Mataupu 39
O loo i ai pea i le Taitaiga [o le Ekalesia]
A o tafa ata o le 2013, sa tulimatai atu Peresitene Thomas S. Monson i se tausaga taua. Sa faailogaina ai e le gata o lona lima o se peresitene o Le Ekalesia a Iesu Keriso o le Au Paia o Aso e Gata Ai ae faapea foi lona limasefulu o se aposetolo a le Alii. Sa foliga na sa’o le taimi e toe mafaufau ai i lona i ai i le au peresitene ma le tulaga o le Ekalesia.
I ni nai tausaga na muamua atu, na maua ai e Peresitene Monson se tusi mai se tagata o le Ekalesia o loo tauivi. “E le’i tuua lava e le talalelei lo’u loto, e ui lava ua Ia tuua lo’u ola,” na tusia ai e le tamaloa. “Faamolemole ‘aua nei galo i matou o i fafo iinei—le Au Paia o Aso e Gata Ai ua leiloloa.”
O upu faamomoiloto a le tamaloa na faamanatu atu ai ia Peresitene Monson se atavali sa ia vaai i ai i se vaa faaola o loo tauasa a’e i totonu o galu maualuluga souā, ma papa’e e laveai se vaa ua pa’ulia. Sa umi se igoa masani o le atavali, lea na faapuupuu e Peresitene Monson i ni upu faigofie se tolu: I le Laveai. O le fasifuaitau na avea mase autu mo lana au peresitene. Talu ona avea ma perofeta, sa ia lagonaina se naunautaiga sili atu e mulimuli i le Faaola i le aapa atu ma le malamalama ma le alofa ia i latou o e na lagonaina le lē fiafia, fefe, leiloloa, pe tuulafoaiina.
I le aso 3 o Fepuari, na faamanatu ai e Peresitene Monson le lima tausaga o lona i ai i le au peresitene i se savali i le Au Paia. “E leai se faatapulaa o o tatou avanoa e auauna atu ai le tasi i le isi,” na ia tautino mai ai. “Ua siomia i tatou e i latou o loo manaomia lo tatou gauai atu, o a tatou faamalosiauga, o la tatou faamafanafanaga, o la tatou lagolago, o lo tatou agalelei.”
Na ia uunaia le Au Paia ia manatua upu a le Faaola: “Aua na faia e outou i le tasi o e aupito itiiti o o’u uso nei, o a’u lea na outou faia i ai.”
I lana savali, sa saunoa ai foi le perofeta e uiga i le galuega faafaifeautalai, o se tasi o le tele o auala e mafai ai e tagata o le Ekalesia ona o mai e laveai isi. I ni nai masina na muamua atu, sa ia faasilasila mai ai se suiga i le matua aupito itiiti mo le galuega faafaifeautalai, ma ua tuu ai i lalo i le sefuluiva mo tamaitai talavou ma le sefuluvalu mo alii talavou.
E faitau afe talosaga mo faifeautalai, e silia ma le afa o na talosaga e mai tamaitai talavou, e lei umi ae sasaa atu i le laumua o le Ekalesia. O le suiga na tuuina atu ai i le toatele o le autalavou ni avanoa fou e faamalolosia ai a latou molimau e uiga i le Faaola ma faafou ai la latou tautinoga i le Ekalesia e ala i le auaunaga faafaifeautalai. Ua faaitiitia ai foi feteenaiga mo tagata o le Ekalesia i atunuu na faigata ai ona auauna atu i aiaiga faavae a iunivesite po o auaunaga faamiliteli.
I le faaauauina o lana savali, na ta’ua ai e Peresitene Monson e tolusefulutasi malumalu fou ua fofogaina mai ma e sefuluono na faapaiaina i le lima tausaga ua mavae. “O le a faaauau pea ona faateleina nei fuainumera,” na ia folafola mai ai, “a o tatou agai i luma i le faia o malumalu ia maua e o tatou tagata uma, po o fea lava e nonofo ai.”
Mulimuli ane, na ia ta’ua ai le matua o lona soifua. “O Aokuso ua te’a atu sa faamanatuina ai lo’u aso fanau lona valusefulu lima,” o lana tala lea. “E i’u lava ina oo mai le matua iā i tatou uma.” Ae sa ia faamautinoa atu i le Au Paia o loo i ai le Ekalesia i lima lelei.
“O lo tatou Faaola, o Iesu Keriso, le o loo tatou mulimuli i ai, le o loo tatou tapuai i ai, ma le o loo tatou auauna i ai, o loo i ai pea i le foeuli,” na ia molimau mai ai. “A o tatou agai nei i luma, tau ina ia tatou mulimuli i Lana faataitaiga.”
I le aso 28 o Me, 2017, na tu ai Uili Binene e tuuina atu lana molimau i le falelotu o lana uarota i Luputa. O le Aso Sa mulimuli lea o lona aiga iina—mo sina taimi. Sa la mauaina talu ai nei ma Lili se valaauga mai le Au Peresitene Sili e avea ma taitai o le Misiona a Côte d’Ivoire Abidjan, i le talafatai i sisifo o Aferika. I le misia ai o lona avanoa e auauna atu ai i se misiona faamisiona a o talavou, sa faamoemoe lava Uili e i ai se aso e auauna atu ai faatasi ma Lili i se misiona. Ae e leai se tasi o i laua na faamoemoe e vave ona oo mai le valaauga.
