14:12

Ika-pulo: Pagbukas sang mga Bintana sang Langit

Ni Elder Neil L. Andersen

Sang Korum sang Dose ka Apostoles

Ang mga bintana sang langit nagabukas sa madamo nga paagi. Magsalig sa tiyempo sang Ginuo; ang mga bugay pirme nagaabot.

Mahal kong mga kauturan, samtang ara ako sa South America sang nagligad lang, si Brother Roger Parra sang Venezuela nag-istorya sa akon sang masunod nga eksperiyensya:

“Sang 2019, ang Venezuela gin-uyog sang mga problema nga nagtuga sang pagkadula sang kuryente sing lima ka adlaw.

“Ang kagamo kag anarkiya naglapnag sa kadalanan, kag madamo sing desperado nga mga tawo nga wala sing bastante nga pagkaon.

“Ang pila sa ila nagsugod sa pagpangawat sa mga kalan-an, nga ginapangguba ang tanan nga ila maagyan.

“Bilang tag-iya sing isa ka gamay nga panaderya, nagkabalaka gid ako sa amon negosyo. Bilang pamilya, nagdesisyon kami nga ihatag na lang ang tanan nga pagkaon sa amon panaderya sa mga tawo nga nagakinahanglan.

“Isa ka madulom kaayo nga gab-i may mga riot bisan diin lang. Ang akon gid lang ginapaligban amo ang kaluwasan sang akon pinalangga nga asawa kag kabataan.

“Pagkakaagahon nagkadto ako sa amon panaderya. Sa masubo, ang tanan nga malapit nga mga negosyo sang pagkaon ginguba sang mga nagapangawat, pero sa akon daku nga katingala, ang amon panaderya wala naano. Wala sing may ginguba. Mapainubuson ako nga nagpasalamat sa akon Amay nga Langitnon.

“Pag-abot sa balay, ginsugiran ko ang akon pamilya sang bugay kag pag-amlig sang Dios.

“Daku ang ila pagpasalamat.

“Ang akon subang nga lalaki nga si Rogelio, dose anyos pa lamang, nagsiling, ‘Papa!!! Kabalo ko kon ngaa gin-amligan ang aton tindahan. Ikaw kag si Mama pirme nagabayad sang inyo ika-pulo.’”

Si Brother Parra nagsiling: “Ang mga pulong ni Malaquias nagsulod sa akon hunahuna. ‘Kag sabdungon ko ang manughalunhon bangod sa inyo, kag indi niya pagpapason ang mga bunga sang inyo duta.’ [Malaquias 3:11]. Nagluhod kami kag nagpasalamat sa amon Amay nga Langitnon sa Iya milagro.”¹

Tilawi Ako Karon sa Sini

Ang tanan nga may ara kita kag tanan nga kon ano kita nagahalin sa Dios. Bilang mga disipulo ni Cristo, handa kita magpaambit sa sinang ara sa palibot naton.

Sa tanan nga ginahatag sang Ginuo sa aton, ginpangayo Niya sa aton nga ibalik sa Iya kag sa Iya ginharian sa duta ang 10 porsyento sang aton kita. Ginpromisa Niya sa aton nga kon tampad kita sa aton mga ika-pulo, Iya “buksan … ang mga talambuan sang langit, kag iula … ang pagpakamaayo, sa bagay nga wala na sing masudlan.”² Ginpromisa Niya sa aton nga amligan Niya kita halin sa kalainan.³ Ining mga promisa pat-od gid,⁴ nga ang Ginuo nagpahayag, “Tilawi ako karon sa sini,”⁵ isa ka dinalan nga indi makita sa iban nga bahin sang balaan nga mga kasulatan kundi sa pagsambit lang kay Malaquias.

Ang mga bintana sang langit nagabukas sa madamo nga paagi. Ang iban temporal, pero madamo ang espiritwal. Ang iban indi hilmunon kag mahapos nga indi matalupangdan. Magsalig sa tiyempo sang Ginuo; ang mga bugay pirme nagaabot.

