Savali agai atu i le Malamalama o Lona Alofa
O sootaga e faia faamalosi i le va o tamaitai ua osi feagaiga o le Aualofa, e moni lava e mafai … faamatalaina, faafiafiaina, ma faatamaoaigaina ai le faigamalaga o le olaga
I taeao segisegi o le tautotogo i le faatoa suluia e le la o tumutumu mauga, e amata ai ona ma savavali ma Jan. I le avea ai ma se soa fou o paga asiasi, o i maua uma o ni tina talavou e i ai ni aiga toatele, toe tele fuafuaga e pisi ai.
O Jan ma lona aiga e lei leva ona o mai i le matou uarota, ou te le mautinoa pe o a ni mea o le a ma talanoa ai. Sa ma tauivi, ma sesela, i le o i luga ma lalo o a’ega o se auala maugā, sa ma savavali ai ma talatalanoa i lea aso ma lea aso.
I le amataga, ma te talanoa faasamasamanoa e uiga i o ma taitoalua ma fanau, o mea latou te fiafia i ai faapea ma a’oga i totonu o le eria. Sa amata malie ona tatalaina o ma loto o le tasi i le isi, ma fausia ai ni manatu faaleagaga ma auiliili ai o ma aafiaga e sailia ai elemene o le upu moni. Na foliga mai a o ma galulue e faamalosi o ma tino, na amata foi ona malolosi ai o ma agaga. Sa ou fiafia i lenei gaoioiga matagofie.
Sa ou aoaoina ni lesona e le mafaagaloina se lua mai la ma malaga ma Jan, lea sa faaauau ona faafiafiaina ai lo’u mafaufau ma faatumulia ai lo’u agaga i le olioli. O le mea muamua, po o a lava tulaga o lou olaga, afai ua e saunia faaleagaga, e leai lava se mea e te mata’u ai (tagai MFF 38:30).
I se taimi umi talu ona amata a ma savaliga, sa ou iloa ai, o ni tausaga ua mavae sa faia ai e Jan ni filifiliga sa avea ma mea na faifaimalie ai lava lona aluese mai ma le Ekalesia, ma oo atu ai ina toe salamo. O le vaitaimi na ma masani ai, sa ia naunau e toe faatulaga lelei lona olaga. O faanaunauga o lona loto o le saunia lea o ia lava ia mafai ona faamauina i lana tane ma lana fanau i le malumalu. E tasi lava le mea faapitoa sa faanaunau i ai o ia, e pei ona faaupuina e Nifae, “[ina] ia faalelei ma Keriso, ma ulu atu i le faitotoa vaapiapi, ma savavali i le ala sa’o e tau atu i le ola, ma tumau i le ala e oo lava i le iuga o aso o le olaga faataitai” (2 Nifae 33:9).
Atonu e te manatu, o le taimi lava na taumafai malosi ai Jan e pei o le tamā o Lamonae i le Tusi a Mamona ina ia “lafoaiina [ana] agasala uma ina ia iloa ai [le Alii]” (Alema 22:18), o le a faafaigofieina lana malaga. E le i faapena lona tulaga. Sa feagai o ia ma nisi o tofotofoga sili ona faigata. Sa i ai se tuma i le faiai o Jan, sa leai se galuega a lana tane, sosoo ai ma le aveesea o le fale ma le taavale a le latou aiga.
Peitai, na tumau pea le tuputupu ae o le faatuatua o Jan ia Iesu Keriso a o atili faigata lona ala. A o ma savavali faatasi i a ma savaliga i taeao, sa tele ni mea na ou aoaoina mai ia Jan e uiga i lona faatuatua i le Alii, ma o sauniuniga faaleagaga i aso taitasi na fesoasoani ia te ia, e faatoilalo ai le fefe. Na foliga mai sa malamalama lelei o ia i le aoaoga a Peresitene Gordon B. Hinckley: “O le a tatou atamamai i le tootutuli i luma o lo tatou Atua i le tatalo. O le a Ia fesoasoani mai ia i tatou. O le a Ia faamanuia mai i tatou. O le a Ia faamafanafanaina ma lagolagoina i tatou” (Standing for Something [2000], 178).
E ui lava ina sa i ai o ia i le lotolotoi o tofotofoga faigata, ae sa ou iloa lelei, sa silafia e Jan e moni upu a lo tatou perofeta. Sa le muta ai ana lava sauniuniga faaleagaga a o ia agai atu i luma ma le le fefe e tasi le aso i le taimi faatasi ai ma se vaaiga susulu o le toafilemu i lona olaga. O le i ai faatasi i gasologa o na taimi i taeao po, na ou vaai moni ai “ua [tafa] ata, mavae le po … [ma] ua oo mai se aso fou” (“Ua Tafa Ata,” Viiga, nu. 1) a o aumaia e le salamo o Jan ia te ia le faasaolotoina mai agasala, ona sosoo ai lea ma se faamalamalamaga faaleagaga loloto ma patino.
