Higugmaa ang imo isigkatawo
Ang kaluoy isa ka kinaiya ni Cristo. Resulta ini sang pagpalangga sa iban kag wala sing limitasyon.
Sini nga aga, ginaagda ko kamo nga updan ako sa sa pagbiyahe sa Africa. Indi kamo makakita sang leon, zebra, ukon elepante, pero basi, pagkatapos sang biyahe, makita ninyo kon paano ginasabat sang linibo ka mga miyembro sang Ang Simbahan ni Jesucristo sang mga Santos sa Ulihing mga adlaw ang ika-duha nga dakung sugo ni Cristo nga “higugmaa ang imo isigkatawo” (Marcos 12:31
Hunahunaa sing makadali, ang pula nga duta sa uma sang Africa. Makita ninyo sa mala kag matig-a nga duta nga wala nakatupa ang madamol nga ulan sing madamo na gid nga tinuig. Ang pila ka baka nga masugata mo tama ka niwang kag ginabakirohan sang Karamojong nga manugbantay nga nakasandalyas nga nagalakat sa paglaum nga makakita sang halalban kag tubig.
Samtang nagalakat ka sa batsehon kag batuhon nga dalan, makita mo ang pila ka grupo sang matahum nga kabataan kag matingala ka kon ngaa wala sila sa eskwelahan. Ang kabataan nagayuhum kag nagapababay, kag nagpababay ka man nga may luha kag yuhum. Nobenta’y dos porsyento sang pinakagagmay nga kabataan nga imo makita sa sining biyahe wala sing bastante nga pagkaon kag tuman ang imo kalisod.
Sa unhan, makita mo ang isa ka iloy nga ginabalanse sa iya ulo ang lima ka galon (19 L) nga tubig sa suludlan kag isa pa gid sa iya kamot. Ginarepresentar niya ang isa sa kada duha ka panimalay sa sini nga lugar nga ang mga babayi, hubin kag tigulang, nagalakat sobra treynta minutos pakadto kag pabalik, adlaw-adlaw sa kuluhaan sang tubig para sa ila pamilya. Hinali ka nakabatyag sing tuman nga kasubo.
Pagligad sang duha ka oras nakaabot ka sa maligwin, mahandong nga kahawanan. Ang tilipunan indi kwarto ukon bisan gani tolda kundi, sa idalom sang pila ka dalagko nga kahoy nga palasilungan sa nagatagiti nga init. Sa sini nga lugar, makita mo nga wala sing tubig sa gripo, wala kuryente, wala mga inidoro. Naghulonghulong ka kag nahibal-an mo nga ara ka upod sa mga tawo nga nagahigugma sa Dios kag gilayon mo nabatyagan ang paghigugma sang Dios sa ila. Nagtipon sila agud magbaton sang bulig kag paglaum kag nag-abot ka sa paghatag sini.
Amo sina ang biyahe namon ni Sister Ardern, upod si Sister Camille Johnson, ang aton General Relief Society President kag iya bana nga si Doug kag si Sister Sharon Eubank, direktor sang Church Humanitarian Services, pagkadto namon sa Uganda, pungsod sang 47 ka milyon nga tawo sa Africa Central Area sang Simbahan. Sina nga adlaw, sa handong sang mga kahoy, nagbisita kami sa isa ka community health project nga buligay nga gingastohan sang Church Humanitarian Services, UNICEF, kag Ministry of Health sang gobyerno sang Uganda. Ining masaligan nga mga organisasyon, ginpili sing maayo agud segurohon nga ang gin-amot sang mga miyembro nga pundo para sa tawhanon nga bulig ginagamit sing husto.
Masubo man nga makita ang kabataan nga kulang sa sustansya kag ang mga epekto sang anos, malaria kag sige-sige nga paglupot, nakabaton kami sing dugang nga paglaum sa mas maayo nga palaabuton para sa amon mga nakilala.
