O E Aupito Itiiti o O’u Uso Nei
Aua nei manatu faatauvaa se tasi i le mana o le faatuatua i tagata le taualoa o le Au Paia o Aso e Gata Ai.
O loo i ai se savali mo le Au Paia o Aso e Gata Ai, i se faaaliga e seasea ona ta’ua, na tuuina mai i le Perofeta o Iosefa Samita i le 1838. “O lenei foi, ou te fai atu ia te outou, ou te manatua la’u auauna o Oliver Granger; faauta, e moni ou te fai atu ia te ia, o le a manatua ma le paia lona igoa mai lea tupulaga i lea tupulaga, e faavavau, faavavau lava, ua faapea mai ai le Alii” (MFF 117:12).
O Oliver Granger o se alii sili ona taualoa. Sa tele lava ina tauaso “ona sa aveesea lana vaaiga i le maatiati o le malulu” (History of the Church, 4:408). Sa faamatalaina e le Au Peresitene Sili o ia o se “alii sili ona faamaoni ma amio lelei; a aotele, o ia o se tagata o le Atua” (History of the Church, 3:350).
Ina ua tuliesea le Au Paia mai Katelani, Ohaio, i se vaaiga na faapea foi ona toe faia i Independence, Sisifo Mamao, ma Navu, na tuua ai Oliver e faatau atu a latou meatotino ma fanua i soo se tau lava na te maua. Sa le tele se avanoa e manuia ai. Ma o le mea moni, e lei faamanuiaina!
Ae na fetalai mai le Alii, “O lea ia tuu atu ai ia te ia e finau faamaoni mo le togiolaina o le Au Peresitene Sili o lau Ekalesia, ua faapea mai ai le Alii; pe a pau foi o ia o le a toe tulai o ia, aua e sili lava ona paia lana taulaga ia te au i lo le faateleina o ana mea, ua faapea mai ai le Alii” (MFF 117:13).
O le a se mea na faia e Oliver Granger e tatau ai ona manatuaina o ia ma le paia? O le mea moni, e tau leai se mea. E le faapea ona o mea sa ia faia, ae o le ituaiga tagata sa i ai o ia.
Pe a tatou faamamaluina Oliver, atonu o le tele lava o le mamalu e tatau ona alu atu ia Lydia Dibble Granger, lona faletua.
Sa i’u ina tuua e Oliver ma Lydia ia Katelani ina ia auai faatasi ma le Au Paia i Sisifo Mamao, Misuri. Na o ni nai maila lava na la o atu ai mai Katelani, ae toe faafoi i laua e tagata leaga. I se taimi mulimuli ane sa la faatasi atu ai ma le Au Paia i Navu.
Na maliu Oliver i le 47 o ona tausaga, ma tuua ai Lydia e tausia le la fanau.
E lei faamoemoe le Alii e atoatoa ia Oliver pe faamanuiaina foi. “Pe a pau foi o ia o le a toe tulai o ia, aua e sili lava ona paia lana taulaga ia te au i lo le faateleina o ana mea, ua faapea mai ai le Alii” (MFF 117:13).
E le mafai ona tatou mafaufau tatou te manuia i taimi uma, ae e tatau ona faia le mea sili tatou te mafaia.
“Aua o A’u, le Alii, o le a faamasinoina tagata uma e tusa ma a latou galuega, e tusa ma manaoga o o latou loto” (MFF 137:9).
Na fetalai mai le Alii i le Ekalesia:
“A ou tuuina atu se poloaiga i soo se tasi o atalii o tagata ia faia se galuega i lo’u igoa, ona o atu lea o ia atalii o tagata ma lo latou malosi atoatoa ma mea uma e fai ai lena galuega, ma le tuua lo latou maelega, a e o atu o latou fili ia i latou ma taofia i latou mai le faiga o lena galuega, faauta, ua tonu ia te au ona le toe sueina lea galuega mai ia atalii o tagata ae talia lava a latou taulaga… .
“… Ou te faia ma faataitaiga ia te outou, mo lo outou faamafanafanaga e uiga ia i latou uma na poloaiina e faia se galuega a ua faalavelaveina e o latou fili, ma sauaga, ua faapea mai ai le Alii lo outou Atua” (MFF 124:49, 53; tagai foi i le Mosaea 4:27).
