Ina Filifili Ia Outou i le Aso Nei
O filifiliga tatou te faia e iloa ai lo tatou taunuuga.
Ou uso ma tuafafine pele, ua mafai ona ou vaai atu i ai ma e o potopoto i le lalolagi atoa, ou te talosagaina o outou faatuatua ma tatalo a o ou tali atu i se tofiga ma se avanoa e talanoa atu ai ia te outou. Ae muamua lava, ou te fia faafeiloai atu ia Elder Dieter Uchtdorf ma Elder David Bednar, o tatou sui fou o le Korama a le Au Aposetolo e Toasefululua.
Talu ai nei lava na ou mafaufau ai e uiga i filifiliga ma o latou taunuuga. Fai mai, o mea maoae na tutupu i le talafaasolopito, o taunuuga ia o ni mea laiti na tutupu, ma e faapena foi i olaga o tagata. O filifiliga tatou te faia e iloa ai lo tatou taunuuga.
Na folafola mai e Iosua o anamua e faapea, “Ina filifili ia outou i le aso nei po o ai tou te auauna i ai; … a o au nei ma lou aiga, matou te auauna ia Ieova.”1
O i tatou uma, ua tatou amataina se faigamalaga matagofie ma le taua ina ua tatou tuua le lalolagi o agaga ma ulufale mai i lenei vaega e masani ona luitauina ua taua o le olaga faaletino. Sa tatou aumaia faatasi ai lena meaalofa sili mai le Atua—o lo tatou saolotoga. Fai mai le perofeta o Uilifoti Uitilafi: “Ua tuuina mai e le Atua i Ana fanau uma … le saolotoga o le tagata lava ia… . Sa [tatou] umia lea saolotoga i le lagi o lagi a o lei faia le lalolagi, ma na faatumauina ma puipuia e le Alii mai soo se fouvalega a Lusifelo… . O le lelei o lenei saolotoga, ua avea ai oe ma au ma tagata uma, o ni tagata sili ona faatuatuaina mo le galuega o loo tatou faia, i olaga o loo tatou ola ai, i mea tatou te faia.”2
Fai mai Polika Iaga, “E tatau i tagata uma ona faaaoga [lenei saolotoga] ina ia mafai ona maua le faaeaina i le malo o le [Atua]; talu ai ona ua ia i [tatou] le mana o filifiliga, e tatau lava ona [tatou] faaaogaina lena mana.”3
Ua tau mai e tusitusiga paia ia i tatou, ua tatou saoloto e galulue mo i tatou lava, “ina ia filifili e outou le ala o le oti faavavau, po o le ala o le ola faavavau.”4
O se viiga masani ua tuuina mai ai ni musumusuga i filifiliga tatou te faia:
Filifili tau o mea tonu.
Tau mai e le Agaga Sa;
Lona sulu e te iloa ai,
I lou loto o le mea e fai… .
Filifili tau o mea tonu.
E te filemu ma toa ai.
Fai mea tonu i mea uma e te faia;
O le Atua lou faamoemoe lea.5
Pe o i ai ea so tatou taiala, e fesoasoani tatou te filifili ai le mea tonu ma aloese ai mai auala matautia? O loo tautau i luga o le puipui o lou ofisa, e faafeagai tonu ma lau kesi, se ata matagofie o le Faaola, sa valiina e Heinrich Hofmann. Ou te fiafia lava i le ata vali, lea na ou mauaina talu mai ona avea au ma se epikopo i le 22 o ou tausaga, ma sa ou feaveaiina lava i soo se mea na tofia i ai au ou te galue ai. Sa ou taumafai e faataitai lou olaga i le soifuaga o le Matai. Soo se taimi lava ou te faia ai se filifiliga faigata, sa ou vaai atu i lena ata ma fesili ifo ia te au lava, “O le a se mea Na te faia?” Ona ou taumafai lea e fai. E le mafai lava ona tatou sese pe a tatou filifili e mulimuli i le Faaola.
O nisi filifiliga e foliga mai e sili atu ona taua nai lo isi, ae e leai se filifiliga e le taua.