I le tausaga na muamua atu, na sau ai Elder Neil L. Andersen o le Korama a Aposetolo e Toasefululua i le DRC e suatia le eleele mo le malumalu i Kinshasa. I le taimi o le malaga, sa la malaga atu ai ma lona faletua o Kathy i Mbuji-Mayi, o se aai e tusa ma le ivasefulu maila i matu o Luputa, e feiloai ma le Au Paia i le eria. Sa feiloai Uili ia Elder Andersen ma faasoa atu lana tala ia te ia.
I ni nai masina talu ona mavae le asiasiga a Elder Andersen, na faateia ai e le aposetolo ia Uili ma Lili i se valaau faavitio. Sa ia ta’u atu ia i laua e i ai se isi tofiga a le Alii mo i laua ma sa fai atu ni fesili e uiga i o laua olaga ma tiutetauave i galuega. Ona ia fesili atu lea ia Lili, “E te ioe e tuua lou atunuu ae alu e auauna atu i le Alii i se isi nofoaga?”
“Ioe,” o le tala lea a Lilly ia te ia. “Ua ma loto malie i ai.”
Pe tusa o se vaiaso mulimuli ane, na tuuina atu ai e Peresitene Dieter F. Uchtdorf le valaauga e avea ma taitai misiona. Sa la mauaina ma se su’ifefiloi o le olioli ma le fefe. Sa lagona e i laua uma le le mautonu pe mafai ona la taulimaina o la tiutetauave fou. Ae e le o le taimi muamua lea ua talosagaina ai i laua e le Alii e fai se mea faigata, ma sa la naunau e tuuto atoatoa atu i laua lava i Lana galuega.
“Afai o le Atua na valaauina i ma’ua,” na mafaufau ai Lili, “na o Ia lava o le a faaali mai o Ia lava ma faaagavaa i ma’ua mo le galuega.”
Sa talia lelei e le la fanau e toafa—e lima tausaga i le sefuluono—le tala. Peitai, sa le mafai e le Au Paia i Luputa ona nanaina le faanoanoa i o latou foliga ina ua faasilasila atu le valaauga o Uili ma Lilly. Ua silia ma le luasefulu tausaga, sa fesoasoani ai Uili i le Ekalesia e fua tele mai i Luputa, na tuputupu ae mai se vaega toaitiiti o tagata talitonu ua faaaunuua i se siteki olaola o Siona. Sa le na ona manatu le Au Paia ia te ia o lo latou peresitene o le itu ma le siteki sa i ai muamua. O le talalelei toefuataiina na aoaoina ai i latou e vaai le tasi i le isi o ni uso ma ni tuafafine, o lea na avea ai Uili, Lili, ma le fanau a Binene ma o latou aiga.
A o tuuina atu e Uili lana molimau i tagata o le uarota, sa ia lagonaina le alofa tele mo i latou. Ae sa tumau pea ona mago ona mata—e oo foi ia Lili, o tagata o le aufaipese, ma isi tagata uma na siomia o ia sa fetagisi. E itiiti ni mea i lona olaga na mavae atu e pei ona faamoemoeina. Sa foliga mai o taimi uma lava na te faia ai se fuafuaga—mo le aoga, mo se misiona faamisiona, mo le galuega—sa tupu se mea, ma auina atu ai o ia i se isi itu. Ae o le toe tepa i tua i lona olaga, sa mafai ona ia iloa ai sa i ai lava i taimi uma se fuafuaga a le Alii mo ia.
Ina ua maea le fonotaga, na iu lava ina lofituina Uili i ona lagona, ma sa maligi ai ona loimata. Na te lei manatu na ia faia se mea faapitoa. O le mea moni, sa ia lagonaina e fai lava si ona faatauvaa, e pei o se mataua i le sami. Ae sa ia iloa sa taialaina o ia e le Alii, ma uunaia o ia a o faasolo ina manino ma faamalamalama atili le fuafuaga.
I lo latou fale, sa faatofa atu ai o ia, Lili, ma tamaiti i a latou uo. Ona feosofi lea o le aiga i totonu o se taavale ma faatalitali e ave i latou i le isi nofoaga mo la latou auaunaga.
“E le mafai lava ona e faanatinati,” na iloa ai e Uili. “Tuu atu le taimi i le Atua.”
Na maliu Peresitene Monson i le aso 2 o Ianuari, 2018. E ui lava sa fāi ifo lona soifua maloloina mo le tele o tausaga, ae sa tumau pea le malosi o lana molimau. I se tasi aso, a o lei leva ae maliu o ia, sa asiasi atu ai ona fesoasoani i le Au Peresitene Sili ia te ia i lona fale. A o la o ese atu, sa ia taofia i laua ma faapea atu “Ou te alofa i le Faaola o Iesu Keriso. Ma ou te iloa e alofa o Ia ia te a’u.”
