O Fea Ou Te Tu Ai?
Ina ia maua le fiafia ma le olioli, e tusa lava po o le a le mea e oo mai, e tatau lava ona tatou tutu faatasi ma le Alii e aunoa ma le masalosalo
O’u uso e ma tuafafine ma uo pele, ua faamanatu mai e Peresitene Hinckley ia i tatou faapea o “tausaga auro” e tumu atu i ‘ele nai lo auro! O le mafuaaga lea ua ou nofo ai i lalo a o o’u tautala atu ia te outou i le aso. O lea faatoa ou tau malosi mai se aafiaga o le tuasivi, na afaina ai se uaua. Ua ta’uina mai ia te a’u e i ai se taimi e mafai ai ona ou toe malosi atoatoa.
Ou te momoli atu la’u faafetai tele mo faamanuiaga ua oo mai i le lalolagi e ala i le tautua maoae a o tatou Uso na faatoa maliliu atu nei, o Elder Neal A. Maxwell ma David B. Haight o le Aufono a Aposetolo e Toasefululua. Tatou te le toe maua nei alii maoae. Tatou te faafeiloai atu ia Uso Uchtdorf ma Uso Bednar, o alii o le malosiaga ma le faatuatua, i le aufono mafana a le Korama a Aposetolo e Toasefululua.
Ou te tatalo faamaualalo i lenei taeao ina ia outou malamalama ia te a’u ae le o le le malamalama. I totonu o se lalolagi ua faateleina le le talafeagai e ola ai ma saili ai le fiafia ma le olioli, e tusa lava po o le a le mea e oo mai, e tatau lava ona tatou tutu faatasi ma le Alii e aunoa ma le masalosalo. E moomia ona tatou taumafai ina ia faamaoni i itula uma o aso taitasi ina ia ‘aua lava ne’i luluina lo tatou faatuatua i le Alii. O la’u savali o se faamoemoe ma se fautuaga mo i latou o e atonu o loo manatunatu i le le talafeagai o le oo mai o tiga, mafatiaga, mala, ma le lototiga i lenei olaga. Atonu e fesili nisi:
“Aisea na ou fanau mai ai ma ni faafaigata faaletino po o le mafaufau?”
“O le a le mea na ou faia na oo mai ai lenei lototiga?”
“Aisea na mafatia tele ai fua lo’u tama ina ua mavae se ma’i tuga na pe ai lona tino? O ia o se tagata amiotonu ma sa faamaoni pea ma tumau i le Alii ma Lana Ekalesia.”
“Aisea ua faalua ai ona leiloa atu lo’u tina—o le taimi muamua i aafiaga matautia o le faamai o le Alzheimer ma lona lua i le oti? O ia lava o se agelu.”
“Aisea na tuu ai e le Alii lo ma afafine pepe e oti? E pele o ia ma e ma te alolofa tele ia te ia.”
“Aisea na le tali mai ai le Alii i a matou tatalo i le mea na matou mananao i ai?”
“E le fetaui le olaga. Matou te iloa nisi o tagata na faia ni mea e matuai leaga lava ae peitai e foliga mai o loo latou maua mea uma latou te mananao pe moomoo i ai.”
Na fautua mai e Dr. Arthur Wentworth Hewitt ia nisi o mafuaaga e ao ai ona puapuagatia le tagata lelei e faapea foi i le tagata leaga: “Muamua: Ou te leiloa. Lua: Atonu tatou te le o mama a’ia’i e pei ona tatou manatu ai. Tolu: … Ou te talitonu ona e alofa tele o Ia ia i tatou e sili atu nai lo Lona alofa i lo tatou fiafia. E faapefea? Ia, afai e fuafua i le taui o le tagata lava ia i le taimi lenei, e fiafia pea lava la ia tagata lelei, ae o tagata leaga e matuai puapuaga lava (nai lo le mea ua masani ai o le faafeagai), semanu o le auala sili lenei ona atamai e faaumatia ai uiga o le tagata e mafai ona mafaufau i ai.”1
Na tuuina mai e Peresitene Kimball lenei faamalamalamaga malamalama:
“Afai o le tiga ma le faanoanoa ma le faasalaga uma e mulimuli mai i le taimi tonu lava e faia ai le leaga, semanu e leai se agaga e toe faia se mea sese. Afai o le olioli ma le filemu faapea ma taui e tuuina mai lava i le taimi e faia ai le lelei, semanu e le mafai ona i ai se leaga—semanu e faia e tagata uma lava le lelei ma e le mafua mai ona o le tonu ona faia o le mea lelei. Semanu e leai se tofotofoina o le malosi, e leai se atinaeina o uiga, e leai se faatupulaia o mana, e leai se filifiliga saoloto… . Semanu e leai foi se olioli, faamanuiaina, toetu, ola faavavau, ma le avea ma atua.”2
O lo tatou alofa i le Atua e tatau ona mama, e aunoa ma se manatu faapito. O le alofa mama o Keriso e tatau ona avea ma uunaiga o lo tatou naunautaiga.
