Mataupu 12

O o Latou Foliga Ua Faasaga Atu i Siona

I le taeao o le aso 6 o Aperila, 1853, sa tutu faatasi ai Polika Iaga ma ona fesoasoani o Hipa Kimball ma Uiliata Lisati, i se vaega na eliina o le faavae mo le malumalu fou i le Aai o Sate Leki. Sa tulimatai atu lava o ia i lenei aso mo le tele o masina—atonu foi o ni tausaga—ma sa le mafai ona ia ole atu mo se lagi e lanumoana manino atu. O le faamanatuga o le luasefulu tolu tausaga o le Ekalesia ma o le aso muamua foi o le konafesi aoao i le tautotogo. E faitau afe le Au Paia na o mai i le pitonuu o le malumalu, e pei ona sa latou faia e faalua i le tausaga, e faalogologo i upu a o latou taitai. Ae o le asō, ua ese lea. O le asō ua latou o mai e molimauina le faataatitiaga o maatulimanu o le malumalu.¹

Sa lagona e Polika le fia alaga olioli. Sa ia suatiaina le eleele mo le malumalu ae o Hipa sa faapaiaina lona tulaga i le lua ma le afa masina na muamua atu. Talu mai lena aso, sa le’i faapea na le lava le taimi o le aufaigaluega e eli atoa ai le faavae telē, ae sa latou eliina foi ni ‘autu loloto i tafatafa o ona puipui na lava le tetelē ia ofi ai maasimā lapopoa o maatulimanu. O le faaumaga o le eliga o le a manaomia ai se isi lua masina o galuega.²

Faatasi ai ma le faapotopoto atu o le Au Paia, sa faataatitia ai e Polika ma ona fesoasoani le maatulimanu o le tulimanu i sautesasae o le faavae.³ O maatulimanu taitasi sa sili atu ma le tai lima afe pauna le mamafa.⁴ O le malumalu o le a i ai ni tumutumu se ono ma o le a sili atu le maualuga nai lo o malumalu i Katelani ma Navu, lea e manaomia ai se faavae mausali e talitalia lona mamafa. I se fonotaga ma le tufuga tusiata o Truman Angell, sa faamata’osi ai e Polika le malumalu i luga o se maatusi ma faamalamalama atu e faapea, o ona tumutumu e tolu i sasa’e o le a faatusa i le Perisitua Mekisateko ae o ona tumutumu e tolu i sisifo o le a faatusa i le Perisitua Arona.⁵

Ina ua uma ona faataatitia ia maatulimanu, ona faitau atu lea e Tomasi Bullock, o se failautusi o le Ekalesia, se lauga na saunia e Polika Iaga e uiga i faamoemoega o malumalu. E ui ina sa maua e le toatele o le Au Paia le [sauniga] o le faaeega paia i le Malumalu o Navu, po o totonu foi o le Maota Fono, o se maota i le Aai o Sate Leki sa faatagaina mo se taimi le tumau e Polika mo ni isi o galuega o le malumalu, o le toatele o i latou sa na’o le faatasi ona latou maua se aafiaga i sauniga ma atonu e le o malamalama atoatoa i lona matagofie ma lona taua. O isi o le Au Paia, e aofia ai le toatele o tagata Europa na faatoa taunuu atu, sa le’i mauaina se avanoa e maua ai faaeega paia. Ina ia fesoasoani ia latou malamalama i le paia o le sauniga ma lona tāua, sa faapea ona tuuina atu ai e Polika se faamalamalamaga.⁶

“O lou faaeega paia,” sa faamalamalama mai ai i le lauga, “ia faapea ona maua ai na sauniga uma i totonu o le maota o le Alii, ia e alagatatau mo oe, pe a e tuua lenei olaga, ina ia mafai ai ona e toe savali atu i le afioaga o le Tama, e ui atu i agelu o e tutū o ni leoleo, e mafai ona tuu atu ia i latou ia upu tatala, o faailoga, ma faatusa e faatatau i le perisitua paia, ma maua ai lou faaeaga e faavavau e ui lava i le lalolagi ma seoli.”⁷

A o le’i oo mai foi i le vanu, sa fuafuaina lava e Polika e fau se isi malumalu i se taimi lava e maua ai e le Ekalesia se nofoaga fou e faapotopoto i ai. Ma o le taimi lava na taunuu ai o ia i le vanu, sa ia vaaia ai le malumalu i se faaaliga vaaia. Sa ia molimau atu i le Au Paia i le konafesi, “O le lima o tausaga talu ai ia Iulai na te’a atu nei, sa ou vaai ai iinei i le maatulimanu o le malumalu, e le atoa le sefulu futu mai le mea ua tatou faataatiaina ai le maa,” “Ou te le’i vaai lava i lena fasilaueleele, ae o le faaaliga vaaia o lea mea o loo i o’u luma.”⁸

A o tuuto atu e le Au Paia i latou lava i le galuega faatino ma totogi a latou sefuluai, sa folafola atu e Polika, o le a alu a’e le malumalu i le matagofie ma le mamalu, o le a maoae atu nai lo o se isi lava mea na latou vaai pe mafaufau i ai.⁹

---

E le’i leva ona uma le sauniga o le maatulimanu, ae maua e Ana Elisa Secrist ni tusi se fa i le aso e tasi mai lana tane o Iakopo. O tusi taitasi na faamatalaina ai se vaega ese o lana malaga i le misiona. O le tusi aupito lata mai, na tusia i le aso 28 o Iulai, 1853, na faaalia ai, ua iu ina taunuu i Hamburg, o se nuu o Siamani Aufaatasi.¹⁰

Ua valu masina talu ona aluese atu Iakopo, ae ua sili atu le toafilemu o Ana Elisa i lona toesea ai. Sa masani ona lolomi e le Deseret News ia tusi mai alii faifeautalai i le lalolagi atoa, e tuuina atu ai i le Au Paia se lipoti o le galuega faifeautalai i nofoaga taumamao e pei o Ausetalia, Suetena, Italia ma Initia. O ni isi o taimi o nei lipoti e faamatalaina ai le matautia tele o le tetee i faifeautalai. O le mea moni, o le lua o aso a’o le’i taunuu mai tusi a Iakopo, sa faitau ai Ana Elisa i le Deseret News e uiga i taumafaiga a le malo e faate’a ese se faifeautalai mai Hamburg.