I le sefulu tausaga o lona tofi, sa taialaina ai e Peresitene Monson le Au Paia i se vaitaimi o suiga vave faaagafesootai ma le alualu i luma ofoofogia faatekinolosi. O ala o faasalalauga faaagafesootai na maua ai e tagata o le Ekalesia ni auala fou e faasoa atu ai le talalelei, atiina ae ai le malamalama i tagata i fafo atu o le faatuatuaga, ma fesootai ai ma taitai aoao. O le atiina ae o telefonipoto ma isi masini feaveai na fesoasoani i lenei galuega ma tulai mai ai le polokalama o le Potutusi o le Talalelei i le 2010, ma tuuina atu ai i le Au Paia i le lalolagi atoa le ala faigofie e maua ai tusitusiga paia, mekasini a le Ekalesia, ma isi punaoa.
Sa vaaia foi e Peresitene Monson le faalauteleina o le galuega faafaifeautalai, o se faamamafa sili atu i le aapa atu i fegalegaleaiga faalefaatuatuaga, ma le faateleina o taumafaiga agaalofa. I lalo o lana taitaiga, sa galulue faatasi ai le Ekalesia ma le tele o faalapotopotoga e fesoasoani i tagata sulufai mai eria ua faatamaia i taua, fesoasoani i e ua aafia i mala faalenatura, ma faamāmā mafatiaga o e mama’i ma fia aai.
Sa fausia foi e le Ekalesia i luga o le galuega o le Tupe Faaagaga mo Aoga ma isi taumafaiga e tuuina atu ai avanoa faaleaoaoga i tagata i le lalolagi atoa. I le 2009, sa faama’ite ai e le BYU–Idaho ma isi nofoaga e tolu se polokalama lea na tuufaatasia ai vasega patino ma aoaoga i luga o le initoneti ina ia maua atili ai aoaoga maualuluga ma taugofie mo tamaiti aoga. I le 2017, na avea ai lenei polokalama ma BYU–Pathway Worldwide, lea na faaauau ai ona auauna atu i le faitau fiasefulu afe o tamaiti a’oga i le silia ma le limasefulu atunuu.
Ae o le mea sili lava, o le talatuu silisili a Peresitene Monson o lana galuega agaalofa, faaKeriso. O le aso na sosoo ma lona maliu, na tusia ai e nusipepa lea tala ma lea tala e uiga i se olaga sa ola filemu e asiasi atu i falemai ma falelauasiga, saofai i autafa o moega o uo mama’i, ma uunaia tagata talavou ma tagata matutua e o mai ia Iesu Keriso.
I le aso 14 o Ianuari, 2018, na faauuina ai ma vaetofia e le Korama a Aposetolo e Toasefululua ia Russell M. Nelson e avea ma peresitene lona sefulufitu o Le Ekalesia a Iesu Keriso o le Au Paia o Aso e Gata Ai. Sa saunoa mai le perofeta fou i tagata o le Ekalesia i le lua o aso mulimuli ane, faatasi ai ma Peresitene Dallin H. Oaks ma Peresitene Henry B. Eyring, o ona fesoasoani i le Au Peresitene Sili.
“O lo tatou tiute paia” sa ia saunoa mai ai, “o le o atu i atunuu uma, ituaiga, gagana, ma tagata, e fesoasoani e saunia le lalolagi mo le Afio Mai Faalua o le Alii.” I le avea ai ma se au peresitene, sa latou mananao i tagata taitoatasi o le ekalesia ia “tutumau i luga o le ala o feagaiga” ma “amata ma le taunuuga i le mafaufau.”
“O le taunuuga lea tatou te tauivi uma i ai, o le faaeeina lea i le mana i totonu o se maota o le Alii, faamauina o ni aiga, faamaoni i feagaiga e osia i totonu o se malumalu,” na ia tautino mai ai. “O lo outou tuuto e mulimuli i le Faaola e ala i le osia o feagaiga ma Ia ona tausia lea o na feagaiga, o le a matala ai le faitotoa i faamanuiaga uma faaleagaga ma avanoa e maua e alii, tamaitai, ma fanau i soo se mea.”
E lei umi ae faalauiloa mai e Peresitene Nelson ni nai fetuunaiga i totonu o le Ekalesia e fesoasoani ai i lenei galuega taua. I le konafesi aoao ia Aperila 2018, sa ia faasilasila mai ai o le a amata ona auai faitaulaga sili i fonotaga a le korama ma toeaina. Faatasi ai ma le fesoasoani a Elder Jeffrey R. Holland ma le peresitene aoao o le Aualofa o Jean B. Bingham, sa ia faalauiloa mai ai foi se auala fou e tausia ai isi, ua ta’ua o le “auaunaga,” e sui ai faiaoga o aiga ma faiaoga asiasi.
I se lauga e uiga i le auaunaga, sa uunaia ai e Elder Holland le Au Paia ina ia talia le “avea ma soo mai le loto,” ma faamanatu atu ia i latou le poloaiga sili a le Faaola i Ana aposetolo: “Ia fealofani.” Sa faapena foi ona uunaia e Sister Bingham le Au Paia e mulimuli i le faataitaiga a Keriso. “A o e maua ai le avanoa e fai ai ma sui o le Faaola i au taumafaiga faaleauaunaga,” na ia faapea mai ai, “ia fesili ifo ia te oe lava ia, ‘E mafai faapefea ona ou faasoaina atu le malamalama o le talalelei i lenei tagata po o le aiga? O le a le mea o loo musuia ai a’u e le Agaga e fai?’”