O lenei puapuaga uma e mafai ona moni e le fetaui pe ana fai e muta mea uma i le oti, ae leai. O le olaga e le pei o se tala e tasi le vaega. E tolu ona vaega. Sa i ai la tatou vaega ua mavae atu a o tatou i ai i le muai olaga; ma o loo tatou i ai nei i le vaega o loo faatinoina, o le olaga faaletino lea; ma o le a i ai foi se tatou vaega faatino i le lumanai, pe a tatou toe foi atu i le Atua.3 E pei ona folafola mai e Iesu, “E tele mea e nonofo ai i le maota o lo’u Tama.”4 Na auina mai i tatou i le olaga faaletino ina ia suesueina ma tofotofoina ai. E pei ona faamatala atu e le Alii ia Aperaamo, “Ma o le a tatou faataitai ai i latou, ia iloa ai, pe latou te faia mea uma e poloaiina ai i latou e le Alii lo latou Atua.”5
O o tatou mafatiaga i le taimi ua tuanai ma le taimi nei, e le mafai, e pei ona fai mai Paulo, “ona faatusaina i le manuia atali e faaalia mai ia te i tatou”6 i le faavavau. “Aua e oo mai faamanuiaga pe a mavae atu puapuaga e tele. O lea o le a oo mai le aso e faapaleina ai outou i le mamalu.”7 O lea, o puapuaga e aoga i le lagona faapea e fesoasoani ai ina ia oo atu i le malo selesitila.
O nisi tagata, talu ai ona o le le lava o le faatuatua po o le malamalama i le fuafuaga faavavau, ua tiga ai ma leai se faamoemoe. E faapena se tasi o tusitala o le senituri 19 o le sa manuia ma tamaoaiga i ana tusitusiga ma uiga malie. O lona faletua e mai se aiga lolotu, ma sa ia manao ina ia faatuatua i le Atua ae le’i mautinoa pe i ai moni se Atua. Na oo ia te ia se faasologa o tofotofoga faigata. O se faaletonu i mea tautupe i le atunuu i le 1893 na tetele ai ana aitalafu. Na maliu lona afafine matua a o malaga o ia e lauga i nofoaga eseese. Na afaina le soifua maloloina o lona faletua, ma maliu ai i le 1904. Na maliu lona afafine laitiiti i le 1909. Na faasolo ina leaga lona ola maloloina. O ana tusitusiga, lea sa matuai mataina i le taimi muamua, ae ua atagia mai ai lona tiga. Na faateteleina lona le fiafia, masalosalo, ma le faanoanoa, ma faapena ai lava seia oo i lona maliu i le 1910. E ui i lona atamai uma, ae sa aunoa o ia ma le malosiaga i totonu e faafetaui ai faigata ma faigofie ai lava ona gauai atu o ia i ona puapuaga.
O le mamafa e le o i le ituaiga o mea e tupu ia i tatou, ae o i le auala tatou te taulimaina ai mea e tutupu ia i tatou. E faamanatu mai ai ia te au se fuaitau mai ia Alema. Ina ua mavae se taua umi e toatele “na faamaaaina” ae na “faamaluluina nisi e toatele ona o o latou puapuaga.”8 O tulaga lava e tasi ae na maua mai ai ni tali e faafeagai. O le tusitala na tele mea na leiloa sa le maua le faatuatua e lagolagoina ai o ia. E moomia e i tatou uma taitoatasi ona i ai o tatou lava faleteuoloa o le faatuatua e fesoasoani ai ia i tatou e faatoilaloina ia faafitauli lea ua avea ma se vaega o lenei olaga faataitai.
O Thomas Giles, o se tagata liliu mai i Uelese na auai i le Ekalesia i le 1844, na puapuagatia foi i le tele o taimi o lona olaga. O ia o se tagata eli maina, ma i se tasi aso a o eli koale o ia i le maina, na tau ai se fasi koale lapoa i lona ulu ma afaina ai i se manua e tusa ma le iva inisi le umi. Na fai mai le fomai na vaaia o ia, e le sili atu ma le 24 itula e ola ai le tagata na manua. Ona oo atu lea o toeaiina ma faauu ia te ia. Na folafola atu ia te ia o le a toe manuia o ia, ma e “tusa lava pe le toe pupula o ia, ae o le a tele mea lelei na te faia i totonu o le Ekalesia.” Na ola lava ia Uso Giles ae sa tauaso o ia mo lona olaga atoa na totoe. I totonu o se masina talu lona manua, “sa faimalaga atu o ia i le atunuu ma faataunuu ona tiute faalelotu.”
