O Le Mana o le Alofa o le Atua

Elder John H. Groberg

O Le Au Peresitene o le Au Fitugafulu

A tutumu i Lona alofa, e mafai ona tatou onosa’ia le tiga, faatoafilemu le atuatuvale, faamagalo atu ma le le toe ta’uta’ua, leai se feupua’i, e faafou ai le malosi ma faamanuia ma fesoasoani atu ai i isi.

O le a se mea o i ai i le alofa moni o loo pa’i atu i loto uma? Aisea e puna a’e ai le olioli masani i le fasi fuaitau faatauvaa o le “Ou te alofa ia te oe”?

E eseese lava mafuaaga e aumai e tagata, ae o le mafuaaga moni lava, ona o tagata uma lava e o mai i lenei lalolagi, o se atalii po o se afafine agaga o le Atua. Talu ai o le alofa uma e afua mai i le Atua, ua tatou fananau mai ma le mana ma le manao ia tatou alolofa ma ia alofaina foi. O se tasi o o tatou sootaga loloto na tatou maua i le mua’i olaga, o le tele lea o le alolofa o lo tatou Tama ma Iesu ia te i tatou ma le tele foi o lo tatou alolofa ia te i La’ua. E ui lava ina ua i ai se veli ua punitia ai lo tatou manatua, ae soo se taimi lava tatou te lagonaina ai le alofa moni, na te fāgua se lagona moomoo e le mafai ona faafitia.

O le tali atu i le alofa moni, o se vaega o o tatou tagata. Tatou te moomoo i o tatou loto ina ia toe maua iinei le alofa sa tatou maua iina. Ae sei vagana ua tatou lagonaina le alofa o le Atua ma faatutumu o tatou loto i Lona alofa ona tatou fiafia moni lea.

E tumu le atulaulau atoa i le alofa o le Atua; o le mea lea e le oge le lalolagi i le alofa, e na o lo tatou naunau lava e faia mea e tatau ona fai ina ia lagonaina ai. Ina ia faia o lena mea, ua faamanino mai e Iesu e tatau ona tatou “alofa atu i le Alii lou Atua ma lou loto atoa, ma lou agaga atoa, ma lou malosi atoa, ma lou manatu atoa; e te alofa atu foi i le lua te tuaoi ia pei o oe lava ia te oe” (Luka 10:27).

O le tele o lo tatou usitai i le Atua, o le tele foi lena o lo tatou naunau e fesoasoani i isi. O le tele o lo tatou fesoasoani atu i isi, o le tele foi lena o lo tatou alofa i le Atua ma fai ai pea lava.

E faafeagai ma le tulaga lea, o le tele o lo tatou le usiusitai i le Atua, ma o le tele foi o lo tatou manatu faapito, o le itiiti foi lena o le alofa tatou te lagona.

O le taumafai e saili le alofa tumau e aunoa ma le usitai i le Atua, e pei lava o la e te taumafai e faamalie le fiainu i le inu mai i se ipu e leai se mea o i ai—e mafai ona e faatinoina taga [o le inu], ae e tumau lava le fiainu. E faapena foi, o le taumafai e saili le alofa e aunoa ma le fesoasoani ma le ositaulaga mo isi e faapei o le taumafai e ola ae le ‘ai—e feteena’i ma tulafono o le natura ma e le mafai ona manuia. E le mafai ona tatou taupepeloina le alofa. E tatau lava ona avea ma se vaega o i tatou. Sa faamatala mai e le perofeta o Mamona:

“O le alofa moni o le alofa mama lea o Keriso, e tumau ia e faavavau; o i latou uma foi ua maua ua i ai lea alofa i le aso gataaga, e lelei ia te i latou.

“O le mea lea, o’u uso pele e, ia outou tatalo atu ai i le Tama ma le malosi uma o le loto, ina ia faatumuina outou i lenei alofa” (Moronae 7:47–48).

O loo naunau le Atua e fesoasoani ia tatou lagonaina Lona alofa—pe o fea lava o tatou i ai. Se’i ou tuuina atu se faataitaiga.