I lalo ifo ole tolu masina talu ona vaetofiaina, na amata ai loa ePeresitene Nelson le uluai malaga taamilo o le tele o asiasiga i le lalolagi atoa. O le malaga faatasi ai ma Sister Wendy Nelson, lea na ia faaipoipo i ai i le 2006 ina ua mavae le maliu o lona faletua muamua, o Dantzel, sa asiasi atu le perofeta i le Au Paia i aai e valu i konetineta e fa i aso e sefulutasi.
“Soo se taimi lava ou te nofo ai ma le toafimalie i lo’u fale, ua ou i ai i le nofoaga sese,” o lana tala lea. “Ou te mana’omia ona ou i ai i le mea o i ai tagata. E mana’omia ona tatou aumaia ia i latou le savali a le Faaola.”
Mulimuli ane, i le konafesi aoao ia Oketopa 2018, na faasilasila mai ai e Peresitene Nelson se suiga i le faatulagaga o sauniga i Le Aso Sa ina ia avea ai le ola ai i le talalelei ma mea e sili ona taulai atu i le aiga ma lagolagoina e le Ekalesia. O le suiga na faaitiitia ai le umi o sauniga faalevaiaso a le Ekalesia i le itula e tasi, ma tuuina atu ai i le Au Paia se taimi sili atu e suesue ai le talalelei i le fale. Sau, Mulimuli Mai ia te Au—o se mataupu aoaoina fou mo le Aoga Sa a tagata matutua, vasega a le autalavou ma le Peraimeri, ma suesuega faaletagata lava ia ma faaleaiga—na amata ona faia se matafaioi autu i le aumaia o le Au Paia ia Keriso e ala i le aoaoina o le talalelei.
I le konafesi, sa saunoa ai foi Peresitene Nelson e uiga i le faaaogaina o le igoa sa’o o le Ekalesia, nai lo igoa tauvalaau. “Ua ou iloa ma le faanoanoa loloto tele ona ua tatou taliaina ma le lē iloa le valaauina o le Ekalesia toefuataiina a le Alii i isi igoa, o igoa taitasi ia aveesea ai le suafa paia o Iesu Keriso!” na ia tautino mai ai. “A tatou aveesea Lona suafa mai Lana Ekalesia, ua tatou aveesea ma le lē iloa o Ia o le taulaiga tutotonu o o tatou olaga.”
I lalo o le taitaiga a Peresitene Nelson, na faatuina ai e le Ekalesia se polokalama fou mo tamaiti ma le autalavou e sui ai le Sikauti, Alualu i Luma o le Tagata Lava Ia, ma isi gaoioiga mo le Au Paia talavou. O se vaega o lenei suiga, na tuuina atu ai e le Ekalesia ia konafesi mo le Malosi o le Autalavou i talavou uma o le Au Paia o Aso e Gata Ai i le va o le sefulufa ma le sefuluvalu tausaga. E pei o le EFY ma le TFY, na tuuina atu e le FSY i le autalavou se avanoa e faaalu ai se vaiaso e auai ai i vasega ma lauga e taulai atu i le talalelei, faia ni uo fou, ma faamalolosia a latou molimau.
Ina ua maea nei fetuunaiga, sa faalauiloa mai e le Ekalesia se tusitaulima fou o faatonuga, Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai. Na mamanuina e fesoasoani ai i tagata uma ia o mai ia Keriso, o le tusitaiala na tuuina mai ai se taitaiga manino e fesoasoani ai i le Au Paia e fesoasoani i le galuega a le Atua. E le pei o tusi na muamua atu, o le Tusitaulima Aoao o se voluma e tasi o loo maua e ala i le uepisaite ma le polokalama feaveai a le Ekalesia. Ina ia lagolagoina le taitaiga laugatasia, ma musuia i le galuega a le Ekalesia i le lalolagi atoa, sa maua i gagana e limasefulutasi.
I le amataga o lana pulega, sa amata ai ona galulue vavalalata Peresitene Nelson ma le National Association for the Advancement of Colored People, po o le NAACP, e faalauiloa ai le faaaloalo, faatamalii, ma le lotogatasi o ituaiga ma lanu i le lalolagi atoa. Sa ia tausalaina le faailoga lanu ma uunaia le Au Paia ina ia siitia ma faaaloalo i fanau uma a le Atua.
I le vaitau atoa o le 2010, o fesili e uiga i le tulaga o tamaitai i le Ekalesia na taitai atu ai foi i suiga taua i faiga masani a le Ekalesia. I le avea ai ma se tasi o le Korama a Aposetolo e Toasefululua, sa aoao mai ai Russell M. Nelson e faapea o tamaitai o ni “paaga atoatoa i le galuega o le faaolataga” ma ua tatau ai la latou vaaiga i aufono a le Ekalesia. Na faamanino mai foi e Elder Dallin H. Oaks e faapea, ua i ai i tamaitai le pule o le perisitua i le faataunuuina o o latou valaauga. “E le masani ona tatou talanoa i tamaitai i le i ai o le pule o le perisitua i o latou valaauga faale-Ekalesia,” na ia saunoa mai ai “ae o le a se isi pule e mafai ona i ai?”
