Mataupu 28

Seia oo i le Afio mai o le Atalii o le Tagata

I le aso 19 o Iuni, 1875, na tuua ai e Polika Iaga le Aai o Sate Leki e asiasi atu i nuu i Iuta tutotonu.¹ Ua faatoa atoa lona fitusefulu-fa tausaga, ma ua amata ona faigata ona malaga. O taimi uma e minoi ai o ia, e tiga ona sooga o ivi i ma’i o ponaivi. Ae o le asiasi atu i nuu o le au paia na ia latalata atili atu ai i le Au Paia—ma maua ai se faaleleiga i le va o ia ma faigata faalemalo ona o le Ekalesia.

I le mae’a ai ona molia Siaosi Renolo mo le faaautaunonofo, na solia ai e le loia sili a le Iunaite Setete lana folafolaga i taitai o le Ekalesia ma molia ai foi Siaosi Q. Kanona i le faaautaunonofo. O le moliaga o Siaosi Kanona na faaleaogaina mulimuli ane, a o Renolo na faaauau ona molia ma faamaonia, ma sala tupe ai e $300.-, faatasi ai ma le falepuipuiina mo se tausaga. Na faaleaogaina e le faamasinoga maualuga faateritori le faasalaga o Renolo, peitai, i le mavae ai ona manuia le finauina e ana loia e faapea na molia o ia ma faasalaina e ni faamasino lagolago (juries) lea na le faaletulafono lona faatulagaina. O lea la ua saoloto Renolo, ma na faapea atu loia mo moliaga o le a toe aumai o ia e toe tulai i le faamasinoga.²

Ma le isi, o le ava faaautaunonofo ua tuuese e Polika o Ann Eliza Young, na auai faatasi talu ai nei ma le vaega faitio o le Ekalesia ia molia le perofeta mo le tatalaina o le faaipoipoga. Ina ua ia manaomia le sili atu ma le $200,000 o tupe ma isi mea, na teena e loia a Polika lona moliaga, i le talitonu ua tele naua. Na latou finau mai foi o Ann Eliza e le mafai ona tatala le faaipoipoga ma Polika i le tulafono ona e lei taliaina e le Iunaite Setete le autaunonofo o se tulaga aloaia . Ae ui i lea, na malo Ann Eliza i le faaiuga a Faamasino James McKean, ma auina atu Polika i le falepuipui mo le po e tasi ina ua ia, i le fautuaga a ana loia, musu e totogi seia uma ona latou toe talosaga mo le toe iloiloina o le faaiuga i se faamasinoga e maualuga atu.

Na faailoa e nusipepa i le atunuu atoa faatinoga a le faamasino faapea o se taumafaiga a tagata ia faamaasiasi ai Polika, ma na latou fetuuina ma faifaia McKean mo lena mea. I ni nai aso mulimuli ane, na suia ai o ia i se isi faamasino e le peresitene o le Iunaite Setete, ma na alu atu Polika e totogi pili faaletulafono e $3,000 a Ann Eliza.³

E lua aso talu ona tuua e Polika ma lana vaega le Aai o Sate Leki, ae feiloai ma le Aualofa i Moronae, o se tamai taulaga i le Vanu o Sanpete. O Eliza Snow ma Mary Isabella Horne, ia na malaga mai i le vaega lea, na uunaia tamaitai e faaauau le galulue faatasi ma ia ola tutoatasi i mea tautupe. Na uunaia i latou e Mary Isabella ia faamuamua le malo o le Atua i o latou olaga. “O mea tatou te faamoemoe ia maua,” na ia saunoa atu ai, “e tatau ona tatou galulue ia maua.”

Ona saunoa lea o Eliza e uiga i aoaoga faalelotu. O nisi o aiga i le Vanu o Sanpete na auina atu a latou fanau i se aoga fou e faia e se faifeautalai o se isi lotu, ma na popole taitai o le Ekalesia ina nei feteenai ana lesona ma mea na aoaoina e fanau mai o latou matua ma le Ekalesia.

“O Siona le nofoaga e aoao ai fanau a Siona,” na ia tau atu i tamaitai. “Ia malamalama fanau o lau tapuaiga e faasilisili i lou mafaufau.”⁴

I isi nofoaga i Sanpete, na uunaia ai e Polika le Au Paia ia taliaina se isi polokalama tuufaatasi tautupe. I le lua tausaga na muamua atu, na leaga ai le tulaga tautupe i Iuta ona o se pau o le tulaga tautupe o le atunuu atoa. Ae ui i lea, o ni nai faleoloa tuufaatasi ma falegaosi mea i le teritori na taulimaina lelei le pagatia tautupe, lea na faamalosia ai le talitonuga o Polika i faalapotopotoga.

Talu mai lena taimi, na ia valaau atu i le Au Paia ia ola e pei o tagata anamua o Enoka, ia na lototasi i le loto ma le mafaufau ma na leai se tasi na mativa ia i latou.⁵ O le polokalama, e taua o le Faatulagaga Autasi a Enoka, na manatua ai le faaaliga a le Alii i le tulafono o le faapaiaga. O sui o le polokalama na fesoasoani ai le tasi i le isi e pei o se aiga, ma saofaga atu ma le lotomalie i galuega ma meatotino patino e faalauiloa ai fale faigaluega faaleaiga ma faaleleia tulaga tautupe i le lotoifale.