Nasuboan kita para sa mga nabudlayan nga makaangkon sang mga kinahanglanon sang kabuhi. Ang Simbahan sang nagligad lang nagdonar sang 54 milyon ka dolyares agud maghatag sang kaumpawan sa makaluluoy nga mga kabataan kag mga iloy sa bilog nga kalibutan.⁶ Kag tungod sa mga halad halin sa inyo bulanan nga pagpuasa, ang aton maayo nga mga bishop nagabulig sa linibo kada semana nga temporaryo nagakinahanglan sang pagkaon sa ila mga lamisa, bayo sa ila lawas, kag atop sa ila mga ulo. Ang permanente lang gid nga solusyon sa kaimolon sining kalibutan amo ang ebanghelyo ni Jesucristo.⁷

Pagpakita sang Pagtuo

Ang Apostoles nga si Pablo nagpaandam nga ang kaalam sang tawo nakahangop sang mga butang sang tawo pero nabudlayan maghangop sang mga butang sang Dios.⁸ Ang kalibutan nagatumod sa ika-pulo bilang aton kwarta, apang ang sagrado nga layi sang ika-pulo una gid parte sa aton pagtuo. Ang mangin tampad sa aton mga ika-pulo isa ka paagi nga ginapakita naton ang aton kahanda nga unahon ang Ginuo sa aton mga kabuhi, labaw pa sa aton kaugalingon nga mga handum kag mga interes. Ginapromisa ko nga kon magsalig kamo sa Ginuo, ang mga bugay sang langit magasunod.

Si Jesus nagsiling nga ihatag “kay Cesar ang mga butang nga iya ni Cesar; kag sa Dios ang mga butang nga iya sang Dios.”⁹ Ang nabanhaw nga Manluluwas nagsugo sa mga Nefinhon nga isulat sa ila rekord ang Iya mga promisa nga makita sa Malaquias.¹⁰ Sa aton panahon, ang Ginuo nagkompirma liwat sang diosnon nga layi sang ika-pulo nga nagapahayag: “Ini ang pagsugod sang pagbayad sang ika-pulo sang akon katawhan. Kag magbayad [sila] sang ika-napulo nga bahin sang tanan nila nga ganansya sa kada tuig; kag mangin permanente ini nga layi sa ila tubtob sa wala’y katapusan.”¹¹

Ang Ginuo maathag nga nagtudlo kon paano ibayad ang ika-pulo nga nagasiling, “Dalha ninyo ang bug-os nga ikapulo sa balay sang bahandi,”¹² buot silingon nga dal-on ang mga ika-pulo sa Iya ginpanumbalik nga ginharian, Ang Simbahan ni Jesucristo sang mga Santos sa Ulihing mga Adlaw.¹³ Gintudlo Niya nga ang paggamit sining sagrado nga mga ika-pulo binagbinagon paagi sa pangamuyo sang konseho sang Unang Pangulohan, sang Korum sang Dose ka Apostoles, sang Nagapangulo nga Bishopric, “kag sang akon kaugalingon nga tingug sa ila, siling sang Ginuo.”¹⁴

Ang Sagrado nga mga Pondo sang Ginuo

Ining sagrado nga mga pondo indi iya sang mga lider sang Simbahan. Iya ini sang Ginuo. Ang Iya mga alagad nakahibalo sang sagrado nga kinaiya sang ila pagkatulugyanan.

Si Pangulong Gordon B. Hinckley nagsugid sang iya eksperiyensya sang bata pa sia: “Sang gamay pa ako nagpamangkot ako sa akon tatay … parte sa paggasto sang mga pondo sang Simbahan. Ginpahanumduman niya ako nga may obligasyon nga ginhatag ang Dios sa akon nga magbayad sang akon mga ika-pulo kag mga halad. Sa paghimo ko sini, [siling sang akon tatay,] inang akon ginahatag indi na akon. Iya na ini sang Ginuo kon kay sin-o ko ini ginkonsagrar.” Ang iya amay nagdugang: “Kon ano ang ginahimo sang mga awtoridad sang Simbahan sa sini indi mo na pagpaligban pa [Gordon]. May-salabton sila sa Ginuo nga magapangayo sang pagkwenta sa ila mga kamot.”¹⁵

Nabatyagan gid namon ang kabug-at nga mangin “may-salabton sa Ginuo.”

