Na Faamanuia Faapefea e le Aualofa Lou Olaga?
Ona o le Aualofa ua mamanuina faalelagi, ua faamanuiaina ai e le gata i tamaitai, ae faapea foi le aiga, ma le Ekalesia.
O le toe tepa i tua i lona olaga, sa faamatala mai talu ai nei e se alii lenei tala faamomoiloto ia te au: “A o ou ola a’e, sa le’i malosi lo’u tama i le Lotu. Sa faigata ia te ia ona tuu le ava malosi—ma a oo ina pogisa lona mafaufau e oo atu lava ina mateletele ma saua. E masani lava e lē tetee i le galue o Tina i le uarota. E 38 tausaga o galue o ia i le Peraimeri, ma o le tele foi o le taimi lena sa galue ai foi i Tamaitai Talavou. Sa mamafa lana avega sa tauamo. Sa faigata la la’ua ulugalii, ma ua ou iloa nei sa i ai taimi e lotovaivai ai, ae ou te le’i iloaina i lena taimi.
“Faatoa ou iloa mulimuli ane, sa avea tuafafine o le matou uarota ma ona malosiaga. E le’i i ai o ia i le au taitai o le Aualofa, ae e alu lava o ia i fonotaga, ma e fiafia lava i ana uo e i ai iina. Latou te popole ma alolofa mo ia. E leai sona uso na o tuagane, a o tama uma foi lana fanau. Sa ia maua uso sa ia manaomia i le matou uarota. Ou te iloa na te fetufaai atu ona lagona ia i latou—o lagona sa le mafai ona ia faaalia i se isi lava mea. Sa leai se mea na foliga mai o se uiga o le ‘Aualofa’ ia te au i lena taimi, ae ua ou malamalama nei e sa’o lava.”1 Sa momomo lo’u loto ona o le mea na manatua e lenei atalii i le Aualofa. Ioe, o tagata o le Aualofa o tamaitai, ae e le gata ina faamanuiaina tamaitai i le Aualofa; ae e faamanuiaina ai i tatou uma taitoatasi.
O manuia faapefea lou olaga i le Aualofa?
Sa ou faia le fesili lenei ia Peresitene Hinckley. Sa ia tali mai, “Ua faamanuiaina e le Aualofa lo’u aiga ma le aiga o si o’u toalua pele, i le tusa ma le fitu augatupulaga. Talu mai le popofou o le Ekalesia, sa aoaoina o matou tina ma afafine i a latou matafaioi mo i latou e puapuagatia. Sa aoaoina i latou i ituaiga tomai aupito sili o le tausi aiga, ma sa faamalosiauina i o latou atinaega faaleagaga ma taialaina e faataunuu o latou malosiaga atoatoa o ni tamaitai. O le tele lava o nei mea sa faia i le Aualofa, ma sa aumai ai i le aiga ina ia manuia ai le olaga o tagata taitoatasi o lo’u auaiga.”2
Ou te manatua foi lo’u taalo i lalo o faavaa o ievavae a le tina o lo’u tama, a o latou su’iina ma uso o le Aualofa. Sa ou laitiiti, ae sa ou iloa o le vaega lenei o le Aualofa—faamanuiaina olaga o isi tagata. Sa taialaina a’u ma le alofa i le Aualofa e lo’u tina ma lo’u tinamatua. Ou te alofa i le Aualofa—ou te manatu ou te alofa lava i ai e le aunoa. Sa fesoasoani le Aualofa ia ou iloa le Faaola, ma ua ia faamalosia foi lo’u alofa mo Ia ma lo’u Tama Faalelagi. O le avea o a’u ma se itu tino o le Aualofa ua ou maua ai le tele naua o avanoa e aoao ai, alofa, tautua ai ma faatumuina i le alofa o le Alii i lo’u olaga, a o ou taumafai e tausia a’u feagaiga, faatino le alofa ma faamalosi i lo’u aiga.
O lea ou te toe fesili atu ai, e fia ni auala ua faamanuiaina ai lou olaga e le Aualofa?
I se asiasiga i le Nofoaga e Aoao ai Faifeautalai i Pasila, sa ou fai atu i faifeautalai, “O le a so outou silafia i le Aualofa?” Sa fai mai le tasi faifeau, “O kaserola!” Sa fai mai le isi, “E i ai lo’u tina ma lo’u tuafafine.” Mulimuli ane fai mai le isi, “o le faalapotopotoga a le Alii mo tamaitai.” E sa’o lava o ia, ae e i ai isi mea e sili atu: O le Aualofa “o se itu tino taua o le talalelei.”3
O le tausaga e 1842 sa matua faigata mo le Perofeta o Iosefa Samita. Sa faasagatau atu ia te ia nisi sa avea muamua ma ana uo, a o isi fili sa mananao e ave faanana o ia mai Navu ma taofia ai le ola o le Lotu. I lena lava tausaga, sa ia faatulagaina ai le Aualofa ina ia tausia e matitiva ma e le tagolima, ma “laveai ai agaga.”4 Sa matauina e Peresitene J. Reuben Clark, Jr. “e ui lava i nei faigata, ae “sa liliu atu [Iosefa Samita] i tamaitai mo se faamafanafanaga, ma le siitia a’e o lona agaga lea sa ia matua manaomia i lea taimi.”5 O se mafaufauga lotomaulalo ma le faamomoiloto: o se perofeta a le Atua, o loo sailia le faamama avega a ona tuafafine—o tamaitai ia sa ia tuuina atu i ai le poloaiga, “e le uma le alofa.”6 Ia te a’u lava ia, ua faamanatu mai ai na tamaitai sa faavauvau faatasi ma le Faaola i Kolokota.