O le tele o le Au Paia ua uma ona faatulagaina polokalama tuufaatasi i o latou nuu. E ui o polokalama e eseese mai le tasi ma le isi i le faatulagaga, na latou faasoa atu tulaga taua o faalapotopotoga tautupe, ola tutoatasi, ma le ola taugofie.⁶

Ao feiloai ma le Au Paia i Sanpete, na saunoa ai le aposetolo o Erastus Snow i le ala na faamanuiaina ai e le Faatulagaga Autasi le Au Paia i Iuta i saute. “O loo i ai se manao ia i tatou ia galue i lena ala faaloloto e matele i le mauoa ai o ni nai tagata i tupe a le toatele e matitiva,” na ia matauina ai. “O lenei lava mea o se amioleaga.”

“O le Faatulagaga Autasi o le aoao po o le a le mea e fai i mea ua tatou maua,” na faaopoopo atu ai Polika mulimuli ane i lena aso, “ma ia faaaoga i tatou lava e faataunuu ai fuafuaga a le Atua.”⁷

Ae lei faaiuina lana asiasiga i Sanpete, na saunoa atu Polika i taitai o le Ekalesia o le lotoifale. “E mafai ona tatou fausia ni malumalu iinei e taugofie atu i lena o loo i Sate Leki,” na ia tau atu ia i latou. “Pe toute lagona le mauaina ma le fausiaina o se malumalu iinei e outou lava ia?”

O alii uma nai totonu o le potu na sii o latou lima e faaali ai le latou lagolago, ma na latou malilie uma ia filifili e le perofeta se tulaga. Na asiasi atu Polika i ni nai tulaga e talafeagai, ma na ia faailoa atu lana filifiliga i le aso na sosoo ai.

“O le a ou faapea atu ua i ai lou agaga atoa i luga o le tumutumu o le mauga e faasino i Manti,” na ia saunoa ai.⁸

---

Ina ua foi mai Polika mai Iuta tutotonu, na i ai se alii e igoa ia Meliton Trejo i le Aai o Sate Leki na faaliliuina le Tusi a Mamona i le faaSipaniolo. O Meliton, o se fitafita matua mai Sepania, na sau i le aai mai Filipaina i le faaiuga o le taumafanafana o le 1874. Na ia taunuu i Iuta ma ona ofu toniga militeri, ma na vave lava ona tosina le vaai a tagata i ona foliga.

Na sau Meliton i le teritori ma sina iloa itiiti lava e uiga i le Ekalesia. Sa ia faalogo e uiga i le Au Paia i Mauga PaPa ma sa manao e asiasi ia i latou. I se tasi po i Filipaina, ina ua uma ona tatalo mo le taitaiga, na uunaia o ia i se miti ia faia le malaga. Na ia faamavae mai le autau, su’i faatasi ana tupe i totonu o lona faapeleue, ma malaga mai loa i se vaa mo San Francisco.

Na i ai loa i le Aai o Sate Leki, na feiloai Meliton i se alii e tautala faaSipaniolo lea na faailoaina atu o ia ia Polika Iaga ma isi taitai o le Ekalesia.⁹ Na faatoa talosaga atu lava Polika i ni alii se toalua, o Daniel Jones ma Henry Brizzee, ia saunia mo se misiona i Mekisiko. Na talitonu Polika o nisi o tupuga mai tagata o le Tusi a Mamona na nonofo iina, ma na ia naunau e auina atu le talalelei ia i latou. Ae na ia iloaina foi o Pale Palate na taumafai e ave atu le talalelei i Amerika Latina i le 1851 ma na le manuia le taumafaiga o se vaega ona e le maua le Tusi a Mamona i le faaSipaniolo.¹⁰

O se vaega o le sauniuniga a Daniel ma Henry, na fai atu Polika ia i laua e suesue le gagana ma iu ai ina faaliliu le Tusi a Mamona. Na iloa e i laua uma sina faaSipaniolo, ae o le manatu e faaliliu se tusi o tusitusiga paia na taufaafefe. Na leai se tasi o i laua na manatu e lava lona poto masani i le gagana. Na la manaomia se tagatanuu e tautala i le gagana e mafai ona fesoasoani ia i laua.

Na mafaufau Daniel ma Henry o le taunuu atu o Meliton na auina mai e le Atua. Na la aoaoina o ia i le talalelei, ma na taliaina ma le loto atoa e Meliton le papatisoga.¹¹ Ona valaaulia lea e Daniel ia Meliton la te nonofo mo le taumalulu e galue i le faaliliuga.

Na alu ni nai masina o Meliton i le faaliliuga o le tusiga paia. Ina ua uma tupe, na maua e Daniel le faatagaga mai ia Polika Iaga e fesili atu i le Au Paia mo ni foai. Na sili atu ma le faselau tagata na foai atu tupe e lagolago ai Meliton ma totogi ai le lolomiga.

Ina ua uma le iloiloina o le faaliliuga, na fuafua loa Daniel mo laupepa e selau o le tusiga mai le faaliliuga ia lolomiina o le Trozos selectos del Libro de Mormon.¹² Ae ui i lea, na manao Polika ia Daniel ia mautinoa ua sao le faaliliuga, o lea na fuafua ai Daniel e toe faitau le faaliliuga faatasi ma Meliton. Ao la faitau, na ole atu Daniel i le Atua e fesoasoani ia te ia ia maua ni measese i le la galuega. Soo se taimi lava e lagona ai se vaega le lelei i le tusiga, na te fesili atu ia Meliton mo le fesoasoani. Ona suesue lea ma le maelega e Meliton le faaliliuga ma maua ai le faasa’oga e manaomia. Na lagona e Daniel le taitaiga a le Alii i la latou galuega.