O ni nai tausaga ua mavae, sa ou uuina ai i lou lima se taiala, afai e mulimulitai i ai, o le a le mafai lava ona tatou toilalo, e fesoasoani ia i tatou i le faia o filifiliga sao. O se lomiga o tusitusiga paia ua tatou masani ona faaigoaina o le tusi fusi tolu, ua i ai le Tusi a Mamona, Mataupu Faavae ma Feagaiga, ma le Penina Tautele. O lenei tusi o se meaalofa mai se tama agalelei i se afafine sa mulimuli ma le faaeteete i lana fautuaga. I luga o itulau avanoa, na tusia ai e lona tama i lana lava tusitusi upu musuia nei:
“Mo lau pele o Maurine,
“Ina ia mafai ona e maua se fua faatatau e le mavae, e faapea ona e filifili ai i le va o le upu moni ma aoaoga sese a le tagata, ma o le a faapea ona e tuputupu ae ai i le faaleagaga a o faateleina lou malamalama, ou te tuuina atu ia te oe lenei tusi paia e te faitau i ai e le aunoa ma faapelepele i ai i lou olaga atoa.
“O lou tama pele,
“Harold B. Lee”
I le avea ai ma tagata O Le Ekalesia a Iesu Keriso o le Au Paia o Aso e Gata Ai, o la tatou sini o le maua lea o le mamalu selesitila.
E le tatau ona tatou le mautonu e pei o Alisa i le tusi lauiloa a Lewis Carroll O Mea Na Tutupu ia Alisa i le Nuu o Matagofie. O le a outou manatua sa tau atu Alisa i se magaala, e valalua, e taufai agai uma i luma ae eseese itu e agai i ai. Sa la fetaiai ma le Pusi o Tesia, ma sa fesili atu i ai Alisa, “O fea le ala e tatau ona ou mulimuli ai?”
Sa tali ane le pusi: “E fuafua lava i le mea e te fia alu i ai. Afai e te le iloa le mea e te fia alu i ai, e le afaina po o fea le ala e te ui ai.”6
E le pei o Alisa, ua tatou iloa uma lava le mea tatou te fia o i ai, ma e afaina po o fea le ala tatou te ui ai, aua o le ala tatou te mulimuli ai i lenei olaga, e tau atu lea i le ala tatou te ui ai i le isi.
E tatau ia i tatou taitoatasi ona manatua, o ia o se atalii po o se afafine o le Atua, ua faaeeina i le faatuatua, faameaalofaina i le lototele, ma taitaiina e le tatalo. Ua i o tatou luma lo tatou faasinomaga e faavavau. O loo tautala mai le Aposetolo o Paulo ia i tatou i le aso a o ia talanoa atu ia Timoteo i tausaga e tele ua tuanai: “Aua nei e faatalale i le meaalofa na tuuina atu ia te oe.”6 “Timoteo e, ia e tausi i le mea na tuuina atu ia te oe.”7
E i ai taimi o le toatele o i tatou, tatou te faatagaina ai le fili o le ausia o se mea—o le faapogai o le “toilalo”—e lofituina a tatou sini, faatamaia a tatou miti, faanenefu la tatou vaaiga ma faaleagaina o tatou olaga. E musumusu mai le leo o le fili i o tatou taliga, “E le mafai ona e faia.” “E te laitiiti tele.” “Ua e matua tele.” “O oe o se tagata e le taua.” O le taimi lenei tatou te manatua ai ua foafoaina i tatou i le faatusa o le Atua. O le mafaufau i lenei upu moni e maua ai se lagona loloto o le malosi ma le mana.
Sa ou maua le avanoa ou te masani lelei ai ia Peresitene J. Reuben Clark Jr., o le sa auauna atu mo le tele o tausaga o se tasi o le Au Peresitene Sili. A o ou fesoasoani atu ia te ia i tapenaga mo le lolomiina o ana tusi matagofie, sa [ou] aoaoina ai ni lesona aupito sili ona taua. O se tasi aso a o i ai i se lagona faanoanoa ma le loloto, na fai mai ai Peresitene Clark pe mafai ona ou faia fuafuaga mo le lolomiina o se ata e talafeagai mo le faavaaina. O le ata sa tatau ona faaalia ai liona o Persepolis o loo leoleoina ia mea na faaleagaina o se aai na faatafunaina. Sa finagalo Peresitene Clark ina ia lolomiina faatasi ma le ata—i le ogatotonu o faaofuofu pala o se malo na le toe avea—o se vaega o mau e sili ona fiafia i ai, sa filifilia mai i le tele o lona malamalama i tusitusiga paia. Ou te manatu o le a outou mananao e iloa ana filifiliga. E tolu—e lua mai le Failauga ma le tasi mai le Evagelia a Ioane.
