O Le Avanoa e Molimau Atu Ai
Faatasi ma … lagona mu’amu’a o le faafetai mo i latou uma sa faa-aafiaina lo’u olaga i tausaga ua mavae, ou te tuuina atu a’u lava i ai mo le lumanai.
O’u uso e ma tuafafine pele, iinei i le Aai o Sate Leki ma le lalolagi atoa, o se mea lelei le faatasi ai ma outou. E momoli atu o’u alofaaga ma faamalo ia Elder Bednar ma Elder Robert Oaks i o la valaauga fou. I le faamatalaina o o’u lagona i totonu, ou te faapea atu ai ua ou filemu e pei o le afa, po o le faapea foi, ua ou fiafia ma fefe. I se fuaiupu e tasi e faaupu ai, ou te manaomia a outou tatalo; ou te moomia le Alii.
O le mauaina o se valaauga ma le tuuina mai o se faatuatuaga o le a matua aafia atoa ai lo’u olaga e faavavau, e momomo ai lava o’u lagona ma toetoe ina a maligi ai loimata.
E matua tele lava lo’u lagona o le le agavaa ma ua ou lagonaina se loloto o le mafatia mai se suesuega tiga o lo’u agaga i le tele o itula ua mavae i le ao ma le po talu mai le taeao o le Aso Faraile o le vaiaso na te’a nei.
Ina ua uma ona tuuina mai e Peresitene Gordon B. Hinckley le valaauga ia te au e avea ma se Aposetolo ma se uso o le Korama a le Toasefululua, sa ou tuua lo’u ofisa pisi ina ia faasoa atu lenei talafou sa matua le mafaufauina lava, i la’u pele o Harriet. I lenei taimi aupito taua i o ma’ua olaga, sa ma talisapaia ai le paia toafilemu o lo ma’ua fale, o se nofoaga o le sulufaiga ma le puipuiga. E maeu lo’u faafetai ona o lo’u toalua, ona o le faamafanafanaga matagofie ma lona lagolagosua malosi i lo’u olaga atoa. E sosoo ma le meaalofa o le ola ma le talalelei toefuataiina a Iesu Keriso, o Harriet o le faamanuiaga aupito sili lea ua oo mai i lo’u olaga. Ou te fia faailoa atu lo’u alofa loloto ma le talisapaia i la ma’ua fanau ma a latou fanau mo a latou tatalo ma lo latou alolofa, ae o le mea sili o mea uma, o a latou faataitaiga. O le ma fanau ma a latou fanau, e nonofo i Siamani ma o loo fausia le malo o le Atua i lo matou atunuu. O le olioli i le talalelei a Iesu Keriso ma ona faamanuiaga faavavau ua fesootai ai le mamao o le fiaafe o maila ma ua aumaia ai le fiafia ma le mafanafana i o matou olaga.
E tuuina atu la’u faafetai ma o’u alofaaga i tagata taitoatasi uma o lo’u aiga, ma le anoanoa’i o uo ma faiaoga sa aoaoina ma tautuaina ma sii a’e i ma’ua ua mafua ai ona i ai o ma tagata e pei ona i ai nei.
E faailoa atu o’u lagona loloto o le alofa ma le faafetai i uso o le Au Peresitene Sili ma le Korama a le Toasefululua mo lo latou alolofa ma le agalelei. I le faaiuga o lo’u tiute o se tasi o Peresitene e Toafitu o le Au Fitugafulu, ou te fia faailoa atu lo’u alofa ma la’u faamemelo i le Au Fitugafulu. O i latou moni lava o ni molimau faapitoa a Keriso. O i latou o ni tagata e valaau atu i ai le Toasefululua pe a manaomia le fesoasoani, nai lo nisi. Ou te faafetai atu i na alii faamaoni o ē ua tuuina atu le tele o o latou taimi, taleni ma le mana faaleagaga e galueaiina ai le malo. E le mafai e upu ona faamatala lo’u alofa i le 10 1/2 tausaga sa ou maua ai le avanoa ma le olioli e galue ai o se Fitugafulu. O le a ou teuina faapelepele e faavavau le faataitaiga ma le faauooga a uso o Korama a Fitugafulu e faavavau.