Na vave lava mulimuli ane ina ua uma ona lolomiina le Trozos selectos na valaaulia Daniel ma isi faifeautalai i Mekisiko. E lei tofia Meliton e o faatasi ma i latou, ae na ia faamoemoe o taumafaiga a faifeautalai o le a fua mai.¹³

Na malaga ese atu faifeautalai i le tautoulu o le 1875. Ae lei tuua, na teuina ma le faaeteete e Daniel ma isi le afe limaselau kopi o le Trozos selectos i tua o miula. Ona latou malaga atu loa lea i le auala palapala e faailoa atu le Tusi a Mamona i tagata o Mekisiko.¹⁴

---

I le taimi tonu lea, na faalogoina ai le talafou i le Aai o Sate Leki i le asiasiga ua fou mai a Peresitene Ulysses Grant. E lei i ai lava se Peresitene o le Iunaite Setete na asia muamua le teritori, ma na vave lava ona faatuina le faasafuaina atu o taitai o le teritori, tagata aloaia o le aai, ma sitiseni faaleoleo e faafeiloaiina o ia. Na valaaulia Polika Iaga e auai i le faasafuaga, ma e faapena foi Ioane Teila, ma Iosefa F. Samita.¹⁵

Na taunuu atu Grant ia Oketopa, ma na faafeiloaia o ia ma lona faletua, o Julia, e Polika Iaga i se nofoaafi i Ogden. Na mafai e Polika ona feiloai puupuu lava i le vaega ae lei tuumuli ese atu le peresitene e asiasi i le taavale e matamata ai o le nofoaafi.

“O loo ou naunau e vaai i le atunuu,” na faamatala atu ai e Grant.

Ina ua ia tuua, na saunoa atu Julia, “Ua ou le iloa pe faapefea ona valaau lau Susuga Young.”

“O nisi taimi e valaau au o kovana,” na tali atu ai Polika, “o nisi taimi o peresitene, po o, General Young, foi.” Na ia maua le tulaga mulimuli i ni tausaga na muamua atu o se taitai i le Autau a Navu.

“Ona ou te masani i tulaga faamiliteri, o le a ou valaau oe i le tulaga mulimuli,” na saunoa atu ai Julia. O lana tane, o se toa o le Taua o le Lotoifale o Amerika, ma na avea ma se taitai o le ami mo le tele o lona soifua.

“Ia, lau afioga,” na saunoa atu ai Polika, “o le a e maua nei le avanoa e tagai ai i nei tagata matitiva, itagia, ma inosia.”

“Oi, leai, General Young,” na tali atu ai Julia. “I le isi itu, o ou tagata e faatoa mafai ona faaaloalogia ma fiafia i ai tagata mo lo latou tumau, mausali, ma le faatuatua.” Ona ia faaopoopo atu lea, “E nao le tasi lava le tetee i ou tagata—o oe, General.”

E lei manaomia ona taua e Julia lona tetee; o lana tane o se tetee malosi o faaipoipoga faaautaunonofo. “Ia,” na saunoa atu ai Polika, “ana leai lena vaega semanu matou te le maua le faitauaofai ua matou i ai nei.”

“E faasaina lena mea e tulafono o le atunuu,” na saunoa atu ai Julia, “ma semanu ua leva ona tafiesea e le lima malosi o le malo sei vagana ai le alofa mo fanau laiti ma mama o le a pagatia ai lava.”

Ae lei tali atu Polika, na valaaulia o ia e se taitai o le aufaigaluega ia faatasi ma le peresitene i le taavale matamata, ma na tuua loa e Polika le Faletua o le Peresitene.

Mulimuli ane, ina ua taunuu i le Aai o Sate Leki, na tuua loa e Polika le au Grant, ma faaleo atu le faamoemoe o le a latou olioli i la latpou asiasiga. Mai le nofoaga o nofoaafi, na malaga atu ai le au Grant mo se asiasiga o le aai faatasi ma Geroge Emery, le kovana o le teritori. Ao latou tietie atu i tafatafa o le poloka o le malumalu, na latou vaaia ni laina o tamaiti, o ofu papae, o loo laina i auala ma o latou faiaoga o le Aoga Sa. Ao pasi atu le taavale a le au Grant, na lafo ane e tamaiti ni fugalaau i le auala ma pepese i le au asiasi.

Na ootia Peresitene Grant, ma fesili atu, “O fanau ia a ai?”

“Tamaiti Mamona,” na fai atu ai le kovana.

Na filemu le peresitene mo ni nai sekone. O mea uma na ia faalogo i ai e uiga i le Au Paia na taitai atu ai o ia e talitonu o i latou o ni tagata leaga. Ae o foliga ma amio a nei tamaiti na ese le mea na tau mai ai.

“Na faaseseina au,” na ia memumemu ai.¹⁶

---

I lena taumalulu, na tulai ai Samuel Chmabers e molimau i se sauniga a le Siteki o Sate Leki o le korama a tiakono. E pei o alii o saofafai faataamilo ia te ia, o ia o se tagata faamatua tagata. “Na ou sau iinei mo lau lotu,” na tau atu e Samuel i nei alii. “Na ou tuuese mea uma na ia te au ina ia sau iinei e fesoasoani e fausia le malo o le Atua.”

