Perofeta, Tagatavaai ma Tali Faaaliga
O Le Au Peresitene Sili ma le Korama a le Toasefululua ua tofia e le Atua ma lagolagoina … o ni perofeta, tagatavaai, ma tali faaaliga.
I le avea ai ma sui o o’u uso i le Korama a Aposetolo e Toasefululua, ou te fia avea ai ma tagata muamua e faafeiloai atu i a Elder Dieter Uchtdorf maElder David Bednar i o la valaauga fou ma le mafutaga fou o loo faatalitali mai. Ina ua valaauina le uluai Toasefululua i lenei tisipenisione sa ta’u atu ia i latou e faapea o o latou tofiga na “faamoemoe e faatupuina ai se lagona alofa o le tasi mo le isi, e malosi atu nai lo le oti.”1 Ua i ai lena lagona alofa mo oulua, Uso, ma o oulua taitoalua ma o oulua aiga. Matou te faapea atu ma le loto ma le leo e tasi, “Susū maia, uo pele e.”
I le agaga o le saunoaga faamomoiloto a Peresitene Hinckley, ou te fia faailoa atu ai foi lena lava “alofa … e malosi atu nai lo le oti” ma le lagona loloto o le misia na tofu lagona e i tatou uma i le maliliu o a tatou uo pele o David B. Haight ma Neal A. Maxwell. I na uso pele e toalua ma o la faletua o Ruby ma Colleen, matou te faapea atu matou te alolofa ia te oulua, matou te aloaia la oulua tautua ma e faamamaluina foi soifuaga faataitai sa oulua soifua ai. Matou te iloa uma o ni avanoa maoae le iloaina o oulua ma lo tatou galulue soosoo tauau ai ma oulua. E pele pea oulua e faavavau.
Pe a ou manatu i fesuiaiga taua o le aualu i luma o lenei galuega, ou te fia fai atu ai se upu i lenei taeao i le tofi aposetolo ma le taua o lona faaauauina pea i totonu o le Ekalesia moni a Iesu Keriso. O le faia ai o lea mea ou te le tautala atu ai i alii o loo umia lena tofi ae o le tofi lava ia, o se valaauga i totonu o le Perisitua Mekisateko paia lea na tuuina mai e le Faaola lava Ia mo le tausia o Ona tagata ma le molimau atu ai i Lona suafa.
Ina ia faavaeina se ekalesia lea o le a faaauauina pea i lalo o Lana taitaiga e ui lava ina sa aveeseina o Ia mai le lalolagi, na maliu atu Iesu … i le “mauga e tatalo, ua aoina lana tatalo i le Atua.
“Ua ao foi, ona valaau atu lea o ia i ona soo, ua filifilia e ia ni o latou e toasefulu ma le toalua, ua faaigoa foi i latou e ia o aposetolo.”2
Mulimuli ane, na aoao mai Paulo e faapea, na silafia lava e le Faaola, e mautinoa o Lona maliu, o lea na faia ai lenei mea ina ia tuu atu ai i le Ekalesia se “faavae o … aposetolo ma perofeta.”3 O nei Uso ma isi taitai o le Ekalesia o le a galulue i lalo o le taitaiga a le Keriso toetu.