Muamua, mai le Failauga: “Ia e matau i le Atua, ma e anaana i ana poloaiga: aua o mea ia e tatau i tagata uma.”8
Lona lua, “Ua faapea mai le Failauga, E matua faatauvaa, e matua faatauvaa; e faatauvaa mea uma lava.”9
Lona tolu, mai le Ioane: “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.”10
O se perofeta o anamua, o Moronae, sa tusitusi i le mea ua taua nei o le Tusi a Mamona, na lapatai mai, “O lenei foi, ou te fia apoapoai atu ia te outou, ia outou saili ia Iesu ua tusia e le au perofeta ma le au aposetolo ina ia i ai ma nonofo tumau ia te outou e faavavau le alofa tunoa o le Atua le Tama, atoa ma le Alii o Iesu Keriso, ma le Agaga Paia, o Le molimau ia te i laua.”11
Na fautua mai Peresitene Tavita O. Makei: “‘O le taua sili o le olaga o loo tauina i totonu o lou lava loto.’ … O se mea lelei le nofo i lalo ma talanoa ia te oe lava, ina ia e malamalama ia te oe lava, ma filifili ai i lena itula filemu, pe o le a lou tiute i lou aiga, i lau Ekalesia, i lou atunuu, ma … ou uso a tagata.”12
O le perofeta taulealea o Iosefa Samita, sa saili atu i le fesoasoaniga faalelagi e ala i le alu atu i se togavao lea sa faapea ona oo ai ina paia. Pe tatou te manaomia ea se malosiaga faapena? Pe manaomia ea e tagata taitoatasi le sailia o lana lava “Togavao Paia”? O se nofoaga e faia ai fesootaiga i le va o le Atua ma le tagata e le taofiofia, e le faasalaveiina, ma le faalavelaveina, o se togavao faapena.
I le Feagaiga Fou, tatou te aoao ai, ina ia mafai ona maua le manatu tonu ia Keriso e tatau ona tatou maua se manatu e le faapito i tagata. I le tusi o Mataio, sa aoao mai Iesu, “Aua na faia e outou i le tasi o e aupito itiiti o ou uso nei, o au lea na outou faia i ai.”13
Ina ua sailia e le Faaola se tagata faatuatua, Na te lei filifilia mai o ia mai le vaega o tagata faafia amiotonu o e sa masani ona i ai i totonu o sunako. Ae sa Ia valaauina o ia mai le au faifaiva o Kapanaumi. A o aoao atu o [Ia] i le matafaga, sa Ia vaaia ni vaa se lua ua talana’i i le auvai. Sa maliu atu o ia i le tasi [vaa] ma fai atu i le ana le vaa ina ia tuutuu mamao teisi atu mai le auvai, ina ia le fetuleni mai le motu o tagata ia te Ia. Ina ua maea ona aoao atu, sa Ia fetalai atu ia Simona, “Ina tuutuu atu ia i le loloto, ma tuu ifo ai o outou upega.”
Sa tali atu Simona, “Le Alii e, ua atoa le po ua tigaina ai i matou, e leai ni mea ua maua: a ona o lau fetalaiga ou te tuu ifo ai le upega.
“Ua uma ona latou faia o lea mea, ona latou siomia lea o le au ia tele… .
“Ua iloa e Simona Peteru, ona faapau lea o ia i tulivae o Iesu, ua faapea mai, Le Alii e, ina maliu ese atu ia oe ia te au, aua o au le tagata agasala.”14
Na sau le tali, “Ina mulimuli mai ia ia te au, ou te faia oulua ma faifaiva i tagata.”15
Na maua e Simona le faifaiva lona valaauga. O le masalosalo, le talitonu, le aoga, le aoaoina, sa le i iloa e Simona osovale o le ala a le Alii o se ala faigofie ma e leai se tiga. Sa faalogo o ia i le aoaiga, “O oe na le faatuatua itiiti.”16 Ae ina ua fesili atu le Matai ia te ia, “Se a la outou upu ia te au, po o ai?” na tali Peteru, “O oe o le Keriso, o le Alo o le Atua soifua.”17
O Simona le alii masalosalo, na avea ma Peteru, [le] Aposetolo o le faatuatua. Sa fai e Peteru lana filifiliga.