Ua sili ma le tolusefulu tausaga talu ona avea au ma se tagata o le Ekalesia. Na fanau mai o avea ma ni pologa i le Iunaite Setete i saute, na papatiso o ia i le sefulutolu tausaga ina ua uma ona aoao e faifeautalai o ia i le talalelei. Ona sa pologa o ia, sa le mafai ai ona faatasi atu o ia ma isi Au Paia i Navu. Sa itiiti sana sootaga ma le Ekalesia i tausaga na mulimuli mai, ae sa ia tausisia pea lona faatuatua e ala i le uunaiga a le Agaga Paia.

Ina ua uma le Taua a le Atunuu ma saoloto ai tagata pologa o le Iunaite Setete, sa leai se la tupe ma lona toalua, o Amanda, e siitia atu ai i Iuta. Na la galulue mo le lima tausaga, ma sefe pene uma na la mafaia, ae late lei malaga ese. Na la o mai i Iuta ia Aperila, 1870 ma le atalii o Samuelu, o Peter. Na siitia atu foi le tuagane o Amanda ma lona toalua, o Edward ma Susan Leggroan, ma le la fanau e toatolu i Iuta.¹⁷

O aiga o Chamber ma Leggroan na nonofo tuaoi i se tasi o aiga o le Uarota Muamua o le Aai o Sate Leki. O Richard ma Johanna Provis, o se ulugalii totolua mai Aferika i Saute, na nonofo foi i le uarota. Na auai le au Leggroan i le Ekalesia i le 1873 ma na vave ona siitia atu ma le au Chamber i le Uarota Valu, lea na nonofo ai foi Jane Manning, lona toalua, o Frank Perkins, ma nai isi Au Paia uli.¹⁸

I nei uarota, na tapuai faatasi le Au Paia uli ma le Au Paia papae. E ui lava e lei tuuina atu e le Ekalesia le perisitua i le Au Paia uli i lea taimi, na auauna atu Samuelu o se fesoasoani e lei faauuina i le korama a tiakono ma tuuina atu lana molimau i masina taitasi i fono a le korama. Na auai Amanda ma Jane i le Aualofa. Na latou totogi a latou sefuluai ma taulaga ma auai soo ia latou sauniga o le Ekalesia. Ina ua sau le valaau e foai atu i le malumalu o St. George, na foai atu e Samuelu le lima tala ao Jane ma Frank na foai atu le tai limasefulu sene.

O Samuelu ma Amanda, faatasi ma nai isi Au Paia uli, na auai talu ai nei i papatisoga mo e ua maliliu i le Maota o Faaeega. Na papatiso Samuelu ma Amanda mo le sili atu ma le lua taseni o uo ma aiga. Na papatiso Edward Leggroan mo le tane muamua a lona toalua. Na papatiso Jane Manning mo se uo ao laitiiti.¹⁹

Sa faamemelo Samuelu i lona auai i le Ekalesia ma le avanoa e fai ai lana molimau i le korama a toeaina. “A ou le tuuina atu lau molimau,” na ia fai mai ai, “e faapefea ona outou iloa ou lagona, po o o outou lagona? Ae afai ou te tulai ma tautala atu, ou te iloa o loo i ai sau uo, ma afai ou te faalogo atu o e tautala e pei ona ou tautala, ou te iloa ua tasi i tatou.²⁰

---

I le afiafi po o le aso 5 o Aperila, 1876, na luluina ai le ea o le tautotogo i luga o le Aai o Sate Leki e se pa leotele. Na lele i luga se afipomu tele lava mai le matie i matu lea na teu ai e le au eli maa ia pauta pomu. Na i ai se mea na faamumuina pomu, ma faaleaga ai le maa.

I le faleaoga o le Uarota Luasefulu, lea e aoao ai vasega a Karl Maeser, na salalau ai le faalo o le fale i le fola ona o le pomu. Talu ai sa fuafua e tuuina atu sana aoaoga i le faleaoga i lena po, na iloa e Karl e tatau loa ona ia talanoa atu i lona epikopo e uiga i le faafitauli.²¹

Na maua atu e Karl lona epikopo o fono ma Polika Iaga i le ofisa o le perofeta. Na lipoti atu e Karl le tele o le faaletonu i le faleaoga ma tau atu ia i laua e le mafai ona faaauau vasega seia faaleleia le fale.

“Ua sao lelei lava lena, Brother Maeser,” na saunoa atu ai Polika. “O loo ia te au se isi misiona mo oe.”²²

Na tau pe le fatu o Karl. Faatoa mavae ni nai tausaga talu ona foi mai se misiona i Siamani ma Suitiselani. O lana galuega tumau i le aoga a le Uarota Luasefulu o se faamanuiaga mo lona aiga. Sa manuia lava lo latou nonofo ai i le Aai o Sate Leki ma na lagonaina le i ai i le aiga.²³

Ae sa lei manao Polika ia te ia e alu mamao. E pei o Eliza Snow, na popole Polika ma isi taitai o le Ekalesia e uiga i le aoaoina o le tupulaga faiae o tagata talavou, ia na luiina lo latou faatuatua e ala o le sauaina o le Ekalesia pe na faamalolosia e ala i aafiaga o le liua ma le faigamalaga.²⁴

E lei tetee Polika i aoaoga faalelalolagi po o iunivesite; o nisi o ona atalii na aooga i kolisi i le Iunaite Setete i sasae. Ae na ia popole ona sa aoaoina talavou o le Au Paia e tagata na faitioina tele le talalelei toefuataiina. O le Iunivesite o le Tesareta, na faatoa faatuina i le 1850, na lesitala ai tamaiti aoga mai isi lotu ae lei aoaoina ai ni talitonuga o le Au Paia o Aso e Gata Ai o se vaega o mataupu aoaoina. Na manao Polika ia maua e le autalavou o le Ekalesia avanoa faaleaoaoga na e faamalosia lo latou faatuatua ma fesoasoani e fatuina se sosaiete o Siona.²⁵

Ina ia ausia nei vaega, o le mea moni, na ia faatuina talu ai nei se aoga i Provo na taua o le Brigham Young Academy. O lea faatoa uma lona kuata muamua, ma ua ia valaaulia Karl e pulea.

