10:23

Sir, Luyag Kami Magpakigkita kay Jesus

Ni Elder Robert M. Daines

Sang Sitenta

Gusto naton makilala si Jesus sa kon sin-o gid Sia kag mabatyagan ang Iya gugma.

Face Blindness

Isa ka adlaw sa tigpamulak sang 1945, isa bataon nga lalaki ang nagbugtaw sa ospital sang militar. Maswerte sia nga nabuhi—natirohan sia sa likod sang dalunggan, pero gin-operahan sia, kag makalakat na sia kag makahambal.

Masubo nga, ginhalitan sang bala ang bahin sang iya utok nga nagakilala sang itsura. Kon magtulok sia subong sa iya asawa, indi niya ini makilal-an; indi man niya makilal-an ang iya iloy. Bisan ang itsura sa espeho bag-o sa iya—indi sia kahibalo kon lalaki ini ukon babayi.¹

Face-blind na sia—kahimtangan nga nagaapekto sang minilyon ka tawo.²

Ang mga tawo nga grabe kaface-blind nagatinguha nga makilal-an ang iban paagi sa pagsaulo sang mga pagsulundan—pagsulundan sa pagkilala sang anak paagi sa iya mga pikas ukon sang abyan paagi sa iya panglakat.

Pagdaku

Ang ika-duha nga istorya personal: sang gamay pa ako, panulok ko kay nanay tag-himo sang pagsulundan nga dapat gid tumanon. Depende sa iya kon san-o ako makahampang, magtulog ukon, mas malala, magpanghilamon.

Klaro nga palangga niya ako. Pero pirme kag ginakahuya ko nga, ang panan-aw ko sa iya sadto amo lang nga “Sia Dapat gid Tumanon.”

Tinuig pa ang nagligad kag nakilala ko sia sing matuodtuod. Nahuya ako nga wala ko gid nadiparahan ang iya sakripisyo ukon natingala kon ngaa sa madamo nga tinuig amo lang gid gihapon ang ginasuksok niya nga duha ka daan nga palda (samtang bag-o ang akon mga uniporme) ukon ngaa, pagkagab-i, kapoy sia katama kag gusto nga magtulog ako temprano.

Mahimo nga Face-Blind Kita

Siguro namutikan ninyo nga ining duha ka istorya, sa pagkamatuod isa lang—sa madamo nga tinuig, nangin face-blind ako. Wala ko nakilal-an si nanay kon sin-o gid sia. Wala ko nakita sa iya mga pagsulundan ang iya pagpalangga.

Ginasugid ko ining duha ka istorya agud ipakita ang isa ka punto: Siguro may kilala kamo (ukon basi isa ka) nga nagaantos sa isa ka sahi sang espirituhanon nga face-blindness.

Basi indi mo makita ang Dios bilang isa ka mahigugmaon nga Amay. Mahimo nga nagatulok ka sa langit kag makita, indi ang nawong sang pagpalangga kag kaluoy, kundi kasiotan sang mga pagsulundan nga dapat nimo usuyon. Ayhan nagapati ka nga ang Dios nagagahum sa Iya kalangitan, nagahambal paagi sa Iya mga propeta, kag nagapalangga sa imo utod pero sekdreto ka nga nagaduda kon bala palangga ka Niya.³ Ayhan nagakapyot ka sa barandilya nga salsalon pero wala pa natilawan ang gugma sang imo Manluluwas kon sa diin ini nagapadulong.⁴

Suspetso ko, may mga kilala kamo nga pareho sini tungod sa malawig nga tion, ako sadto amo man sini—espirituhanon ako nga face-blind.

Abi ko ang akon kabuhi parte lang sa pagtuman sang mga pagsulundan kag pagtumbas sa di-klaro nga mga talaksan. Kahibalo ko nga palangga ka sang Dios pero indi ko ini mabatyagan para sa akon. Basi bala mas napamensar ko ang pagsaka sa langit sangsa makaupod ang akon Amay sa Langit.

Kon pareho kamo sa akon nga kon kis-a makatikab-tikab lang pero wala “nagakanta sang nagatubos nga gugma,”⁵ ano ang himuon naton?

Ang sabat, pareho sang ginahambal sa aton ni Pangulong Nelson, pirme gid si Jesus.⁶ Kag maayo gid ina nga balita.

