Ang Gahum ni Jesucristo sa Aton Kabuhi Adlaw-Adlaw
Ang ginhalinan sang aton kusog amo ang pagtuo kay Jesucristo kon ginahungod naton ang magpalapit sa Iya adlaw-adlaw.
Mahal kong mga utod, ini ang Simbahan ni Jesucristo sang mga Santos sa Ulihing mga Adlaw. Ano nga kalipay nga matipon bilang Iya Simbahan. Nagapasalamat ako nga si Pangulong Russell M. Nelson nagpahanumdom sa aton sa husto nga paggamit sang ngalan sang Simbahan sang Ginuo agud madumduman naton kon kay sin-o ini Simbahan kag kon kay sin-o ang mga panudlo nga aton ginasunod.
Si Pangulong Nelson nagsiling: “Sa maabot nga inadlaw, makita naton ang pinakadakonga mga pagpahayag sang gahum sang Manluluwas nga amo pa lang makita sang kalibutan. … Ihatag Niya ang di-maisip nga mga pribilihiyo, bugay, kag milagro sa mga matutum.”1
Isa sang pinakadako nga mga pribilihiyo sa akon kag akon asawa nga si Renee amo nga makilala ang mga Santos kon diin kami nagaalagad. Nabatian namon ang ila mga istorya, nasaksihan namon ang ila mga kapierdihan, gin-updan namon sila sa ila kalisud, kag nagpangalipay kami sa ila kadalag-an. Nakita namon ang madamo nga bugay kag milagro nga ginhatag sang Manluluwas sa mga matutum. Nakilala namon ang mga tawo nga nagbatas sang imposible, nga nag-antos sing tuman.
Nakita namon ang pagpahayag sang gahum sang Manluluwas sa isa ka balo nga napatyan sang bana samtang yara sila sa buluhaton sang Ginuo sa Bolivia.2 Nakita namon ini sa isa ka hubin nga babayi sa Argentina nga nahulog sa idalom sang tren kag nautod ang iya batiis, tungod lang nga may gusto magkawat sang iya cell phone.3 Kag sa iya solo nga amay, nga kinahanglan buligan kag pabakuron ang iya anak sia sa di-masaysay nga buhat sang kapintas. Nakita namon ini sa mga pamilya nga nawad-an sang mga balay kag mga pagkabutang sa natabo nga sunog sa Chile duha ka adlaw antes sang Paskwa sang tuig 2022.4Nakita namon ini sa mga nag-antos halin sa masakit nga diborsyo kag sa inosente nga mga biktima sang pag-abuso.
Ano ang naghatag sa ila gahum nga mabatas ang mabudlay nga mga butang? Ano ang naghatag sing dugang nga kusog nga magpadayon kon daw nadula na ang tanan-tanan?
Natun-an ko nga ang ginhalinan sinang kusog amo ang pagtuo kay Jesucristo kon ginahungod naton ang magpalapit sa Iya adlaw-adlaw.
Ang propetang si Jacob nagtudlo, “Kag magakari sia sa kalibutan agud nga maluwas niya ang tanan nga tawo kon magpamati sila sa iya tingug; kay tan-awa, pagaantoson niya ang mga kasakit sang tanan nga tawo, huo, ang mga kasakit sang tagsa ka nagakabuhi nga tinuga, nga mga lalaki, mga babayi, kag mga kabataan nga miyembro sang panimalay ni Adan.”5
Kon kaisa, ang magtuo kay Jesucristo daw imposible, halos indi mahimo. Mahimo kita maghunahuna nga ang pagpalapit kay Cristo nagakinahanglan sang kusog, gahum, kag kaperpekto nga wala sa aton, kag daw wala kita sang inisyatibo nga himuon ina tanan. Pero ang natun-an ko sa sining mga tawo amo nga ang pagtuo kay Jesucristo ang nagahatag sa aton sang inisyatibo nga sugdan ang paglakbay. Kon kaisa makapanghunahuna kita, “Kinahanglan ko kay-ohon ang akon kabuhi antes ako magpalapit kay Jesus,” pero ang matuod nagapalapit kita kay Jesus agud kay-ohon ang aton mga kabuhi paagi sa Iya.