Nai lo o le popole mo Iakopo, sa tusi atu Ana Elisa ia te ia i se tusi faamalosiau. “E leai se aoga o le taumafai e taofi lenei galuega,” sa ia molimau atu ai, “aua o le a taavale pea e ui lava i mea leaga uma o le lalolagi ma seoli, ma e leai se mea e mafai ona faalavelave i lona alualu i luma.”¹¹

Soo se taimi lava e tusi atu ai Ana Elisa i lana tane, na te ta’ua ai le maloloina o le la fanau. O lena taumalulu na latou mama’i ai i le fiva mūmū, ae e oo atu i le tautotogo ua manuia uma i latou taitoatasi mai le faama’i. Ona mama’i lea o i latou i le tane susu, lea na avea ma se faafitauli ia i latou mo se masina. I le taimi lea, sa masani ona talanoa ai tamaiti e uiga i le latou tamā, ae maise pe a latou saofafai e aai i se taumafataga na latou iloa o le a fiafia i ai o ia.

Sa ia tusi foi e uiga i le faatoaga a le aiga, na tu pe tusa ma le luasefulu maila i matu o le Aai o Sate Leki. Sa faafaigaluega e Iakopo ma Ana Elisa ni alii e galueaina a o nonofo le aiga i le aai, ma e le’i leva atu na poloai atu ai se tasi o le au faigaluega i le faatoaga ia Ana Elisa mo ni tioata, fao, ma laupapa e faauma ai se fale na fau i luga o le fanua. Sa ia aveina atu ni mea faufale mai lona fale i le aai, e ui lava ina sa le’i uma foi [ona fau lona] fale. Sa poloai mulimuli ane foi lea lava alii mo le totogi o le galuega sa ia malie muamua e fai fua. O le leai o se tinoitupe po o se saito na i ai, na faatau ese ai e Ana Elisa se povi e totogi ai o ia.¹²

Ae peitai, i lana tusi na sosoo ai ia Iakopo, sa fiafia ai Ana Elisa e lipoti atu e faapea, na manuia lava le faatoaga ma lelei ona faaeleeleaga. Sa ia ta’ua foi e faapea, na malosi lava lona lagona e tatau ona toe foi atu i latou ma tamaiti i le faatoaga, fau se tamai fale i luga o le fanua, ma nonofo ai iina. Ae sa na le manao e faia se faaiuga tāua faapena e aunoa ma le sailia muamua o le fautuaga a Iakopo. “Ou te fia iloa lou manatu e uiga i le mataupu,” sa ia fai atu ai, “ ma ou te manao e te tusi mai i se vave e mafai ai e uiga i ai.”

Sa ia auina atu le talosaga ma le alofa faateleina ma faamalosiauga. Sa ia tusia, “E ui ina tatou valavala mamao mai le tasi ma le isi e ala i vasa tetele, o fanua tetele, ma mauga e ufitia i kiona, ae e faaauau pea ona ou mafaufau atu ia te oe ma po o faapefea mai oe.” “Aua ne’i i ai se mea e te popole ai e uiga ia te au, aua ou te talitonu o le Atua, o lana galuega o loo e i ai, o le a puipuia au.”¹³

---

O lena tautotogo, i le motu o Maui, na lipotia mai ai i le nusipepa se vevesi na tupu ona o le lauga a Orson Pratt ia Aokuso 1852, e uiga i faaipoipoga autaunonofo. Sa faia e tagata Hawaii i se tasi o taimi autaunonofo, ae na faasā e le mālo lea faiga ma ua faasalaina ai nei i latou o e solia le tulafono. Sa vave ona pu’e e faifeautalai Porotesano ia aoaoga o le lauga a Orson ma mimilo ina ia tauemu ai i le Au Paia ma lafo atu ai le masalosalo i luga o le Ekalesia.¹⁴

O le talitonu e faapea, o le mea moni ma le mafaufau fetala’i o le auala sili lea ona lelei e tali atu ai i pepelo ma taufaasese e uiga i le Ekalesia, sa faapafala ai e Siaosi Q.Kanona le faaliliuga o le Tusi a Mamona, ae faaliliu le faaaliga e uiga i faaipoipoga autaunonofo, ma talai atu e uiga i lea faiga i se motu o tagata pe a ma le afe. O le lauga a Siaosi na aveese ai le vevesi e uiga i faaipoipoga autaunonofo ma faamanino atu ai e faapea, sa le faamoemoeina tagata taitoatasi latou te faia sei iloga na poloaiina i latou e le Alii e fai.¹⁵

