Tulaga o le Ekalesia
Ou te talitonu ua sili atu le tulaga ua i ai nei le Ekalesia nai lo se isi lava taimi i le talafaasolopito atoa
A o tatou amataina lenei konafesi maoae, ua tatou matauina le le auai o Elders David B. Haight ma Neal A. Maxwell o le Korama a Aposetolo e Toasefululua. Sa galulue i la’ua mo se taimi umi ma le atoatoa. Tatou te faanoanoa ina ua maliliu i la’ua. Ua tatou matua misia lava i la’ua. E momoli atu o matou alofaaga i o la’ua aiga pele. Matou te talitonu, o loo tauaveina foi e i la’ua lenei galuega maoae i lena itu o le veli.
Tatou te iloa o le gasologa o mea e tutupu, e i ai lava avanoa e tulai mai e alagatatau ai ona faatutumu pe a oo mai. Ina ua mae’a ona anapopogi ma tatalo, ua matou valaauina ai nei Elder Dieter Friedrich Uchtdorf, ma Elder David Allan Bednar e faatutumuina nei avanoa i le Korama a Aposetolo e Toasefululua. Matou te tuuina atu o la’ua suafa i lenei taeao. Atonu tou te le silafia i la’ua, peitai e le o toe mamao ona outou masani lea ma i la’ua. O i latou e manatu e mafai ona latou lagolagoina i la’ua i lenei tofiga paia, faamolemole ia faaali mai i le siitia o aao. Pe i ai se atonu e faatuiese ai?
O le a aofia ai o la’ua suafa i le lagolagoina o pulega aoao uma i se taimi o mulimuli mai o le konafesi. Matou te valaau atu i nei Uso ina ia susu mai i o la’ua ava i luga nei e faatasi ai ma uso o le Toasefululua. O le a saunoa i la’ua i le taeao o le Aso Sa, ona outou saga silafia atili ai lea e uiga ia te i la’ua.
O le taimi nei, i le tatalaina o le konafesi, ou te fia avatu sina faamatalaga puupuu i le tulaga o i ai le Ekalesia. A o ou faia, ou te mafaufau lava i upu mai le viiga Savali i Luma le Autau Kerisiano.
Ona e manaomia le sauniuni mo lenei faatupula’ia, e tatau ona faaauau pea lo tatou fauina o fale tapuai. Ua i ai nei, ni falelotu e 451 e eseese le tetelē, o loo fauina nei i le tele o vaega o le lalolagi. O lenei polokalama maoae o le fauina o fale, e matua tulaga ese lava. Ou te le iloa lava nisi tagata e faapea le tele o ni fale o latou fauina. E matagofie a tatou fausaga. E faaopoopo atu i le matagofie o soo se nuu e tutu ai. E tausia lelei. Ua loa lo tatou poto masani i le fausiaina o fale tapua’i, ma e mafua mai i lena poto masani maoa’e, ua tatou gaosia ai ni fale e sili atu nai lo se isi taimi na fausia ai e le Ekalesia. Ua tuufaatasi ai le matagofie ma le aoga tele. Afai e tali foliga tutusa uma, e afua ona o le faamoemoega lena. O le mulimulita’i i mamanu sa tofotofo ma suesue, ua tatou faasaoina ai le faitau miliona o tupe a o taulimaina mea e manaomia e o tatou tagata.
E faaauau foi ona tatou fauina o malumalu. Sa matou suatiaina talu ai nei le eleele mo se malumalu fou i Sacramento, i Kalefonia, o le lona fitu ai lea i lena setete, lea e lona lua le toatele o le faitau aofai o tagata o le Ekalesia e i ai, i lo isi setete i le Iunaite Setete.
E matua pisi tele malumalu i le Aai o Sate Leki, ma o nisi taimi e le ofi. Ona o lena le mafuaaga, o lea ua tonu ai ia i matou e fau se isi malumalu fou i Saute Sasae o le Vanu o Sate Leki. O le a fofoga atu lava le mea e faatu ai.
Atonu e foliga mai o loo matou faamemelo pea i lenei eria. Peitai, ona o le toatele naua o le auai i le malumalu, o lea ua tatau ai ona taulimaina le mananao o i latou o loo fia malaga mai i ai.