Na amata mai i le 2015, na amata ai ona saofafa’i tamaitai sa avea ma taitai aoao i aufono autu o le pulega i le laumua o le Ekalesia. Sa avea le peresitene aoao o le Aualofa o Linda K. Burton ma se sui o le Aufono Faatonusili o le Perisitua ma Aiga, sa auai le peresitene aoao o Tamaitai Talavou o Bonnie L. Oscarson i le Aufono Faapitoa a Faifeautalai, ma sa auai le peresitene aoao o le Peraimeri o Rosemary M. Wixom i le Aufono Faatonusili o Malumalu ma Talafaasolopito o Aiga. Ma i le 2019, na faatagaina ai e Peresitene Nelson ma ona fesoasoani ia tamaitai e auauna atu o ni molimau aloaia i papatisoga ma faamauga o le malumalu.
E pei o Peresitene Monson, sa sailia e Peresitene Nelson le malamalama a o talanoaina e le Ekalesia ia faafitauli e aafia ai tagata LGBTQ. I le 2015, na avea ai le Iunaite Setete ma atunuu lona sefuluiva ua faatagaina le faaipoipoga a le itupa tutusa. Talu mai lena taimi, na toe ta’ua ai e le Au Peresitene Sili le faaaloalo o le Ekalesia mo le tulafono o le laueleele a o faamautuina foi lana tautinoga i le faaipoipoga i le va o se alii ma se tamaitai.
A o taumafai le Ekalesia ia malamalama ma saunia mo manaoga o tagata LGBTQ ma o latou aiga, sa faaopoopo atu nisi vitio ma punaoa i lana uepisaite. I le taimi o se faigalotu a le Iunivesite o Polika Iaga, sa uunaia ai e Elder M. Russell Ballard tagata o le Ekalesia ina ia sili atu ona nofouta i lagona ma aafiaga o le Au Paia LGBTQ. “E moni lava e tatau ona tatou faia mea e sili atu nai lo le mea sa tatou faia i le taimi ua tuanai,” na ia tautino mai ai, “ina ia lagona e tagata uma o le ekalesia ua i ai so latou aiga faaleagaga lea e alolofa ai o latou uso ma tuafafine ia i latou ma i ai se nofoaga e tapuai ai ma auauna atu ai i le Alii.”
Mai lava i le amataga o lana taitaiga, sa molimau mai Peresitene Nelson i le taua o malumalu i le tausia o fanau a le Atua i luga o le “ala o le feagaiga” ma le faapotopotoina o Isaraelu i itu uma e lua o le veli. I ona tausaga muamua e lua, sa ia faasilasila atu ai malumalu fou e tolusefulu lima i nofoaga eseese e pei o Bengaluru, Initia; Port Moresby, Papua Niu Kini; ma Budapest, Hanikeri. I lena taimi, e valu malumalu fou na faapaiaina foi, e aofia ai se maota o le Alii i Roma, Italia.
Sa talitonu le perofeta o le Malumalu o Roma na faailogaina ai se suiga i le talafaasolopito o le Ekalesia. “O le a agai i luma mea uma i se saoasaoa televave,” na ia tautino mai ai ina ua maea le faapaiaga. “O le a i ai se lumanai e lei mailoa, e le mafaatusalia o le Ekalesia. Ua na ona tatou fausiaina nei o se faavae mo le lumanai.”
I le konafesi aoao ia Oketopa 2019, na faasilasila mai ai e Peresitene Nelson o le 2020 o le a avea ma se faamanatuina o le luaselau tausaga, o se taimi mo le Au Paia e manatua ai le luaselau tausaga o le Uluai Faaaliga a Iosefa Samita o le Tama Faalelagi ma Iesu Keriso.
Sa ia valaaulia le Au Paia e faatofu i latou lava i le malamalama o le Toefuataiga. “I le isi ono masina e sosoo ai, ou te faamoemoe o le a saunia tagata uma ma aiga uma mo se konafesi tulagaese o le a faamanatu ai faavae tonu o le talalelei toefuataiina,” na ia saunoa ai. “A e faia, o le konafesi aoao ia Aperila a sau o le a le gata e manatua pea; ae o le a le galo lava.”
E lei leva ona uma le konafesi aoao ia Oketopa 2019, ae lagona e Laudy Kaouk e sefulufitu tausaga le matua le tuuatoatasi a o alu atu lana taavale i le auala. “Tama Faalelagi e,” sa ia tatalo ai, “E manaomia lava ona ou lagonaina o loo e i ai iina.”