A o le’i faia lana lauga, sa faaali atu e Siaosi lana faaliliuga o le faaaliga ia Ionatana Napela. Sa fiafia i ai Napela. A o le’i oo i lona papatisoga i le 1852, na lagona e Napela ni uunaiga malosi mai ana uo Porotesano e lafoa’i le Ekalesia. O le galulue vavalalata ai ma Siaosi i le Ekalesia na faamalosia ai lona faatuatua. E ui ina sa o se galuega faigata le faaliliuga o le Tusi a Mamona, ae sa i ai taimi sa la malolo ai ma Siaosi ma soalaupule e uiga i le tusi. Sa mafai ona lagona e Napela le tutupu o ni suiga i lona olaga. Sa pei o le fuaitau o loo i le tusi o Alema: na totōina se fatu, ma ua amata nei ona tuputupu a’e. Sa [ia] lagonaina le sa’o ma le manaia o le talalelei toefuataiga a Iesu Keriso, ma sa manao o ia e faasoa atu i isi.¹⁶

Sa amata ona o faatasi Napela ma faifeautalai i a latou asiasiga, ma sa ia talaiina atu le talalelei ma le mana ma le manino lelei. Sa ia tusi atu foi i se tasi o aso ia Polika Iaga e faasoa atu le tala o lona liliu mai. Sa molimau atu Napela, “Ua matuai manino lelei lava ia i matou o le ekalesia lenei a le Atua, ma ua ou fia alu atu i le tulaga o loo e i ai, pe a oo mai le taimi talafeagai.”¹⁷

Ina ua taunuu faifeautalai fou i le atumotu, o le le gafatia ona latou tautatala i le gagana sa tai pei lava o se mea malie. Sa ofo atu Napela e tuu atu ia i latou ni lesona i le gagana—o se fautuaga sa latou taliaina ma le fiafia. Sa ia tuuina atu ia i latou ni Tusi Paia ma ni lomifefiloi faaHawaii, se nofoaga e suesue ai, ma ni mea e aai ai. O taeao ma afiafi uma lava, na tauloto ai e alii faifeautalai ni fuaitau mai le Tusi Paia i le faaHawaii ae su’esu’e i latou e Napela i [faaupuga] faigofie o lana gagana. E oo ane i le faaiuga o aso taitasi, na matuai lelavava lava ana tagata aooga.

Na fai mai se tasi o faifeautalai, “sa avea lava a’u i taimi uma o se tagata galue malosi, ae o le galuega aupito faigata lenei ua ou faia.”¹⁸

Ina ua mavae ni nai aso o aoaoga mai ia Napela, sa mafai e alii faifeautalai ona faaleo ni isi o upu—e tusa lava pe na leai se mea na latou faitauina na malamalama i ai. I totonu o se masina, ua ave e alii faifeautalai a latou tusi i ni nofoaga filemu i le togavao e faataitai ai le gagana e ala i le faaliliuina o mataupu o le Tusi Paia mai le Igilisi i le faaHawaii faigofie.¹⁹

Ina ua faaiu e Napela ana aoaoga, sa taape atu alii faifeautalai i le salafa o le atumotu, ua taoso lelei i le faataunuuina o a latou misiona. E le’i umi ae faauuina Napela o se toeaina, ma avea ai ma se tasi o tagata Hawaii muamua na umia le Perisitua Mekisateko. Sa mauaa le talalelei ia te ia, ma e faafetaia ai se vaega o ana lava taumafaiga, sa amata foi ona mauaa i Hawaii.²⁰

---

Sa vaai Viliamu Walker mo le taimi muamua ia Cape Town, Aferika i Saute i le aso 18 o Aperila, 1853.²¹ O le aai e taatia i le faatausiusiuga i sautesisifo o se faga i auvae o se mauga maualuga e mafola le tumutumu. Sa aliali a’e se isi tumutumu, e toeitiiti tutusa le maualuga ma le isi, i luga ae o le itu i sisifo o le aai. Mai le mea na tu ai Viliamu, i luga o le fogavaa o le vaa pe a ma le tasi le maila mai le matafaga, sa foliga mai le tumutumu mauga o se leona tele na taoto i lona manava.²²

O le valu masina na muamua atu, sa aofia ai Viliamu ma ana soa o Iese Haven ma Leonard Samita, i le 108 o alii na valaauina i le galuega faifeautalai i le konafesi faapitoa ia Aokuso 1852. O Viliamu lava ia sa i ai i mauga i sautesasae o le Aai o Sate Leki, sa tipi laau ai e fau ai se ililaupapa i le taimi na faasilasilaina ai lona valaauga. Sa alu atu o ia i le aai i ni nai aso mulimuli ane e faafaigaluega ni tamaloloa e fesoasoani ia te ia i le ili, a o alu atu o ia iina, sa ia faalogo ai e uiga i lona tofiga fou.²³

O se tagata sa avea ma se fitafita o le Autau a Mamona o lē sa tuuto faamaoni i le faamoemoe o Siona, sa faapea loa ona tapena Viliamu i le taimi lena mo lana misiona. I le tolusefulu lua [o ona tausaga], sa ia tuua ana avā e toalua, ni tamaiti laiti e toalua, ma se fale fogafale lua na fai i piliki palapala i le aai. Sa ia faatau atu ana sea o le ililaupapa, faatau mai ai ni oloa na lava e tausi ai lona aiga mo se tausaga, ma tuua loa le Aai o Sate Leki i le sefululima o aso mulimuli ane.²⁴