Ina o le a filifilia e le Faaola se faifeautalai naunautai ma le malosi, Na te le i maua o ia i e na lagolagoina o Ia ae mai Ona fili. O le aafiaga i le ala i Tamaseko na suia ai Saulo. Na fetalai mai le Alii e uiga ia te ia, “O le ipu lava o ia ua filifilia mau, e momoli lou igoa i luma o Nuu Ese, ma tupu, ma le fanauga a Isaraelu.”18
O Saulo le faaoo sala na avea ma Paulo le faifeautalai. Na fai e Paulo lana filifiliga.
O gaoioiga le manatu faapito o le auauna atu o loo faataunuuina i aso uma e le toatele o tagata o le Ekalesia. E tele [auaunaga] o loo tuuina atu ma le lotomalie, e aunoa ma se faalauiloaina faalauaitele pe faalialia vale, ae e ala i le alofa filemu ma tausiga agalelei. Sei ou fetufaai atu ia te outou se faataitaiga o se tasi o le na faia se filifiliga e auauna atu, e faigofie ae taua tele.
O ni nai tausaga ua mavae, sa ma i ai ma Tuafafine Monson i le aai o Toronto, lea sa matou nonofo ai i se taimi a o avea au ma peresitene o le misiona. O Olive Davies, o le faletua o le fesoasoani muamua o le peresitene o le siteki i Toronto, sa matuai mai tigaina lava ma o le a le umi ae maliu. O lona gasegase sa manaomia ai lona tuua o lona aiga faapelepele ae alu atu i se falemai lea e mafai ona maua ai le tausiga sa ia manaomia. O lana tama e toatasi sa nonofo ma lona lava aiga e mamao i Sisifo.
Sa ou taumafai e faamafanafana ia Tuafafine Davies, ae ua i ai se tasi e faamafanafanaina o ia. Sa saofai filemu le atalii toa a lana tama i tafatafa o lona tinamatua. Sa ou iloaina sa ia faaaluina le tele o le taumafanafana e aluese mai ai mai ana aoaoga i le iunivesite, ina ia mafai ona ia auauna atu i manaoga o lona tinamatua. Sa ou fai atu ia te ia, “Shawn, o le a le mafai lava ona e salamo i lau filifiliga. Ua manatu lou tinamatua na auina mai oe mai le lagi, o se tali i ana tatalo.”
Sa ia tali mai, “Na ou filifili ou te sau ona ou te alofa ia te ia, ma ou te iloa o le mea lenei e finagalo lou Tama Faalelagi ou te faia.”
O se taimi sili lea ona ootia. Sa faamatala mai e tinamatua lona fiafia tele i le fesoasoani atu a le tama a lana tama, ma faailoa atu o ia i tagata faigaluega ma gasegase uma i totonu o le falemai. La te savalivali faatasi i le fale faafiafia, ma a oo i le po, e latalata atu lava o ia.
Na maliu Olive Davies, ua ia faatasi atu i lona toalua faamaoni ma ua la faaauauina faatasi ai se malaga e faavavau. I le loto o le tama a lana tama, o le a tumau ai pea na upu, “Filifili tau o mea tonu. Tau mai e le Agaga Sa.”19
O maa faavae na i le fausiaina o se malumalu a le tagata lava ia. E pei ona lapatai mai le Aposetolo o Paulo, “Tou te le o iloa ea o le malumalu outou o le Atua, o loo nofo foi le Agaga o le Atua i totonu ia te outou?”20
Ou te fia tuuina atu ia te outou i le aso se fua faatatau faigofie ae taua, e taitaiina ai outou i filifiliga o le olaga:
Faatumu o outou mafaufau i le upu moni.
Faatumu o outou loto i le alofa.
Faatumu o outou olaga i auaunaga.
O le faia o ia mea, tau ina ia i ai se aso tatou te faalogoina ai le faamaoniaina mai lo tatou Alii ma le Faaola, “Ua lelei ia, le auauna lelei e, ma le faamaoni; ua e faamaoni i nai mea itiiti, ou te tofia oe e pule i mea e tele: ina ulufale mai ia i le fiafia o lou alii.”21
I le suafa o Iesu Keriso, amene.