Na o ni nai tagata o le Au Paia sa i ai i Katelani i na aso, ae o lenei ua fia miliona tagata le taualoa o Au Paia o Aso e Gata Ai i le lalolagi atoa. E tele ni gagana latou te tautatala ai ae ua faatasia i le faatuatua ma le malamalama e ala i le gagana a le Agaga.
O nei tagata faamaoni [o le Ekalesia] ua osia ma tausia a latou feagaiga, ma taumafai ia agavaa e ulu atu i le malumalu. Latou te talitonu i valoaga ma lagolago i taitai o uarota ma paranesi.
E pei foi o Oliver, latou te lagolagoina le Au Peresitene Sili ma le Korama a le Au Aposetolo e Toasefululua, ma talia le fetalaiga a le Alii: “Afai foi e faalogo mai lo’u nuu i lo’u leo, ma le leo o [nei alii] ua ou tofia e taitaiina lo’u nuu, faauta, e moni ou te fai atu ia te outou, o le a le aveesea lava i latou mai lo latou nofoaga” (MFF 124:45).
I le faaaliga na tuuina mai o se faatomuaga o le Mataupu Faavae ma Feagaiga, na faamalamalama mai ai e le Alii i latou o le a faia Lana galuega. Faalogo lelei ae ou faitauina lena faaaliga, ma mafaufau i le faatuatuaga a le Alii ia i tatou:
“O le mea lea, o a’u le Alii ina ua iloa le malaia o le a oo mai i luga o tagata o le lalolagi, na ou valaauina la’u auauna o Iosefa Samita, le itiiti, ma ua ou tautala atu ia te ia mai le lagi ma ua tuuina atu ia te ia poloaiga;
“Ma na tuuina atu foi poloaiga i isi, ina ia latou folafola atu nei mea i le lalolagi; ma ua faia nei mea uma ina ia mafai ona faataunuuina ai mea ua tusitusia e le au perofeta—
“O le a oo mai mea vaivai a le lalolagi ma lepetia i lalo mea sili ma le malolosi, ina ia le faatonuina e le tagata lona uso a tagata, pe faalagolago i le malosi o le tino.”
O le isi fuaiupu na tuuina mai mo le faaeeina atu o le perisitua i alii ma tama le taualoa ma agavaa:
“Ia mafai ona taitoatasi le tagata ma tautala atu i le suafa o le Atua le Alii, o le Faaola lava o le lalolagi; …
“Ina ia mafai ona folafola atu le atoatoa o la’u talalelei i e vaivai ma loto maualalo e oo i tuluiga o le lalolagi, ma luma o tupu ma faipule.
“Faauta, o a’u o le Atua ma ua fai atu ai; o a’u poloaiga lava nei, ma ua ou tuuina atu i a’u auauna i lo latou vaivai, e tusa ma le uiga o la latou gagana, ina ia mafai ona latou maua le malamalama.
“Ma afai ua sese i latou e mafai ona faailoa atu ai;
“Ma afai ua latou sailiili i le poto e mafai ona aoao atu ia te i latou;
“Ma afai ua agasala i latou e mafai ona aoaiina i latou, ina ia mafai ona latou salamo;
“Ma afai ua lotomaualalo i latou e mafai ona faamalosia i latou, ma faamanuiaina mai luga, ma maua le malamalama mai lea ituaso i lea ituaso” (MFF 1:17–20, 23–28; faaopoopo le faamamafa).
O le taimi nei, ua agai mai ai i luma se isi augatupulaga o tagata talavou. Tatou te vaaia se malosiaga ia i latou e sili atu nai lo mea sa tatou vaaia muamua. O le inu ava malosi ma fualaau faasaina ma amioga faalogogata, e le o se vaega lea o o latou olaga. Latou te potopoto faatasi e aoao i le talalelei, i gaoioiga faafiafia, ma galuega auauna atu.
E le atoatoa i latou. E le’i oo mai le taimi. O loo latou faia le mea sili latou te mafaia, ma e malolosi atu i latou nai lo augatupulaga na i ai muamua.
E pei ona ta’u atu e le Alii ia Oliver Granger, “Pe a [pauu foi i latou] o le a toe tulai, aua e sili lava ona paia [a latou] taulaga ia te a’u i lo le faateleina o a [latou] mea” (MFF 117:13).