Ina ua taula le latou vaa i Cape Town, sa o ese loa Viliamu ma ana soa ma iloa ai sa mamao ese lava le mea na latou i ai mai Iuta.²⁵ O Cape Town sa o se nofoaga tuai o Take lea sa i lalo o le pule a Peretania. O tagata kolone papae Peretania ma tagata Aferika—o e tupuga mai i uluai tagata kolone o Take—na maua ai se vaega o le tolusefulu afe o tagata na nofoia le aai, ae toetoe o le afa o lona faitau aofai sa o tagata fefiloi po o tagata uli, e aofia ai le toatele o Mosalemi ma tagata sa avea muamua ma pologa.²⁶

I le afiafi o le aso 25 o Aperila, sa faia ai e faifeautalai la latou uluai fonotaga i le fale faafiafia tele i le taulaga. Sa susue e Iese lana Feagaiga Fou ma talai atu mai le Kalatia i se faapotopotoga lelei. Sa sosoo atu ai ma Leonard i se lauga e uiga ia Iosefa Samita, le Tusi a Mamona, ma faaaliga. Sa amata ona tapisa ni isi o tagata o le aofia ma faasalavei i faifeautalai. Sa vave ona tupu ai se fouvalega, ma faaiuina ai le fonotaga i vesiga. Ina ua toe foi atu faifeautalai i le falefaafiafia i le aso na sosoo ai e fai se isi fonotaga, ua taloka faitotoa.²⁷

Sa anapopogi ma tatalo faifeautalai ina ia tatala e le Alii loto o tagata ia talia le upumoni ma ia faaali atu sina agalelei ia i latou. O le tele o po sa momoe ai faifeautalai ma le fiaaai. Sa tusia e Viliamu i lana apitalaaga, “Sa foliga mai na matuai leai lava ni a matou uo.” “Sa matuai fuli lava le tiapolo e faagalala i matou.”²⁸

O le isi vaega na faafaigata ai la latou galuega o tagatanuu. O se tausaga na muamua atu, sa finauina ai e le au faitulafono a Iuta le tulaga o pologa uli i Iuta. Sa le’i mananao Polika Iaga po o le au faitulafono ia salalau atu pologa i le risone, ae peitai, na uma ona aumai e ni nai tagata o le Au Paia mai le Iunaite Setete i saute ni tagata pologa i le teritori. Sa talitonu Polika i le tulaga faaletagata soifua o tagata uma, ma sa tetee o ia i le faia o pologa e pei ona sa i ai i Amerika i Saute, lea sa manatulia ai alii ma tamaitai pologa o ni meatotino ma sa leai ni o latou aiā tatau faavae. Ae e pei o le toatele o tagata mai le Iunaite Setete i matu, sa talitonu o ia o tagata uli sa talafeagai mo pologa.²⁹

I le aluga o faafinauga, sa folafola faalauaitele ai e Polika mo le taimi muamua e faapea, o tagata uli e tupuga mai Aferika, ua le mafai ona faaeeina i ai le perisitua. A o le’i oo i lea taimi, sa i ai ni nai alii uli sa faauuina, ma sa leai ni tapulaa sa i ai i lena taimi pe na mulimuli ane ai mo isi tagatanuu po o tagata o isi atunuu. A o ia faamalamalamaina le faatapulaa, sa toe ta’ua ai e Polika se manatu taatele ae sese e faapea, na fetuu e le Atua ia tagata uli e tupuga mai Aferika. Ae sa ia ta’ua foi e faapea, i se taimi i le lumanai, o le a “maua ai e le [Au Paia uli] ia aiā tatau uma ma le tele [o isi mea]” ua olioli ai isi tagata o le Ekalesia.³⁰

Sa tetee le Aposetolo o Orson Pratt, o lē sa tautua i le ofisa faitulafono, i le faatagaina o pologa i le teritori ma lapataia ai le au faitulafono e faasaga i le faia o pologa i luga o ni tagata e aunoa ma le pule a le Atua. Sa ia fesili atu, “Pe o le a tatou ave la le tagata Aferika mamā sa le’i faia se agasala, ma faasala o ia i le pologa ma le saisaitia e aunoa ma le mauaina o se pule mai le lagi e fai ai lea mea?”³¹

Sa faapena foi ona fesiligia e Orson Spencer, o lē sa avea muamua ma se peresitene o le misiona ma sa galue i le ofisa faitulafono, le ala o le a aafia ai le galuega faifeautalai i lenei faatapulaa. “E mafai faapefea ona aveina atu le talalelei i Aferika?” sa ia fesili ai. “E le mafai ona tatou tuuina atu ia i latou le perisitua. O le a faapefea ona latou mauaina?”³²

O fesili faapena e uiga i le faatapulaa o le perisitua sa le’i foiaina, ae peitai, sa iu ina palota e le au faitulafono e faatuina se polokalama o tagata “pologa” uli i le teritori.³³

Afai sa i ai se aafiaga tuusa’o o le saunoaga a Polika i faatinoga a Viliamu ma ona uso a faifeautalai i Aferika i Saute, sa leai se mea e uiga i ai na ta’ua i a latou tusitusiga. O le tautalaga sa le’i faasāina ai alii ma tamaitai uli mai le auai i le Ekalesia. Peitai a o saili isi lotu ia maua ni tagata liliu mai i tagata uli, sa taulai atu e Viliamu, Iese, ma Leonard a latou taumafaiga autu i tagata papae na nofoia le aai.³⁴

I se tasi o aso, i le mavae ai o se masina ae sa le’i faamanuiaina lava le talaiga, sa alu atu ai Viliamu i ni maila i tua atu o le aai i le sailiga o ni nofoaga fou e talai atu ai. Sa matuai mamafa le toulu o timuga, ma sa le’i leva ae palavivi le ofuvae ma seevae o Viliamu. Ina ua mavae sina taimi, sa afe loa o ia i se faletalimalo ma faailoa atu ai o ia o se faifeautalai o le Au Paia o Aso e Gata Ai.