A o avea a’u o se faifeautalai talavou, sa tofia a’u i se tama’i motu pe tusa ma le 700 tagata e nonofo ai, i se vaega maotua o le Pasefika i Saute. Ia te a’u lava ia, sa lofituina le vevela, o namu sa mata’utia, sa palapala faasoloatoa, sa ou le malamalama i le gagana, o meaai foi—ia, “e ese.”

Ina ua mavae ni nai masina, sa fetaiai lo matou motu ma se afa matautia. Sa matua tele naua se faatafunaga. Sa faaleagaina meatoto, sa faaumatia ola, sa tafi ese fale, ma sa faatama’ia—le fale uaealesi—o lo matou sootaga e tasi ma le lalolagi i fafo atu. O le tamai vaa o le malo sa masani ona alu atu e ta’itasi i le masina pe ta’ilua foi masina, o lea la sa tau faasoasoa ai a matou meaai ina ia aulia le ta’ifa po o le ta’ilima vaiaso, ma le faamoemoe o le a alu atu le vaai. Ae e leai se vaa na alu atu, ma o lea sa faasolosolo ai ina matou vaivai i aso taitasi. Sa tele le agalelei sa faaalia, ae ina ua mavae vaiaso lona ono ma le lona fitu ma le utiuti o meaai, sa matauina le fāi malie atu o lo matou malosi. Sa fesoasoani la’u soa mai le nuu, e igoa ia Feki, i mea uma sa ia mafai, ae ina ua amata le vaiaso lona valu, sa leai so’u malosi. Sa na o lo’u nofonofo i lalo o se laau paolo ma tatalo ma faitau a’u tusitusiga paia ma faaalu le tele o itula, e mafaufau loloto ai i mea o le faavavau.

Sa amata le vaiaso lona iva i sina suiga vaaia laitiiti. Peitai, sa telē se suiga i totonu. Sa ou lagonaina le loloto atu o le alofa o le Alii nai lo le taimi muamua, ma sa ou faatoa iloa ai o Lona alofa “e sili ona manaomia i mea uma … ioe, ma le fiafia silisili i le agaga” (1 Nifae 11:22–23).

O le taimi lena ua na o o’u pa’u ma ponaivi. Ou te manatua lo’u matauina, ma le migao loloto, o le ta o lo’u fatu, ma le manava o o’u mama, ma mafaufau oka se matagofie o le tino ua foafoaina e le Alii e faamalumalu ai o tatou agaga ofoofogia! O le manatu i se faatasiga tumau a nei elemene, lea e mafai ona o le alofa o le Faaola, o lana taulaga togiola, ma le Toetu, sa matua musuia ma faamalieloto, ma galo atu ai lava soo sina faaletonu faaletino.

A tatou malamalama pe o ai le Atua, pe o ai i tatou, pe faapefea ona alofa o Ia ia te i tatou, ma pe o le a foi Lana fuafuaga mo i tatou, ona mou atu ai lea o le popole. A tatou maua sina tepa aupito itiiti lava i nei upumoni, ona gālo atu foi lea o popolega i mea faalelalolagi. A mafaufau ua tatou gauai moni atu i pepelo a Satani, faapea e taua le mana faalelalolagi, o le ta’uta’ua, po o oa, e matua taufaavalea—pe o se mea taufaaata foi pe a na le o se tulaga e matua faanoanoa ai.

Sa ou aoaoina e pei lava ona tatau i roketi ona manumalo i le malosi o kalave ina ia taalililili atu ai i le vateatea, e faapena foi ona tatau ia i tatou ona tatou manumalo i le malosi o le lalolagi ina ia tatou felelei atu ai i malo faavavau o le malamalama ma le alofa. Sa ou iloaina e ono uma ai lo’u ola i la’u misiona, ae sa leai so’u fefe. Sa ou iloa o le a alu pea le olaga ma pe o iinei po o iina, sa le’i afaina lea. O le mea sa taua o le tele o le alofa sa i ai i lo’u loto. Sa ou iloa sa ou manaomia se alofa e tele atu! Sa ou iloa o lo tatou olioli i le taimi nei ua matua noatia lava i lo tatou malosi e alolofa ai.