Ou te fia faafetai atu i tagata taitoatasi uma o le Ekalesia i le lalolagi atoa mo lo outou faatuatua e ui lava i le tele o faaosoosoga; mo lo outou alolofa; mo lo outou faamaoni i mataupu faavae ma aoaoga faavae o le talalelei toefuataiina a Iesu Keriso; mo lo outou naunautai e mulimuli i le perofeta soifua i le faatupula’ia o uarota ma paranesi; mo a outou osigataulaga e ala i le tuuina atu o outou taimi, malosi, o lagona ootia, ma oa faaleagaga ma le faaletino. Faafetai atu mo le totogiina o sefuluai faamaoni, ma lo outou lē tuulafoaiina o ē matitiva ma ē ua matuaoti. Ua ou vaai i fofoga o Keriso i o outou foliga, o a outou galuega, ma o outou soifua tauaogaina. O outou o vavega o ona po nei.
Ou te faafetai atu mo la outou lagolago, i o outou aao ma o outou loto, o taitai aoao o le Ekalesia. O le aso ananafi sa tatou lagolagoina ai le au taitai aoao o le Ekalesia e tusa ai ma le mataupu faavae o le finagalo autasi. E leai se tasi o nei taitai faaleEkalesia o sailia sea tulaga pe latou te teena foi sea valaauga aua ua latou iloa, e auala mai i faaaliga mai le Atua.
Matou te faafetai mo a outou tatalo, ma e matou te tatalo foi mo outou. Matou te alolofa ia te outou, ma e matou te manaomia foi lo outou alofa. Matou te lagolagoina outou, ma e matou te manaomia foi lo outou naunautai e auauna atu i le Alii po o fea lava o e i ai ae pe o le a foi le tofiga e tofia oe i ai. I totonu o le Ekalesia a le Alii, e taua lava valaauga uma.
Na saunoa Peresitene Gordon B. Hinckley: “Ua tatou i ai iinei e fesoasoani i lo tatou tama i Lana galuega ma Lona mamalu, ina ia ‘faataunuu le faaofuina o le tagata i le tino ola pea ma le ola faavavau’ (Mose 1:39). O la outou matafaioi e tutusa lava le taua i le vaega o lou tiutetauave e pei foi o la’u vaega” (“O le Galuega Lenei a le Matai,” Liahona, Iulai 1995, 75). Ma ua talosaga mai le Peresitene ia i tatou ina ia aapa atu i isi ma faamanuia ai olaga o i latou o loo siomia ai i tatou. Na ia saunoa: “Ia totoina se silafia i loto o tagata uma o le ekalesia lona lava gafatia e aumaia ai isi ia malamalama i le upumoni. Tuu atu [i latou] e tatalo ma le matua faamaoni a’ia’i e uiga i lena mea” (“Saili Tamai Mamoe, Fafaga Mamoe,” Liahona, Iulai 1999, 120).
Sa matua faamanuiaina e faavavau lo’u olaga e se uso filifilia e toatasi o le ekalesia o le na aapa mai i le silia ma le 50 tausaga talu ai. I se tasi aso ina ua mavae le Taua Lona Lua o le Lalolagi, sa tutu ai lo’u tinamatua i le laina e faatalitali mo ni meaai, ae alu ane se loomatua nofofua, e leai sona aiga ma valaaulia o ia la te o i se sauniga faamanatuga i Zwickau, i Siamani i Sasae. Sa talia e lo’u tinamatua ma o’u matua le valaaulia. Sa latou o i le lotu, ma lagonaina ai le Agaga, ma sa faagaeetia i le agalelei o le au paia, ma sa aoaoina ma faamalamalamaina i viiga o le toefuataiga. Sa papatisoina uma lo’u tinamatua, o o’u matua, ma o’u tei e toatolu. Sa ou faatalitali mo le lua tausaga aua sa na o le ono o’u tausaga [i lea taimi]. Oka so’u faafetai ona o se tinamatua sa nofouta faaleagaga, o ni matua sa aoaoinagofie, ma se tuafafine olomatua lauulu sina, sa maeu lona lototele e aapa atu ai ma mulimuli i le faataitaiga a le Faaola e ala lea i lona valaauliaina o i matou e “o atu ma vaai” (tagai Ioane 1:39). O lona igoa o Sister Ewig, lea e faaliliuina i le Igilisi, o Sister Faavavau. O le a faavavau ona ou faafetai mo lona alofa ma lana faataitaiga.
