10:40

Mapainubuson nga Magbaton kag Magsunod

Ni Elder Joni L. Koch

Sang Sitenta

Ang pagkamapainubuson isa ka obligado nga ginapangayo agud mangin handa sa pagbalik sa presensya sang Dios.

Sa ika-lima nga kapitulo sang Alma, may makapabinagbinag nga pamangkot: “Makasiling bala kamo, kon kamo gintawag nga mamatay sa sini nga tion, sa sulod sang inyo mga kaugalingon, nga nangin igo kamo nga mapainubuson?”¹ Ina nga pamangkot nagapaintiendi nga obligado kita nga mangin mapainubuson agud mangin handa sa pagbalik sa presensya sang Dios.

Gusto naton tanan magpanumdum nga igo ang aton pagkamapainubuson, pero ang pila ka eksperiyensya sa kabuhi makapamarasmas sa aton nga may natural kita nga huyog nga mangin bugalon ukon arogante.

Pila ka tuig ang nagligad, sang ara pa sa balay ang amon duha ka bata nga babayi, nagdesisyon ako nga pakitaon sila kag ang akon asawa sang sanga sa negosyo nga akon ginakaptan sa kompanya nga akon ginaobrahan.

Bisan nga ang tunay ko nga tuyo amo nga pakitaon sila sang lugar nga, indi pareho sa balay, ang tanan nagapati gid sing eksakto bisan ano pa ang ipaobra ko nga wala sing reklamo. Pag-abot namon sa naatubang nga gate, nga masami nagaabri dayon kon mag-abot ang akon awto, nakibot ako nga wala ini nag-abri. Kundi, isa ka gwardia nga wala ko pa gid anay nakita sa akon kabuhi ang nagkadto sa awto kag ginpangayoan ako sang company ID.

Siling ko sa iya nga nungka pa gid ako ginpangayoan sang ID kon magsulod ang akon awto sa lugar kag dayon ginpamangkot sia sang kinaandan nga pamangkot sang bugalon nga tawo: “Kakilala ka kon sin-o ako?”

Nga iya ginsabat sang, “Te, kay wala ka kadala sang imo company ID, indi ko kabalo kon sin-o ka, kag mientras ari ako diri sa gate, indi ka kasulod nga wala sing nagakaigo nga identipikasyon.”

Nagpamensar ako nga magtulok sa rearview mirror, agud tan-awon ang mga reaksyon sang akon mga bata nga babayi pero nakahibalo ako nga nasadyahan sila sang nagakatabo! Ang akon asawa sa tupad ko nagalungo nga indi komporme sa akon ginhimo. Ang katapusan ko nga solusyon sadto amo ang mangayo pasensya sa gwardia kag magsiling nga ginakasubo ko ang malain ko nga pagtratar sa iya. “Napatawad ka na,” siling niya, “pero kon wala sang company ID, indi ka makasulod subong!”

Dayon mahinay ako nga nagmaneho papuli agud kuhaon ang akon ID, nga mahimo nakatuon sining mapuslanon nga leksyon: Nga kon pilion naton nga mangin di-mapainubuson, mahuy-an kita.

Sa Mga Hulubaton mabasa naton, “Ang bugal amo ang kabangdanan sang pagkapukan sang tawo, pero ang tawo nga mapainuboson pagatahuron.”² Agud mangin mas mapainubuson, dapat naton hangpon kon ano gid ang kahulugan sini sa konteksto sang ebanghelyo.

Gakasal-an sang iban nga tawo ang pagkamapainubuson nga katumbas sang iban nga butang pareho sang, halimbawa, kaimolon. Pero sa pagkamatuod madamo ang imol nga bugalon kag madamo man ang manggaranon nga mapainubuson. Ang iban nga tama ka mahuluy-on ukon manubo ang pagtahod sa kaugalingon mahimo nagapakita sang pagkamapainubuson pero sa sulod kon kaisa puno sang bugal.

Gani ano bala ang pagkamapainubuson? Suno sa Preach My Gospel, kahanda ini nga magpaidalom sa pagbuot sang Ginuo. … Kahanda ini nga matudloan. … Importante [ini] nga panugod sang espirituhanon nga pagtubo.”³

Sigurado nga madamo ang mga oportunidad para sa aton tanan nga mapauswag sa ining Cristohanon nga kinaiya. Gusto ko usisaon anay kon daw ano kita ka mapainubuson sadto ukon dapat, sa pagsunod sang laygay sang aton propeta. Isa ka eksamen nga dapat sabton sang kada isa amo nga :

Ginahambal bala naton ang bug-os nga ngalan sang Simbahan sa tanan naton nga mga pagsugilanon? Si Pangulong Russell M. Nelson nagsiling, “Ang pagkakas sang ngalan sang Ginuo sa Simbahan sang Ginuo isa ka dako gid nga kadalag-an para kay Satanas.”⁴
Ginatugotan bala naton ang Dios nga magpangibabaw sa aton mga kabuhi paagi sa pagbaton sang tuman ka pat-od nga pangagda sang aton propeta? “Sini nga adlaw ginapanawagan ko sa aton mga miyembro sa bisan diin nga pangunahan ang pagsikway sang mga pamatasan kag mga buhat sang diskriminasyon.”⁵
Ginadaug bala naton ang kalibutan, nga nagasalig sa doktrina ni Cristo sangsa mga pilosopiya sang tawo, pareho sang gintudlo sang aton propeta?⁶
Mahidaeton bala kita, nga nagahambal sang positibo nga mga butang sa kag parte sa iban nga tawo? Si Pangulong Nelson nagtudlo sa aton sang masunod sang nagligad nga pangkabilogan nga komperensya: “Kon may bisan ano nga butang nga matarong, matahum, ukon dungganon ukon dalayawon nga pwede naton ihambal parte sa isa ka tawo—sing atubangay ukon bisan wala sia—amo ina dapat ang aton sulundan sa komunikasyon.”⁷

