O Faamanuiaga o le [Faataunuuina] Sa’o o le Anapogi
Ou te popole … o le toatele o i tatou e le anapopogi i aso anapogi, pe tatou te faia foi i se faiga e na o le fia faataunuu lava.
Uso e, ou te faamoemoe sa outou matauina i lenei taeao, ina ua sauni Peresitene Hinckley e faasilasila atu suafa o Aposetolo fou e toalua, sa ia ta’ua ai o le anapogi ma le tatalo e iloa ai le finagalo o le Alii.
O le anapogi sa fai lava ma se aga masani o le nuu o le Atua. O aso nei, o se poloaiga ua tuuina mai e le Alii i tagata uma o le Ekalesia. E ese mai i anapogi faapitoa ia tatou te faia mo ni mafuaaga faaletagata lava ia pe faaleaiga, e tatau ona tatou anapopogi e tasi i le masina i Aso Sa muamua. Ua aoaoina i tatou, e tolu vaega e tatau ona faia o se anapogi sa’o: muamua, e le aai pe feinu mo ni aiga sosoo se lua pe, o se isi faaupuga, i le 24 itula; lua, auai i sauniga anapogi ma molimau; ma le tolu, o le foai atu o se taulaga anapogi ma le lotomalie.
Mo le aiga o Pratt, o a matou anapogi masani e amata mai le aiga i le aoauli o le Aso Toonai seia oo atu i le aiga o le aoauli o le Aso Sa. O lena faiga, matou te anapopogi ai mo ni aiga se lua, o aiga i le afiafi o le Aso Toonai ma le taeao o le Aso Sa. E ui lava ina e leai se faiga faatulagaina a le Ekalesia mo le anapogi, sei vagana ai e tatau ona 24 itula ma ni aiga se lua, ua matou maua le fesoasoani faaleagaga i le auai ai i sauniga anapogi ma sauniga molimau, a o latalata atu i le maea ai o le anapogi.
Mo i latou e gafatia le tulaga faaletino, o le anapogi o se poloaiga. Na saunoa mai Peresitene Iosefa F. Samita e uiga i o tatou aso anapogi faalemasina: “Na tuuina mai e le Alii le anapogi ona o se mafuaaga taua ma le atamai… . O i latou o e e mafai [ona anapopogi] e manaomia ona usitai i ai … ; o se tiute e le mafai ona latou sosola ese mai ai; … [ua] tuuina atu i tagata o se tulaga faalemafaufau, e faaaoga i ai le poto ma le faautauta… .
“Ae o i latou o e e mafai ona anapopogi e tatau ona anapopogi… . E leai se tasi e tuusaunoa mai lenei mea; e tatau lava ona faia e le Au Paia, tagata matutua ma tagata talavou, o soo se vaega lava o le Ekalesia” (Gospel Doctrine, 5th ed. [1939], 244).
Uso e, ou te popole ona o le toatele o i tatou e le anapopogi i aso anapogi pe tatou te faia foi i se faiga e na o le fia faataunuu lava. Afai o tatou agasala i le faaleano i o tatou aso anapogi pe na o le anapogi foi i le taeao o le Aso Sa ae le o aiga uma e lua—24 itula—ua tatou olegia i tatou lava ma o tatou aiga i aafiaga faaleagaga matagofie ma faamanuiaga, ia e mafai ona oo mai i se anapogi sao.
Pe afai foi na o le pau le mea tatou te faia o le le ai ma le inu mo le 24 itula ma totogi a tatou taulaga anapogi, ua tatou misia foi se avanoa matagofie mo le tuputupu ae faaleagaga. I se tasi itu, afai o i ai se mafuaaga faapitoa o la tatou anapogi, o le a sili atu ona taua le anapogi. Atonu e mafai ona tatou faaaluina se taimi a o lei amataina a tatou anapogi e talanoaina ai mea ua tatou faamoemoe e ausia i lenei anapogi. E mafai ona faia lenei mea i se afiafi faaleaiga i le vaiaso a o lumanai le Aso Sa anapogi, pe o se fonotaga faaleaiga i le taimi o le tatalo faaleaiga. Pe a tatou anapopogi ma se mafuaaga, ua i ai se mea e taulai atu i ai o tatou manatu e ese mai i lo le fiaai.