Ang Inyo Maalwan nga mga Ika-pulo kag mga Halad

Halin sa maalwan nga mga ika-pulo kag mga halad nga ginkonsagrar ninyo sa Ginuo, kapin sa isa ka bilyon dolyares ang gingamit sa pagbugay sang mga nagakinahanglan sang nagligad nga tuig.¹⁶

Sa pagtuman sang aton dako nga responsibilidad nga dal-on ang ginpanumbalik nga ebanghelyo sa bilog nga kalibutan, may ara kita kapin sa 71,000 ka misyonero nga nagaalagad sa 414 ka misyon.¹⁷ Tungod sang inyo mga ika-pulo kag mga halad, ang mga misyonero makaalagad bisan ano pa ang pinansyal nga sitwasyon sang ila pamilya.

Madamo gid kaayo nga mga templo ang ginapatukod sa bilog nga kalibutan. Sa karon, 177 ka templo ang nagaoperar, 59 ang ginatukod ukon ginakay-o, kag 79 pa gid ang ginaplano kag ginadesinyo.¹⁸ Ang inyo mga ika-pulo nagatugot sang mga bugay sang templo nga mahamtang sa mga lugar nga ang Ginuo lamang ang nakahibalo.

May kapin sa 30,000 ka kongregasyon nga nagasimba sa linibo ka mga kapilya kag iban pa nga mga pasilidad sa 195 ka mga pungsod kag teritoryo.¹⁹ Tungod sang inyo tampad nga pagbayad sang mga ika-pulo, ang Simbahan ginapahamtang sa malayo nga mga lugar nga indi na ninyo makadtoan sa tunga sang matarong nga mga Santos nga indi na ninyo makilala.

Ang Simbahan sa karon nagaisponsor sing lima ka institusyon sang mas mataas nga pagtuon.²⁰ Ang mga ini nagaserbe sang kapin sa 145,000 ka estudyante. Isa ka gatos kag napulo ka libo nga mga klase ang ginatudlo kada semana sa aton mga seminary kag mga institute.²¹

Ining mga bugay kag madamo pa gid nagaabot sa daku nga bahin halin sa mga hubin kag mga tigulang nga may lainlain nga kahimtangan sa pangabuhi nga nagabayad sing tampad nga ika-pulo.

Ang espirituhanon nga gahum sang diosnon nga layi sang ika-pulo wala ginatakos sa kantidad sang kwarta nga ginahatag, kay ang manggaranon kag ang imol ginasugo sang Ginuo nga maghatag sing 10 porsyento sang ila kita.²² Ang gahum nagahalin sa pagbutang sang aton pagsalig sa Ginuo.²³

Ang dugang nga kabuganaan halin sa Ginuo nga ginpadala paagi sa inyo maalwan nga pagbayad sang mga ika-pulo nagpabakod sang mga reserba sang Simbahan, nga nagahatag sang mga oportunidad agud pasanyugon ang buluhaton sang Ginuo labaw sa bisan ano nga aton naeksperiyensyahan. Ang tanan nahibaloan sang Ginuo, kag sa husto nga tion, makita naton nga matuman ang Iya sagrado nga mga katuyoan.²⁴

Ang mga Bugay Nagaabot sa Madamo nga Paagi.

Ang mga bugay sang ika-pulo nagaabot sa madamo nga paagi. Sang 1998 gin-updan ko si Elder Henry B. Eyring sa isa ka dako nga miting sa Simbahan sa Utah nga sa karon kilala na bilang Silicon Slopes, isa ka komunidad nga may dako nga pag-uswag sa teknolohiya. Isa ato ka tion sang kauswagan, kag si Elder Eyring nagpaandam sa mga Santos parte sa pagkomparar sang kon ano ang may ara sila sa iya sang iban kag paghandum sing dugang pa. Madumduman ko gid ang iya promisa nga kon magbayad sila sing tampad nga ika-pulo, ang ila handum para sa materyal nga mga pagkabutang magabuhin. Sa sulod sang duha ka tuig, madasig nga nag-usmod ang teknolohiya. Madamo ang nawad-an sang obra, kag ang mga kompanya nabudlayan sa sining tion sang pinansyal nga pagbag-o. Nabugayan ang mga nagsunod sa laygay ni Pangulong Eyring.