Isa ka rason sa pagbaton sinang paglaum amo ang kaayo sang mga miyembro sang Simbahan sa bilog nga kalibutan nga nag-amot sang oras kag kwarta sa Church Humanitarian effort. Pagkakita ko sang nagamasakit kag ginalisdan nga ginabuligan kag napalipay, nagduko ako sa pagpasalamat. Sa sina nga tion, mas naintiendihan ko ang buot silingon sang Hari sang mga hari, na nagsiling:
“Dali kamo nga ginpakamaayo sang akon Amay, Panublia ninyo ang Ginharian nga gin-aman sa inyo… :
“Kay gingutom ako, kag ginpakaon ninyo ako: Gin-uhaw ako, kag ginpainom ninyo ako: Dumuluong ako kag ginpadayon ninyo ako sa inyo mga puluy-an” (Mateo 25:34–35).
Ang pangabay sang aton Manluluwas amo nga “pasigahon ang inyo kapawa sa mga tawo agod makita nila ang inyo maayo nga mga binuhatan, kag magadayaw sila sa inyo Amay nga yara sa langit” (Mateo 5:16; tan-awa man sa mga bersikulo 14–15). Sa naligwin kag malayo nga bahin sang kalibutan, ang inyo maayong mga buhat nagpasanag sang kabuhi kag nagpamag-an sang palas-anon sang mga tawo nga may daku nga panginahanglan, kag ang Dios nahimaya.
Sa sadtong mainit kag mayab-ok nga adlaw, kuntani nabatian ninyo ang ila mga pangamuyo sang pagdayaw kag pagpasalamat sa Dios. Luyag nila nga hambalon ko kamo sa ila tumandok nga Karamojong, “Alakara.” Salamat.
Ang amon biyahe nagpadumdum sa akon sang paanggid sang Maayong Samariahanon, nga ang iya biyahe nagdala sa iya sa yab-okon nga dalan nga pareho sa akon ginlaragway, dalan nga halin sa Jerusalem pakadto sa Jerico. Ining maalagaron nga Samariahanon nagatudlo sa aton sang kahulugan sang higugmaa ang imo isigkatawo.
Nakakita sia sang “isa ka tawo … [nga] ginbanggaan sang mga buyong, [nga] ginkuha nila ang iya tanan nga pagkabutang pati ang iya bayu, ginbakol sia kag ginbayaan nga daw sa patay na” (Lucas 10:30). Ang Samariahanon “naluoy gid sa iya” (Lucas 10:33).
Ang kaluoy isa ka kinaiya ni Cristo. Resulta ini sang pagpalangga sa iban kag wala sing limitasyon. Si Jesus, ang Manluluwas sang kalibutan, ehemplo sang kaluoy. Pagbasa naton nga si “Jesus naghibi” (Juan 11:35mga saksi kita, pareho kay Maria kag Marta, sang Iya kaluoy nga rason nga Sia una anay natandog sa iya tagipusuon kag natublag (tan-awa sa Juan 11:33). Sa ehemplo sang kaluoy ni Cristo sa Libro ni Mormon, si Jesus nagpakita sa kadam-an kag nagsiling:
May mga lupog bala kamo, ukon bulag, ukon piang, … ukon bungol, ukon nagaantos sa ano man nga paagi? Dalha sila diri kag paayuhon ko sila, kay naluoy ako sa inyo. …
Kag ginpaayo niya sila ang tagsa-tagsa nga gindala palapit sa iya” (3 Nephi 17:7, 9).
Wala sapayan sang tagsa naton ka pagpaninguha, indi naton mapaayo ang tanan pero ang tagsa sa aton sarang makahimo sang kinalain para sa kaayohan sa kabuhi sang isa ka tawo. Isa ka pamatan-on, bata pa lang, ang naghatag sing lima ka tinapay kag duha ka isda nga nagpakaon sang lima ka libo. Mahimo mamangkot kita parte sa aton halad, pareho kay Andrew nga disipulo parte sa mga tinapay kag isda, “Ano bala ang pagkaigo sini sa amo nga kadamuon sang tawo?” (Juan 6:9) Ginapasalig ko kamo; igo na ang maghatag ukon maghimo sang inyo masarangan, kag dayon tugotan si Cristo nga pauswagon ang inyo mga pagpangabudlay.
Sa sini nga punto,si Elder Jeffrey R. Holland nag-agda sa aton: “manggaranon ukon imol, … nga ‘himuon ang aton masarangan’ kon nagakinahanglan ang iban.” Nagsaksi sia dayon, kag amo man ako, nga ang Dios “magabulig sa inyo kag magagiya sa inyo sa [inyo] maluluy-on nga mga buhat sang pagkadisipulo” (“Are We Not All Beggars?,” Liahona, Nob. 2014, 41).