Aisea? O isi mafuaaga, ina “ia le toe tama ninii i tatou o loo felafoaiina e pei o peau, ma feaveaiina i matagi uma lava o mataupu, i le pepelo o tagata, i togafiti leaga ua saunia e faasese ai.”4
O lea, o le faavae o le tofi faaaposetolo ma le faaperofeta o le Ekalesia o le faamanuia lea i taimi uma, aemaise lava i taimi o faigata po o tulaga matautia, o taimi atonu tatou te lagonaina ai le pei o ni tamaiti, o le fenumiai po o le le mautonu, atonu o sina fefe, o taimi o uiga le taupulea o tagata po o le le taupulea o le tiapolo o le a taumafai e faafenumiai po o le faasese po o le taitaisese. I le saunia mo taimi faapea pe a oo mai i o tatou vaitaimi, ua tofia ai le Au Peresitene Sili ma le Korama a le Toasefululua e le Atua ma outou lagolagoina e avea ma “perofeta, tagatavaai ma tali faaaliga,” faatasi ai ma le Peresitene o le Ekalesia e lagolagoina o le perofeta, tagatavaai ma tali faaaliga, o le Aposetolo sinia lea, ma e na o le pau lea o le tagata ua faataga e faaaogaina uma ia ki o faaaliga ma le taitaiga o le Ekalesia. I taimi o le Feagaiga Fou, i taimi o le Tusi a Mamona, ma taimi o ona po nei, o nei taitai e fausia mai ai maa faavae o le Ekalesia moni, e faatutuina ma maua mai lo latou malosi mai le maatulimanu sili, “le papa o lo tatou Togiola, o [Iesu] Keriso lea, o le Alo o le Atua,”5 o Ia le “Aposetolo ma le Faitaulaga Sili ua ta’uta’uina e i tatou,” e pei ona faaaoga ai e Paulo.6 O se faavae faapea ia Keriso o le a avea pea ma puipuiga i taimi “pe a faaoo mai e le tiapolo ana matagi tetele, ioe, o ana u fanafana i le asiosio, ioe, pe a pesi mai ia te oulua lana uatoa uma lava ma ana afa.” I aso faapea e pei ona tatou i ai nei—ma o le a tele pe itiiti ifo foi—o afa o le olaga “e le malo ai ia te oulua … ona o le papa ua atiina ae ai oulua, o le faavae mau lea, o le faavae foi lea, afai e ati ae tagata i ona luga, e le mafai lava ona pauu i latou.”7
I le tolu vaiaso talu ai sa ou i ai i se konafesi a le siteki i si tamai nuu mauga o Prescott, Arizona. Ina ua mavae gaoioiga matagofie o le faaiuga o lena vaiaso, na momono mai e se tuafafine se fasi pepa ia te au a o malaga mai o ia ma isi matou te faatalofa ma faatofa. Faatasi ai ma sina tau le mautonu ou te fia faasoa atu ai sina vaega o lena tusi ia te outou i lenei taeao. Faamolemole ia taulai i le aoaoga faavae o loo aoao mai e lenei tuafafine, ae le o tagata na ta’ua i le tusi.
“Lau susuga Elder Holland, faafetai atu mo le molimau na e faasoaina mai i lenei konafesi e uiga i le Faaola ma Lona alofa. O le fasefulutasi tausaga talu ai sa ou tatalo faamaoni i le Alii, ma ta’u atu ia te Ia ou te moomoo maumau pe ana ou ola i le lalolagi i le taimi na soifua ai Aposetolo, a o i ai le Ekalesia moni, a o lagonaina pea le siufofoga o Keriso. I totonu o se tausaga talu lena tatalo na auina mai ai e le Tama Faalelagi ni faifeautalai o le Au Paia o Aso e Gata Ai se toalua ia te a’u, ma ou iloaina ai o na faamoemoega uma e mafai ona moni. Atonu o sina taimi pe a e lelava po o le fesouaiina foi, o le a fesoasoani lenei faamatalaga ina ia e manatua ai le mafuaaga sa matuai taua tele ai ia te au ma le fia miliona o isi e pei o a’u le faalogoina o lou leo ma le faatalofa ma oe. O lou tuafafine, ma le alofa ma le faafetai tele, Gloria Clements.”
Ia Sister Clements, o lau faamatalaga faamomoiloto ou te toe manatua ai se faamoemoega faapea ma e tali faapea foi le gagana sa faaaogaina i se tasi taimi i totonu o lo’u lava aiga. I tausaga fesouaiina o tagata na uluai nofoia lenei atunuu, o Roger Williams, o le lona 10 o o’u tama matua o se tagata e naunautai ma femoumouai, na solaese—e le’i faapea o lona lava loto—mai le Kolone o le Vaifagaloa o Massachusetts ma nofo i le mea ua ta’ua nei o Rhode Island. Na ia faaigoaina lona nofoaga o le Tausiga Faalelagi, e atagia ai lana sailiga na faia i le olaga atoa mo ni fesootaiga ma ni faaaliga faalelagi. Ae na te le’i mauaina le mea sa ia lagona o le lotu moni o le Feagaiga Fou o uluai taimi. Na tusia e le tusitala lauiloa o Cotton Mather e uiga i lenei tagata sa sailia ni aposetolo fou, ae na le’i fiafia. “Na [i’u] ina ua ta’u atu e Mr. Williams [i e na mulimuli ia te ia] e ‘faapea ua taitaiseseina o ia, ua ia [taitaiseseina i latou ma] ua faamalieina nei o ia e leai se tasi o i le lalolagi faapea e mafai ona ia faia le papatisoga [po o soo se isi lava sauniga o le talalelei], … [o lea] na ia fautuaina ai i latou ina ia tuuese mea uma … ma faatalitali mo le oo mai o aposetolo fou.”8 E le’i ola ia Roger Williams e vaai mo na Aposetolo fou ua leva ona faatali i ai, ae i se taimi i le lumanai ou te faamoemoe e mafai ona ou ta’uina atu ia te ia na ola ana fanau e vaai i ai.