Ang iya promisa nagpahanumdom sa akon sing isa pa ka eksperiyensya. Nakilala ko ang 12-anyos nga si Charlotte Hlimi malapit sa Carcassonne, France, sang 1990 samtang nagaalagad ako bilang mission president. Ang mga Hlimi isa ka matutum nga pamilya nga nagaistar sa isa ka simple nga apartment upod ang walo ka kabataan. May ara sila sang larawan sang Manluluwas kag sang propeta sa dingding. Sa interbyu para sa iya patriarchal blessing, ginpamangkot ko si Charlotte kon nagabayad sia sing tampad nga ika-pulo. Nagsabat sia, “Huo, President Andersen. Gintudloan ako ni nanay nga may temporal nga mga bugay kag espirituhanon nga mga bugay nga nagahalin sa pagbayad sang amon ika-pulo. Gintudloan ako ni nanay nga kon sige-sige kami nga nagabayad sang amon ika-pulo, indi kami mawad-an. Kag President Andersen, wala kami nawad-i.”

Sa paghatag niya sa akon sing permiso nga ipaambit ang iya istorya, si Charlotte, nga karon 45 na kag naselyohan na sa templo, nagkomento: “Ang akon testimonya parte sa ika-pulo matuod gid sadto nga tion, kag mas nagbaskog pa gid subong. Nagapasalamat gid ako para sa sining kasugoan. Sa akon pagtuman sini padayon ako nga ginabugayan sing bugana.”²⁵

Pila ka adlaw ang tagsa sa aton magatapos sang aton dutan-on nga paglakbay. Beynte-singko ka tuig ang nagligad, pila lang ka adlaw antes ang akon ugangan nga si Martha Williams napatay sa kanser, nakabaton sia sing diutay nga kwarta halin sa koreo. Gilayon niya nga ginsugo ang akon asawa nga si Kathy nga kuhaon ang iya tsekero kay mabayad sia sang iya ika-pulo. Bangod maluya na kaayo ang iya iloy nga haluson na sia makasulat, si Kathy nagtanyag nga sia na lang ang masulat sa tseke para sa iya. Ang iya iloy nagsabat, “Indi lang, Kathy. Gusto ko ako lang.” Kag dugang pa niya, “Gusto ko nga mangin matarong sa atubang sang Ginuo.” Isa sang katapusan nga mga bagay nga ginhimo ni Kathy para sa iya iloy amo ang ihatag ang sobre sang iya ika-pulo sa iya bishop.

Importante nga Buluhaton sang Dios

Mga kauturan ko, ang Simbahan ni Jesucristo sang mga Santos sa Ulihing mga Adlaw “gindala halin sa kaguom,”²⁶ nga nagadala sing dalagko nga mga bugay sa bilog nga kalibutan. May ara sinang mga magasuporta sa aton kag may mga ara man nga indi. Ginhunahuna ko ang mga pulong sang maalamon nga si Gamaliel, nga, sa pagkabati niya sang mga milagro sang mga Apostoles nga sanday Pedro kag Juan, nagpaandam sang konseho sa Jerusalem:

“Pabay-i [ining mga tawo]: kay kon … ining buluhaton iya sang tawo, mangin wala ini sing pulos:

“Apang kon iya ini sang Dios, indi kamo makapierdi sini; kay basi … masalapoan kamo nga magpakigbato batok sa Dios.”²⁷

Kamo kag ako kabahin sang importante nga buluhaton sang Dios sa duta. Indi ini mangin wala pulos kundi magapadayon nga mag-uswag sa bilog nga kalibutan, nga ginahanda ang alagyan para sa pagbalik sang Manluluwas. Si Pangulong Russell M. Nelson nagpahayag: “Sa maabot nga inadlaw, makita naton ang pinakadalagko nga pagpakita sang gahum sang Manluluwas nga amo pa lang makita sang kalibutan. Halin karon tubtob sa tion sang Iya pagbalik … magahatag Sia sang indi maisip nga mga pribilihiyo, mga bugay, kag mga milagro sa mga tampad.”²⁸

Ini ang akon saksi. Si Jesus ang Cristo. Ini ang Iya balaan nga buluhaton. Magakari sia liwat. Sa ngalan ni Jesucristo, amen.