Daw Ano Kadako sang Inyo Mangin Kalipay
Ginaagda ko kamo karon nga dalhon ang inyo nahibal-an, upod ang inyo madugay na nga mga testimonya, kag maglakat sa misyon.
Mga utod, ang hunahuna ko karon ara sa pagtipon sang Israel, nga ginatawag ni Pangulong Nelson “ang pinakaimportante nga nagakatabo sa kalibutan sa karon. Wala sing makatupong sa kasangkad, wala sing makatupong sa importansya, wala sing makatupong sa katahum.”1
Ang pagtipon amo ang pinakamataas nga pagkilala nga “dako ang bili sang mga kalag sa panan-awan sang Dios.”2 Amo lang sina kasimple. Ginatipon naton ang mga anak sang Dios sa sining ulihing mga adlaw para ila mabaton ang “dalagko nga mga bugay nga ginbubo sa ila mga ulo”3 kag ang mga promisa sang “mga manggad sang wala’y katapusan.”4 Para matipon ang Israel kinahanglan naton sang mga misyonero—mas madamo pa sa nagaserbisyo karon.5 Ginatumod ko ang mga edaran na sa Simbahan nga pwede mag-alagad bilang mga misyonero. Kinahanglan kamo sang Ginuo. Kinahanglan namon kamo sa New York kag Chicago, Australia kag Africa, Thailand kag Mexico, kag sa bisan diin.
Iistorya ko sa inyo ang natabo sang 2015. Bag-o lang gid ako gintawag sa Korum sang Dose ka Apostoles. Isa sa matahum nga mga responsibilidad namon bilang mga Apostoles amo ang magdestino sang mga misyonero sa mga misyon. Nagpartisipar ako sa sini nga proseso sadto bilang Seventy,6 pero karon bilang Apostoles, nabatyagan ko ang kabug-at sining hilikuton. Mainampuon ako nga nagsugod sa pagdestino sang madamo nga elder kag sister, tag-isaisa, sa mga misyon sa bilog nga kalibutan. Dayon didto naman sa mga may edad na nga mag-asawa. May 10 sa listahan. Indi kaayo damo. Nakibot nga ginpamangkot ko ang upod ko sa Missionary Department, “Pila ang kinahanglan naton sini nga semana para ipadala sa nagapangayo?”
Sabat niya, “300.”
Ining seryoso nga hitabo nagpabilin sa akon: 10 ka mag-asawa para sa 300 nga ginapangayo.
Si Pangulong Russell M. Nelson nagapaisog sa mga mag-asawa nga “magluhod kag magpamangkot sa Amay nga Langitnon kon oras na bala nga magserbisyo sila sa misyon.”7 Sa tanan nga kwalipikasyon siling niya, “ang handum nga magserbisyo amo ang pinakaimportante.”8
Sa ginasiling sa balaan nga kasulatan, “Kon may mga handum kamo sa pag-alagad sa Dios ginatawag kamo para sa buluhaton.”9 Ang ina nga buluhaton nahanungod sa layi sa ani. Mabasahan naton sa Juan, “Ang tawo nga nagatanom magakalipay upod sa tawo nga nagaani.”10
Nakita ko ang layi sang ani nga natuman sa akon mismo pamilya.
Pila ka tuig na ang nagligad nagaistorya ako sa pamilya, sang ginpangabay ako ni bishop nga maghambal sa katapusan sang sakramento nga pag-alagad.11 Sang nagapanaog ako halin sa pulpito, nagpalapit sa akon ang isa ka babayi upod ang iya pito ka kabataan kag nagpakilala nga sia si Sister Rebecca Guzman.
Namangkot sia, “Elder Rasband, kilala mo si Rulon kag Verda Rasband?”
Nagyuhum ako kag nagsabat, “Mga ginikanan ko sila.”
Makita na ninyo kon diin ini pakadto. Sa pahanugot ni Rebecca nga ari sa Conference Center upod ang iya pamilya, isugid ko ang istorya sang iya pamilya.12
Ang mga ginikanan ko, si Elder Rulon kag Sister Verda Rasband, nagaserbisyo bilang senior couple sa Florida Fort Lauderdale Mission.13 Naga-proselyte sila kag sa diosnon nga giya nagpanuktok sa pwertahan sang balay ni Rebecca. Tin-edyer pa lang sia sadto kag nanamian magpamati sa mga kanta sang mga Osmond, ilabi na gid sang abyan ninyo nga si Donny—nga ari diri upod sa aton subong.14 Nakapamati sia sa ila mga interbyu sa media kag natukiban nga mga miyembro sila sang Simbahan ni Jesucristo sang mga Santos sa Ulihing mga Adlaw. Nabatyagan niya nga may lain sa ila, kag nagahunahuna nga amo siguro ato ang ila relihiyon, nagpangusisa si Rebecca sa sulod sang duha ka tuig parte sa mga pinatihan sang Simbahan sa librarya sang eskwelahan. Gani, sang may mabuot-tulukon nga mag-asawa nga nagpanuktok sa ila balay kag nagpakilala nga mga misyonero sang mga Santos sa Ulihing mga Adlaw, nakibot sia.