Sa faataupupula lapelapea atu le pule o le faletalimalo ia te ia. “Ou te le kea po o ai oe,” sa fai atu ai le pule o le faletalimalo, “pau lava le mea o le totogi o oe lava.”

“Matou te malaga ma talai atu le talalelei e aunoa ma ni atotupe po o ni taga,” sa amata faamalamalama atu ai e Viliamu, ae sa vave lava ona tuliese o ia e le pule o le faletalimalo.

Sa toe savali ese ma le vaivai ia Viliamu i le po timuga, na tiga ma mafoefoe ona vae. Sa le’i umi ae faateteleina le matagi, ma sa ia augani atu mo se malutaga i fale uma sa ia pasi atu ai. E oo ane i le taimi na taunuu ai i le taulaga i Mowbray, e fa maila mai Cape Town, ua faasefuluono ona teena o ia.

I Mowbray sa afe ai o ia i se fale ma e toalua ni alii sa taliina mai le faitotoa. Sa fesili atu Viliamu i le alii laitiiti o alii e toalua pe o i ai sona potu po o se moega o avanoa. Sa manao le alii talavou e fesoasoani ia te ia, ae sa le’i i ai se avanoa e malolo i ai o ia mo le po.

Ma le mafatia, sa toe laa atu ai Viliamu i fafo i le timuga. Ae sa le’i leva ae oo atu le tamaloa matua ia Viliamu ma ofo atu ia te ia se avanoa e moe ai i lona fale. A o la savavali, sa ia faailoa atu o ia lava o Nikolao Paulo, o le paaga faipisinisi a le isi tamaloa sa i ai i le faitotoa, o Charles Rawlinson. O i laua o ni konakarate faufale mai Egelani o e sa me’i atu i Aferika i Saute mo galuega.

Sa taunuu atu Viliamu ma Nikolao i le fale o Nikolao i le te’a laitiiti o le iva. Sa matuai palavivi lavalava o Viliamu, o lea na vave fai ai e le toalua o Nikolao, o Harriet se afi. Ona ia laulauina atu lea o se taumafataga vevela, ma na usu e Viliamu se viiga ma tatalo. Ona latou talanoa lea mo le lua itula ona faatoa latou lagonaina lea o le fiamomoe ma latou malolo ai mo le po.³⁵

---

O ni nai aso talu ona mavae le feiloaiga ma Nikolao ma Harriet Paulo, sa fuafuaina loa e Viliamu e talai atu i ni isi o pagota i se falepuipui lata ane i le fale o le au Paulo. Sa auai atu Nikolao ma Charles Rawlinson i le lauga, sa faagaeetia uma nei alii i le savali a Viliamu. Sa ta’u atu e Harriet i le faifeautalai, sa talia o ia latou te nonofo i soo se taimi lava. E le’i leva ae ofo atu e le au Paulo e talimalo i se fonotaga a le Ekalesia i lo latou fale.

Sa faafaigaluega e Nikolao le fasefulu e oo i le limasefulu o tagata i Mowbray ma sa lelei lona talaave. Ae ina ua faalogo ni isi o tagata i le taulaga e uiga i le fonotaga na loma, sa latou faamata’u ane e taei ana faamalama ma faitotoa ma faataape le faapotopotoga. Sa faapea atu Nikolao e talia tagata uma ia auai, ae sa ia faamata’u atu e fanaina soo se tagata e taumafai e faalumaluma ia Viliamu po o soo se isi lava i totonu o le fale. Ina ua oo i le aso o le fonotaga, sa talai atu Viliamu e aunoa ma se mea faalavefau i totonu o se fale na faatumulia.³⁶

Faatasi ai ma le fesoasoani a Nikolao, sa amata ai ona tuputupu a’e le Ekalesia i Cape Town. I se tasi o po, a’o le’i leva ona uma le fonotaga muamua i le fale o le au Paulo, sa fai atu Viliamu ia Nikolao e aua le tolopoina ona papatiso pe afai na faatalitonuina o ia e uiga i le upumoni. Sa fai atu Nikolao, ua saunia o ia e papatiso, ae sa pogisa ma timuga fafo, ma sa le’i mafaufau o ia e alu i fafo Viliamu i se po faapea.

“Ioe, ou te alu,” sa fai atu ai Viliamu. “E le mafai ona taofia au i le timu po o le pogisa.”

Sa papatisoina e Viliamu ia Nikolao i le taimi lava lea, ma o aso na faasolo ane ai, sa ia papatisoina ai Harriet faapea foi ma Charles ma lona toalua.³⁷ O le taimi lea, sa tusia ai e Iese Haven ni nai tamaitusi e uiga i le aoaoga faavae o le Ekalesia ma le mataupu faavae o le faaipoipoga autaunonofo, ma sa tufatufa atu e faifeautalai i le aai atoa.³⁸

E oo ane i aso muamua o Setema, ua papatisoina e faifeautalai o le Au Paia o Aso e Gata Ai le silia ma le fasefulu o tagata ma faatulagaina ni paranesi se lua i sautesasae o Cape Town.³⁹ Na i ai faatasi i tagata fou o le ekalesia ni tamaitai uli se toalua, o Sara Hariss ma Rasela Hanable, ma se tamaitai Aferika na igoa ia Ioana Provis.⁴⁰

Faatasi ai ma paranesi e lua na faatulagaina, sa faapotopoto faatasi ai e faifeautalai le Au Paia Aferika i Saute i le aso 13 o Setema ma tofia ni alii se toalima ma ni tamaitai se toatolu e auauna atu i ni misiona i le eria o Cape Town pe tufatufa atu tamaitusi i o latou pitonuu.⁴¹ Ae sa manatu Iese Haven sa manaomia e le eria ni isi faifeautalai se toatele.