O le popole ma le faamoemoe e tusa ai ma le moomia o le taitaiga faalelagi e le o se mea e le’i masani ai na uluai tagata na toe faatulagaina ia talitonuga faalelotu, o e na avea ma teuteuala mo le Toefuataiga o le talalelei. O se tasi o failauga sili ona lauiloa i New England, o Jonathan Edwards, na saunoa, “e foliga mai ia te a’u o [se] … mea faigata, le taumate faapea e tatau ona i ai se Atua … o lē e tele lona popolega [mo i tatou], … ae peitai ua ia le tautala lava, … faapea ua leai se upu [mai ia te ia].”9
Mulimuli ane na faavevesiina ai e Ralph Waldo Emerson ia faavae o talitonuga faalelotu ua taliaina i New England ina ua ia faapea atu i le A’oga Faafaifeau i Harvard: “O lo’u tiute le faapea atu o le tulaga moomia [mo] ni faaaliga fou e le’i sili atu nai lo le taimi nei.” “O le aoaoga faavae o musumusuga ua leiloa… . O vavega, valoaga, … o le olaga paia, sa [na o le] talafaasolopito anamua sa i ai… . Ua talanoa tagata i … faaaliga e pei o se mea ua leva aso talu ona tuuina mai ma ua muta, e pei ua maliu le Atua… . O le tofi o le faiaoga moni,” na ia lapatai mai, “ina ia faaali mai ia i tatou o loo i ai le Atua, e le faapea sa i ai; o loo Ia fetalai mai, ae le faapea sa fetalai mai.”10 E pei ona fai mai Emerson, “Afai e te tausisi pea e avatu maa pe a talosaga mai tagata i le areto, o le a i’u ina latou le toe o mai i le falefalaoa.”11
Afai e manatunatu i folafolaga na faia e nei tagata lauiloa o le talafaasolopito o Amerika, e tusa lava foi pe le manatulia ia tatalo a tagata e pei o Gloria Clements, o le a outou iloaina lava le tulagaese o le malosi o le savali a le Ekalesia a Iesu Keriso o le Au Paia o Aso e Gata Ai, aemaise lava ia te outou na o e feiloai ma a matou faifeautalai. Perofeta? Tagatavaai? Tali Faaaliga? O mea na tutupu o le 1820 ma le 1830, ma mea na tutupu i le lata i le lua senituri talu ai lea na sosoo mai ai, o loo faasilasila mai ai faapea o faaaliga ma i latou o e na mauaina e le’i faapea “ua leva ona tuuina mai pe ua muta foi.”