Na faamanuiaina e le Aualofa soifua o perofeta. O faapefea ona faamanuiaina ai lou olaga?
Na saunoa Peresitene Boyd K. Packer, “O puipuiga o le fale ma le aiga e matua faamalosia lava pe a i ai le ava ma le tina ma fanau teine i le Aualofa.”7 Aisea? Aua o tamaitai o le fatu lea o le aiga.
O lo’u i ai i le Aualofa, ua faafouina ai a’u, faamalosi, ma naunautai ai e avea ma se tina, o se toalua, ma se afafine sili atu o le Atua. Ua faateleina lo’u loto i le malamalama o le talalelei, ma le alofa o le Faaola ma mea ua Ia faia mo a’u. O le mea lea, outou na o’u uso pele, ou te faapea atu: O mai i le Aualofa! O le a faatumulia ai o outou aiga i le alofa ma le alofa mama; o le a faafaileleina ai ma faamalolosia outou ma o outou aiga. E manaomia e lou aiga lou loto amiotonu.
I so’u tofiga talu ai nei i Peru, sa ou asiasi atu ai i se aiga faatauvaa o Brother ma Sister Morales. Sa faatumulia i le alofa. O i la’ua o matua o se fanau e toafitu, ma ua 4 tausaga o avea ma tagata o le Ekalesia. E tele naua mea sa aoaoina e Sister de Morales i le Aualofa. Ina ia fesoasoani i le tausiga o lo latou aiga ma le la tama o loo faifeautalai, na te faia tagamea ma auliga. Na te tausia foi le fanau e toalua a lona tuaoi, pe a o e faigaluega. Na te lagolago lona toalua o lē o loo tauivi ma ona fatuga’o ua lē toe aoga, ma o loo galue foi o le Peresitene o le korama a toeaina. La te talanoaina faatasi lesona a Heber J. Grant e sauniuni ai [lona toalua] mo le aoaoina atu o lana lesona.
Sa ou fesili ia te ia, “O oe o se faiaoga asiasi?” Sa ia tali mai ma le ataata, “Ioe, Sister Parkin. E toafa uso ou te asia. E toalua e le o toaaga mai, ae o le a ou toe aumaia i la’ua ma le alofa.”
Ina ua matou tuua le fale, sa ou vaaia se faaupuga tusilima i luga o le faitotoa. O loo fesili mai: “Pe ua faitau au tusitusiga paia i le asō?” Ua faamanuia e le Aualofa lenei aiga, o lenei uarota, ma lenei pitonuu. O faamanuia ai faapefea oe?
O le avea ma itutino o le Aualofa, e matua taua mo uso faatoa papatiso faapea foi o latou aiga. A o ma galulue ma lo’u toalua a o pulefaamalumalu o ia i le Misiona a Egelani Lonetona i Saute, sa matou feiloai ma le toatele o uso faatoa liliu mai—e pei o Gloria, o se tina nofo toatasi. Ina ua auai o ia i le Ekalesia, sa auai foi o ia i le Aualofa. O se nofoaga saogalemu e mafai ai ona ia fesili e uiga i lona faatuatuaga fou. Sa faalogo o ia i tamaitai o faamatala ma le le afeifeia o latou aafiaga, lea na mafua ai ona ia suesue i le afioga a le Atua.8 Ua maua lona faamanuiaga faapeteriaka, ua ulu foi i le malumalu, ma o loo galue auauna nei i le Ekalesia. Ou te mafaufau i fautuaga a Peresitene Hinckley ia te au, “[Tamaitai] e tatau ona faatasitasi i se siosiomaga e faamalosia ai le faatuatua.”9 O le Aualofa e maua ai se siosiomaga faapena.
Sa ou mafaufau i le autau talavou ina ua ou faalogo i se tama tama a se uso o le Aualofa o faapea mai, “Ua faamanuiaina a’u i le faatuatua ma le faataitaiga a lo’u tina. E oo atu i le taimi na ou umia ai le perisitua, ua tele mea ua ou aoaoina e uiga i faiaoga o aiga, mai i taumafaiga a lo’u tina i ana asiasiga faaleaiga, faapea foi faataitaiga a lo’u tama i faiaoga o aiga… . O lona faatuatua i le perisitua, ua aafia ai lo’u faatuatua ma ua faamalosia ai lo’u mana’o ina ia avea ma se toeaina … agavaa.”10
Uso e ma tuagane, ua suia a’u ma faamanuiaina, ua sili atu a’u nai lo le mea sa ou i ai ona o le Aualofa. Ma ou te talitonu ua manuia uma ai i tatou.
Ou te tatalo o le a auai ma le malolosi tina ma fanau teine; o le a lagolago e tane o latou taitoalua ma o le a saunia faatasi e tina ma tamā o latou afafine mo le Aualofa. Ou te uuna’ia taitai o le perisitua ina ia taialaina afafine o le Atua o ē iti ma ē ua matutua i le Aualofa—o se tasi o le mau vavega o le toefuataiga. A tatou laa atu i nei faasitepu, o le a lofituina i tatou i le faafetai ona o lenei faalapotopotoga paia.
Ona o le Aualofa ua mamanuina faalelagi, ua faamanuiaina ai e le gata i tamaitai, ae faapea foi le aiga, ma le Ekalesia. Ou te molimau atu [o le Aualofa] o se vaega taua o le talalelei toefuataiina a le Alii aua o loo faavae i le alofa—Lona alofa mama. Ou te molimau atu i nei mea, i le suafa o Iesu Keriso, amene.