Mga Ginharian sang Himaya
May mapinalanggaon kita nga Amay nga Langitnon nga nagaasiguro nga mabaton naton ang tagsa ka bugay kag tagsa ka bentaha nga ginatugot sang aton kaugalingon nga mga luyag kag mga pagpili.
Ang mga miyembro sang Simbahan ni Jesucristo sang mga Santos sa Ulihing mga Adlaw pirme ginapamangkot, “Ano ang kinalain sang inyo simbahan sa iban mga simbahan? Isa sang aton ginasabat amo ang kabug-osan sang doktrina ni Jesucristo. Unod sa sinang doktrina amo nga palangga kaayo sang aton Amay sa Langit ang tanan Niya nga anak kag luyag Niya kita tanan nga mabuhi sa katubtuban sa ginharian sang himaya. Nga mabuhi kita upod sa Iya kag sa Iya Anak nga si Jesucristo. Ginhatagan Niya kita sang tulun-an kag mga oportunidad nga magpili sang kapalaran kag kabuhi nga gusto naton.
I.
Sa moderno nga rebelasyon nahibal-an naton nga ang katapusan nga malab-utan sang tanan nga nabuhi sa duta indi ang kabos naton nga ideya sang langit kag impiyerno. Gintudlo ni Jesucristo nga: “Sa balay sang akon Amay may madamo nga mansyon.”1
Ang ginpanumbalik nga Simbahan ni Jesucristo nagatudlo nga ang tanan nga anak sang Dios—magluwas sa pila lang gid—sa ulihi magabaton sang ginharian sang himaya nga ang pinakanubo “labaw [gihapon] sa tanan nga paghangop.”2 Pagkatapos sang mga salawayon mag-antos bangod sang ila mga sala ang tanan mabanhaw kag makadto sa Katapusan nga Paghukom sang Ginuong Jesucristo. Didto, ang aton Manluluwas nga “nagahimaya sang Amay, kag ginaluwas ang tanan nga gintuga sang iya mga kamot,”3 magapadala sang tanan nga anak sang Dios sa isa sining mga ginharian sang himaya suno sa ila mga pagpili.
Pinasahi nga doktrina kag gawi sang ginpanumbalik nga Simbahan ang ginpahayag nga mga kasugoan kag kasugtanan nga nagatanyag sa tanan nga mga anak sang Dios sang pribelihiyo nga malab-ot ang pinakamataas nga himaya sa selestiyal nga ginharian. Ang pangkahitaasan sa selestiyal nga ginharian—amo ang ginatutokan sang Simbahan ni Jesucristo sang mga Santos sa Ulihing mga Adlaw.
Paagi sa moderno nga rebelasyon ang mga Santos sa Ulihing mga Adlaw may pinasahi nga pag-intiendi sang plano sang Dios para sa kalipayan sang Iya mga anak. Ining plano nagsugod antes pa kita natawo kag ginapahayag sini ang katuyoan kag kondisyon sang aton ginpili nga kabuhi diri sa duta kag ang aton ginahandum nga malab-utan.
II.
Nahibal-an naton paagi sa moderno nga rebelasyon nga “ang tanan nga ginharian may layi”4 kag ang ginharian nga mabaton naton sa Katapusan nga Paghukom/ nagadepende sa layi nga ginpili naton sundon sa aton kabuhi. Sa sinang plano madamo sang ginharian—mga mansyon—para ang tanan nga anak sang Dios makapanubli sang ginharian sang himaya nga ang mga layi masarangan nila “tumanon.”
Ilaragway naton ang kinaiya kag rekisitos sang tatlo ka ginharian sa plano sang Amay, masugod kita sa pinakamataas nga amo ang ginatumbok sang mga kasugoan kag mga ordinansa nga ginpahayag sang Dios sa ginpanumbalik nga Simbahan. Sa “selestiyal” nga himaya5 may tatlo ka lebel,6 ang pinakamataas amo ang exaltation sa selestiyal nga ginharian. Diri magapuyo ang mga “nakabaton sang iya kabug-osan, kag iya himaya,” gani, “mga dios sila, mga anak sang Dios”7 kag “magapuyo sa presensya sang Dios kag [ni] Cristo tubtob sa[katubtuban].”8 Ang rebelasyon sang Dios nagapahayag sang mga layi, ordinansa, kag kasugtanan nga dapat tumanon para magtubo ang diosnon nga mga kinaiya agud malab-ot ining diosnon nga potensyal. Diri nagatutok ang Simbahan ni Jesucristo sang mga Santos sa Ulihing mga Adlaw tungod ang tuyo sining ginpanumbalik nga Simbahan amo ang paghanda sang mga anak sang Dios para sa selestiyal nga himaya, labi na gid sa exaltation sa pinakamataas nga lebel.