Matou te fiafia foi e faasilasila atu o le a fauina se isi malumalu i Idaho. Ua faagasolo foi fuafuaga mo se malumalu i Rexburg i le laueleele e sosoo ma le BYU-Idaho. O loo fuafua foi e fau se malumalu fou i se fale autu fou o se siteki i le aai o Twin Falls i Idaho. O lenei malumalu o le a tautuaina ai le afe ma afe o tagata o le Ekalesia e nonofo i le va o Idaho Falls ma Boise.
O loo fauina nei foi malumalu i Aba, Nigeria; Helsinki; Finland; Newport Beach ma Sacramento, Kalefonia; ma San Antonio, Texas. Ua toe fauina nei foi le malumalu lea sa faaumatia e le afi i Samoa.
A faapaiaina malumalu ia ua faalau atu, ona maua ai lea o le 130 o malumalu e faaaoga. O le a fauina isi a o tumau pea le ola o le Ekalesia.
O loo matou galulue nei i se galuega tele i le Aai o Sate Leki. E matua taua lava lo tatou tausisia o le siosiomaga o le Lotoa o le Malumalu. E tatau ai la se galuega faatino o se fausaga telē naua. O le a le faaaogaina tupe o sefuluai i lenei galuega. O tupe e maua mai i pisinisi a le Ekalesia, o tupe maua mai lisi, o saofaga patino mai tagata, ma isi punaoa o le a mafai ai ona fai.
E tatau ona matua tele se galuega e faia i le Tapeneko i Sate Leki, ina ia saogalemu mai mafui’e. E atoa i le masina nei le 137 tausaga o faaaoga lenei fale ofoofogia. Ua oo mai le taimi ua tatau ai ona tatou faia se mea ina ia faasaoina ai. O se tasi o galuega e maoae lona mamanu ma le faatinoga i le lalolagi atoa, ma o se fale e matua maoae lava lona talafaasolopito. O ona tulaga maualuluga o le talaaga o le a faasaoina, a o lona faaaogaga, sologa lelei ma le saogalemu, o le a faateleina. Tatou te faafetai ona o le i ai o lenei Nofoaga Autu mo Konafesi, lea ua mafai ai ona tatou feiloai i nei ituaiga o potopotoga e pei o lenei. Ou te fesili ifo nei ia te a’u lava, “Pe se a se mea tatou te faia pe ana leai lenei fale?”
Ou te fiafia foi e lipoti atu le faatupula’ia pea o le Tupe Faaagaga mo Aoga, ma e faapena foi i latou o loo manuia ai i lenei faamoemoega matagofie.
Ua tatou faamalosia la tatou polokalama faafaifeautalai. O loo tatou taumafai e aumaia se fuataga tele o le faaleagaga i le galuega a la tatou tino tele naua o faifeautalai.
O loo faaauau foi ona faatupula’ia la tatou polokalama faaleaoaoga, ma oo atu ai lona aafiaga i soo se mea e faatuina ai le Ekalesia.
O le Tusi a Mamona sa faitauina faatasi talu ai nei, o se tasi o tusi e 20 e aupito tosina [i ai tagata] ua lolomiina i le Iunaite Setete. Ua tatou galulue faapaaga nei ma se pisinisi lolomi tusi e faalautele le faasalalauina o lenei tusi e pa’ia, lenei molimau lona lua i le Alii o Iesu Keriso.
E le gata i lea, uso e ma tuafafine, atonu o le a ou faaauau pea. Ua lava lo’u faapea atu, ou te talitonu ua sili atu le tulaga ua i ai nei le Ekalesia nai lo se isi lava taimi i le talafaasolopito atoa. Ua toeitiiti atoa le 95 tausaga o o’u i ai i lena talafaasolopito, ma ua tele naua ua ou vaai i ai. Ua faamalieina a’u o loo i ai se faatuatua tele atu, ua matua tele atu foi galuega auauna atu, ma ua tele atu foi lo outou faamaoni. Ua tele atu le ola o itu uma o le galuega nai lo le mea na tatou vaai i ai muamua. Ina tatou olioli ia i lenei vaitau matagofie o le galuega a le Alii. Aua tatou te femitai pe faamaualuluga ai. Ia tatou lotomaulalo ma faafetai. Ma ia tofu i tatou taitoatasi ma se faaiuga i lona lava loto, o le a tatou faaopoopo atu i le matagofie o lenei galuega maoa’e a le Silisili Ese, ina ia susulu atu i le lalolagi atoa, o se faailoilo o le malosi ma le agalelei e vaavaai atu i ai le lalolagi atoa, o la’u tatalo lea ma le lotomaulalo, i le suafa o Iesu Keriso, amene.