O le 1856 na malaga mai ai Uso Giles ma lona aiga i Iuta, a o le’i tuua e ia lona atunuu, sa tauaao atu e le Au Paia i Uelese se kitara, lea sa ia aoao ia matuai tomai i le taina. O Council Bluffs na ia faatasi atu ai i se vaega o taavaletoso ma agai mai loa i sisifo. “E ui ina tauaso ae sa ia tosoina se taavaletoso mai Council Bluffs e oo mai i le Aai o Sate Leki.” Na maliliu lona toalua ma lana fanau e toalua a o sopoia ia fanua laugatasi. “Na tele lona faanoanoa ma toetoe a nutimomoia lona fatu, ae o lona faatuatua na le toilalo ai o ia. I le totonugalemu o lona faanaunau, sa ia faapea atu ai e pei o se tasi anamua, ‘Na foaiina mai e Ieova, ua aveeseina foi e Ieova; ia faamanuina le suafa o Ieova.’”9 Ina ua ia taunuu i le Aai o Sate Leki, na faaune atu ai e Peresitene Polika Iaga, o le na faalogo i lana tala, se kitara taugata ia Uso Giles seia taunuu mai lana kitara mai Uelese. Sa “femalagaai [Uso Giles] mai lea nofoaga i lea nofoaga i totonu o Iuta, … ma faafiafiaina loto o tagata i ana musika mananaia.”10
O le auala tatou te faaaoga ai lo tatou saolotoga ua tuuina mai e le Atua e faamalamalama ai le mafuaaga e tutupu ai nisi o mea i o tatou olaga. O nisi o a tatou filifiliga e i ai ni taunuuga e le mavaaia, lea e mafai ona lelei pe leaga. Ae ua masani ona tatou iloaina o nisi o a tatou filifiliga o le a i ai ni taunuuga faatamai po o le matuitui. Ou te ta’ua nei mea o “filifiliga ma le iloa” aua ua tatou iloa o a tatou gaoioiga o le a i ai ni taunuuga matautia. O nei filifiliga fai ma le iloa e aofia ai sootaga le talafeagai o feusuaiga, ma le faaaogaina o fualaau oona, ava malosi, po o tapaa. O filifiliga leaga e fai ma le iloa e mafai ona taofia ai se tagata mai le alu atu i se misiona po o le mauaina o faamanuiaga o le malumalu. E mafai ona tatou faia ni faaiuga sese ma le iloa ona o faatosinaga a le lalolagi e suia ai le mea moni ma tatou vaivai ai. I sootaga o tafaoga faamasani ma le isi ituaiga, o le faia o se filifiliga sese a o e talavou e mafai ona faatapulaa ai le faia o se filifiliga sao mulimuli ane.
O fea la e tatau ona tatou tutu ai? A o tatou faatinoina lo tatou faamaoni i le Atua e ala i a tatou gaoioiga amiotonu i aso taitasi, e mafai ona Ia silafia le mea o loo tatou tutu ai. Aua o tatou uma lava, o lenei olaga o se taimi lea e tofotofoina ai ma faamamaina ai. Tatou te feagai uma lava ma faigata. Na tofotofoina ma faaatoatoaina tagata taitoatasi o le ekalesia i popofou o le Ekalesia pe afai latou te filifili pe ua ia te i latou le faatuatua e pei o Uso Giles, e tuu a latou meatotino i totonu o se taavale solofanua po o se taavaletoso a paionia ma malaga e sopoia laufanua o Amerika. O nisi e le’i i ai le faatuatua. O i latou o e sa i ai, sa faimalaga ma le “faatuatua i tulaga aao uma.” I o tatou vaitaimi o loo tatou malaga ai i se taimi ua faateteleina ai le faigata o le tofotofoina ma le faaatoatoaina. O tofotofoga ua sili atu ona faigata aua o laina i le va o le lelei ma le leaga ua tau le iloa. Ua tau leai lava se paia i soo se tatou fesootaiga faalauaitele. I totonu o lenei siosiomaga o le a moomia ai ona tatou mautinoa le mea tatou te tutu ai i taimi uma i la tatou tautinoga i upumoni faavavau ma feagaiga.