Sa ou fesili atu ia Jan pe faapefea ona ia lagonaina le toafilemu a o i ai o ia i na tulaga pagatia, ma lē lelei mea uma sa siomia ai. Ou te talitonu o upu o se viiga sa maua lelei ai ona lagona ma sosoo ai ma le fetufaai mai ia te au e uiga i le mana o le Togiola i lona olaga:
O Iesu lo’u sulu; o lo’u malosi lea.
O lona lava mana ou te malo ai.
O o’u vaivaiga na te aveesea,
A ou faatuatua, ou te manuia pea.
(O Iesu Lou Sulu,” Viiga, nu. 49)
Ona o lona faatuatua mausali, na aumaia ai e le Togiola a le Faaola se faafouina i aso uma ia Jan. Sa tuuina atu lona loto i le Alii i le, tatalo e tasi, mau e tasi, ma se aga o le auauna e tasi i le taimi.
I se taimi e lei mamao a o lei maliu o ia i le 30 ma ona tupu o ona tausaga, sa matou faatasi ma i latou na potopoto i le malumalu, i le olioli fifilemu a o tootuli o ia, o lana tane ma le la fanau i le fata faitaulaga sa faamauina faatasi ai mo le faavavau.
O le lesona lona lua e le mafaagaloina sa ou aoaoina mai ia Jan o le, pe a taulai atu uso o le Aualofa “ma le manatu tasi i le mamalu o le Atua” (MFF 4:5), e mafai ona latou maua ni vaaiga faaleagaga se tele, ma fetufaai faatasi ai malosiaga maoae faaleagaga.
I le amataga o a ma savaliga, e lei tutusa le saosaoa o a ma savavali ma Jan. A o “fusifusia faatasi i lotogatasi ma le fealofani” (Mosaea 18:21), o ma loto, sa atili ai ona ma savavali faatasi i le faaletino ma le faaleagaga. Sa siitia i luga e le tasi le isi i a ma molimau, tauave e le tasi avega a le isi, faamalosi ma faamafanafana le tasi i le tasi e pei ona sa faia ai e uso o le Aualofa.
O le taunuuga o le ma faauoga ma Jan, sa ou aoaoina ai o se sootaga paia ua fusia ai i tatou o uso o le Aualofa. O i ma’ua ma Jan, e pei foi o le toatele o outou, sa ma maua le tuputupuae mai lo ma tofiga o le avea o se paga asiasi i uso ma uo faapelepele. Ou te molimau atu o sootaga e faia faamalosi i le va o tamaitai ua osi feagaiga o le Aualofa, e moni lava e mafai ona faamatalaina, faafiafiaina, ma faatamaoaigaina ai le faigamalaga o le olaga, aua e mafai ona fesoasoani atu le tasi i le tasi i lo tatou faamuamuaina o le Alii i o tatou loto ma o tatou olaga. Ua ou iloa lenei mea aua ua silia ma le 20 tausaga, o fesoasoani mai Jan ia te au ia ou latalata atili i lo tatou Faaola e ala i le olaga sa ola ai o ia. Sa ia uunaia au ina ia ou vaai i tua atu o o’u lava faafitauli, ina ia ou olioli ma le loto faafetai i le mamalu o le Togiola a le Faaola mo a’u agasala, ina ia vaavaai i luma ma le faatuatua i mea e aumaia e aso fou taitasi, ma ia fiafia i mafutaga faaleagaga e na o le Aualofa lava e auala mai ai.
O lo o ou savali pea i taeao i avanoa uma ou te maua. Ou te tu foi e vaavaai i le matagofie o lenei lalolagi ma faafetai i le Tama Faalelagi mo le misiona a lo tatou Faaola, o Iesu Keriso. E masani ona ou manatua ma le loto faafetai le agaga na aumai e Jan i a ma savaliga, ona o lona naunau ia lagonaina le alofa laveai o le Faaola. O lona alofa mo le Alii sa faatumulia ai lo’u loto i lena taimi, e pei lava ona suluia atoa o le fogaeleele i taeao uma e ave o le la oso.
Ou te molimau atu i lo tatou Faaola, o le sa fetalai mai e uiga ia te Ia lava: “Faauta, o au o Iesu Keriso, le Atalii o le Atua. O au o le ola ma le malamalama o le lalolagi” (MFF 11:28). Uso e, ou te iloa o le saunia o i tatou lava i aso taitasi o si laa i le taimi, o i tatou uma, e pei lava o Jan, e mafai ona tatou agai atu i luma e aunoa ma le matata’u, ma maua lo tatou ala e tau atu ia te Ia, a o tatou lagonaina ia faamanuiaga o Lana Togiola e le i’u. Ou te iloa o le tasi o faamanuiaga faalelagi o le Aualofa, o lo tatou sootaga lea i tamaitai o i ai foi ni molimau e uiga i lo tatou Alii. O la’u tatalo ia tatou savavali faatasi pea agai atu i le malamalama o Lona alofa togiola. I le suafa o Iesu Keriso, amene.