“Siling ni nanay nga tabugon ko sila,” ginsulat ni Rebecca sang ulihi, “pero siling sang kasingkasing ko, ‘Indi.’ Gintulok ko ang ila mga guya, kag nakabatyag ako sang grabe nga pagpalangga. Ining panumduman nagapaluha sa gihapon sa akon kag nagatandog sang akon tagipusuon.”15
Ginpasulod sila ni Rebecca, kag nagpaambit ang akon misyonero nga mga ginikanan sang mensahe sa iya, sa iya duha ka manghod nga babayi, kag bisan nagapamatok, sa iya nanay.
Ginsugid ni Rebecca sa akon: “Ang imo mga ginikanan pareho nga manami magpaathag sang bisan ano namon nga pamangkot. Madumduman ko pa ang ila mga guya nga daw may nagapalibot nga kasanag. Pirme namon ginahakos ang imo nanay kon maglakat sia, kag ginasiguro gid niya pirme nga komportable kag ginarespeto ang akon nanay. Ang imo tatay nagaigpat pirme ang mata samtang ginatudloan niya kami parte kay Jesucristo. Gintinguhaan niya nga updon ang akon tatay sa mga diskusyon kag sang ulihi natuman niya ini. Ang akon tatay chef sa country club sa amon kag ginalutuan niya sang panyapon ang imo mga ginikanan, pati ang paborito ni tatay mo nga key lime pie.”16
Sang ginpangabay ni Elder kag Sister Rasband si Rebecca kag ang iya pamilya nga basahon ang Libro ni Mormon, ginhimo ini ni Rebecca sa sulod sang lima ka adlaw. Gusto niya nga mabunyagan dayon, pero ang iban nga mga miyembro sang iya pamilya indi pa handa. Pagligad sang apat ka bulan, nagpamilit si Rebecca nga magpabunyag kag magsulod sa matuod nga Simbahan. Siling niya, “Wala ako sing pagduhaduha nga matuod ini.”17 Sang April 5, 1979, ginbunyagan sang mga misyonero ang 19-anyos nga Rebecca, ang iya nanay, kag duha ka manghod. Nagsaksi ang akon tatay sa bunyag.
Sang makilala ko si Rebecca kag ang iya pamilya sa simbahan, nagpalitrato kami sang iya pamilya. Gindala ko ini sa akon tigulang na nga iloy, kag ginbutang niya ini malapit sa iya dughan. Dayon siling niya sa akon, “Ronnie, isa ini sa pinakasadya nga adlaw sa akon kabuhi.”
Ang reaksyon sang akon iloy nagapalab-ot sang pamangkot sa aton mga may edad: “Ano ang inyo ginahimo sa sini nga punto sang inyo kabuhi?” Kadamo sang mahimo sang mga senior missionaries nga indi mahimo sang bisan sin-o. Dako kamo kaayo nga impluwensya para sa kaayuhan, madugay na sa Simbahan, kag ara sa posisyon para magpaisog kag magsalbar sang mga anak sang Dios.
Ang iban sa inyo siguro nagapanumdom: “Ti, bayaan namon gale ang amon mga apo? Wala kami sa mga hitabo sa pamilya, mga kaadlawan, hidlawon sa mga abyan, kag bisan ang amon kasapatan.” Kon ginpamangkot ko si nanay kon ngaa naglakat sila ni Tatay sa misyon, piho amo gid ini ang isiling niya, “May mga apo ako. Gusto ko nga mahibal-an nila nga kami ni tatay mo naglakat sa misyon, gusto namon magpakita sang ehemplo sa aton pamilya, kag ginbugayan kami sang sobra-sobra.”
Sang nagbisita ako sa mga misyon sa bilog nga kalibutan, nakita ko ang dalayawon nga serbisyo sang guban sang aton mga senior missionary. Maathag nga malipayon sila sa paghimo sang “pagbuot sang Ginuo” kag sa pagtuman sang “buluhaton sang Ginuo.”18
Para sa iban, kag kuntani sa linibo sa inyo, ang full-time nga pagserbisyo bilang misyonero sa iban nga parte sang kalibutan amo gid ang husto nga lugar.19 Para sa iban, ang pagserbisyo sa Church-service mission sa ila lugar mas pabor sa ila. Tungod sa ikaayong lawas kag iban pa nga sirkumstansya, may mga indi gid makaserbisyo. Naintiendihan naton ina nga mga sitwasyon, kag nagalaum ako nga makakita kamo sang paagi para masuportahan ang mga nagaserbisyo. Sunda ang laygay sang propeta kag magpangamuyo para mahibal-an kon ano ang ipahimo sang Ginuo sa inyo.