Faatasi ai ma nei lagona mu’amu’a o le faafetai mo i latou uma sa faa-aafiaina lo’u olaga i tausaga ua mavae, ou te tuuina atu a’u lava i ai mo le lumanai. Ua matua faatumulia lo’u loto ma lo’u mafaufau i le olioli mo aso uma o totoe o lo’u ola, o le a ou maua le avanoa e “tautalatala ai ia Keriso, … olioli ia Keriso, … tala’i atu Keriso, [ma] vavalo atu ia Keriso” (2 Nifae 25:26). O nei mea uma e faia i le avea ai ma se molimau faapitoa o lo tatou Faaola ma le Togiola, o Iesu Keriso (tagai MFF 107:23).
Ina ua ou iloa o’u vaivaiga, sa ou maua se faamafanafanaga tele mai aoaoga na tuuina mai e le Alii. I le Mataupu Faavae ma Feagaiga tatou te faitau ai:
“Ina ia mafai ona folafola atu le atoatoa o la’u talalelei e e vaivai ma lotomaulalo e oo i tuluiga o le lalolagi, ma luma o tupu ma faipule… .
“Ma afai ua latou sailiili i le poto e mafai ona aoao atu ia te i latou; …
“Ma afai ua lotomaulalo i latou, e mafai ona faamalosia i latou, ma faamanuiaina mai luga, ma maua le malamalama” (MFF1:23, 26, 28).
Ma i totonu o le Tusi a Mamona tatou te faitau ai:
“O le a ou alu ma faia mea ua poloaiina ai a’u e le Alii, aua ua ou iloa e le tuuina mai e le Alii se poloaiga … sei iloga na te saunia le ala mo i latou ia mafai ai i latou ona fai le mea ua ia poloaiina ai i latou” (1 Nifae 3:7).
I le Feagaiga Tuai tatou te maua ai le faamafanafanaga:
“Ona osofia lea o oe e le Agaga o Ieova, e … liua oe peiseai se isi tagata,” ona liliu lea o lona loto e le Atua,” ma “ua ia te oe le Atua” (1 Samuelu 10:6, 9, 7).
Ou te talitonu i nei folafolaga matagofie. O le mea lea ou te folafola atu ai ia te outou, o’u uso e, ma le Alii o le a ou ola ina ia ou agavaa ia ou iloa le finagalo o le Alii ma faia e tusa ai.
E silafia e le Atua lo tatou Tama Faavavau i tatou i o tatou igoa. O loo soifua Iesu Keriso; o Ia o le Mesia; ma e alofa o Ia ia te i tatou. E moni le togiola a Iesu Keriso; e maua ai le tino ola pea o tagata uma, ma ua tatalaina ai le faitotoa i le ola faavavau.
Ua toe i ai nei le talalelei a Iesu Keriso i le fogaeleele. E moni ma o loo ola le Ekalesia a Iesu Keriso o le Au Paia o Aso e Gata Ai.
O le Tusi a Mamona o se molimau lona lua ia Iesu Keriso ma o se faaaliga mai foi o le moni o le Perofeta o Iosefa Samita. Ou te alofa i le perofeta o Iosefa. Ou te alofa ia Peresitene Gordon B. Hinckley, o ia o le Perofeta a le Atua ma o loo umia ki uma o le malo i lenei taimi lea e le’i faalavelaveina lona faasologa mai talu Iosefa Samita.
Ua ou iloa nei mea i lo’u loto ma lo’u mafaufau. Ma ou te molimau atu ai i nei mea i le suafa o Iesu Keriso, amene.