Ang mga ini simple pero mabaskog nga mga panugyan. Panumduma, ang dapat gid lang nga himuon sang katawhan ni Moises agud mag-ayo amo ang magtulok sa saway nga man-og nga iya ginbayaw.⁸ Apang “tungod sang kamag-an sang paagi, ukon sang kahapos sini, madamo ang nagkalamatay.”⁹

Sa sining komperensya nakabati kita kag makabati pa gid sang wala nagapalya nga laygay sang aton mga propeta kag mga apostoles. Perpekto ini nga okasyon nga mangin mapainubuson kag tugotan ang aton mabaskog nga mga opinyon nga daugon sang mas mabaskog pa gid nga pagpati nga ang Ginuo nagahambal paagi sining pinili nga mga lider.

Labaw sa tanan, sa pagpatubo sang pagkamapainubuson, dapat man naton hangpon kag batonon nga indi naton sarang daugon ang aton mga hangkat ukon malab-ot ang aton bug-os nga potensyal paagi lang sa aton pagpanikasog. Ang mga motivational speaker, writer, coach, kag influencer sa bilog nga kalibutan, labi na gid sa digital nga mga plataporma, masiling nga ang tanan nagadepende lang gid sa aton kag sa aton mga buhat. Ang kalibutan nagapati sa tawhanon nga gahum.

Pero paagi sa ginpanumbalik nga ebanghelyo nahibal-an naton nga lubos kita nga nagsandig sa kaayo sang Amay nga Langitnon kag sa Pagbayad-Sala sang aton Manluluwas nga si Jesucristo, “kay nahibal-an naton nga paagi sa grasya kita naluwas, pagkatapos sang tanan nga aton mahimo.”¹⁰ Amo ina kon ngaa importante nga maghimo kag matuman sang mga kasugtanan sa Dios, kay ang paghimo sini lubos nga magapatigayon para sa aton sang nagaayo, nagabulig, kag nagaperpekto nga gahum ni Jesucristo paagi sa Iya Pagbayad-Sala.

Ang semanal nga pagtambong sa sakramento nga miting kag pagsimba pirme sa templo agud magpartisipar sa mga ordinansa kag magbaton kag magbag-o sang mga kasugtanan tanda sang aton pagkilala nga nagasalig kita sa Langitnon nga Amay kag sa aton Manluluwas nga si Jesucristo. Magaagda ina sang Ila gahum sa aton kabuhi agud buligan kita sa tanan naton nga mga problema kag sa ulihi matuman ang katuyoan sang pagtuga [sa aton].

Sang sini lang gintilawan naman ang akon pagkamapainubuson kag paghangop sa akon pagsandig sa Ginuo. Sakay ako sa taxi pakadto sa airport para sa malip-ot nga paglupad sa lugar nga may mabudlay katama nga sitwasyon nga dapat solbaron. Ang driver sang taxi, nga indi miyembro sang Simbahan, nagtulok sa akon sa espeho kag nagsiling, “Makita ko nga indi ka maayo subong!”

“Mabal-an mo?” Pamangkot ko.

“Syempre,” siling niya. Dayon daw nagsiling sia nga “Sa tuod lang, may tama kanegatibo nga awra sa palibot mo!”

Ginpaathag ko nga may mabudlay nga sitwasyon ako nga alatendiron kag dayon ginpamangkot niya ako, “Nahimo mo bala ang tanan mo nga masarangan agud solbaron ini?”

Nagsabat ako nga nahimo ko na ang tanan nga akon masarangan.

Dayon nagsiling sia sang isa ka butang nga wala ko gid malimti, “Te isalig lang sa Dios, kag ang tanan mangin maayo.”

Ginaako ko nga natentar ako nga pamangkoton sia, “Kakilala ka kon sin-o ang ginaistorya mo?” Pero wala ko ini ginhimo! Kundi nagpakaubos ako sa Ginuo sa bilog nga isa ka oras nga paglupad nga nagapangayo sang diosnon nga bulig. Pagpanaog ko sa eroplano, nabalitaan ko nga ang sololbaron nga mabudlay nga sitwasyon nahusay na kag ang akon presensya indi na kinahanglanon.

Mga kauturan, ang sugo, imbitasyon kag promisa sang Ginuo klaro kag makapaumpaw: “Magmangin mapainubuson; kag ang Ginuo nga imo Dios magatuytoy sa imo sa kamot, kag magahatag sang sabat sa imo mga pangamuyo.”¹¹

Mangin mapainubuson kita kuntani nga sundon ang laygay sang aton mga propeta kag batonon nga ang Dios kag si Jesucristo gid lang ang makabag-o sa aton—paagi sa mga ordinansa kag mga kasugtanan sa Iya Simbahan—sa pinakamaayo nga bersyon sang aton mga kaugalingon sa sini nga kabuhi kag, sa ulihi, magaperpekto sa aton kay Cristo. Sa ngalan ni Jesucristo, amen.