“Afai na i ai ni isi a matou faifeautalai se toaono iinei, o le a tele galuega mo i latou e fai,” sa ia tusi atu ai i le Au Peresitene Sili. “O i latou ua papatisoina ua autasi lelei—ua naunau e fai mea tonu. Ua latou olioli ua feola e vaai i lenei aso, ma o o latou foliga ua faasaga atu i Siona.”⁴²

---

O se mea o le vaitaimi foi lea, na faama’eaina ai e Siaosi Kanona ma Ionatana Napela le laua faaliliuga o le Tusi a Mamona i le faaHawaii. Sa tau le mafai e Siaosi ona taofiofi lona fiafia. E leai se mea i lana misiona na aumaia ai ia te ia le faamalieina ma le tuputupu a’e faaleagaga faateleina. Ina ua amataina le galuega faatino, sa ia lagonaina atili le Agaga pe a talai atu, sili atu le mamana pe a molimau atu, ma tele atu le faatuatua pe a faataunuuina sauniga o le perisitua. Sa taumasuasua lona loto i le agaga faafetai.⁴³

O ni nai aso mulimuli ane, i se konafesi a faifeautalai e toaluasefulu i Wailuku, sa soalaupuleina ai e Siaosi ma isi alii faifeautalai le auala sili ona lelei e lolomi ai le tusi. Sa galue Siaosi o se lomitusi faaa’oa’o i le ofisa o le Times and Seasons i Navu, o lea sa i ai sona silafia o le mea e manaomia ia ausia ai le galuega faatino. A le o le latou faafaigaluegaina o se tagata lomitusi o le motu, pe e mafai foi ona latou faatauina mai se masini lomitusi ma sapalai ma lolomi ai e i latou lava ia tusi.

“Mo a’u lava ia,” sa fai atu ai Siaosi, “Ou te le manatu ua faataunuuina atoatoa la’u misiona seia oo ina ou vaai ua talia le Tusi a Mamona mo le lomiaina.”⁴⁴

Sa malilie faifeautalai ma tonu e lolomi le tusi e i latou lava ia. Sa latou tofia Siaosi ma isi alii e toalua e malaga atu i motu uma e saili ni tupe mo le lolomiga e ala i le aoina mai o foai mai le Au Paia ma faatau atu kopi nonō o le tusi.

O le isi, sa talanoaina e alii le faapotopotoina o le Au Paia. E silia ma le tolu afe tagata Hawaii na auai i le Ekalesia i totonu o le tolu tausaga talu ona o mai faifeautalai i atumotu, peitai o lo latou matitiva ma tulafono faigata tau i femalagaina a Hawaii na faasāina ai i latou mai le tuua tumau o le malo. Ina ua ia iloa e uiga i le faafitauli, sa fautuaina e Polika Iaga le Au Paia Hawaii e saili “se motu e talafeagai, po o se vaega o se motu” e mafai ona latou faapotopoto ai i le filemu sei oo ina matala mai le ala mo i latou e o mai ai i Iuta.⁴⁵

O Faranisisi Hammond, o se tasi o faifeautalai sa tofia e su’e se nofoaga le tumau e faapotopoto i ai, na fautuaina atu le Faaofuofu o Palawai i Lanai, o se motu e i sisifo ane o Maui. “Ou te le’i vaai lava i se nofoaga na saunia lelei mo le faakoloneina o le Au Paia i luga o nei motu nai lo o lenei,” sa ia matauina ai i le taimi na ia vaai muamua ai i le eria. Sa talitonu o ia, na pau lava lona faaletonu, o le leai o ni timuga i se taimi o le tausaga. Ae afai e fau e le Au Paia ni faatanoa e pei ona sa latou faia i le Aai o Sate Leki, o le a tele le vai latou te maua i le aluga o le vaitau o le lamala.

O le aso na sosoo ai, sa palota ai le Au Paia Hawaii e lagolago ia faaiuga e lolomi le Tusi a Mamona ma su’e i motu se nofoaga e faapotopoto ai.⁴⁶ O le lua vaiaso mulimuli ane, sa malaga atu ai Siaosi, Napela, ma ni isi o faifeautalai i Lanai e siaki le Faaofuofu o Palawai. Sa latou o ese atu ina ua uma le mālutaeao o le aso 20 o Oketopa ma feaei i le auala papa tifatō o se mauga seia oo ina laugatasi le laueleele mo se mamao puupuu ma mafai ona latou iloa atu ai le faaofuofu. O le faaofuofu pe na tusa ma le lua maila le lautele, sa matagofie lona mamanu, ma sa tuufua mai le vaaiga mai le sami.