E lei tali vave atu Karl i le valaaulia a Polika. Ae i le lua vaiaso mulimuli ane, ina ua ia taliaina le tofiga, na asiasi atu ai Karl i le perofeta. “O lea o le a ou alu i Provo, Brother Young, e amata lau galuega i le aoga,” na ia fai atu ai. “E i ai ni au faatonuga?”

“Uso Maeser,” na fai atu ai Polika, “ou te manao ia te oe ia manatua e le tatau ona e aoao atu e oo lava i le alafapeta po o le faatele e aunoa ma le Agaga o le Atua.”²⁶

---

Mulimuli ane i lena tausaga, na faia ai e uarota uma lava i le Aai o Sate Leki se pati e saili ai tupe e faauma ai le malumalu o St. George. I le iloaina o Heber Grant e luasefulu tausaga o se alii talavou e tele ni uo, na tau atu ai e Bishop Edwin Woolley ia te ia e faatulaga le pati o lana Uarota Sefulutolu. “Ou te manao ia te oe ia faia ia manuia lena pati,” na ia tau atu ai ia Heber.

O le tausaga talu ai, na valaaulia ai Heber o se fesoasoani i le au peresitene o le Asosi o le Mutuale Faaleleia a Alii Talavou o lana uarota (Y.M.M.I.A.) o se faalapotopotoga fou na faatuina i le 1875 ina ua tau atu e Polika Iaga i uarota e faatulaga o latou alii talavou e pei lava ona latou faatulagaina o latou tamaitai talavou. I le avea ai o ia ma se taitai i le Y.M.M.I.A., na vaaia e Heber le fesoasoani atu i alii talavou ia atiina ae a latou taleni ma faamalosia a latou molimau o le talalelei.²⁷

Na i ai popolega o Heber i le talosaga a Bishop Woolley. “O le a ou faia lau vaega i le mea sili,” na ia fai atu ai, “ae e tatau ona e faamaonia, a le lava tupe maua, e te totogia le vaega e manaomia.”

Na ia faamatala atu o tagata talavou e fiafia e auai i siva e mafai ai ona latou uosi. O le siva lauiloa e fusi ai e paga le isi faalatalata ao faataamilo solo i le foloa siva i se lio tele. E ui lava o nisi tagata na manatu o le uosi e fai sina le talafeagai nai lo siva taitoafa, na faataga e Polika Iaga ni uosi se tolu i se pati. Ae ui i lea, na le fiafia Bishop Woolley i le siva, ma na faasaina ai i pati o le Uarota Sefulutolu.²⁸

“Ia,” na fai atu ai Bishop Woolley, “e mafai ona e maua au uosi e tolu.”

“E i ai se isi mea,” na fai atu ai Bishop Woolley. A aunoa ma se faaili lelei mo le siva, o le a faigata ia te ia ona faatau atu pepa. “O le a e le faatagaina le Olsen’s Quadrille Band e tata i lau uarota ona sa ona i se taimi le ili pu flute,” na ia tau atu ai i le epikopo. “E na o le tasi le faaili kitara numera tasi, o Olsen.”

Ma le musua, na malie ai le epikopo e faaaoga foi e Heber le faaili. “Ua ou tuu atu i lena alii talavou e fai mea uma e manao ai,” na ia fai atu ai ao savali ese. “O le a ou matuai faia o ia i le ofe i nofoaga faitele pe a le faamanuiaina.”

Na faaaoga e Heber le atalii o Heber o Eddie e fesoasoani e faatau pepa ma saunia le fale o le uarota mo le pati. Na latou tuuese kesi mai le potutele, tuu ni tagasolovae na faanoi mai i le fola, ma tautau ata o Polika Iaga ma isi taitai o le Ekalesia i luga o le puipui. Ona latou faaaoga lea o ni nai alii talavou e faalauiloa ai le siva i a latou fale faigaluega.

I le aso o le siva, na nofo Heber i le faitotoa ma se lisi alafapeta o tagata uma na faatauina pepa. E leai se tasi e faataga i totonu e lei totogia le tala limasefulu sene mo se pepa. Ona oo atu lea o Polika Iaga—e aunoa ma se pepa.

“Ou te malamalama o lenei mea e mo le malumalu o St. George,” na saunoa atu ai Polika. Na ia togi i lalo le sefulu tala. “Pe ua lava lena mo lau pepa?”

“Ua tele,” na fai atu ai Heber, ma le le mautinoa pe tatau ona ia ave atu le sui i le perofeta.

O lena afiafi, na faitau e Heber tupe ao faitau e Polika uosi. Na aumai e le uarota le sili atu ma le valusefulu tala, e sili atu i tupe na ao mai e se isi lava uarota mo le malumalu. Ma na sisiva tagata talavou ia latou uosi e tolu.

Ae ui i lea, na musumusu atu Heber i le taitai faaili ae lei uma le pati, e ta se pese uosi taitoafa, o se uosi e i ai faiga o le siva masani faasikuea.

