Mga Pagpabatyag sang Espiritu

Ni Elder Gary E. Stevenson

Sang Korum sang Dose ka Apostoles

Ang pirme nga pag-upod sang Balaan nga Espiritu amo ang pinakadako sa espirituhanon nga mga dulot nga maagom sang mga Santos sa Ulihing mga Adlaw.

Pauna

Sang san-o lang, ang mga mata sang mga mahiligon sa isports nakatutok sa 2023 FIFA Women’s World Cup nga gin-host sang Australia kag New Zealand. Ang sagaran kaayo nga mga atleta naggikan sa masobra 200 ka nasyunal nga mga grupo sa bilog nga kalibutan nagpakita sang pagkapursigido, dedikasyon, talento, kag kaabtik samtang ginalab-ot ang pinakamataas nga pagkilala sa kabilogan nga soccer.

Nagadayaw kita sa mga humalampang sa lainlain nga isports kag sa lainlain nga patag nga nakalab-ot sa pinakamataas nga lebel sang ila ikasarang. Ginatumod naton ang ila natural nga mga talento ukon dulot nga ginhatag sang Dios. Dala diri ang mga talento sa saot, gymnastics, musika, art, drama, matematika, siyensya, kag madamo pa. Ang tagsa sini sa ila nagapakita sang ginhatag sang Dios nga mga talento nga ginpapino kag ginperpekto sang bug-os-kabuhi nga kapisan, pagtuon, kag praktis. Ang talentado nga mga tawo may mga dulot nga ginhatag sang Dios.

Paggamit sang Espirituhanon nga mga Dulot

Sa perspektibo sang ebanghelyo, ginahatagan sang Dios ang Iya mga anak sang madamo nga espirituhanon nga mga dulot, gani nangin talentado sila sa espirituhanon. Ang mga miyembro sang Simbahan nga nagatuman sang mga kasugtanan ginahatagan sang mga dulot sang Balaan nga Espiritu, dala ang testimonya parte kay Jesucristo bilang aton Manluluwas, ang dulot sang Balaan nga Espiritu, ang dulot sang pagtuo nga magpang-ayo kag mag-ayo, dulot sang paghangop, dulot sang pagbaton sang mga milagro, kag ang mga dulot sang kaalam kag ihibalo.¹ Ginaagda kita sang Ginuo nga matutom naton nga pangitaon ang pinakamaayo nga mga dulot, bisan ang espirituhanon nga mga dulot. Ginahatag Niya ining espirituhanon nga mga dulot sa aton para bugayan kita kag para gamiton sa pagbugay sa iban.²

Balik sa aton paanggid sang talentado nga mga humalampang, importante nga tandaan naton nga ang pag-angkon sang talento wala nagakahulugan nga sagad ka na. Bisan nga natural sa iya inang indi matupungan nga talento, paagi lamang sa mapisan kag dedikado nga pagpraktis kag pagpaninguha nga malab-ot niya ang pinakamataas nga ikasarang. Bisan ang mga regalo nga mabaton naton kag ginabuksan masami may upod sinang ginakahadlukan naton nga instruksyon “kinahanglan i-assemble.”

Naobserbahan ko man nga mabudlay tun-an sa panugod ang espirituhanon nga mga dulot. Ang paggamit sang espirituhanon nga mga dulot nagakinahanglan sang espirituhanon nga paggamit. “Ang pag-angkon sang giya sang Balaan nga Espiritu sa imo kabuhi nagakinahanglan sang espirituhanon nga trabaho. Ini nga trabaho kasami may kaupod nga sinsero nga pangamuyo kag sige-sige nga pagtuon sang balaan nga kasulatan. Upod man diri ang pagtuman sang imo mga kasugtanan kag sang mga kasugoan sang Dios. Upod sini ang pag-ambit sang sakramento kada semana nga kaangay-angay.”³

Ano ang mga bunga sang paggamit sang espirituhanon nga mga dulot? Nagalakip ini sang mga pagpabatyag halin sa Espiritu nga nagabulig sa aton nga atubangon ang aton adlaw-adlaw nga mga panginahanglan kag ipakita sa aton kon ano ang himuon kag ihambal—kag mga bugay sang kalinong kag kasulhay. Kon pamatian naton kag aktuhan ining espirituhanon nga mga pagpabatyag, ginapadako sang Balaan nga Espiritu ang aton abilidad kag ikasarang nga masobra pa sangsa mahimo naton nga kita lang. Ining bilidhon nga espirituhanon nga mga dulot makabulig sa aton sa tagsa ka aspeto sang aton mga kabuhi.⁴

Ang pirme nga pag-upod sang Balaan nga Espiritu amo ang pinakadako sa espirituhanon nga mga dulot nga maagom sang mga Santos sa Ulihing mga Adlaw.