O mafuaaga o a tatou anapogi atonu o se mea e patino i le tagata lava ia. O le anapogi e fesoasoani ia i tatou e foia ai ni vaivaiga ma ni agasala faaletagata lava ia. E mafai ona fesoasoani ia i tatou e foia ai o tatou vaivaiga—e fesoasoani e avea [vaivaiga] ma ni malosiaga. O le anapogi e mafai ona fesoasoani ai ia i tatou ia atili lotomaulalo ai, faaitiitia le faamaualuga, faaitiitia ai le manatu faapito, ae ia atili popole ai i manaoga o isi tagata. E mafai ona fesoasoani ia i tatou e iloa manino ai a tatou lava mea sese ma vaivaiga, ma fesoasoani ia i tatou e faaitiitia ai le faitioina o isi. Pe atonu foi e taulai atu la tatou anapogi i se luitau faaleaiga. O se anapogi faaleaiga e mafai ona fesoasoani e faateleina ai le alofa ma le talisapaia i tagata o le aiga, ma tuuitiitia ai le tele o feupuaiga i totonu o le aiga, pe tatou te anapopogi foi o se ulugalii e faamalosia ai a tatou sootaga o le faaipoipoga. O se faamoemoega o a tatou anapogi i le avea ai ma e umia le perisitua, atonu o le sailia lea o le taitaiga a le Alii i o tatou valaauga, e pei ona sa faailoa atu e Peresitene Hinckley, pe atonu foi tatou te anapopogi ma a tatou paga o faiaoga o aiga, e iloa ai pe faapefea ona [tatou] fesoasoani atu i se tasi o o tatou aiga asi.
I tusitusiga paia uma, o le upu anapogi e masani lava ona i ai faatasi ma le tatalo. O le fautuaga a le Alii, “Ia outou tatalo pea ma anapopogi mai lenei aso” (MFF 88:76). O le anapogi e aunoa ma le tatalo ua na o le faaogea lava mo le 24 itula. Ae o le anapogi faatasi ma le tatalo, e aumaia ai le faateleina o le mana faaleagaga.
Ina ua le mafai e le au soo ona faamaloloina se tamaitiiti na ulufia e le agaga o le tiapolo, sa latou fesili atu i le Faaola, “Se a le mea na matou le mafai ai ona tulia o ia?” Na tali atu Iesu, “A ua na o le tatalo ma le anapogi e o ese ai mea faapena”(Mataio 17:19, 21).
Ia tatou amataina a tatou anapogi i le tatalo. E mafai ona tootutuli i le laulau pe a uma le taumafataga lea o le a amataina ai le anapogi. O lena tatalo e tatau ona avea o se mea masani a o tatou talanoa atu i lo tatou Tama Faalelagi, e uiga i le faamoemoega o la tatou anapogi, ma augani atu ia te Ia mo Lana fesoasoani i le ausiaina o a tatou sini. E tatau foi ona faapena le faaumaina o a tatou anapogi i le tatalo. E talafeagai lelei foi ona tatou tootutuli i le laulau a e tatou te lei saofafai e faaaoga le taumafataga lea e tatalaina ai la tatou anapogi. Tatou te faafetai atu i le Alii mo Lana fesoasoani i le taimi o le anapogi, faapea foi i mea na tatou lagonaina ma aoaoina mai le anapogi.
E faaopoopo atu i le tatalo i le amataga ma le faaiuga [o le anapogi], e tatau ona tatou saili atu e le aunoa i le Alii i tatalo a le tagata lava ia, i le taimi atoa o le anapogi.
E le tatau ona tatou faamoemoe e anapopogi a tatou fanau iti mo taumafataga e lua ua fautuaina. Ae ia tatou aoaoina i latou i mataupu faavae o le anapogi. Afai e talanoaina ma fuafuaina le anapogi i se tulaga faaleaiga, o le a matauina e tamaiti o loo anapogi o latou matua ma o latou tei matutua, ma o le a latou malamalama i le faamoemoega o le anapogi. E tatau ona latou auai i tatalo faaleaiga e amata ma tatalaina ai le anapogi. O lenei auala, pe a latou oo atu i le matua talafeagai, o le a latou naunau e anapopogi faatasi ma le aiga atoa. O le matou aiga, ua matou faia lenei mea, e ala i le uuna’ia o le ma fanau e i le va o le 8 ma le 12 tausaga e anapopogi mo se ’aiga se tasi; a atoa o latou tai 12 tausaga ma maua le Perisitua Arona, pe ulufale atu i Tamaitai Talavou, ua ma uunaia foi i latou e anapopogi mo ’aiga atoatoa e lua.