A o faatumuina ma siitia lo’u agaga e nei mafaufauga, sa oo ina ou faalogoina ni leo fiafia. Sa matua sagisagi fiafia le pupula a la’u soa o Feki a o faapea mai, “Kolopeki, ua taunuu mai se vaa, ma e tumu i meaai. Ua tatou ola! E te le o fiafia?” Ou te le’i mautinoa, ae talu ai ua sau le vaa, atonu o le tali lena a le Atua, o lea, ioe, sa ou fiafia. Sa sau Feki ma ni meaai ma faapea mai, “Ia, ‘ai.” Sa ou tau faaletonu. Sa ou tilotilo i meaai. Sa ou tilotilo atu ia Feki. Sa ou tilotilo a’e i le lagi ma moeiini o’u mata.

Sa ou lagonaina se mea i le ta’ele o lo’u loto. Sa ou faafetai o le a agai pea i luma lo’u olaga e pei ona i ai muamua, ae sa i ai se lagona faanoanoa—se lagona o le lē faataunuuina, aua a ufitia e le pogisa ia lanu fe’ilafi mananaia o se lagoto ua matua atoatoa, e te iloa e tatau ona faatalitali mo se isi afiafi ona e faatoa toe maua lea o lena ituaiga matagofie.

Sa ou le mautinoa pe sa fia pupula o’u mata ma se loto ua suia, ae ina ua ou iloa sa suia e le alofa o le Atua mea uma, o le vevela, o le palapala, o namu, o tagata, o le gagana, o meaai—ua lē o toe avea ma ni lu’itau. O i latou sa taumafai e faatiga ia te a’u, ua le o toe avea ma ni o’u fili. O tagata uma o so’u uso po o so’u tuafafine. O le faatumuina i le alofa o le Atua, o le mea aupito sili lea ona fiafia ai i lo mea uma, ma matua ta’uaogaina ai lava le tau atoa.

Sa ou faafetai i le Atua mo lenei taimi taua ma le tele o faamanatu o Lona alofa—o le la, o le masina, o fetu, o le fogaeleele, o le fanau mai o se tamaitiiti, o le ataata mai o se uo. Sa ou faafetai ia te Ia mo tusitusiga paia, o le faamanuiaga o le tatalo, ma le faamanatu aupito ofoofogia o Lona alofa—o le faamanatuga lea.

Sa ou aoaoina afai tatou te usuina ma o tatou loto atoa ia viiga o le faamanatuga, o fasi fuaitau e pei o le, “Maeu le poto ma le alofa!” po o le “Ia alolofa ia te Ia, mo Lona alofa mai” o le a faatutumuina ai o tatou loto i le alofa ma le faafetai. (tagai “Maeu le poto ma le alofa,” Viiga, nu.109; “E I Ai se Mauga Lanu Vao,” Viiga, nu.108). A tatou faalogologo ma le loto i tatalo o le faamanatuga, o fasi fuaitau e pei o le “ia manatua pea o ia,” “tausi ana poloaiga,” “ia latou maua pea lona agaga e faatasi ma i latou” o le a faatutumuina ai o tatou loto i se manaoga lofituina ia lelei atili (tagai MFF 20:77, 79). Pe a tatou taumamafa ma le loto e momomo ma le agaga faamaulalo, ou te iloa e mafai ona tatou lagona ma faalogoina na upu aupito matagofie, “Ou te alofa ia te oe. Ou te alofa ia te oe.”

Sa ou manatu o le a le galo lava ia te au na lagona, peitai, e malosi le faatosina a le lalolagi ma e tauau foi ina tatou see ai. Ae e tumau pea le alofa o le Atua ia te i tatou.

Ina ua mavae ni masina talu ona toe maua mai lo’u malosi, sa matou toe fetaia’i foi ma se isi afa matautia, ae o le taimi la lenei i le sami. Sa matua tetele galu ma na sa’e ai lo matou vaa, ma togi ifo ai matou i le vasa sousou ma le galuā. Ina ua ou iloa ua ou i ai i le totonugalemu o se sami matamataita, sa ou ofo, fefe, ma lē fiafia. “Aisea ua tupu ai lenei mea?” sa ou mafaufau ai. “O a’u o se faifeautalai. O fea o i ai lo’u puipuiga? E le tatau ona feausi faifeautalai.”