Ao amata e le faaili ona ta le pese, na nofo Heber i talaane o Polika e faalogo i sana tala e fai pe a vaai i le uosi lona fa. E mautinoa lava, o le taimi lava na amata ai e le autalavou ona sisiva, na fai atu Polika, “O loo latou uosi.”

“Leai,” na faamatala atu ai Heber, “a latou uosi, latou te uosi faataamilo i le potu. O le siva taitoafa lena.”

Na tilotilo atu Polika ia Heber ma ata. “Oi, outou tama, outou tama,” na ia fai atu ai.²⁹

---

Na uma loa le siva a le Uarota Sefulutolu, na agai atu loa Polika i saute ma Uilifoti Uitilafi e faapaia ni vaega o le malumalu o St. George. E ui lava o le a le uma le malumalu seia oo i le tautotogo, ae ua saunia ni potu o sauniga mo le faaaogaina.³⁰ I le malumalu o Navu ma le Maota o Faaeega, na faia e le Au Paia ni faaeega paia mo na o tagata soifua. O le taimi lava na faapaia ai le malumalu o St. George, o le a latou faia loa faaeega paia mo e ua maliliu mo le uluai taimi.³¹

Ao latalata atu Polika i le nuu, na faigofie ona ia iloa atu le malumalu. Mai se nofoaga mamao, na foliga mai e pei o le malumalu o Navu, ae a latalata i ai o lona pito i fafo sa sili atu le faigofie. E i ai ona laina o faamalama uumi ma lagolago e le teuteua e lagolago ai ona puipui maualuluga papae. Na alu ae maualuga se olo faaofuofu i luga atu o se puipui e foliga o se maota tele ma ni pu e faaaoga i le taua e faasolo i le tumutumu.³²

I le Aso o le Tausaga Fou, 1877, e sili atu ma le afe lua selau tagata na taufaaofiofi i totonu o le pito i lalo o le malumalu mo le faapaiaina o le vai papatisoga.³³ Ina ua taunuu atu i le sitepu pito i luga o le vai papatisoga, na valaau atu Uilifoti Uitilafi mo le gauai atu o le Au Paia. “Ou te iloa e le mafai e lenei faapotopotoga ona tootutuli tulivae i lo latou tulaga feomai,” na ia saunoa atu ai, “ae e mafai ona punonou o outou ulu ma o outou loto i le Atua.”

Ina ua uma ona ofo atu e Uilifoti le tatalo o le faapaiaga, na malaga atu loa le faapotopotoga i le fogafale i luga i se potu tele e potopoto ai. Na toeitiiti le mafai ona savali Polika ona o le tiga o ponaivi, o lea na sii ai o ia e ni alii se toatolu i le potu. Ona faapaiaina lea e Erastus Snow le potu tele, ona sii atu lea e alii e toatolu Polika i luga i isi faasitepu e faapaia se potu o faamauga.

Ina ua foi mai Polika i le potu tele, na ia tauivi e tu i le pulelaa. Na faapaleni o ia lava i se tootoo laau, ma saunoa atu, “E le mafai ona ou ioe i ou lagona ia aluese atu mai lenei maota e aunoa ma le faaaogaina o lou malosi—le malosi o ou mama, manava, ma totoga e tautala ai.”

Na finagalo Polika i le Au Paia ia faapaia i latou lava ia faaola e ua maliliu. “Pe a ou mafaufau i lenei mataupu, ou te manao i leo o faititili e fitu e fafagu i luga tagata,” na ia folafola atu ai. “Pe mafai ona faasaoina tama e aunoa ma i tatou? Leai. Pe mafai ona faasaoina i tatou e aunoa ma i latou? Leai. Ae afai tatou te le feala i luga ma taofi le manao atu i mea o lenei lalolagi, o le a tatou iloa ai o i tatou o ni tagata taitoatasi o le a o ifo i lalo i seoli. ”

Na faanoanoa Polika faapea o le tele o le Au Paia na saili atu i mea o le lalolagi. “A faapea o le a tatou feala i luga i lenei mea, e faapitoa lava i le faaolataga o le aiga o tagata,” na ia saunoa ai, “O le a faatumulia lenei maota, e pei ona tatou faamoemoeina ia i ai, mai le taeao o le aso Gafua seia oo i le po o le aso Toonai.”

I le faaiuga o lana lauga, na sii i luga e Polika lona tootoo i le ea. “Ou te le iloa pe o faamalieina tagata i sauniga o le faapaiaga o le malumalu pe leai,” na ia saunoa ai. “E le o afa lou faamalieina, ma ou te le faamoemoe ia faamalieina seia sasaina ma tuliesea le tiapolo mai luga o le fogaeleele.”

Ao ia saunoa atu, na matuai ta lava e Polika le pulelaa i lona tootoo, ma tuua ai ni matogi i le laupapa.

“Afai ua ou faaleagaina le pulelaa,” na ia saunoa ai, “o le a mafai ona toe faaleleia e nei kamuta lelei.”³⁴

---

I le aso 9 o Ianuari, na asa atu ai Uilifoti Uitilafi i le vai papatisoga faatasi ma le afafine o Polika o Susie, ua sefuluvalu tausaga ma ua faaipoipo atu i se alii talavou e igoa ia Alema Dunford. Na faaaogaina se tootoo faalagolago ma se tootoo savali, na tulai ai Polika o se molimau ao papatisoina e Uilifoti Susie mo se tasi o ana uo ua maliu, le papatisoga muamua lava mo e ua maliliu i le malumalu o St. George. Mulimuli ane, na faaee e Uilifoti ma Polika o laua lima i luga o le ulu o Susie ma faamauina o ia mo le ua maliu.

