbahan sang mag-edad sia sing 15 anyos. 40 anyos na sia pakilalahay namon.
Sa sina nga tion narealisar ko nga wala ako nagsala sang ginsakyan ko nga taksi. Wala ato nataboan lang! Ginsugiran ko sia kon sin-o ako kag ara ako sa iya taksi tungod ginatawag sia sang Ginuo nga magbalik sa pagkaaktibo sa Iya Simbahan.
Dayon nag-istoryahanay kami sang panahon nga sia kag ang iya pamilya aktibo pa sa Simbahan. May manami sia nga mga handurawan sang masadya nga tinion sa family-home-evening kag pila ka mga kanta sa Primary. Dayon mahinay niya nga ginkanta ang pila ka tinaga sang “I Am a Child of God [Ako Anak sang Dios].”1
Pagkatapos nga makuha ang iya adres, telepono kag pahanugot nga ihatag ini sa iya bishop, ginhambalan ko sia nga tinguhaan ko nga makakadto sa chapel sa una nga adlaw sang iya pagbalik sa simbahan. Nahuman ang amon biyahe halin sa airport pakadto sa akon balay, subong man ang amon paghambalanay parte sa iya nagligad, kag nagbulagay na kami.
Pila ka semana pagkatapos sina, gintawgan ako sang iya bishop nga si Omar nagaplano nga magsimba sa isa ka Domingo. Ginhambalan ko sia nga makadto ako. Sina nga Domingo, si Omar nagsimba upod ang iya bata nga lalaki. Ang iya asawa kag ang iya bata nga babayi indi pa interesado. Pagligad sang pila ka bulan, gintawgan ako liwat sang iya bishop, agud sugiran nga bunyagan ni Omar ang iya asawa kag duha ka bata, kag gin-agda niya ako nga magkadto. Ari ang letrato sang sina nga Domingo nga ginkompirma sila nga mga miyembro sang Simbahan.
Sina mismo nga Domingo, ginhambalan ko si Omar kag iya pamilya nga kon handa na sila, sa isa ka tuig, dungog ko ang maghikot sang pagselyo sa ila sa Lima Temple. Ari ang letrato sinang halandumon nga tion para sa amon tanan, ginkuha pagkaligad sing isa ka tuig.
Ngaa ginapaambit ko ini nga eksperiyensia sa inyo? Ginapaambit ko ini sa duha ka tuyo.
Una, agud maghambal sa maayo nga mga miyembro nga sa kon ano nga mga rason nagtalikod sa ginpanumbalik nga ebanghelyo ni Jesucristo. Ikaduha, agud maghambal man sa nagapartisipar nga mga miyembro subong nga ayhan indi tuman katutom sa ila mga kasugtanan. Sa pareho nga kaso, ang mga henerasyon nga magaabot maapektohan, kag ang mga bugay kag mga promisa nga naaman para sa ila kaliwatan ara sa risgo.
Maumpisa kita sa una nga kahimtangan, mga maayo nga miyembro nga nagbiya sa banas sang kasugtanan, pareho sang natabo sa akon Peruvianhon nga abyan nga si Omar. Sang ginpamangkot ko kon ngaa nagdesisyon sia nga magbalik, nagsiling sia nga ginpamensar nila sang iya asawa nga mangin mas malipayon ang kabuhi sang ila kabataan sa ebanghelyo ni Jesucristo. Nabatyagan niya nga tion na nga magbalik sa simbahan para sa kaayohan sang ila kabataan.
Masubo ang makasugata sang indi-aktibo nga mga miyembro ukon indi mga miyembro sang Simbahan nga sadto anay ginpangabuhi sang ila mga pamilya ang ebanghelyo kag nadula ini bangod sang desisyon sang ila mga ginikanan ukon mga lola kag lolo nga indi na magsimba. Ina nga desisyon makaapekto sa ila kaliwatan sa wala katapusan!
Ang ila mga kabataan kag mga kaapohan nadulaan sang proteksyon kag mga bugay sang ebanghelyo ni Jesucristo sa ila kabuhi. Ang mas masakit pa gid, nadula sa ila ang mga promisa sang isa ka walay katapusan nga pamilya nga sadto anay yara sa ila. Ang desisyon sang isa ka tawo nag-apekto sang madamo nga henerasyon sang mga kaliwatan. Isa ka panublion sang pagtuo ang naguba.
Apang, sa aton nahibal-an, ang ano man nga naguba mahimo nga makay-o paagi kay Jesucristo. Tungod sining rason, palihog binagbinaga ining imbitasyon halin kay Pangulong Russell M. Nelson: “Karon, kon nagliw-as kamo sa dalan, ginaagda ko kamo upod ang tanan nga paglaum nga yara sa akon tagipusuon nga palihog magbalik na. Kon ano man ang inyo mga kabalaka, ano man ang inyo mga hangkat, may lugar para sa inyo diri, sa Simbahan sang Ginuo. Kamo kag ang wala pa mabun-ag nga mga henerasyon pagabugayan sang inyo aksyon sa karon sa pagbalik sa dalan sang kasugtanan.1
Karon, aton hambalan ang ikaduha nga kahimtangan, ang nagapartisipar nga mga miyembro subong nga ayhan indi tuman katutom sa ila mga kasugtanan. Pareho nga ang mga desisyon kahapon nagaapekto sang mga realidad subong, ang mga desisyon subong magaapekto sa aton palaabuton kag sa palaabuton sang mga miyembro sang aton pamilya.
