Luyag Bala Ninyo nga Mangin Malipayon?
Magpabilin sa banas sang kasugtanan. Ang inyo kabuhi mangin mas mahapos, mas malipayon, kag puno sang kalipay.
Luyag bala ninyo nga mangin malipayon? Ano ang nagapasubo sa inyo? Si Pangulong Nelson nagsiling: “Kon luyag ninyo nga mangin miserable, lapasa ang mga kasugoan—kag indi maghinulsol. Kon luyag ninyo sang kalipay, magpabilin sa banas sang kasugtanan.”1 Indi bala nga ka simple lang nga mangin malipayon? Maghimo lang sang mga kasugtanan kag tumanon ang mga ini sa inyo kabuhi. Rebyuhon naton ang pila ka butang nga makabulig sa aton nga magpabilin sa banas sang kasugtanan kag makapalipay sa aton.
1. Ano ang Banas sang Kasugtanan?
Suno kay Elder Dale G. Renlund: “Ang tinaga nga banas sang kasugtanan nagatumod sa serye sang mga kasugtanan kon diin nagapalapit kita kay Cristo kag nagapakig-angot sa Iya. Paagi sa sining kaangtanan sa kasugtanan, makatigayon kita sang Iya wala katapusan nga gahum. Ang banas nagasugod sa pagtuo kay Jesucristo kag paghinulsol, nga ginasundan sang bunyag kag pagbaton sang Balaan nga Espiritu.”2 Ginabag-o naton ining mga kasugtanan tagsa nga mag-ambit kita sang sakramento.
Sugod sa kasugtanan sa bunyag, nagahimo kita sang dugang pa gid nga mga kasugtanan sa bilog naton nga kabuhi. Sa liwat, si Elder Renlund nagsiling: “Ang banas sang kasugtanan nagapadulong sa mga ordinansa sang templo, pareho sang endowment sa templo. Ang endowment regalo sang Dios sang sagrado nga mga kasugtanan nga lubos nga nagaangot sa aton sa Iya.”3
2. Nagapadayon Bala Kamo sa Banas sang Kasugtanan?
Kon kaisa kon maghimo kita sang mga kasugtanan, nagakapaslawan kita nga tumanon ini. Kon matabo ini, paano kamo makabalik sa banas sang kasugtanan? Mapaambit ako sing pila ka halimbawa sang pagbalik sa banas sang kasugtanan.
Sulosobra sa isa ka bulan ang nagligad, nakabaton ako sing mensahe halin sa isa ka nagpauli na nga misyonero nga nag-alagad upod sa amon. Siling niya: “Ang patapos na nga bahin nangin mabudlay. Ang pagbato sang kabalaka kag depresyon adlaw-adlaw nagapaluya sa akon, kag nabudlayan gid ako. Daw ako lang isa kag kamiserable gid. Nagapangamuyo ako para sa giya sang aton Amay nga Langitnon para sa katawhay kag kasulhay agud mabatoan ko ang mga kabudlayan. … Samtang nagapangamuyo ako, nag-abot sa akon ang pagpabatyag sang Espiritu nga nagasiling sa akon nga kinahanglan ko magbayad sing bug-os nga ika-pulo. … Nabatyagan ko gid ang Espiritu kag gilayon nabatyagan ko nga kinahanglan ko ini himuon. Kay luyag ko nga himuon ini, ang pagpabatyag sa akon amo nga ‘kon magbayad ka sang imo ika-pulo mangin OK ang tanan.’ Nagatinguha ako sa gihapon nga makakita sang paghidaet, pero may testimonya ako sa aton Manluluwas kag paagi sa akon pagtuman, mabatyagan ko kag masalapoan ang paghidaet nga ginapangita ko sa akon tagipusuon kag hunahuna. Nagdesisyon ako sang sini lang nga magbalik sa simbahan kag magpangayo sang giya sang Espiritu sa tanan ko nga ginahimo.”
Karon ok na gid sia. Makapangayo man kamo sa Amay nga Langitnon sang paghidaet, pero ang sabat mahimo nga lain sangsa inyo ginapaabot. Basta nagatinguha kamo sa paghibalo parte sa Manluluwas kag pagpangamuyo sa Amay nga Langitnon, hatagan Niya kamo sang sabat nga para sa inyo.
Si Pangulong Thomas S. Monson nagtudlo:
“Ang pinakadako nga leksyon nga aton matun-an sa dutan-on nga kabuhi amo nga kon ang Dios maghambal kag kita magtuman, pirme kita mangin insakto.”4
“Kon kita magtuman sa mga sugo, ang aton mga kabuhi mas malipayon, mas may katumanan, kag mas mahapos. Ang aton mga hangkat kag mga problema mangin mas mahapos dal-on, kag mabaton naton ang ginpromisa nga mga bugay [sang Dios].”5
Gintawag ako nga bishop sa pinakamabudlay nga tion sang akon kabuhi. Lamharon ako nga amay nga treintahon pa lang, pero may problema ako sa kwarta tungod sang mga hangkat sa pamilya. Wala ako sing solusyon, kag abi ko ang mga hangkat indi na matapos. Naluyahan gid ako sa pinansyal kag sa emosyunal. Nagsugod man ako sa pagduda sang akon espiritwal nga kusog. Amo gid yadto nga tion nga gintawag ako sang akon stake president . Ginbaton ko ang calling bisan nga mabudlay.