Ano kaimportante ining dulot? Si Pangulong Russell M. Nelson maathag nga nagsabat sining pamangkot sang magsiling sia nga “sa maabot nga mga adlaw, indi posible nga makalampuwas kita sing espirituhanon kon wala ang nagagiya, nagatudlo, nagapasulhay, kag dalayon nga impluwensya sang Balaan nga Espiritu.”⁵

Paano Agdahon kag Makilala ang mga Pagpabatyag sang Espiritu

Sa tion sang akon pag-alagad, natalupangdan ko ang palareho nga handum sang tagsa-tagsa nga mahibal-an kon paano agdahon kag kilalahon ang mga pagpabatyag sang Balaan nga Espiritu. Ang mga pagpabatyag sang Espiritu personal kaayo kag nagaabot sa lainlain nga porma. Pero, ginbuyagan kita nga maangkon ang mga pulong sang mga propeta, dumaan kag moderno, nagahatag sa aton sang bilidhon nga ihibalo kon paano magbaton sang direksyon halin sa Espiritu.

Tugoti ako nga maghatag sang apat ka giya nga mga prinsipyo nga basi makabulig sa inyo sa pag-agda kag pagkilala sang mga pagpabatyag sang Espiritu.

Magtindog Kamo sa Balaan nga mga Lugar

Ang una amo nga magtindog sa balaan nga mga lugar.⁶ Sang sini lang nakigbahin ako sa open house sang templo sa Tokyo Japan. Ang sabat sa pormal nga mga imbitasyon nga ginpadala sa media kag VIP nga mga bisita sobra sangsa ginpaabot. Ginatos ang nag-entra sa sining mga tour sa templo. Natandog gid ang mga bisita sa katahum sang templo, pati na sa disenyo kag istilo nga may koneksyon sa tradisyon sang Japan. Mas makatalandog pa gid ang malinong kag matinahuron nga reaksyon sang mga bisita sang ginlaragway ang mga ordinansa sang mga katigulangan sa mga kuwarto kon diin ini hiwaton. Pero pinakabaskog amo ang mga pagpabatyag sang Espiritu.

Isa ka higayon upod sa isa ka kilala nga opisyal sang gobyerno ang nagtatak sa akon kaisipan. Pagkatapos sang tion sang pagpamalandong sa celestial room, emosyunal kag natandog gid sing labi, naghutik sia sa akon, “Bisan ang hangin nga ginahaklo ko sa sini nga kuwarto daw lain sa pamatyagan.” Nahangpan ko nga gusto niya ilaragway ang presensya sang Balaan nga Espiritu, nga matuod, nagatiner sa sagrado nga mga lugar. Kon nagahandum kamo nga mabatyagan ang Espiritu, magkadto sa lugar kon diin mahapos nga magtiner ang Espiritu.

Ang aton mga templo kag mga puluy-an amo ang pinakasagrado sa sining mga lugar. Diri naton mahapos nga maagda kag makilala ang Espiritu. Ang iban pa nga balaan nga mga lugar amo ang mga kuwarto kag espasyo sa simbahan, mga bilding sang seminary kag institute, kag mga lugar sang kasaysayan sang Simbahan kag mga visitor center. Magtindog kamo sa balaan nga mga lugar.

Magtindog upod sa Balaan nga mga Tawo

Ikaduha, magtindog upod sa balaan nga mga tawo. Ilaragway ko ining ikaduha nga giya nga prinsipyo paagi sa isa ka inagihan.

Indi ko gid malimtan ang pagkadto sa isa ka debosyonal nga ginhiwat sa isa ka sikat nga sports arena. Masami ini nga arena puno sang magahod nga mga nagaidolo sang ila mga grupo sa hinampang kag bisan sa pagsunlog sa ila kontra. Pero sa ini nga gab-i, lain ang palibot. Napuno ang arena sang linibo ka mga lamharon nga nagtipon para pasidunggan kag saulugon ang kabuhi ni Propetang Joseph Smith. Ang ila matinahuron, malinong nga pamatasan, nagapasalamat, kag mainampuon nga mga tagipusuon ang nagpuno sang arena upod ang presensya sang Balaan nga Espiritu. Literal ko ini nga makita sa ila mga nawong. Amo ato ang dulot sang Balaan nga Espiritu nga nagahikot, nagapabakod sang mga testimonya nga ginapahayag parte kay Joseph Smith kag sa Pagpanumbalik sang ebanghelyo.