Sir, Luyag Kami Magpakigkita kay Jesus

May malip-ot nga dinalan sa Juan nga nanamian ko gid. Nagasugid ini parte sa isa ka grupo sang mga pangayaw nga nagpalapit sa iya disipulo nga may importante nga pangabay. “Sir,” siling nila, “[luyag] namon makigkita kay Jesus.”⁷

Ina ang gusto naton tanan—gusto naton nga makilala si Jesus kon sin-o gid Sia kag mabatyagan ang Iya gugma. Ini dapat ang rason sang halos tanan nga ginahimo naton sa simbahan kag syempre kada sacrament meeting. Kon gapalibog kamo sang leksyon nga itudlo, miting nga planohon, kag kon bala mangampo na lang sa mga deacon kag maghampang igo-ay bola, pwede ninyo ini himuon nga giya: makabulig bala ini sa mga tawo nga makilala kag palanggaon si Jesucristo? Kon indi, siguro tilawan ang lain.

Sang narealisar ko nga espirituhanon ako nga face-blind, nga makita ko ang mga pagsulundan pero indi ang kaluoy sang Amay, nahibal-an ko nga indi ini sala sang Simbahan. Indi ini sala sang Dios, kag wala nagakahulugan nga wala na sang paglaum; kinahanglan naton ini tanan mahibal-an. Bisan ang una nga mga saksi sa Pagkabanhaw masami nga naatubang gid ang nabanhaw nga Ginuo pero wala Sia nakilal-an; halin sa Lulubngan sa Hardin tubtob sa baybayon sang Galilea, ang Iya una nga mga sumulunod “nakita si Jesus nga nagatindog, kag wala nakahibalo nga si Jesus ato.”⁸ Gintun-an pa nila nga makilala Sia, kag amo man kita.⁹

Paghigugma sa Isigkatawo

Ginsugdan ko nga sundon ang laygay ni Mormon nga mangamuyo “sa bug-os nga ikasarang sang tagipusuon” agud mapuno sang gugma nga iya ginpromisa sa Iya mga disipulo—gugma ko sa Iya kag gugma Niya sa akon—kag agud “makita sia subong nga sia gid … kag maangkon ini nga paglaum.”¹⁰ Nagpangamuyo ako sa madamo nga tinuig nga masunod ko ang una nga dakong sugo nga higugmaon ang Dios kag mabatyagan inang “una nga dakong kamatuoran … nga ang Dios nagahigugma sa aton sa bug-os Niya nga tagipusuon, ikasarang, hunahuna kag kusog.”¹¹

Ang Ebanghelyo

Liwat-liwat ko man nga ginbasa ang apat ka Ebanghelyo—sa sini nga tion indi agud kuhaon ang Iya mga pagsulundan kundi agud mahangpan kon sin-o Sia kag ano ang Iya luyag. Kag, sang ulihi, nabatyagan ko gid kag nahangpan ang daku Niya nga gugma.

Pagsugod ni Jesus alagad sa publiko, nagsiling Sia nga nag-abot Sia “sa pagpaayo sa mga [napunô sang kasakit], sa [pagwali sang kaluwasan] sa mga nabihag, kag sa [pag-ayo] sang panulok sang mga bulag.”¹²

Indi ini listahan lang sang mga hilimuon ukon para sa pagpahamtang sang maayo nga ngalan; kundi natural nga pagpakita sang Iya gugma.

Basaha ang Ebanghelyo sa bisan diin sini nga bahin; halos sa tagsa ka pahina makita naton Sia nga nagatatap sang mga tawo nga nagaantos—sing sosyal, espirituhanon, kag pisikal. Ginatandog Niya ang mga tawo nga ginakabig nadagtaan kag mahigko¹³ kag ginapakaon ang ginagutom.¹⁴

Ano ang imo paborito nga istorya parte kay Jesus? Siguro nagapakita ini sa Anak sang Dios nga nagadab-ot sa pagbaton sang tawo nga ginaahig-ahig sa sosyedad—ang aruon,¹⁵ ang ginakaugtan nga Samariahanon,¹⁶ ang malain nga babayi,¹⁷ ukon ang pungsodnon nga kaaway (Romanhon nga Soldado).¹⁸ Ina nga klase sang grasya dalayawon.

Tilawi sulat ang tagsa ka tion nga nagdayaw Sia, ukon nagpang-ayo, ukon nagkaon upod sa pangayaw, kag maubusan ka sang tinta antes mo matapos ang Libro ni Lucas.