Ang mga lugar sa misyon sa bilog nga kalibutan nagapangayo sang inyo bulig. Ginlaragway ni Pangulong Nelson ang aton may edad na nga mga misyonero, “Hubin pa sila sa espiritu, maalam, kag handa magtrabaho.”20
Sa patag sang misyon, madamo kamo sang mga oportunidad: pwede kamo magserbisyo sa mga mission office ukon templo, magpabakod sang lamharon nga mga misyonero, magsuporta sa magagmay nga mga branch, magtrabaho sa mga FamilySearch center ukon lugar sang aton kasaysayan, magtudlo sa institute, maghatag sang tawhanon nga bulig, magtrabaho upod ang mga young adults, magbulig sa mga employment center ukon mga uma sang Simbahan. Ang mga paagi sa pagserbisyo, kon ano ang bagay sa inyo, kon diin kamo kinahanglanon, kag kon paano maghanda ara tanan sa website nga “Senior Missionary.”21 Pwede man ninyo istoryahon ang inyo bishop ukon branch president.
Madamo na ako sang gintawag nga mag-asawa para magserbisyo kag nakita ang Kasanag ni Cristo sa ila mga guya.22 Pagbalik nila, ginlaragway nila nga mas naglapit sila sa Ginuo kag sa isa kag isa, nabatyagan ang Espiritu sang Ginuo nga ginbubo sa ila, kag nahibal-an nga may maayo sila nga nahimo.23 Sin-o ang indi gusto sina?
Ang misyon mahimo nga mangin pinakadako nga parte sang kabuhi sang mag-asawa. Pwede ini tig-ulohan sang “Basi Kinahanglan Ako sang Ginuo.”24 Pwede nga bag-o ang lugar para sa inyo; pero, ang gahum sang Espiritu magaabiabi sa inyo.
Ang akon ginikanan kag ang pulo ka linibo ka nagbalik na nga mga misyonero nga mag-asawa nagpamatuod sang kalipay nga nakita nila sa pang-misyonaryo nga buluhaton. Siling sang Ginuo sa balaan nga kasulatan sa ulihing-adlaw, “Kag kon mangin amo sini nga magpangabudlay kamo sa tanan ninyo nga adlaw sa pagwali sang paghinulsol sa sining katawhan, kag makadala sing bisan isa lang ka kalag sa akon, daw ano kadako ang inyo kalipay upod sa iya sa ginharian sang akon Amay!”25
Ginlaragway ni Isaias sa binalaybay kon ano ang buot silingon sang magserbisyo sa “patag” sang misyon. Ang balaan nga kasulatan nagasiling sa aton “ang uma amo ang kalibutan.”26 Ginsulat sining dumaan nga propeta, “Pagatuytoyan kamo sa paggwa sa siudad nga indi maano: Ang mga kabukiran kag ang mga kabakuloran sa hinali magakinanta kag ang mga kakahuyan magahinugyaw.”27 Ang mga bukid, bakulod, kaumhan, kag kakahuyan daw pareho sang mga mission president, bishop, district leaders, mga miyembro, kag mga nagapangita sang kamatuoran nga “wala sila kahibalo kon diin ini pangitaon,”28 Magapamatuod sila nga ang mga senior missionary nagaliwat sang palibot paagi sa ila testimonya sang aton Manluluwas kag Manunubos nga si Jesucristo.
Bilang Apostoles sang Ginuong Jesucristo, ginapangabay ko kamo nga magserbisyo bilang misyonero sa pagtipon sang Israel kag kuntani magserbisyo liwat. Kinahanglan namon kamo—kinahanglan namon kamo. Nagapasalamat kami sa inyo nga mga may edad sa inyo pagpangabuhi kag sa inyo mga ehemplo sa inyo balay, mga ward, kag mga stake. Ginaagda ko kamo karon nga dalhon ang inyo nahibal-an, upod ang inyo madugay na nga mga testimonya, kag maglakat sa misyon. Ginapangamuyo ko nga sa dason nga magpungko ako sa pagdestino sang may edad na nga mag-asawa may ginatos na sa inyo nga nagapaabot para sa inyo tawag.
Ginapromisa ko man nga samtang nagaserbisyo kamo, mabatyagan ninyo ang pagpalangga sang Ginuo sa inyo kabuhi, makilala ninyo Sia, makilala Niya kamo, kag “daw ano kadako sang inyo mangin kalipay.”29 Ang inyo matutom nga pagserbisyo kay Jesucristo magainspirar kag magabugay sang inyo pamilya, sang inyo mga apo, kag mga apo sa tuhod. “Ang paghidaet, kag gugma [maga]bugana”30 sa ila mga kabuhi sa maabot nga tinuig. Nagapromisa ako. Sa ngalan ni Jesucristo, amen.