Sa i ai Laudy i lona tausaga mulimuli i le aoga maualuga i Provo, Iuta. A le o i ai o ia i le vasega po o le talosaga i iunivesite, sa aofia ai o ia i vaega o aoga faaopoopo po o le alu i lana galuega i se faleaiga i le lotoifale. Sa avea foi o ia ma peresitene o lana vasega a Tamaitai Talavou ma se tagata siva i Luz de las Naciones, o le faamanatuina faaletausaga o aganuu a le Ekalesia i Amerika Latina i le Maota Autu mo Konafesi. E faigata ona pisi atu pe lavelave atili le olaga.
Sa suia foi mea i le aiga. Sa fiafia o ia e avea ma se vaega o se aiga toatele, ma vavalalata. O lona tamā e mai Suria ae o lona tinā e mai Venesuela. O i laua o ni tagata ua leva ona liliu mai i le Ekalesia o e na malaga atu i Provo a o lei fanau mai Laudy, le uii o le aiga. Sa o mai le aiga atoa i le fale i Aso Sa, ma sa aumai e nai ona tei ua faaipoipo o latou toalua ma fanau. Sa tulimatai atu e Laudy nei faatasiga.
Ae talu ai nei lava, na lagona ai le gaogao tele o lona fale. Sa alu lona uso matua i se misiona i Iapani, o lea sa na o Laudy ai le tamaitiiti i le fale. Sa i ai lava i taimi uma ona tei sa nonofo faatasi ma ia, ae o lea ua ia lagonaina le tuuatoatasi. O lea na ia sasaa atu ai lona agaga i le Atua.
E lua vaiaso mulimuli ane, na maua ai e Laudy se valaau mai lona peresitene o le siteki. Sa ia ta’u atu ia te ia o Bonnie H. Cordon, le peresitene aoao o Tamaitai Talavou, sa manao e asiasi atu ia te ia. Sa faateia Laudy, ae sa ioe o ia i le asiasiga. E lei leva mulimuli ane, ae auai Peresitene Cordon i le uarota a Laudy e tautatala faaSipaniolo ma sa saofai i lalo e talanoa ma ia. “Ou te alu ma auauna atu i le toatele o tagata i le lalolagi atoa ma ou te manao e sau ma auauna atu ia te oe,” sa ia fai atu ai ia Laudy.
O le taimi lava na fai atu ai e Peresitene Cordon nei upu, na iloa ai e Laudy na faafofogaina e le Tama Faalelagi lana tatalo. O lenei asiasiga o Lana tali lea.
I le masina e tasi mulimuli ane, na sau ai Laudy i le fale mai le galuega ma maua ai ona matua o loo faatalitali ma le naunautai mo ia. “O loo i ai sau tusi,” na la fai ane ai. O se tusi mai le Au Peresitene Sili.
I le le mautonu, sa nonofo ai Laudy ma ona matua ma tatala le tusi. O se valaaulia mo ia e lauga i le konafesi aoao ia Aperila 2020.
“E faapefea ona ou faia lenei mea?” na ia mafaufau ai.
Ona musumusu atu lea o le Agaga i upu a Nifae ia te ia: “Ou te alu ma fai mea ua poloaiina ai e le Alii.” I le taimi lava lea, sa ia lagonaina ai le fiafia ma le faamaualaloina. Sa ia iloa o le a fesoasoani le Atua ia te ia.
I le aso 30 o Ianuari, 2020, na folafola mai ai e le Faalapotopotoga o le Soifua Maloloina o le Lalolagi se “faalavelave faafuasei i le soifua maloloina lautele.” Ua alia’e mai le korona vairusi matautia i Asia, ma ua aafia ai le faitau selau o tagata i Saina. Na muamua faaalia le vairusi i āūga e pei o le niumonia, ae sa itiiti se aoga i ai o togafitiga masani faafomai. Sa vave ona salalau atu ma e le’i mafaufauina.
E oo ane i le amataga o Fepuari, ua i ai le igoa o le faama’i: KOVITI-19. I le vave tali atu i le faalavelave, na auina atu ai e taitai o le Ekalesia le silia ma le lua selau afe o talifofoga manava i Saina. Sa amata foi ona latou faaleaogaina sauniga, tapunia malumalu mo sauniga sui, ma tuu faifeautalai i eria na aafia ai i lalo o le puipuiga.
Iā Mati 11, na faalauiloa ai e le WHO le COVID-19 o se faama’i. E oo ane i lenā taimi, ua salalau atu lenei faama’i i atunuu e 114, ma ua aafia ai le silia i le selau afe tagata ma i’u ai i le faitau afe o tagata ua maliliu. E pei o le faama’i o le fulū i le lalolagi atoa o le 1918–19, na taofia e le Au Peresitene Sili sauniga uma a le Ekalesia. Na le toe faatagaina e le Ekalesia ni faifeautalai fou i nisi o NAF ma fatuina se faiga mo le a’oa’oina o faifeautalai i le fale e ala i le fonotaga faavitio. Na faasilasila mai foi e le Au Peresitene Sili ni fuafuaga mo se konafesi aoao faaeletonika ia Aperila ma faatonuina le Au Paia e faia sauniga tapuai i o latou fale, ma tuuina atu i e umia le perisitua se faatagaga le tumau e faatautaia ai le faamanatuga i o latou lava aiga.