Ina ua uma ona aoaiina Isaraelu anamua i le le sao o le faataunuuina o le anapogi, na fetalai mai le Alii e ala mai i le perofeta o Isaia, i se gagana matagofie faafatusolo e uiga i le faiga sao o le anapogi:
“E le o lenei ea le anapogi ou te loto i ai? ina ia tatalaina fusi na faia i le amioleaga, e tatala fusi o le amo, e tuuina atu ia saoloto e ua faasauaina, ma ia outou gausia amo uma lava?” (Isaia 58:6).
Afai tatou te anapopogi ma tatalo mo le faamoemoega o le salamoina o agasala ma le faatoilaloina o ni vaivaiga faaletagata lava ia, o le mea moni o loo tatou saili e “tatalaina fusi na faia i le amio leaga” i o tatou olaga. Afai o le faamoemoega o la tatou anapogi ina ia tatou atili mataalia i le aoaoina atu o le talalelei ma le auauna atu i isi i o tatou valaauga o le Ekalesia, o loo tatou taumafai moni e “tatala fusi o le amo” a isi. Afai o loo tatou anapopogi ma tatalo mo le fesoasoani a le Alii i a tatou taumafaiga faafaifeautalai, pe tatou te le o naunau e “tuuina atu ia saoloto e ua faasauaina”? Afai o le faamoemoega o la tatou anapogi ina ia faateleina lo tatou alolofa i o tatou uso a tagata ma lafoai le manatu faapito, lo tatou faamaualuga, ma le taulai atu o o tatou loto i mea o lenei lalolagi, o le mea moni o loo tatou saili e “gausia amo uma lava.”
Sa faaauau ona faamatalaina e le Alii le auala sao o le anapogi:
“E le o lenei ea, ona ia tofitofi au mea e ai i le ua fia ai, ia au mai i lou fale e ua matitiva ma faasauaina? A e iloa le ua lelavalava e te faaofuina o ia, aua foi e te lafi ia i latou o lou lava aiga?” (Isaia 58:7).
O se mea matagofie moni lava, o le auala atu i a tatou taulaga anapogi i aso nei, e mafai ai ona tatou fafagaina e fia aai, malutia e ua leai ni fale, ma faalavalava i latou ua lelavalava.
Afai tatou te anapopogi sao, ua folafola mai e le Alii:
“Ona gafoa mai ai lea o lou malamalama e pei o le tafa o ata, e taalise ona tupu mai foi o lou malolo: e alu atu foi lau amiotonu i ou luma; …
“Ona e valaau lea, ae tali mai ai Ieova; e te alaga atu, ae fetalai mai o ia, O au lenei… .
“Afai foi e te alofa atu i le ua fiaai, ma fafaga ia maona o le ua tiga; ona alu ae lea o lou malamalama i le pouliuli, ma lou pogisa e pei o le aoauli ia:
“E taitaiina foi oe e le aunoa e Ieova, e faamalie foi o ia ia te oe pe a oge vai, … e avea foi oe e pei se fanua ua faasusuina, e pei o le punavai foi, e le mate ona suavai” (Isaia 58:8–11).
O lau tatalo ia mafai ona tatou faaleleia a tatou anapogi, ina ia mafai ona tatou olioli i le matagofie o nei faamanuiaga folafolaina. O lau molimau, pe afai tatou te “faalatalata atu” i le Alii e ala ia tatou anapogi ma tatalo, o le a ia “faalatalata mai” foi ia i tatou. (tagai MFF 88:63). Ou te molimau atu o loo soifua o Ia, ma e alofa o Ia i a i tatou, ma e finagalo o Ia e faalatalata mai ia i tatou. I le suafa o Iesu Keriso, amene.