Indi mapunggan ang Espiritu nga magtambong sa pagtililipon sang balaan nga mga tawo. Kon nagahandum kamo nga mabatyagan ang Espiritu, mag-upod sa mga tawo nga sa ila mahapos nga magtiner ang Espiritu. Ginhambal ini sang Manluluwas sa sini nga paagi, “Kay kon diin ang duha ukon tatlo nga nagatipon sa akon ngalan, yara ako sa tunga nila.”⁷ Sa mga lamharon, binagbinaga ang inyo mga pagtililipon upod sa balaan nga mga tawo, mga korum kag klase, FSY kag seminary, aktibidades sa ward kag stake, kag mga ward choir. Pilia nga mag-upod sa mga tawo kag magkadto sa mga lugar kon diin makita ang pagkamatarong. Mangin mabakod sa inyo kadamuon Magpangita sang maayo nga mga abyan. Mangin maayo nga abyan. Suportahi ang tagsa-tagsa bisan diin man kamo. Magtindog upod sa balaan nga mga tawo.

Magpamatuod parte sa Balaan nga mga Kamatuoran

Ikatatlo, magpamatuod pirme parte sa balaan nga mga kamatuoran kon kinahanglanon. Ang Manugpasulhay masami nagapaambit sang Iya tingug kon nagapamatuod kita gamit ang aton tingug. Ang Espiritu nagasaksi sa pareho nagahambal kag nagapamati.

Nadumduman ko nga kaisa nagsakay ako sa taxi sang 45-minutos sa New York City. Kanami sang amon pag-istoryahanay sang drayber parte sa ebanghelyo samtang nagapadulong ako sa airport, ginbayran ko sia kag naghanda nga magpanaog sa taxi. Kag akon narealisar nga wala pa gale ako nakapamatuod parte sa akon gin-istorya sa iya. Nagpundo sing makadali, nagpaambit ako sang simple kag malip-ot nga testimonya, nga nag-agda sang Espiritu, kag nagpaluha sa amon nga duha.

Kon pangitaon ninyo kag gamiton ang mga oportunidad sa pagpaambit sang inyo testimonya sa iban, makatuga kamo sang tinion nga makilala ninyo mismo ang Espiritu.

Magpamati sing Maayo sa Balaan nga Espiritu

Ang katapusan nga prinsipyo amo ang magpamati sa Balaan nga Espiritu. Sarang Sia nga mangin kaupod naton pirme, pero nagahambal Sia sa mahinay, malinong nga paagi. Si propeta Elias nakadiskubre nga ang tingug sang Ginuo wala sa hangin, sa linog, ukon sa kalayo—kundi sa “isa ka tingug nga mahinay.”⁸ Indi ini “tingug sang daguob,” kundi “isa ini ka mahinay nga tingug sang himpit nga kahugmay, nga daw subong ini sang isa ka hutik,” pero sarang sini “[maglapos] bisan sa kalag mismo.”⁹

Si Pangulong Boyd K. Packer nagsiling: “Wala ginakuha sang Espiritu ang aton atensyon paagi sa pagsinggit ukon pag-uyog sa aton sa pisikal. Sa baylo nagahutik ini. Malum-ok ini nga nagatandog sa aton nga kon lain ang aton ginapaminsar, indi naton ini mabatyagan.”¹⁰ Naobserbahan ko nga kon kaisa ang Iya tingug tama ka hinay, ukon lain ang akon ginapaminsar, nga ang mahal mo sa kabuhi ang makabaton sini para sa imo. Kadamo na gid nga beses nga ang mga pagpabatyag sang Balaan nga Espiritu nag-abot sa akon paagi sa akon asawa nga si Lesa. Ang matarong nga mga ginikanan ukon mga lider mahimo nga makabaton man sang inspirado nga giya para sa inyo.

Ang kagahod, pagkinagula, kag pagbinaisay nga komon sa kalibutan sa karon mahimo nga magdaog sang malinong kag mahipos nga pagpabatyag sang Balaan nga Espiritu. Magpangita sang malinong, balaan nga lugar kon diin kamo makabaton sang direksyon halin sa Espiritu.

Mga Pulong sang Paandam

Samtang ginabinagbinag ninyo ining mga prinsipyo sa pag-agda kag pagkilala sang Espiritu, hunahunaa ang masunod nga mga pulong sang paandam nga giya para masiguro ang inyo espirituhanon nga balatyagon.¹¹

Kumpirmaha ang espirituhanon nga mga pagpabatyag sa inyo. Ang mga pagpabatyag halin sa Espiritu magasunod sa balaan nga kasulatan kag sa mga pinanudlo sang buhi nga mga propeta.

Siguroha nga ang mga balatyagon nga inyo nabaton santo sa inyo hilikuton. Magluwas kon gintawag kamo paagi sa husto nga awtoridad, ang mga pagpabatyag halin sa Espiritu wala ginahatag sa inyo para maglaygay ukon magsaway sang iban.