I le aso 14 o Mati, na saunoa ai Peresitene Nelson i le Au Paia i se vitio i luga o le initoneti. “O i tatou o se Ekalesia i le lalolagi atoa o loo feagai ma se luitau tulaga ese,” o lana tala lea. “Matou te tatalo mo i latou o loo mafatia ma mo i latou ua maliliu ē pele ia i latou.”
Sa ia uunaia le Au Paia e tausia i latou lava ma isi. “O le Tama Faalelagi ma Lona Alo, o Iesu Keriso, e silafia i tatou, alolofa ia i tatou, ma o loo leoleoina i tatou,” na ia saunoa ai. “E mafai ona tatou mautinoa lena mea.”
I le aso 4 o Aperila, 2020, sa nofo ai Laudy Kaouk i le fale faafiafia na toetoe lava a leai se mea o i ai i le Maota o ofisa o le Ekalesia, ma tusitusi ma le popole i lana api. Sa amataina le sauniga o le afiafi o le Aso Toonai o le Konafesi Aoao Lona 190 Faaletausaga a le Ekalesia, ma e le o toe mamao ona oo lea i lona taimi e lauga ai.
I le amataga o lena aso, na tatalaina ai e Peresitene Nelson le konafesi i le tamai fale faafiafia. O le salalau o le KOVITI-19 na taitai atu ai le Ekalesia e taofia mea na tutupu i ana a’oga, toe tofia pe faamalolo faifeautalai, ma tapunia malumalu uma mo se umi e le iloa. A o tu o ia i luma o le Au Paia, sa leai se aufaipese i tua o le perofeta, ma sa leai ni laina masani o taitai aoao ma le au mautofi. Nai lo lena, sa nonofo latalata ane ona fesoasoani ma ni nai failauga, ma sa tofu i latou ma ni nai futu le va e fai ma faaeteetega e tetee atu ai i le salalau atu o le KOVITI-19.
A o ia saunoa atu i le Au Paia, sa faamanatu atu e Peresitene Nelson ia i latou le folafolaga sa ia faia i le faaiuga o le konafesi mulimuli—o lenei faamanatuina o le luaselau tausaga o le Uluai Faaaliga a Iosefa Samita o le a “le mafaagaloina” ia i latou o e na saunia i latou lava mo lena mea.
“Sa ou le iloa,” na ia saunoa ai, “o le talanoa atu i se faapotopotoga vaaia e itiiti ifo ma le toasefulu tagata o le a avea ai lenei konafesi ma se mea e manatua pea ma e le mafaagaloina mo au!”
Sa faia e Laudy le mea sili na te mafaia e saunia ai mo le konafesi, e pei ona talosagaina ai e Peresitene Nelson le Au Paia e fai. Sa ia faitauina nisi o Talafaasolopito-Iosefa Samita i le Penina Tau Tele ma maofa i le naunautaiga o le perofeta talavou e fai le galuega a le Alii, e ui lava i le leai o sona aoaoga. “Oka,” sa ia mafaufau ai, “atonu sa ia lagonaina le matuai le agavaa lava.”
O se lagona sa ia iloaina lava. E le o ia o se tagata e fefe e tautala i nofoaga faitele, ae o le mafaufau i le i ai i luma o le faitau miliona o tagata sa taufaafefe. O nisi taimi sa masalosalo ai o ia lava, ae sa i ai foi ni ona aafiaga na faamalosia ai lona talitonuga mautinoa. A o galue o ia i lana lauga, sa ia lagonaina le taitaiina o ia e le Alii, e pei ona sa Ia taialaina Iosefa Samita. E le’i faatulagaina uma lana lauga i le taimi e tasi. Ae, sa oo mai faasolosolo malie lava, e tasi le uunaiga i le taimi, a o ia tatalo, mafaufau loloto, ma alu i le malumalu.
O lea la ua maea le lauga a Elder Gerrit W. Gong, ma tuu ese e Laudy lana api. Sa ia latalata atu i le pulelaa, ma o le taimi lava na ia tu ai i tua, na mou ese lona popole. “Ua ou faafetai lava i le i ai iinei,” na ia fai mai ai. “Ua ou faaaluina le tele o le taimi e mafaufau ai e uiga i mea e mafai ona ou faasoa atu, ma ou te faamoemoe e fetalai tuusa’o atu le Agaga ia te outou e ala atu i la’u savali.”
Ina ua oo mai le faama’i, sa liliu le a’oga a Laudy i aoaoina na o ia lava, ma sa matuai suia lava ana faiga masani i aso taitasi. A o latalata mai le konafesi, sa mulimuli ma le faaeteete o ia ma ona mātua i faiga faavae o le tapuniga ina ia mautinoa ai o loo tumau lona soifua maloloina ma lē tuuina ai se isi tagata i se tulaga lamatia i le konafesi. Sa faanoanoa o ia ona sa le’i i ai ona matua ma isi tagata o le aiga i totonu o le potu faatasi ma ia i le taimi nei. Ae sa ia iloaina sa latalata ane i latou, ma matamata i le televise, ma sa mafai ona ia lagonaina o loo faalogologo foi ona tuaa ma lagolagoina o ia.