Wala kita nagapalapit kay Jesus tungod perpekto kita. Nagapalapit kita sa Iya tungod may mga diperensya kita kag sa Iya mahimo kita nga “maperpekto.”6
Paano kita magsugod sa paggamit sing tag-diutay nga pagtuo adlaw-adlaw? Para sa akon nagasugod ini sa aga: Kon magbugtaw ako, imbes magtan-aw sa akon cell phone, mangamuyo ako. Bisan simple nga pangamuyo. Dayon mabasa ako sang balaan nga kasulatan. Makabulig ini sa akon semanal nga kasugtanan nga ginahimo ko kon mag-ambit ako sang sakramento agud “sia dalayon [ko] nga ginadumdum.”7 Kon sugdan ko ang akon adlaw sang pangamuyo kag balaan nga kasulatan, “madumduman ko Sia” kon magtan-aw ako sa akon cell phone. “Madumduman ko Sia” kon may mga problema ako, kag ginatinguhaan ko atubangon ini pareho kay Jesus.
Kon “madumduman ko Sia,” luyag ko magbag-o, maghinulsol. Masalapoan ko ang ginahalinan sang kusog agud tumanon ang akon mga kasugtanan, kag mabatyagan ko ang impluwensya sang Balaan nga Espiritu sa akon kabuhi “kag magtuman sang iya mga kasugoan nga iya ginhatag sa [akon]; agud dalayon [ko] nga maangkon ang iya Espiritu.”8 Nagabulig ini sa akon nga magbatas tubtob sa katapusan.9 Ukon bisan na lang sa katapusan sang adlaw! Kag sa sinang mga adlaw nga indi ko Sia madumduman sa bilog nga adlaw, ara lang Sia gihapon dira, nagapalangga sa akon kag nagasiling sa akon nga, “OK lang na, sa buwas naman ah.”
Bisan pa nga indi kita perpekto sa pagdumdum sa Iya, ang aton mapinalanggaon nga Amay nga Langitnon wala gid nagauntat sa pagdumdum sa aton.
Isa sang mga sala nga pirme naton ginahimo amo ang maghunahuna nga ang pagtuman sang mga kasugtanan, ukon ang mga promisa nga ginahimo naton sa Dios, daw transaksyon nga ginahimo naton upod sa Iya: Matuman ako, kag amligan Niya ako nga wala sing malain nga matabo sa akon. Mabayad ako sang ika-pulo, kag indi gid ako mawad-an sang obra ukon indi masunog ang akon balay. Pero kon indi amo sa aton ginapaabot, masinggit kita sa Ginuo, “Wala ka bala kabalaka nga mawala ako?”10
Ang aton mga kasugtanan indi nga transaksyon lamang; makapabag-o ang mga ini.11 Paagi sa akon mga kasugtanan mabaton ko ang nagapakabalaan, nagapabakod nga gahum ni Jesucristo, nga nagapabag-o sa akon, agud patawaron ang daw indi mapatawad, agud madaug ang imposible. Gamhanan ang hungod nga pagdumdum kay Jesucristo pirme; nagahatag ini sa akon sing dugang nga kusog agud “magtuman sang iya mga kasugoan nga iya ginhatag sa [akon].”12 Nagabulig ini sa akon nga mangin mas manami, nga magyuhum nga wala rason, nga mangin manugpaluntad sing paghidaet,13 nga malikawan ang mga inaway, nga ipangibabaw ang Dios sa akon kabuhi.14
Kon ang aton kasakit ukon ang kasakit sang aton pinalangga tuman na nga indi na naton maagwanta, ang pagdumdum kay Jesucristo kag pagpalapit sa Iya makapamag-an sang mga kabudlayan, makapahumok sang tagipusuon, kag makapahagan-hagan sang sakit. Amo ini ang gahum nga nagbulig sa amay labaw pa sa iya masarangan nga suportahan ang iya anak nga babayi sa pisikal kag emosyonal nga kasakit sa pagkadula sang iya paa.