E lua aso mulimuli ane, ae faatonutonuina e Uilifoti ma Polika ia faaeega paia muamua lava mo e ua maliliu na faia i se malumalu. Ona faaaluina lea e Uilifoti toeitiiti lava o aso uma na mulimuli ane i le faia o galuega o le malumalu. Na ia amata ona faaaogaina se suti paepae, le taimi muamua lea ua faia ai e se tasi ni ofu papae nai lo ofu masani o se vaega o sauniga o le malumalu. O le tina o Susie, o Lucy, na faapena foi ona tuuto atu o ia lava i galuega o le malumalu, na ofuina se ofu paepae o se faataitaiga mo tamaitai.³⁵

Ao galue Uilifoti i le malumalu, na tau atu ia te ia e Polika ma isi taitai o le Ekalesia e tusi le sauniga o le faaeega paia ma isi sauniga o le malumalu. Talu mai le taimi o Iosefa Samita, na faasaoina upu o sauniga i le na o le ala atu i upu e tautala ai. O le taimi lea o le a fai ai sauniga e mamao ese mai nofoaga autu o le Ekalesia, na finagalo Polika ia tusia sauniga i lalo ia mautinoa ai ua tutusa auala e fai ai i malumalu taitasi.³⁶

I le faalaugatasia o sauniga, na faataunuuina ai e Polika se galuega na tuuina atu e Iosefa Samita ia te ia i le mavae ai o faaeega paia i Navu. “E le o sao ona faatulaga lenei vaega, ae ua tatou faia le mea sili tatou te mafaia i lalo o tulaga faapenei,” na tau atu ai e Iosefa ia te ia. “Ou te faamoemoe o le a e vaaia lenei vaega ma faamaopoopo ma faatulaga nei sauniga uma lava.”³⁷

Na galulue Uilifoti ma isi mo ni vaiaso i le tofiga. Ina ua tusia i lalo sauniga, na latou faitau atu ia Polika, lea na taliaina pe toe iloiloina e pei ona taitaia e le Agaga. Ina ua maea, na saunoa atu Polika ia Uilifoti, “O lea ua i ou luma se faataitaiga e feaveai i faaeega paia i malumalu uma lava seia oo i le afio mai o le Atalii o le Tagata.”³⁸

1. Historical Department, Office Journal, June 19, 1875.

2. Reynolds, Journal, Oct. 21–23, 1874; Van Orden, Prisoner for Conscience’ Sake, 60–63, 68–74.

3. “Young vs. Young,” Salt Lake Daily Tribune, Mar. 12, 1875, [4]; “The order granting alimony,” President’s Office Files, Legal Files, Brigham Young Office Files, CHL; Historical Department, Office Journal, Feb. 26, 1875; Mar. 11, 1875; and May 10, 1875; Arrington, Brigham Young, 334–35, 373; Firmage and Mangrum, Zion in the Courts, 249–51; Whitney, History of Utah, 2:603–7; tagai foi Van Orden, Prisoner for Conscience’ Sake, 67.

4. Moroni Ward, North Sanpete Stake, Relief Society Minutes, June 21, 1875, 97–98; Sanpete Stake, Minutes, June 23, 1875, [15]–[16]; Brackenridge, “Evolution of an Anti-Mormon Story,” 82–85.

5. Tagai Mose 7:18.

6. Arrington, Fox, and May, Building the City of God, 136–45; Arrington, Great Basin Kingdom, 141, 323–30, 389. Autu: United Orders [Faatulagaga Autasi]

7. Sanpete Stake, Minutes, June 23, 1875, [13]–[14], [40]. Brigham Young quotation edited for readability; “United Order” in original changed to “The United Order.”

8. Sanpete Stake, Minutes, June 25, 1875, [44]–[45], [49]–[52], [67]; June 26, 1875, [34]; George Q. Cannon, Journal, June 25, 1875.

9. Jones, Forty Years among the Indians, 220–21; Duke, “Meliton Gonzalez Trejo,” 714–15.

10. Tagai Jones, Forty Years among the Indians, 220; “Book of Mormon in Spanish,” Deseret News, Apr. 16, 1884, [8]; and “Parley P. Pratt, October 31, 1852: Report of His Mission to Chile.”

11. Tagai “Meliton Gonzalez Trejo,” Missionary Database, history.ChurchofJesusChrist.org/missionary.

12. Trozos selectos del Libro de Mormon (Salt Lake City: Impreso para Daniel W. Jones en la imprenta del Deseret News, 1875).

13. Jones, Forty Years among the Indians, 219–33; tagai foi Geilman, “Taking the Gospel to Mexico: Meliton Gonzalez Trejo,” note 12.

14. Daniel Webster Jones, “Report of the Mexican Mission,” Oct. 5, 1876, 1; James Z. Stewart, Mission Report, Aug. 6, 1876, [1], Missionary Reports, CHL. Autu: Mexico

15. “Visit of President Grant,” Deseret News, Oct. 6, 1875, [8]; “Visit of President Grant,” Deseret News, Oct. 6, 1875, [12].

16. Simon, Personal Memoirs of Julia Dent Grant, 184–85; Tullidge, History of Salt Lake City, 620–23; “Visit of President Grant,” Deseret News, Oct. 6, 1875, [12].