O nisi e popole i le le faia o se misiona, pe o ni faaipoipoga ua le taunuu, po o le le mafai ona maua ni fanau, po o ni fanau e foliga mai ua se ese, po o ni miti e le’i faataunuuina, ia pe ona o le matua ua tapulaa ai mea e mafai ona latou faia. Ou te le manatu e fiafia le Alii pe a tatou popole ona ua tatou manatu e le lava mea o loo tatou faia, pe o mea o loo tatou faia e le lelei naua.
O nisi o loo tauaveina e aunoa ma se faapogai se avega mamafa o le tausalaina lea e mafai ona aveesea e ala i le tautau atu ma le salamo.
E le’i faapea atu le Alii ia Oliver, “[Afai] e pau o ia,” ae “Pe a pau foi o ia, o le a toe tulai o ia” (MFF 117:13; faaopoopo le faamamafa).
O ni tausaga ua tuanai i Filipaina, sa matou vave taunuu atu mo se konafesi. Sa saofafai ai i tafatafa o le auala se tama ma se tina ma ni tamaiti laiti se toafa, sa latou laeiina o latou laei o le Aso Sa. Sa latou malaga mai i ni nai itula i le pasi ma o loo fai le latou mea tausami muamua o le aso. O i latou uma sa aina se fasi saga vela ua maluluina. E masalo o le totogi o le malaga mai i le pasi i Manila na sau mai le latou paketi o le meaai.
A o ou vaavaai atu i lena aiga, sa tumu lou loto i le ootia. O i latou o le Ekalesia. O i latou o le mana. O i latou o le lumanai o le Ekalesia. E pei foi o aiga i le tele o atunuu, latou te totogiina ni sefuluai, lagolago o latou taitai, ma faia le mea sili latou te mafaia e auauna atu ai.
Mo le silia i le 40 tausaga, sa ma femalagaai ai ma lo’u toalua i le lalolagi. Ma te iloa ia tagata o le Ekalesia pe tusa o le selau atunuu. Sa ma lagonaina le mana o o latou faatuatua faigofie. O a latou molimau taitoatasi ma a latou osigataulaga, ua matua tele ai se aafiaga mo i ma’ua.
Ou te le fiafia e maua ni faamamaluga. O faaaloaloga e faalavelave ia te a’u i taimi uma lava, aua o le galuega tele o le tuleiina i luma o le talalelei, e pei ona sa i ai i le taimi ua tuanai, i le taimi nei, ma le lumanai, e faalagolago lea i tagata le taualoa o le ekalesia.
Ma te le faamoemoe ma lo’u toalua e maua se taui sili atu i le lagi nai lo taui o le a maua e le ma fanau ma o ma matua. Ma te le uunaia pe ma te mananao i le ma fanau ina ia avea le lauiloa ma le tautaua i le lalolagi po o totonu foi o le Ekalesia, o ni a latou sini o le olaga. O lena mea e matuai itiiti lava se mea e faia ai i le taua o le agaga. O le a latou faataunuuina a ma miti pe a latou ola i le talalelei ma tausia a latou fanau i le faatuatua.
E pei o Ioane, “E leai [so ma] fiafia e sili i lenei, pe a ou faalogo ua savavali [le ma] fanau i le upu moni” (3 Ioane 1:4).
I tausaga ua mavae, ao avea a’u ma se peresitene o le Misiona a New England, sa ou tuua ai Fredericton, New Brunswick. Sa 40 tikeri e maualalo ai i le selo [le malulu]. A o aluese mai le vaalele mai lena malae vaalele laitiiti, sa ou vaaia ni alii faifeautalai se toalua i fafo o talotalo faatofa mai. Sa ou mafaufau, “Tamaiti valelea. Aisea ua le o ai i totonu i le mafanafana?”
Na faafuasei ona oo mai ia te a’u se uunaiga mamana, o se faaaliga: O na faifeautalai talavou le taualoa e toalua, o loo i ai le perisitua a le Atua Silisiliese. Sa ou faalagolago i tua ma le faamalieina e tuu atu le galuega faafaifeautalai o lena itumalo atoa o Kanata i o laua lima. O se lesona ou te le’i toe faagaloina lava.