Ang plano sang Dios, nga nabase sa wala katapusan nga kamatuoran, nagapangayo nga ang exaltation malab-ot lamang paagi sa katampad sa mga kasugtanan sang wala katapusan nga pag-asawahay sang lalaki kag babayi sa templo,9 nga sa ulihi matigayon sang tanan nga tampad. ni ang rason kon ngaa ang “gender [importante] nga kinaiya sang indibidwal para sa wala pa mabun-ag, mortal kag wala’y katapusan nga [palatandaan] kag katuyuan.”10
Makabulig sa aton paghanda sa exaltation ang 1995 nga proklamasyon parte sa pamilya.11 Ginaklaro sini ang langitnon nga mga rekisito para makaupod naton ang Dios nga Amay kag ang Iya Anak nga si Jesucristo. Ang wala lubos nakahangop sang plano sang Amay para sa Iya mga anak magakabig sining proklamasyon parte sa pamilya bilang pwede lang bag-obag-uhon nga polisiya. Pero ginapabakod naton nga ang proklamasyon parte sa pamilya, gintukod sa indi mabag-o nga doktrina, kag nagaplastar sang klase sang relasyon sa pamilya nga pwede kita mag-uswag sa wala katapusan.
Ginkumparar ni Apostoles Pablo ang tatlo ka lebel sang himaya, sa mga himaya sang adlaw, bulan kag mga bituon.12 Gintawag niya ang pinakamataas nga “selestiyal” kag ang ika-duha nga “terestriyal.”13 Wala niya ginngalanan ang pinakanubo, pero ginhatag kay Joseph Smith paagi sa rebelasyon ang ngalan sini nga “telestiyal.”14 Isa pa ka rebelasyon ang naglarawan sang mga kinaiya sang mga tawo nga mabutang sa sining mga ginharian sang himaya. Ang wala magpili “nga [magsunod] sang layi sang selestiyal nga ginharian”15 magapanubli sang lain nga ginharian sang himaya, mas manubo sangsa selestiyal pero bagay sa mga layi nga ginpili nila kag kumportable nga “ginatuman.” Ang Ingles nga tinaga nga abide, nga ginagamit sa balaan nga kasulatan, nagakahulugan sang magpadayon ukon mag-agwanta.16 Halimbawa, ang ara sa terestriyal nga ginharian—makomparar sa ginapatihan sang kadam-an nga langit—“Sila ining nagbaton sang presensya sang Anak, apang indi sang kabug-osan sang Amay.”17 Sila ining “dungganon nga mga tawo sa duta nga nabulagan sang pagpatalang sang mga tawo,”18 kag “indi maisog sa testimonya parte kay Jesus.”19
Ang mga makadto sa telestiyal nga ginharian sang himaya, amo atong mga “indi [makapadayon] sa terestriyal nga himaya.”20 Ini ang mga nagsikway sa Manluluwas kag wala magsunod sa mga limitasyon nga ginpahamtang sang Dios. Ini ang ginharian kon diin ang mga malain magapuyo, pagkatapos nila nga mag-antos para sa ila mga sala. Sa moderno nga rebelasyon amo ini “sila [ang] wala nagbaton sang ebanghelyo ni Cristo ukon sang testimonya parte kay Jesus. …
“Sila [ining] mga butigon, mga manughiwit, mga nagapanginbabayi, mga makihilawason, kag mga nagapalangga kag nagahimo sang butig.”21
Si Pangulong Russel M. Nelson naghambal parte sa tatlo ka ginharian sang himaya: “Ang kabuhi sa duta malip-ot kaayo kon ikumparar sa wala katapusan. Pero importante ini kaayo! Binagbinaga bala: Sa sining mortal nga kabuhi ka makapili kon ano nga mga layi ang gusto mo sundon—ang iya sang selestiyal nga ginharian, ukon iya sang terestriyal ukon telestiyal— kon diin nga ginharian sang himaya ka maistar sa wala katubtuban. Grabe nga plano! Plano ini nga nagarespeto gid sang imo kinamatarong sa pagpili.”22
III.