17. “Minute Book of the Deacon’s Quorum Salt Lake City,” Nov. 11, 1873, 23; May 12, 1874, 55; Dec. 14, 1875, 163; “Worthy Couple Married 66 Years,” Deseret News, May 10, 1924, section 3, vii; Hartley, “Samuel D. Chambers,” 47–50.

18. Hartley, “Samuel D. Chambers,” 47–50; “Leggroan, Edward ‘Ned,’” Biographical Entry, Century of Black Mormons website, exhibits.lib.utah.edu/s/century-of-black-mormons; 1870 U.S. Census, 1st Ward, Salt Lake City, Salt Lake County, Utah Territory, 553[A]; 1880 U.S. Census, 1st and 10th Wards, Salt Lake City, Salt Lake County, Utah Territory, 10C; “8th Ward Liberty Stake Record of Members Early–1905,” [12]; “Worthy Couple Married 66 Years,” Deseret News, May 10, 1924, section 3, vii.

19. “Minute Book of the Deacon’s Quorum Salt Lake City,” 1873–76; Salt Lake City Eighth Ward, Liberty Stake, Relief Society Minute Book B, 2; “Worthy Couple Married 66 Years,” Deseret News, May 10, 1924, section 3, vii; “Minutes of Meetings Held in the 8th. Ward G. S. L. City,” Teachers Meeting, Oct. 14, 1874; Reiter, “Black Saviors on Mount Zion,” 100–104, 120–21; “Leggroan, Edward ‘Ned,’” Biographical Entry, Century of Black Mormons website, exhibits.lib.utah.edu/s/century-of-black-mormons. Autu: Priesthood and Temple Restriction [Puleaina o le Perisitua ma le Malumalu]

20. “Minute Book of the Deacon’s Quorum Salt Lake City,” Jan. 12, 1876, 167.

21. “Death and Destruction,” Salt Lake Daily Herald, Apr. 6, 1876, [3]; “Terrible Disaster,” Deseret Evening News, Apr. 6, 1876, [3]; “The Explosion,” Salt Lake Daily Herald, Apr. 7, 1876, [3]; Richards, Called to Teach, 358–59; Maeser, Karl G. Maeser, 76.

22. Maeser, Karl G. Maeser, 76–77; Richards, Called to Teach, 358–59.

23. Maeser, Karl G. Maeser, 77; see also Richards, Called to Teach, 251–86, 328–29, 348.

24. Moroni Ward, North Sanpete Stake, Relief Society Minutes, June 21, 1875, 97–98.

25. Richards, Called to Teach, 223, note 38; 330–32; 360–61; Jessee, Letters of Brigham Young to His Sons, 161, 199, 217, 264; Brackenridge, “Evolution of an Anti-Mormon Story,” 86. Autu: Church Academies [Aoga a le Ekalesia]

26. Maeser, Karl G. Maeser, 77, 79; Richards, Called to Teach, 363–65; Maeser, School and Fireside, 189; tagai foi “Going to Provo,” Deseret News, Apr. 12, 1876, [13].

27. Anderson, “Past of Mutual Improvement,” 2–3. Autu: Heber J. Grant; Young Men Organizations [Faalapotopotoga a Alii Talavou]

28. Heber J. Grant, “When I was a small boy,” box 176, folder 13, item 2, 12–13, in Heber J. Grant Collection, CHL; Shumway, “Dancing the Buckles off Their Shoes in Pioneer Utah,” 40–41.

29. Heber J. Grant, “When I was a small boy,” box 176, folder 13, item 2, 12–16, in Heber J. Grant Collection, CHL; Grant and Taylor, “When Brigham Young Watched a Waltz,” 654, 678.

30. Historical Department, Office Journal, Nov. 1, 1876; tagai foi Woodruff, Journal, Jan. 1, 1877.

31. “Discourse by President Brigham Young,” Deseret News, Sept. 24, 1873, 532; see also Mackley, Wilford Woodruff’s Witness, 170.

32. Woodruff, Journal, Nov. 9–10, 1876; Booth, St. George Temple, CHL.

33. Charles L. Walker, Journal, Jan. 1, 1877.

34. Woodruff, Journal, Jan. 1, 1877; Interviews with Living Pioneers, 40–41; see also “Dedication Services at the Temple at St. George,” Deseret News, Jan. 17, 1877, [8].

35. Alma Bailey Dunford and Susa Amelia Young, Dec. 1, 1872, 379, Sealings of Couples, Living and By Proxy, 1851–89, volume H, microfilm 183,398, U.S. and Canada Record Collection, Family History Library; Alma Dunford to Isaac Dunford and Leah Bailey Dunford, Dec. 21, 1872, Isaac Dunford Family Correspondence, CHL; Charles L. Walker, Journal, Jan. 9, 1877; Woodruff, Journal, Jan. 9 and 11, 1877; Feb. 1, 1877; Bennett, “Which Is the Wisest Course?,” 5–43.

36. Woodruff, Journal, Jan. 14, 1877; Mackley, Wilford Woodruff’s Witness, 168; Bennett, “Line upon Line,” 61–62; tagai foi Bennett, Temples Rising, 78–79, 210–12.

37. Nuttall, Diary, Feb.7, 1877.

38. Yorgason, Schmutz, and Alder, All That Was Promised, 282–84; Woodruff, “History of the St George Temple,” [2]. Quotation edited for clarity; “ensample” in original changed to “example.“ Autu: Temple Endowment [Faaeega Paia o le Malumalu]