E tusa ma le ono minute le umi o le lauga a Laudy. Sa ia talanoa e uiga i le mana o faamanuiaga o le perisitua ma le alofa ma le filemu sa ia lagonaina ina ua ia mauaina mai lona tamā. ‘Aua ne’i faatuai e talosaga mo se faamanuiaga pe a e manaomia se isi taiala faaopoopo,” na ia fai mai ai. “O nisi o i tatou atonu e mafatia i le popolevale, atuatuvale, o vaisu, po o lagona e le lava lo tatou lelei. E mafai e faamanuiaga faaleperisitua ona fesoasoani ia i tatou e faatoilalo nei luitau ma maua le filemu a o tatou agai i luma i le lumanai.”
Sa ia molimau atui—mai aafiaga—e silafia patino e le Atua Ana fanau. “E silafia e Ia i tatou e le aunoa ma faamanuia i tatou e ui ina tatou lagona e le tatau mo i tatou,” na ia fai mai ai. “E silafia e Ia mea tatou te manaoga ma le taimi tatou te manaomiaina ai.”
Ina ua maea Laudy, sa tu mai se isi failauga talavou, o Enzo Petelo, ma tuuina atu se lauga. Ma a o faalogologo atu o ia ia te ia, sa faigata ia Laudy ona manatua le mea na tupu i lana lava lauga. Pe na lelei le mea na ia fai?
O le taimi lava na uma ai le sauniga, sa tamoe o ia i fafo o le fale faafiafia e feiloai i ona matua. “Pe na vave tele la’u tautala?” sa ia fesili ai.
“Leai, hija,” o le tala lea a lona tina. “Na matua’i lelei lau faatinoga.”
O le taeao na sosoo ai, sa faafetai ai Peresitene Nelson i le Au Paia mo le filifili e faalogo i le afioga a le Alii, e ui lava i fesouaiga i le lalolagi atoa. “O le faatupulaia o le pouliuli lea e ō mai faatasi ma puapuaga ua atili susulu malamalama ai le malamalama o Iesu Keriso. “Se’i tau ina mafaufau i le lelei e mafai e i tatou taitoatasi ona faia i lenei taimi.”
Sa Ia faailoa atu upu a le Tama ia Iosefa Samita i le Togalaau Paia: “O Lo’u Alo Pele Lenei. Faalogo ia te Ia!”
“I na upu e lua—’Faalogo ia te Ia’—ua tuuina mai e le Atua ia i tatou le mamanu mo le manuia, fiafia, ma le olioli i lenei olaga,” na ia saunoa ai, ma uunaia le Au Paia ia faalogo, lagona, ma ua’i atu i le afioga a le Alii. “Ou te folafola atu o le a faamanuiaina outou i le mana faaopoopoina e taulima ai faaosoosoga, faigata, ma vaivaiga,” na ia saunoa ai. “Ou te folafola atu vavega i a outou faaipoipoga, sootaga faaleaiga, ma galuega i aso taitasi. Ma ou te folafola atu o le a faateleina lou gafatia e lagona ai le olioli e tusa lava pe faateleina puapuaga i lou olaga.”
Ina ua maea nei saunoaga, sa faasilasila atu e Peresitene Nelson se folafolaga fou mai le Au Peresitene Sili ma le Korama a Aposetolo e Toasefululua e uiga i le Toefuataiga o le talalelei a Iesu Keriso. Ona faasolo atu lea o le faasalalauga i se vitio o ia o faitauina le folafolaga a o tu o ia i le Vao Paia.
“Ua mou atu nei le luaselau tausaga talu ona amatalia lenei Toefuata’iga e le Atua le Tamā ma Lona Alo Pele, o Iesu Keriso,” na tautino mai ai e le folafolaga. “Matou te faamautū atu o loo faailoa mai e le Atua Lona finagalo mo Ōna atalii ma afafine pele. Matou te molimau atu o i latou e su’esu’e ma le agaga tatalo i le sāvali o le Toefuata’iga ma galulue i le faatuatua o le a faamanuiaina e maua ā latou lava molimau e uiga i lona pa’ia ma lona faamoemoega e saunia le lalolagi mo le Afio Mai Faalua o lo tatou Alii ma le Faaola, o Iesu Keriso, ua folafola mai.”
I le faaiuga o le savali a Peresitene Nelson, sa tutu i luga le Au Paia i atunuu i le salafa o le lalolagi, po o fea lava sa latou faapotopoto ai, ma sii a’e i luga solosolo papae i le ea. Talu mai le faapaiaga o le Malumalu o Katelani i le 1836, sa viia e tagata o le Ekalesia le Tama ma le Alo i se Alaga paia o le Osana. Ma e leai se eseesega ma le aso lenei.
I le mulimuli ai i le taitaiga a le perofeta, sa talotalo atu ai e le Au Paia a latou solosolo i le ea a o olioli faatasi o latou leo i le lalolagi atoa:
Osana, Osana, Osana i le Atua ma le Tama’i Mamoe.
Osana, Osana, Osana i le Atua ma le Tama’i Mamoe.
Osana, Osana, Osana i le Atua ma le Tama’i Mamoe.