Ang espirituhanon nga mga butang indi mapilit. Sarang kamo magpatubo sang pamatasan kag sang palibot nga nagaagda sang Espiritu, kag mahanda ninyo ang inyo kaugalingon, pero indi ninyo madiktahan kon paano kag kon san-o mag-abot ang inspirasyon sa inyo. Mangin pasensyoso kag magsalig nga mabaton ninyo ang inyo kinahanglan sa husto nga tion.

Gamita ang pinakamaayo ninyo nga pagbanta. Kon kaisa gusto naton nga ginatudloan sang Espiritu sa tanan nga butang. Pero, masami nga gusto sang Ginuo nga gamiton naton ang ginhatag sang Dios sa aton nga kaalam kag maggiho sa paagi nga sibo sa aton naintiendihan. Si Pangulong Dallin H. Oaks nagtudlo:

“Ang handum nga pangunahan sang Ginuo kusog, pero kinahanglan nga updan ini sang paghangop nga ang aton Amay nga Langitnon nagabilin sang madamo nga desisyon sa aton personal nga pagpili. Ang mga tawo nga nagasaylo sang tanan nga pagdesisyon sa Ginuo kag nagapangayo sang rebelasyon sa tagsa ka pagpili sa ulihi makasalapo sang mga sirkumstansya nga sa diin mangamuyo sila para sa giya kag indi nila ini mabaton. …

“Dapat naton tun-an ang mga bagay sa aton mga kaisipan. … Dayon dapat naton ini pangamuyoan kag aktuhan. … Kon indi kita makabaton sang giya, dapat kita mag-akto gamit ang aton pinakamaayo nga paghukom.”¹²

Konklusyon nga may Imbitasyon

Ang konklusyon, ang mga Santos sa Ulihing mga Adlaw talentado nga katawhan nga nagatuman sang mga kasugtanan. Wala sapayan sini, nagadepende sa tagsa sa aton ang pagtinguha sa paggamit sang aton espirituhanon nga mga dulot kag dayon mag-agda kag magtuon sa pagkilala sang mga pagpabatyag sang Espiritu. Ang apat ka giya nga mga prinsipyo nga makabulig sa aton sa sining kinahanglanon nga espirituhanon nga hilikuton:

Magtindog kamo sa balaan nga mga lugar.
Magtindog upod sa balaan nga mga tawo.
Magpamatuod parte sa balaan nga mga kamatuoran.
Magpamati sing maayo sa Balaan nga Espiritu.

Ang inyo ikasarang sa pag-agda kag pagkilala sang mga pagpabatyag sang Espiritu magatubo sing amat-amat. “Ang mangin ugyon sa lenggwahe sang Espiritu daw pareho sang pagtuon sang lain nga lenggwahe. Amat-amat ini nga proseso nga nagakinahanglan sang matutom, pasensyoso nga pagpanikasog.”¹³

Balik sa ginsugdan naton, palihog dumduma nga bilang mga Santos sa Ulihing mga Adlaw, talentado kamo. Hunahunaa ining pamilyar nga hitabo sang Domingo sang pagpuasa, nga ginlaragway sa akon sining nagligad lang. Isa ka bata, nga nagatindog sa bangko, haluson makita sa ibabaw sang pulpito. Ang iya tatay nagatindog sa iya tupad nga nagapaisog sa iya kag nagabulig hutik sa iya samtang malipayon niya nga ginasiling, “Anak ako sang Dios.”

Ang madason nga testimonya naghalin sa isa ka young adult nga naghambal antes sia magsugod, “Tani may ara man sang maghutik sa akon ba.” Dayon gulpi lang nag-abot sa iya ang inspirasyon kag nagpamatuod, “May ara gid man sang nagahutik sa akon nga pareho sina—ang Balaan nga Espiritu!”

Nagatakop ako upod ang imbitasyon labi na gid sa tanan nga mga lamharon! Madamo sa inyo ang nagasugod sang inyo adlaw paagi sa pagtulok sa espiho. Bwas, sini nga semana, sini nga tuig, pirme, magpundo samtang ginatulok ninyo ang inyo kaugalingon sa espiho. Pamensara, ukon ihambal sing mabaskog kon gusto ninyo: “Wow, tan-awa bala ako! Kanami sa akon! Anak ako sang Dios! Kilala Niya ako! Palangga Niya ako! Ginbugayan sang Balaan nga Espiritu nga maupod ko pirme!”

Ginadugang ko ang akon testimonya sa inyo, mga talentado nga mga Santos sa Ulihing mga Adlaw, parte sa Dios nga Amay, kay Jesucristo, kag sa Balaan nga Espiritu, nga nagapamatuod parte sa Ila. Sa ngalan ni Jesucristo, amen.