Sa sinang malayo nga lugar, sa indi malimtan nga adlaw, nagtindog ako sadto kag nagatindog subong bilang saksi sang makatalandog kag makabag-o kabuhi nga kaluoy sang mga miyembro sang Simbahan, manggaranon kag imol.
Ang paanggid sang Maayong Samariahanon nagapadayon sang iya “ginbugkosan ang mga pilas [sang tawo] … kag gin-atipan sia” (Lucas 10:34 Ang pagpanikasog sang aton Simbahan para sa Tawhanon nga Bulig, nagasapo sa aton nga nagaresponde sing maabtik sa natural nga mga kalamidad kag nagabugkos sang nagadamo nga pilas sang masakit, gutom, malnutrisyon, pagkadula sang puluy-an kag ang masami indi athagon nga mga pilas sang pagluya sang buot, pagkapaslaw, kag kawala’y paglaum sang kalibutan.
Ang Samariahanon dayon nagkuha “sing duha ka denario, kag ginhatag niya ini sa tag-iya sang dalayunan, kag nagsiling sa iya, Tatapa sia” (Lucas 10:35). Bilang Simbahan, mapasalamaton kita nga makaupod ang Catholic Relief Services, UNICEF, kag Red Cross/Red Crescent, agud magbulig sa aton mga pagpanikasog sa tawhanon nga bulig. Mapasalamaton man kami sa inyo “duha ka denario” ukon duha ka euro, duha ka pisos, ukon duha ka shilling, nga nagapamag-an sang palas-anon nga ginadala sang madamo kaayo sa kalibutan. Labanlaban nga indi ninyo makilala ang mga nakabaton sang inyo tiempo, kwarta, kag sinsilyo, pero ang kaluoy wala nagapangayo sa aton nga kilalahon sila, nagapangayo lang ini nga higugmaon naton sila.
Salamat Pangulong Russell M. Nelson, sa pagpadumdum sa amon nga “kon aton higugmaon ang Dios sa bug-os naton nga tagipusuon, lisuon Niya ang aton mga tagipusuon tuhoy sa kaayohan sang iban” (“The Second Great Commandment,” LiahonaNob. 2019, 97). Nagapamatuod ako nga ang tagsa sa aton makaangkon sang dugang nga kalipay, kalinong, pagpaubos, kag gugma kon mag-akto kita sa panawagan ni Pangulong Nelson kag sa pangabay ni Joseph Smith nga “pakan-on ang ginagutom, pabayoan ang hublas, mag-aman para sa balo, pahiran ang luha sang ilo, [kag] paumpawan ang nagaantos, sa sini nga Simbahan,ukon sa iban man, ukon bisan sa wala sing simbahan, bisan diin sila [naton makita]” (“Editor’s Reply to a Letter from Richard Savary,” Times and SeasonsMar. 15, 1842, 732).
Sadtong nagliligad nga binulan, nakita namon ang mga gutom kag nagaantos sa mamala kag yab-okon nga patag kag saksi kami sa ila mga mata nga nagapakitluoy para sa bulig. Sa amon kaugalingon nga paagi, natandog ang amon tagipusuon kag natublag (tan-awa sa Juan 11:33), pero atong mga balatyagon naghagan-hagan pagkakita namon sang kaluoy sang mga miyembro sang Simbahan nga nagahikot samtang ang mga gutom ginpakaon, ang mga balo gin-amanan, kag ang mga nagaantos ginpaumpawan kag ang ila mga luha ginpahiran.
Kabay nga dalayon kita nga magtinguha sa pagpatigayon sang kaayohan sang iban kag ipakita sa pulong kag sa buhat nga kita “sugot nga magpas-an sang palas-anon sang isa kag isa” (Mosias 18:8), sa “pagpasulhay sang mga masinulub-on sing tagipusuon” (Doktrina kag mga Kasugtanan 138:42), kag sa pagtuman sang ika-duha nga dakung sugo ni Cristo nga “higugmaa ang imo isigkatawo” (Marcos 12:31). Sa ngalan ni Jesucristo, amen.