O le valu vaiaso talu ai, na faia ai e i ma’ua ma Elder William Walker o le Au Fitugafulu se konafesi faalesone i Naha mo ni faifeautalai se toa 44 o le motu o Okinawa. Sa le mafai ona auai atu Peresitene Mills o le Misiona a Iapani Fukuoka ona o se afa malosi na oo atu [i le nuu]. Sa taitaia e taitai sone talavou le sauniga ma le musuia tele ma le mamalu i se faiga atonu e faia ai e lo latou peresitene o le misiona. Sa matou toe foi i le taeao na sosoo ai i le malolosi o matagi, ma le faamalieina e tuu atu le vaavaaiga o faifeautalai ia i laua.
Talu ai nei i Osaka, Iapani, sa matou fono ai ma Elder Russell Ballard ma Henry Eyring o le Toasefululua, o a’u, faatasi ma Peresitene David Sorensen ma isi o le Au Fitugafulu, ma ni peresitene o misiona e 21 ma ni Fitugafulu Pule Eria se toa 26. Sa i ai i le Au Fitugafulu Pule Eria ia Elder Subandriyo mai Jakarta, Indonesia; Elder Chu-Jen Chia mai Bejing, Saina; Elder Remus G. Villarete o Filipaina; Elder Won Yong Ko mai Korea; ma isi e 22—e na o le toalua o Amerika sa faatasi ma i latou. O se tuufaatasiga o malo, gagana, ma tagata. E leai se tasi o i latou e maua se totogi. Latou te auauna fua atu, ma le agaga faafetai ona o le valaauina i le galuega.
Sa matou faatulagaina ni siteki i Okazaki, Sapporo, ma Osaka. O le toatolu uma o peresitene fou o siteki ma se aofaiga toatele o taitai na auai i le Ekalesia ao talavou. O le toatele o i latou na maliliu o latou tama i le taua.
O Elder Yoshihiko Kikuchi o le Au Fitugafulu o se tasi lea o lena augatupulaga.
O sauaga na muai vaaia e le Alii ua oo mai nei i luga o se lalolagi le salamo. Ua matuai televave le tutupu ae o le tele o augatupulaga, e sosoo mai lava. Latou te faaipoipo. Latou te tausia feagaiga na osia i le maota o le Alii. Latou te maua ni fanau ma lē faatagaina le lalolagi e faia ni faatapulaa i le olaga faaleaiga.
O le aso ua tatou faataunuuina ai le valoaga “o le igoa o [Oliver Granger’s] o le a manatua ma le paia mai lea tupulaga i lea tupulaga, e faavavau faavavau lava” (MFF 117:12). E le’i lauiloa o ia i le faauigaga a le lalolagi. Ae peitai, na fetalai mai le Alii, “Aua le inoino ai soo se tagata i la’u auauna o Oliver Granger, a ia tuu atu faamanuiaga … ia te ia e faavavau, faavavau lava” (MFF 117:15).
Aua nei manatu faatauvaa se tasi i le mana o le faatuatua i tagata le taualoa o le Au Paia o Aso e Gata Ai. Ia manatua na fetalai mai le Alii, “Aua na faia e outou i le tasi o e aupito itiiti o ou uso nei, o au lea na outou faia i ai” (Mataio 25:40).
Sa ia folafola mai “e avea le Agaga Paia ma [o latou] aumea tumau, ma [o latou] tootoo ma tootoo le feliuliuai o le amiotonu ma le upu moni; ma [o latou] malo foi o le a faia ma malo faavavau, e aunoa foi ma faiga faamalosi o le a tafe ia te [outou] e faavavau faavavau lava” (MFF 121:46).
E leai se mea! E leai se mana e mafai ona taofia le alualu i luma o le galuega a le Alii.
“E eleelea le vai o loo tafe seia afea? Po o le a ea le mana e taofi a’i le lagi? E tusa lava pe ana faaloaloa atu e le tagata lona lima vaivai e taumafai e taofi a’i le vaitafe o Misuri mai lona ala faatonuina pe toe faafoi a’e lona tafe, pe ana ia taumafai e taofia Le Silisiliese mai le liligiina ifo o le malamalama mai le lagi i luga o le Au Paia o Aso e Gata Ai” (MFF 121:33).
Ou te tuuina atu ai lenei molimau faaaposetolo, i le suafa o Iesu Keriso, amene.