Ae afai ou te fia ola, ua tatau ona ou aau. O taimi uma lava ou te muimui ai, ou te magoto ifo ai i le sami, o lea e le’i umi ae tuu lo’u tomumu. Ona pau lava o le mea ua i ai, ma e leai se mea e maua i le muimui. Sa ou manaomia aunese uma o le malosi e tuu ai lo’u ulu i luga o le vai ma ia ou taunuu i le matafaga. Ona ua maua lo’u Taui o le Sikauti Aeto, o a’u o se tagata aau mautinoa, ae ona o le malolosi o matagi ma galu, sa amata ai ona ou vaivai. Ou te le fiu lava e taumafai, ae sa oo mai le taimi ua le toe mafai ona gaoioi o’u musele.

Sa i ai se tatalo i lo’u loto, ae ua amata lava ona ou magoto. A o ou alu ifo i lalo i le mea e ono mafai ona faapea o le toe taimi lea, sa musuia lo’u mafaufau ma lo’u loto e le Alii i se lagona loloto o le alofa mo se tagata e ese le taua. Sa peiseai ua mafai ona ou vaai atu ma faalogo atu ia te ia. E ui lava ina 8,000 maila le mamao o le mea sa i ai o ia, ae sa faataalise mai le mana o lena alofa mai lena mea mamao, ma ati mai i le taimi ma le vateatea, ma aapa ifo i lalo ma toso a’e—a’u i luga mai le loloto o le moana, o le faavauvau ma le oti ma ava’e a’u i luga i le malamalama ma le ola ma le faamoemoe. O se malosi oso faafuase’i mai, sa ou oo ai i le matafaga, i le mea sa i ai isi tagata o le matou auvaa. Aua lava ne’i manatu faatauvaa i le mana o le alofa moni, aua e leai ni pa vaeloto o le alofa moni.

A tutumu i tatou i le alofa o le Atua, e mafai ona tatou faia ma vaai, mamalamalama i mea e le mafai ona tatou faia, vaai, pe malamalama ai foi. A tutumu i Lona alofa, e mafai ai ona tatou onosa’ia le tiga, faatoafilemu le atuatuvale, faamagalo ma le le toe ta’uta’ua, leai se feupua’i, e faafou ai le malosi ma faamanuia ai ma fesoasoani i isi i ni auala tatou te maofa ai.

Sa faatumulia Iesu Keriso i le alofa e le mafaatusalia, a o Ia onosa’ia tiga e le oo i ai se malamalama, o le agaleaga ma faamasinoga lē tonu mo i tatou. O Lona alofa mo i tatou na Ia tula’i a’e ai i luga atu o isi pa vaeloto matautia uma. E le iloa e Lona alofa ni pa vaeloto. Ua Ia valaaulia i tatou e mulimuli atu ia te Ia ma talia Lona alofa le faatuaoia, ina ia mafai foi e i tatou, ona tula’i a’e i luga atu o tiga ma le agaleaga ma faamasinoga lē tonu o lenei lalolagi, fesoasoani ma faamagalo atu ma faamanuia.

Ou te iloa o loo soifua o Ia, ou te iloa e alofa o Ia ia te i tatou. Ou te iloa e mafai ona tatou lagonaina Lona alofa iinei ma le taimi nei foi. Ou te iloa o Lona siufofoga o le leo itiiti ma le malie lava ia, lea e ati mai i o tatou agaga. Ou te iloa e laufofoga fiafia o Ia ma ua faatumuina i le agalelei ma le alofa. Ou te iloa e tumu o Ia i le agamalu, agalelei, alofa mutimutivale, ma le naunau e fesoasoani mai. Ou te alofa ia te Ia ma lo’u loto atoa. Ou te molimau atu a oo ina ua tatou saunia, e vave lava ona faataalise mai Lona alofa mama ma ati mai i le taimi ma le vateatea ma aapa ifo ai i lalo ma lavea’i i tatou mai le loloto o le pogisa, ma le galuā o soo se ogasami, o le agasala, oti po o faanoanoaga tatou te ono oo i ai, ma aumaia i tatou i le malamalama ma le ola ma le alofa o le faavavau. I le suafa o Iesu Keriso, amene.