E tele mea tatou te aoaoina e uiga i le feagai ai ma faigata mai se “tagata i le nuu o Usa, o lona igoa o Iopu; na sao le amio a lea tagata ma le amiotonu, sa mata’u foi o ia i le Atua, ma ‘alo‘alo ese i mea leaga.”11 Na maua e Satani le faatagaga mai le Atua e tofotofo ma suesue ia Iopu. Sa tamaoaiga Iopu ma e fitu ona atalii ma afafine e toatolu, ae na faatafunaina uma ana meatotino ma lana fanau. O le a se aafiaga o lenei mea ia Iopu? Fai mai o ia, e uiga i le Alii, “E ui lava ina fasiotia o ia ia te au, ou te faamoemoe pea ia te ia,”12 ma “E fai lava o ia mo’u olataga.”13 Na folafola mai e Iopu, “Aua ua ou iloa, o loo soifua le na te togiolaina a’u; o aso amuli foi e tulai mai ai o ia i luga o le eleele: “E ui lava foi ina faaumatia lenei tino pe a mavae atu lo’u pa’u, ae ou te iloa atu le Atua i lo’u tino.”14 Na matuai faamoemoe lava Iopu i le Alii e taulimaina isi popolega uma.
O le auala e maua ai le olioli i lenei olaga o le faia lea o se faaiuga, e pei o Iopu, ina ia tumau i mea uma mo le Atua ma Lana galuega. O le faia faapea o le a tatou maua ai le olioli tumau ma le taua o le faatasi ma lo tatou Faaola i le faavavau. A o tatou pepese i se tasi o a tatou pese ua lauiloa,
O le ua faamoemoe o ia ia te a’u
Ou te le tuulafoaia o ia i le fili;
Po o le a lava lona malosi
E le lafoaia, e a’u o ia!15
Na saunoa Peresitene Howard W. Hunter i se tasi taimi, “E malamalama le Atua i mea e le mafai ona tatou iloa, ma silafia mea e le mafai ona tatou vaai i ai.”16 E leai ma se tasi o i tatou e iloa le atamai o le Alii. Tatou te le mailoa po o le a faapefea ona Ia aveina i tatou mai le mea o loo tatou i ai i le mea e moomia ona tatou i ai, ae ua Ia tuuina mai ni taiala faalauaitele i o tatou faamanuiaga faapeteriaka. E tele faigata, faafitauli, o fesouaiga tatou te fetaiai i lenei olaga a o tatou saili atu i le ola e faavavau. E tele naua aoaoga ma faasaoga a o tatou faimalaga ai i luga o lena ala. Na fetalai mai le Alii, “O le foi e le onosai i le aoaiga e le aoga i lo’u malo.”17 “Aua o le ua alofagia e le Alii ua aoai atu o ia ia te ia.”18
A o tatou ola ai i luga o le fogaeleele e tatau ona tatou savavali i le faatuatua, aua lava le masalosalo vale. A foliga mai ua faigata le malaga, e mafai ona tatou maua le mafanafana i afioga a le Alii, “Ua ou faalogo i lau tatalo, ua ou iloa ou loimata: faauta foi, ou te faamalolo ia te oe.”19 O nisi vaega o le faamalologa e mafai ona faia i le lalolagi e sosoo ai. E le mafai ona tatou iloa le mafuaaga e tutupu ai nisi o mea i lenei olaga. O le mafuaaga o nisi o o tatou puapuaga e na o le Alii e silafiaina.
Na tuu mai e Peresitene Polika Iaga le mafaufauga loloto e faapea o nisi o o tatou puapuaga e i ai se faamoemoega ina ua ia saunoa:
“O tagata atamamai uma o e ua faapaleina i pale o le mamalu, tino ola pea, ma ola e faavavau e tatau ona latou pasia soo se tofotofoga faatulagaina mo tagata atamamai uma ina ia ui ai, ina ia maua ai lo latou mamalu ma le faaeaga. O faigata uma e oo mai i tagata faitino o le a faatagaina ona oo mai i luga o nisi, ina ia saunia ai i latou e olioli i le afioaga o le Alii… . Soo se tofotofoga ma mea na outou oo i ai ma outou pasi mai ai e moomia lea mo lo outou faaolataga.”20
E tele a tatou mafuaaga e ao ai ona i ai lo tatou faamoemoe. E mafai ona tatou maua le olioli pe afai tatou te naunau e ositaulagaina mea uma mo le Alii. Ona mafai lea ona tatou vaai atu i luma, i le mafaia e faavavau ona faatoilaloina luitau uma o lenei olaga. Ona mafai lea ona tatou faatasi ma le Faaola e faavavau, ma e pei foi ona saunoa mai Peresitene Polika Iaga, “i le tulimatai atu i le olioli i le mamalu, atoatoa ma le faaeaga lea ua saunia e le Atua mo e faamaoni.”21 O loo soifua le Atua, o Iesu o le Keriso, o Peresitene Gordon B. Hinckley o lo tatou perofeta, ma o le taimi lenei mo i tatou uma e saunia ai e fetaiai ma le Atua. Ou te molimau atu ai i le suafa o Iesu Keriso, amene.