Si Pangulong Dallin H. Oaks nagtudlo:
Ang ginpanumbalik nga ebanghelyo ni Jesucristo nagapaisog sa aton nga panumdumon ang palaabuton. … Nagatudlo ini sang dalagko nga mga ideya parte sa palaabuton agud giyahan ang aton mga aksyon sa karon.
“Sa kabaliskaran, kita tanan may mga kilala nga nagaulikid lamang sa subong: gastuha ina subong, ikalipay ina subong, kag indi magkabalaka para sa palaabuton.
“… Sa paghimo naton sang mga desisyon sa karon, dapat kita pirme magpamangkot, ‘Sa diin ini magapadulong?3 Ang aton bala nga mga desisyon subong magadala sa aton sa kalipay kag sa wala katapusan, ukon magadala ini sa aton sa kasubo kag mga luha?
Ang pila mahimo nagapensar, “Indi namon kinahanglan nga magsimba kada Domingo,” ukon “Mabayad kami sang ika-pulo kon mag-ayoayo na ang sitwasyon,” ukon “Indi ako magsuporta sa mga lider sang Simbahan parte sa sini nga butang.”
“Apang,” siling nila, “nahibal-an namon nga ang Simbahan matuod, kag indi gid namon pagtalikdan ang ebanghelyo ni Jesucristo.”
Ang mga tawo nga may amo sini nga mga pamensaron wala nakarealisar sang negatibo nga epekto sining “maalabaab” nga klase sang pagkamiyembro sa ila kabuhi kag sa mga kabuhi sang ila kaliwatan. Mahimo nga ang mga ginikanan magpabilin nga aktibo, apang dako ang risgo nga madula ang ila mga kabataan—sa sini nga kabuhi kag sa wala katapusan.
Sa sinang indi makapanubli sang selestiyal nga himaya upod sang ila pamilya, ang Ginuo nagasiling, “Sila ining indi maisog sa testimonya parte kay Jesus; gani, wala nila maangkon ang korona sa ginharian sang aton Dios.”4 Amo bala ina ang luyag naton para sa aton mga kaugalingon, ukon sa aton mga kabataan? Indi bala nga dapat kita nga mangin mas maisog kag indi mangin maalabaab para sa aton kaugalingon nga kaayohan kag para sa kaayohan sang aton kaliwatan?
Si Pangulong M. Russel Ballard nagpamulong sa amo man nga kabalaka:
“Para sa iban, ang imbitasyon ni Cristo nga magpati kag magpabilin nagapadayon nga mabudlay. … Ang iban nga mga sumulunod ginabudlayan sa pag-intiendi sang isa ka polisiya ukon panudlo sang Simbahan. Ang iban may nakita nga mga isyu sa aton maragtas ukon sa mga depekto sang pila ka mga miyembro ukon mga lider sadto kag subong. …
“… Ang desisyon nga ‘indi na mag-upod’ sa mga miyembro sang Simbahan kag sa pinili nga mga lider sang Ginuo mangin may malawig nga epekto nga indi pa makit-an sa subong.”5
Kasubo nga ipapanubli—kag sa ano nga rason? Kon ano man ini, indi husto nga balewalaon ang negatibo nga espirituhanon nga epekto sini sa palaabuton nga mga henerasyon.
Pinalangga kong mga kauturan, kon nagaagi kamo sa isa sining duha ka sitwasyon nga akon namitlang sa akon mensahe, palihog binagbinaga liwat ang inyo mga tikang. Nakahibalo kamo nga may plano para sa aton sa sini nga kabuhi. Nakahibalo kamo nga ang mga pamilya sarang nga mangin walay katapusan. Ngaa nga irisgo mo ang imo pamilya? Indi mangin ang mahuyang nga kaw-id sa sining matahom nga kadena sang pagtuo nga imo gin-umpisahan, ukon imo nabaton, bilang panublion. Mangin ang mabakod nga kaw-id. Turno mo na nga himuon ini, kag ang Ginuo makabulig sa imo.
Halin sa kaibuturan sang akon kasingkasing, ginaagda ko kamo nga pamesaron ini, magtulok sa palaabuton kag timbangon “sa diin ini magapadulong” kag, kon kinahanglanon, mangin tuman kaisog sa pagdihon liwat sang imo banas para sa kaayohan sang imo kaliwatan. Sa ngalan ni Jesucristo, amen.