Sang nagbisita si Elder Soares sa Argentina sang Hunyo kag nagpamangkot kay Flavia parte sa iya aksidente, nagsabat sia, “Nakabatyag ako sang pagtublag, kapait, kaakig, kag pagdumot sang [natabo ini]. Ang nakabulig sa akon amo ang indi pagpamangkot, ‘ngaa ako?’ pero ‘para sa ano?’ … Nagpapalapit pa gid ini sa akon sa iban kag sa Ginuo. … Imbes nga magpalayo sa Iya, kinahanglan ko magkapyot sa Iya.”15
Si Pangulong Nelson nagtudlo: “Ang premyo sa pagtuman sang mga kasugtanan upod sa Dios amo ang langitnon nga gahum—gahum nga nagapabakod sa aton para mas mapakigbatoan ang aton mga pagtilaw, mga tentasyon, kag mga kapaslawan. … Gani, ang mga nagatuman sang ila mga kasugtanan mahatagan sang espesyal nga katawhay.”16 Ini ang klase sang katawhay kag paghidaet nga nakita ko sa mga mata sang balo, bisan pa sang kasakit sang pagkahidlaw sa iya bana adlaw-adlaw.
Ang Bag-ong Katipan nagasaysay sang tion sang si Jesus kag Iya mga disipulo ara sa sakayan-dagat:
“Kag nag-abot ang isa ka dakong unos, kag ang mga balod nagtap-ok sa sakayan. …
“Apang sia … nga katulog sa ulonan; kag ginpukaw nila sia, kag nagsiling sa iya, Manunudlo, wala ka bala kabalaka nga mawala kita?
“Kag nagmata sia, kag nagsabdong sang hangin, kag nagsiling sa dagat, Maglinong, magpuas. …
“Kag nagsiling sia sa ila, Ngaa bala nahadlok kamo? wala pa bala kamo sing pagtuo?”17
Nawili gid ako sining istorya. Ginpaabot bala sang Ginuo nga gamiton nila ang ila pagtuo agud pakalmahon ang unos? Agud sawayon ang hangin? Ang pagtuo kay Jesucristo amo ang balatyagon sang paghidaet nga mabatas ang unos, nga nakahibalo nga indi kita madula tungod ara Sia sa sakayan-dagat upod sa aton.
Ini ang klase sang pagtuo nga nakita namon sang ginbisita namon ang mga pamilya pagkatapos sang sunog sa Chile. Ang ila mga balay nagkalaupos; wala gid sing nabilin. Pero sang nagalakat kami sa ginatindogan anay sang ila mga balay kag nagasugid sila parte sa ila mga naagyan, nabatyagan namon nga nagatindog kami sa balaan nga duta. Isa ka sister nagsiling sa akon asawa, “Sang nakita ko nga nasunog ang mga tupad namon, naghunahuna ako nga ang amon balay masunog man, nga maubos tanan namon nga gamit. Imbes sang kawalay paglaum, nabatyagan ko ang di-masaysay nga paghidaet. Bisan paano, nabatyagan ko nga mangin OK ang tanan.” Ang pagsalig sa Dios kag pagtuman sang aton mga kasugtanan upod sa Iya nagadala sang gahum sa aton mga kahuyang kag kasulhay sa aton pagpangasubo.
Nagapasalamat ako sa oportunidad nga makakilala namon ni Renee ang pila sining pinasahi nga mga Santos, sa ila madamo nga ehemplo sang pagtuo, kabakod, kag pagpadayon. Sa mga istorya sang mga kasakit kag kapaslawan nga indi pwede mabantala sa peryodiko ukon mag-viral. Sa wala nakuha nga mga larawan sang mga luha kag mga pangamuyo tungod napatyan ukon nagdiborsyo; sa mga post nga wala ginhimo parte sa kahadlok, sa kasubo, kag sa kasakit nga nabatas salamat sa pagtuo kay Jesucristo kag Iya Pagbayad-sala. Ining mga tawo nagpabakod sang akon pagtuo, kag nagapasalamat gid ako.
Nakahibalo ako nga ini ang Simbahan ni Jesucristo. Nakahibalo ako nga nagatindog Sia nga handa sa paghatag sa aton sang Iya gahum kon magpalapit kita sa Iya adlaw-adlaw. Sa ngalan ni Jesucristo, amen.