Gintudlo ni Apostoles Pablo nga ang mga tulun-an kag kasugoan sang Ginuo ginhatag agud “mangin hamtong kita nga mga tawo kaangay ni Cristo”23 Ini nga proseso masobra pa sa pag-angkon sang ihibalo. Kulang pa gani ang makumbinsi sang ebanghelyo; dapat kita maggiho para mabag-o kita sini. Indi pareho sa ginawali sang iban nga kinahanglan naton nga maghibalo, ang ebanghelyo ni Jesucristo nagahangkat sa aton nga mangin.
Diri makasiling kita nga ang Katapusan nga Paghukom indi lang pagtakos sang tanan nga maayo kag malain nga binuhatan—sang aton ginhimo. Pagkilala ini sang resulta sang aton binuhatan kag panghunahuna—kon nangin ano kita. Mangin angayan kita sa kabuhi nga wala katapusan paagi sa proseso sang pagbag-o. Ining tinaga nga madamo sing kahulugan nagatumod sa daku nga pagbag-o sang kinaiya. Kulang ang basta lang nagagiho. Ang mga kasugoan, mga ordinansa, kag mga kasugtanan sang ebanghelyo indi mga deposito sa langit nga bayad sa pagpakasala. Ang ebanghelyo ni Jesucristo nagapakita kon paano kita mangin mga tawo nga handum sang Amay nga Langitnon nga mangin kita.24
IV.
Tungod kay Jesucristo kag sa Iya Pagbayad-Sala, kon makasala kita, makahinulsol kita kag makabalik sa dalan sang kasugtanan pabalik sa aton Amay nga Langitnon.
Ang Libro ni Mormon nagatudlo nga “ining kabuhi amo ang tion para maghanda sa pag-atubang sa Dios.”25 Pero ang limitasyon “sining kabuhi” ginhatagan sang paglaum sa ginhambal sang Ginuo kay Pangulong Joseph F. Smith nga nasulat sa Doktrina kag mga Kasugtanan seksyon 138. Siling niya, “Nakita ko nga ang tampad nga mga elder sining dispensasyon, kon magtaliwan na sila sa sining kabuhi, magapadayon sa pagwali sang ebanghelyo sang paghinulsol kag pagtubos, paagi sa sakripisyo sang Bugtong nga Anak sang Dios, sa mga yara sa kadulom kag pagkaulipon sa sala sa kalibutan sang mga espiritu.
“Ang mga patay nga maghinulsol pagatuboson paagi sa mga ordinansa sang balay sang Dios,
“Kon mabayaran [na] nila ang multa sang ila mga kalapasan, kag matinloan, [padyaan] sila suno sa ila mga buhat kay mga manunubli sila sang kaluwasan.”26
Nahibal-an naton nga ang Milenya, ang isa ka libo ka tuig pagkatapos sa Ika-duha nga Pag-abot sang Manluluwas, mangin panahon sa paghikot sang mga ordinansa para sa wala nakabaton sini sa duta.27
Kadamo sang wala pa naton mahibal-i parte sa: (1) kabuhi antes sa duta, (2) kabuhi sa duta, kag (3) pihak nga kinabuhi. Pero nakahibalo kita sining kamatuoran: “Ang kaluwasan responsibilidad sang indibidwal, pero ang pagkahitaasan responsibilidad sang pamilya.”28 Mapinalanggaon ang aton Amay sa Langit kag ginasiguro gid Niya nga mabaton naton ang tagsa ka bugay kag bentaha nga ginatugot sang aton mga handum kag pagpili. Nakahibalo man kita nga indi Niya pagpiliton ang bisan sin-o nga magpaselyo nga kontra sa iya pagbuot. Ang mga bugay sang selyado nga mga relasyon ginpasalig sa mga nagatuman sang ila kasugtanan pero indi paagi sa pilit nga pagselyo sang relasyon sa tawo nga indi bagay ukon indi gusto.
Pinalangga kong kauturan, nagapamatuod ako sa sining mga butang. Nagapamatuod ako kay Ginuong Jesucristo, “ang pangulo kag manughimpit sang [aton] pagtuo,”29 nga paagi sa Iya Pagbayad-Sala sa idalom sang plano sang aton Amay sa Langit, ini tanan nangin posible, sa ngalan ni Jesucristo, amen.