Sa tusia e Siaosi i lana apitalaaga, “Sa o se fasi laueleele matagofie naua ma sa foliga mai sa fetaui lelei mo se nofoaga e faapotopoto i ai.” “Sa na faamanatu mai ia te au ia Tesareta.”⁴⁷

1. Brigham Young, Cornerstone Laying, Apr. 6, 1853, Church History Department Pitman Shorthand Transcriptions, CHL; Brigham Young, Apr. 6, 1853, Historian’s Office, Reports of Speeches, CHL; “Minutes of the General Conference,” Deseret News, Apr. 16, 1853, [2]; Historian’s Office, History of the Church, volume 23, Apr. 6, 1853, 43; tagai foi Saints, volume 1, chapter 8. Autu: Malumalu o Sate Leki

2. Brigham Young, Cornerstone Laying, Apr. 6, 1853, Church History Department Pitman Shorthand Transcriptions, CHL; “Minutes of the General Conference,” Deseret News, Apr. 16, 1853, [2]; Woodruff, Journal, Feb. 14, 1853; “The Temple,” Deseret News, Feb. 19, 1853, [2]; Anderson, “Salt Lake Temple,” 250–52, 259, 263.

3. Historian’s Office, History of the Church, volume 23, Apr. 6, 1853, 43; Anderson, “Salt Lake Temple,” 253.

4. Romney, Journal, Apr. [2], 1853, 29.

5. Temple Souvenir Album, 5, 7.

6. “Minutes of the General Conference,” Deseret News, Apr. 16, 1853, [2]; Brigham Young, Cornerstone Laying, Apr. 6, 1853, Church History Department Pitman Shorthand Transcriptions, CHL; Brigham Young, Apr. 6, 1853, Historian’s Office, Reports of Speeches, CHL; Bennett, “Line upon Line,” 48–49; Anderson, “Salt Lake Temple,” 254; Historian’s Office, History of the Church, volume 23, Apr. 6, 1853, 43.

7. “Minutes of the General Conference,” Deseret News, Apr. 16, 1853, [2]. Autu: Temple Endowment [Faaeega Paia o le Malumalu]

8. Lee, Journal, Mar. 21, 1847; Woodruff, Journal, Aug. 15, 1847; Brigham Young, Discourse, Apr. 6, 1853, Church History Department Pitman Shorthand Transcriptions, CHL. Autu: Temple Building

9. “Minutes of the General Conference,” Deseret News, Apr. 16, 1853, [2].

10. Ann Eliza Logan Secrist to Jacob F. Secrist, May 30, 1853; Jacob F. Secrist, “For the Satisfaction of My Wife and Children,” Dec. 3, 1853, [22], Jacob F. Secrist Collection, CHL.

11. Ann Eliza Logan Secrist to Jacob F. Secrist, May 30, 1853, Jacob F. Secrist Collection, CHL; “German Mission,” Deseret News, May 28, 1853, [2]; tagai foi “Foreign Correspondence,” Deseret News, Nov. 27, 1852, 4; “Liverpool Correspondence,” ma le “Italian Correspondence,” Deseret News, Feb. 5, 1853, [2]; ma le “Foreign Correspondence,” Deseret News, May 14, 1853. Autu: Growth of Missionary Work

12. Ann Eliza Logan Secrist to Jacob F. Secrist, Sept. 29, 1852; Oct. 30, 1852; May 30, 1853; June 30, 1853, Jacob F. Secrist Collection, CHL.

13. Ann Eliza Logan Secrist to Jacob F. Secrist, June 30, 1853, Jacob F. Secrist Collection, CHL. E faatatau i le fuaiupu muamua o le upusii, o le faapogai autu ua faaleagaina i le vaega lea, o lea ua faaaogaina ai se upu mo le manino. O le uluai punavai o loo i ai le “Ou te fia iloa lou mafaufau e uiga i le mataupu.”

14. Tagai George Q. Cannon, Journal, Apr. 2, 1853, footnote, Journal of George Q. Cannon website, churchhistorianspress.org; Allred, Journal, Apr. 2, 1853; ma Minutes, Deseret News, Extra, Sept. 14, 1852, 14–22. Autu: Hawaii

15. George Q. Cannon, Journal, Apr. 7, 1853; Woodbury, Diary, volume 2, Apr. 7 and May 22, 1853; Green, Diary, Apr. 7, 1853.

16. Reddick Allred, Journal, Mar. 24, 1853; George Q. Cannon, Journal, July 4, 1851; May 20, 1852; Oct. 6, 1852; Cannon, My First Mission, 42, 59–61; tagai foi Alema 32:28. Autu: Jonathan Napela

17. George Q. Cannon, Journal, Jan. 27–July 22, 1853; Jonathan Napela to Brigham Young, Apr. 8, 1852, Brigham Young Office Files, CHL; Jonathan Napela to Brigham Young, Apr. 8, 1852, i le “Foreign Correspondence,” Deseret News, Nov. 27, 1852, [4].

18. George Q. Cannon, Journal, Apr. 8, 1853; Reddick Allred, Journal, Mar. 24–25 and Apr. 27, 1853; Green, Diary, Apr. 16, 18, and 20, 1853. Ua faasa’oina le upusii mo le manino; “Ou te le’i fai” i le uluai [tusiga] ua suia i le “Ua ou faia.”

19. Green, Diary, Apr. 18 ma le May 17, 1853.

20. Reddick Allred, Journal, May 29–June 3, 1853; Philip B. Lewis to the First Presidency, Mar. 16, 1853, Brigham Young Office Files, CHL; George Q. Cannon, Journal, May 28 ma le July 22, 1853; tagai foi “Napela, Jonathan (Ionatana) Hawaii,” Biographical Entry, Journal of George Q. Cannon website, churchhistorianspress.org.

21. Walker, Journal, Apr. 18, 1853; Haven, Journal, Apr. 18, 1853. Autu: South Africa

22. Jesse Haven to Willard Richards, Aug. 20, 1853, Willard Richards, Journals and Papers, CHL; Haven, Journal, Apr. 18, 1853.