Ang akon asawa gin-interbyu man sang stake president, pero indi sia maka-huo, kag wala man sia nag-indi kag nagasige lang sia hibi. Naghibi sia bilog nga semana nga nagapamangkot sa Amay nga Langitnon, “Ngaa subong pa?” kag “Kilala mo gid bala ang kada isa?” Wala sia kabaton sang sabat, pero ginsakdag ako nga bishop sa masunod nga Domingo. Wala na sia nagpamangkot pa sa Amay nga Langitnon pero ginsuportahan niya ako sa akon calling sa anum ka tuig.
Sang Domingo nga gin-release ako, ang akon asawa nakabati sang tingug samtang nagaambit sia sang sakramento. Ang tingug naghutik sa iya, “Tungod mabudlay gid para sa imo nga makalakat, gintawag ko sia nga bishop agud uyatan ka kag maglakat para sa imo.” Sa iya pagpanumdom sang nagligad nga anum ka tuig, narealisar niya nga ang tanan nga hangkat nga daw wala katapusan nasolbar na karon.
Narealisar namon nga kon abi naton nga alang-alang kita magbaton sang calling, basi amo pa ina ang tion nga kinahanglan gid naton ang ina nga calling. Kon ang Ginuo magpangabay sa aton nga mag-alagad sa bisan ano nga calling, mamag-an man ini ukon mabug-at, nakita Niya kon ano ang aton kinahanglanon. Nagahatag Sia sang kusog nga kinahanglan naton kag mga bugay nga handa na para ibubo sa aton kon mag-alagad kita sing matutum.
May madamo pa nga butang nga nagatublag sa aton sa pagpabilin sa banas sang kasugtanan. Kon ano man ina, indi pa ulihi agud lisuon ang aton mga tagipusuon sa Amay nga Langitnon para sa bulig. Si Elder Paul V. Johnson nagtudlo sa aton: “Kon sundon naton si Satanas, ginahatagan naton sia sang gahum. Kon sundon naton ang Dios, ginahatagan Niya kita sang gahum.”6
Si Haring Benjamin sa Libro ni Mormon nagpamatuod: “Luyag ko nga binag-binagon ninyo ang bulahan kag malipayon nga kahimtangan sinang mga nagatuman sang mga kasugoan sang Dios. Kay tan-awa, ginapakamaayo sila sa tanan nga butang, pareho nga dutan-on kag espirituhanon; kag kon magpabilin sila nga tampad tubtob sa katapusan pagabatunon sila sa langit, agud nga paagi sa sini mahimo sila nga magpuyo upod sa Dios sa isa ka kahimtangan sang di-matapos nga kalipayan.”7
3. Paano Makapalipay sa Inyo ang Pagtuman sang mga Kasugtanan sa Dios?
Ang akon asawa nagasiling nga ang amon pag-asawahay nagaangot sa amon, kag tungod sina mahimo na niya ang mga butang nga indi niya mahimo sang una. Halimbawa, halin sang bata pa sia, nabudlayan sia maggwa sa dulom, pero wala na karon tungod ginaupdan ko sia. Manubo sia kag indi makalab-ot sang mataas nga estante luwas kon maggamit sia sang bangko ukon hagdan, pero kay mas mataas ako malab-ot ko ang mataas nga mga estante para sa iya. Ang pagpas-an sang gota sang aton Manluluwas pareho man sina. Samtang ginaangot naton ang aton mga kaugalingon sa Iya, mahimo naton ang mga butang nga indi naton mahimo nga kita lang tungod mahimo Niya ang mga butang nga indi naton mahimo.
Si Elder David A. Bednar nagsiling: “Ang paghimo kag pagtuman sang sagrado nga mga kasugtanan nagaangot sa aton kay Ginuong Jesucristo. Buot silingon, ang Manluluwas nagaagda sa aton nga magsalig kag maghiusa sa Iya, bisan pa nga ang aton pinakamaayo indi makatupong kag indi makomparar sa Iya. Samtang nagasalig kita kag nagadala sang aton palas-anon upod sa Iya sa mortal nga paglakbay, matuod nga mahapos ang Iya gota kag ang Iya lulan mamag-an.”8
Si Pangulong Nelson nagtudlo:
“Ang paghigot sang inyo kaugalingon sa Manluluwas nagakahulugan nga matigayon ninyo ang Iya kusog kag nagatubos nga gahum.”9
“Ang premyo sa pagtuman sang mga kasugtanan sa Dios amo ang langitnon nga gahum—gahum nga nagapabakod sa aton para mas mapakigbatuan ang aton mga pagtilaw, mga tentasyon, kag mga kapaslawan. Ining gahum nagapahapos sang aton dalanon. Ang mga nagapangabuhi sang mas mataas nga mga layi ni Jesucristo may ikasarang nga maglab-ot sa mas dako Niya nga gahum.”10
“Ang pagtuman sang mga kasugtanan nagapahapos sang kabuhi! Ang tagsa ka tawo nga nagahimo sang mga kasugtanan sa mga tulugmawan sa bunyag kag sa mga templo—kag nagatuman sang mga ini—may mas dako nga ikasarang sa paglab-ot sang gahum ni Jesucristo.”11
Mahal kong mga kauturan, luyag bala ninyo nga mangin malipayon? Magpabilin sa banas sang kasugtanan. Ang inyo kabuhi mangin mas mahapos, mas malipayon, kag puno sang kalipay. Ang aton Manluluwas nagaagda sa aton, “Kari sa akon, tanan kamo nga ginabudlayan kag ginabug-atan, kag papahuwayon ko kamo.”12 Sia ang buhi nga Cristo! Ginadala Niya ang aton mga kalargahon kag ginapahapos ang aton kabuhi. Sa ngalan ni Jesucristo, amen.