Nakita ko ini kag nalipay gid ako sa pagrealisar nga daw pareho ako sa mga tawo nga wala lubos ginabaton kag nagsugod ako nga magbatyag nga siguro palangga Niya ako. Si Pangulong Nelson nagtudlo, “Mas madamo ang mahibal-an ninyo parte sa Manluluwas, mas mahapos ang magsalig sa Iya kaluoy, sa Iya wala tupong nga gugma.”¹⁹ Kag mas saligan ninyo kag higugmaon ang inyo Amay sa Langit.

Si Elder Jeffrey R. Holland nagtudlo sa aton nga si Jesus nag-abot agud “ipakita sa aton kon sin-o kag daw ano ang aton Wala Katapusan nga Amay, kon ano ka lubos ang Iya debosyon sa Iya mga anak sa tagsa ka dag-on kag nasyon.”²⁰

Si Pablo nagsiling nga ang Dios “maluloy-on nga Amay, kag ang Dios nga ginahalinan sang tanan nga bulig.”²¹

Kon lain ang panan-aw ninyo sa Iya, magpadayon sa pagtinguha.

Mga Kasugtanan kag Pagpalangga sang Dios

Ang mga propeta nagaagda sa aton nga pangitaon ang Iya presensya.²² Ginakabig ko ini bilang pahanumdum nga nagasimba kita sa aton Amay, indi sa pagsulundan, kag indi pa human ang aton buluhaton tubtob nga makita naton ang gugma sang aton Amay sa mga hinimoan ni Jesus²³ kag sundon Sia, indi lang ang Iya mga pagsulundan.²⁴

Kon ang mga propeta kag mga apostoles nagahambal parte sa mga kasugtanan, indi sila pareho sang mga coach nga nagasinggit halin sa kumportable nga mga pulungkuan nga nagasiling sa aton “kaayoha pa gid!” Luyag nila nga makita naton ang aton mga kasugtanan nga tuhoy gid sa mga relasyon²⁵ kag sarang mangin bulong para sa aton espirituhanon nga pagka-face blind.²⁶ Indi ang mga ini pagsulundan agud makuha ang Iya gugma; Palangga na Niya kamo sing perpekto. Ang aton hangkat amo nga hangpon kag dayon pormahon ang aton kabuhi ayon sa sinang gugma.²⁷

Nagatinguha kita nga magtan-aw paagi sa aton mga kasugtanan, nga daw sa bintana, sa guya sang kaluoy sang Amay.

Ang mga kasugtanan paagi sang Dios nga ipakita ang Iya pagpalangga sa aton.

Ang Suba sang Gugma sang Dios

Sa katapusan, matun-an naton nga makita Sia paagi sa pag-alagad sa Iya. “Kay paano makilal-an sang isa ka tawo ang agalon nga wala niya maalagari?”²⁸

Pila ka tuig ang nagligad, nakabaton ako sang calling nga pamatyag ko indi ako bagay. Aga pa ako nagbugtaw, nga ginanerbyos—pero may ginapanumdum nga dinalan nga wala ko pa gid nabatian antes: nga ang mag-alagad sa sini nga Simbahan amo ang magtindog sa suba sang gugma sang Dios para sa Iya mga anak. Ining Simbahan grupo sang mga tawo nga nagaalagad agud hawanan ang ginailigan sang suba para maglab-ot ang gugma sang Dios sa Iya mga anak sa katapusan sang idas.

Kon sin-o ka man, ano man ang imo nagligad, may lugar para sa imo sa sini nga Simbahan.²⁹

Magkuha sang pico kag pala kag mag-upod sa grupo. Buligi dala ang Iya gugma sa Iya mga anak kag ang iban sini magabalik sa imo.³⁰

Pangitaon naton ang Iya mahigugmaon nga presensya, Iya hakos sang kasugtanan, kag dayon magbuylog kita nga nagadapitay upod sa Iya mga anak kag dulungan kita nga magkanta sang “Redeemer of Israel (Manunubos sang Israel)”:

Ibalik Manluluwas ko
Kasanag sang nawong mo;
Hatagi kasulhay ang kalag;
Tugoti ang kahidlaw
Sa balaan mong lugar
Magdala paglaum sa namingaw kong dughan.31

Pangitaon naton kuntani ang Iya mahigugmaon nga presensya kag dayon mangin mga suludlan sang Iya kaluoy para sa Iya mga anak.³² Sa ngalan ni Jesucristo, amen.