23. Minutes, Deseret News, Extra, Sept. 14, 1852, 10; Life Incidents and Travels, 16–17; Eighth General Epistle, Oct. 1852, i le Neilson and Waite, Settling the Valley, 172–73.

24. Life Incidents and Travels, 5, 13, 16–17.

25. Walker, Journal, Apr. 18, 1853; tagai foi Haven, Journal, Apr. 18–19, 1853.

26. Jesse Haven to Willard Richards, Aug. 20, 1853, Willard Richards, Journals and Papers, CHL; Cape of Good Hope, Census, iii, viii.

27. Walker, Journal, Apr. 25–26, 1853; Haven, Journal, Apr. 25–26, 1853.

28. Walker, Journal, Apr. 26 ma le 29, 1853; May 2, 1853.

29. Rich, “True Policy for Utah,” 64–67.

30. Tagai Brigham Young, Feb. 5, 1852, Historian’s Office, Reports of Speeches, CHL; “To the Saints,” Deseret News, Apr. 3, 1852, 2; Elder’s Certificate for Elijah Able, Mar. 31, 1836, i le Kirtland Elders’ Certificates, 61; Nuttall, Diary, May 31, 1879; Saints, volume 1, chapter 27; Cannon, “Jesse Haven,” 447–48; ma le “Race and the Priesthood,” Gospel Topics, topics.ChurchofJesusChrist.org.

31. Orson Pratt, Discourse, Jan. 27, 1852, George D. Watt, Papers, CHL. Ua faasa’oina le upusii mo le manino; na faaopoopo le upu “ina ia” i le faaiuga o le upusii.

32. Orson Spencer, Discourse, Jan. 27, 1852, George D. Watt, Papers, CHL; tagai foi “Spencer, Orson,” Biographical Entry, Joseph Smith Papers website, josephsmithpapers.org.

33. Acts, Resolutions, and Memorials of the Territory of Utah, 80–82; Rich, “True Policy for Utah,” 64–72. Autu: Indian Slavery and Indentured Servitude

34. Orson Spencer, Discourse, Jan. 27, 1852, George D. Watt, Papers, CHL; Jesse Haven to Willard Richards, Aug. 20, 1853, Willard Richards, Journals and Papers, CHL.

35. Walker, Journal, May 19, 1853; Life Incidents and Travels, 26; tagai foi Stott, Faith and Dissent, 49, 57–58.

36. Walker, Journal, May 25, 1853; Life Incidents and Travels, 26–27.

37. Walker, Journal, June 24–25, 1853; Life Incidents and Travels, 28.

38. Haven, Journal, June 12 and 15, 1853; Aug. 16, 1853; Jesse Haven to Samuel Richards, Jan. 20, 1854, Latter-day Saints’ Millennial Star, Mar. 18, 1854, 16:173–74; Jesse Haven, Some of the Principal Doctrines or Belief of the Church of Jesus Christ of Latter Day Saints (Cape Town: W. Foelscher, [1852]); Jesse Haven, William H. Walker, and Leonard I. Smith, A Warning to All ([Cape of Good Hope]: Publisher unidentified, [1853]); Jesse Haven, Celestical Marriage, and the Plurality of Wives! (Cape Town: W. Foelscher, [1854]); tagai foi Cannon, “Jesse Haven,” 448–49; and Whittaker, “Early Mormon Imprints in South Africa,” 404–16.

39. Life Incidents and Travels, 28; Walker, Journal, Aug. 16 and Sept. 7, 1853; Haven, Journal, Aug. 16 and Sept. 7, 1853.

40. Haven, Journal, Aug. 2, 1853; South Africa (Country), Part 1, 1853–1951, 44–47, Record of Members Collection, CHL; Cannon, “Jesse Haven,” 450, 452–53.

41. Walker, Journal, Sept. 13, 1853; Haven, Journal, Sept. 13, 1853.

42. Jesse Haven to Willard Richards, Aug. 20, 1853, Willard Richards, Journals and Papers, CHL. O le fuaiupu muamua o le upusii ua faasa’oina mo le faigofie ona faitauina; “o se tele o galuega” i le [tusiga] autu ua suia i le “tele galuega”

43. Cannon, My First Mission, 61.

44. George Q. Cannon, Journal, Oct. 5, 1853; “Cannon, George Quayle,” i le Jenson, Latter-day Saint Biographical Encyclopedia, 1:44; tagai foi George Q. Cannon, Journal, Aug. 18, 1853. Ua faasa’oina le upusii mo le faigofie ona faitauina; o le punavai autu o loo i ai le “Sa ou fai atu mo a’u lava, ou te le’i manatu o la’u misiona na faataunuuina atoatoa seia oo ina ou vaai ua talia le Tusi a Mamona ia lomiaina.”

45. George Q. Cannon, Journal, Oct. 5–6, 1853; Brigham Young to George Q. Cannon, June 15, 1853; Sept. 30, 1853, Brigham Young Office Files, CHL; Hawaii Honolulu Mission, Manuscript History and Historical Reports, volume 1, Oct. 6, 1853. Topic: Hawaii

46. Hawaii Honolulu Mission, Manuscript History and Historical Reports, volume 1, Oct. 6, 1853; George Q. Cannon, Journal, Oct. 6, 1853; Hammond, Journal, Sept. 24–28, 1853.

47. George Q. Cannon, Journal, Oct. 20, 1853; Karren, Journal, Oct. 19–20, 1853; tagai foi Sixtus Johnson, Journal, book C, Oct. 20, 1853.