I le tausaga lava na tuuina atu ai e Mr. Emerson lana tautalaga i le Aoga Faafaifeau e aunoa ma le matuā aioi sa’o mai mo se mea faapena e tupu, na valaauina ai foi Ioane Teila, se taulealea na malaga mai Egelani i lenei atunuu, e avea ma Aposetolo a le Alii o Iesu Keriso, o se perofeta, o se tagatavaai, o se talifaaaliga. I lena valaauga na saunoa ai Ioane Teila i se tasi taimi i le manatu alofa i e o loo saili ma le faamaoni i le upumoni: “A o ai ua faalogo i se lotu moni e aunoa ma le fesootaiga ma le Atua? Ia te au lava ia, o se mea sili ona faavalevalea lea e ono mafaufau i ai le tagata. E leitioa foi,” na saunoa ai Uso Teila, “pe a teena e tagata le mataupu faavae o faaaliga i le taimi nei, ona matua faateleina ai lea o le masalosalo ma le le talitonu. E leitioa foi” sa faaauau ona ia saunoa, “e toatele naua tagata latou te vaai maualalo i talitonuga faalelotu, ma ua latou faapea o se mea e leai se aoga i tagata atamamai, aua a leai ni faaaliga ua na o se tauemuga ma se meaula ia talitonuga faalelotu… . O le mataupu faavae o faaaliga i ona po nei, o le faavae tonu lea o lo tatou talitonuga faalelotu.”12
O le mataupu faavae o faaaliga i ona po nei? O le faavae lava lea o lo tatou talitonuga faalelotu? Se’i ou toe foi ese mai lava mai na faavae i le taimi nei, le taimi lava lenei, le senituri 21. Mo tagata uma lava—taitai faalelotu, o tagata atamamai i talafaasolopito, ma tagata e le o i ai ni tofiga—e tutusa lava le mataupu. Pe o tatala ea le lagi? Pe o faaali mai ea e le Atua Lona finagalo i perofeta ma aposetolo e pei ona i ai i aso anamua? Ma o i latou ma Ia o le folafolaga mausali lea o le Ekalesia a Iesu Keriso o le Au Paia o Aso e Gata Ai i le lalolagi uma. Ma i lena folafolaga o loo taoto ai le taua o Iosefa Samita, le Perofeta, mo le lata nei i le 200 talu ai.
O lona soifuaga na fesiligia ma sa tali ai le fesili “E te talitonu o loo fetalai mai le Atua i le tagata?” Mai mea uma lava na ia ausia i ona tausaga puupuu e 38 ma le afa, na tuua ai e Iosefa ia i tatou e sili atu nai lo mea uma se talatuu mausali o faaaliga paia—e leai se faaaliga e tasi ma tupito e aunoa ma se faamaoniga po o se taunuuga, ma e leai “ma se musumusuga pei e vaivai e ofi atu i mafaufau o tagata lelei uma” i soo se mea, ae o ni taitaiga patino ma le maoti faifaipea mai le Atua. E pei ona faaupu manino ai e se uo lelei ma le atamai o le Au Paia o Aso e Gata Ai, “I se taimi na matuai osofaia ai lava ia faapogai o le faaKerisiano e malosiaga o le atamai fetuunai, na toe faafoi atu ai ma le manino e Iosefa Samita [e toatasi] le faaKerisiano o ona po nei i ona uluai faapogai o loo i totonu o faaaliga.”13
Matou te “viia oe, le Atua, mo le perofeta ua taitaiina e ia o i matou i ona po nei,”14 aua o le tele o na aso o le a fesouaiina ma afatia ai. Tatou te faafetai mo lena taeao i le tautotogo o le 1820 ina ua faaali atu le Tama ma le Alo i le mamalu i se taulealea e 24 tausaga le matua. Tatou te faafetai mo lena taeao ina ua oo mai Peteru, Iakopo, ma Ioane e toefuatai mai ki o le perisitua paia ma tofi uma o i ai. Ma i lo tatou augatupulaga tatou te faafetai ai mo le taeao o le Aso 30 Setema, 1961, ua 43 tausaga talu ai, ina ua valaauina ia Elder Gordon B. Hinckley i le tofi aposetolo, o le alii lona 75 i lenei tisipenisione ua faaigoaina ai. Ma e faaauau pea lava mea e tutupu faapenei i se aso e pei o lenei, ma o le a faaauau ai pea lava seia afio mai le Faaola.
I se lalolagi o le le mautonu ma le fefefe, o fesuiaiga i uiga ma aga ma fevesiaiga i faiga faaupufai, ou te molimau atu o Iesu o le Keriso—o Ia lava le Areto ola ma le Vai ola—ae, o loo avea, o le a avea, ma e avea pea lava ma Talipupuni sili o le saogalemu i o tatou olaga, le Maa malosi o Isaraelu, le Taula o Lana Ekalesia ola lenei. Ou te molimau atu i Ana perofeta, tagatavaai, ma tali faaaliga, o e o loo aofia ai i faavae faaauauina pea o lena Ekalesia ma molimau atu, o na tofi ma afioga o loo galulue nei, i lalo o le taitaiga a le Faaola o i tatou uma, mo o tatou vaitaimi sili ona moomia ai. Ou te molimau atu ai i nei upumoni ma le paia o lenei galuega. O nei mea e fai ai a’u ma se molimau, i le suafa paia o Iesu Keriso, amene.