Faifeautalai Matutua ma le Talalelei
Ou te faafetai atu i o tatou faifeautalai matutua. E talavou o latou agaga, e atamamai, ma naunau e galulue.
Matou te faafeiloai atu ma le agaga faafetai ia Elder Dieter F. Uchtdorf ma Elder David A. Bednar i le Korama a Aposetolo e Toasefululua. O le a tatou tatalo faatasi ma aufaatasi e tautua le Alii o Iesu Keriso.
O tofiga i lenei tausaga ua ou oo atu ai i le tele o atunuu o le lalolagi. I nisi o na atunuu, o loo matua fou ai lava le Ekalesia. Pe o fea lava ou te alu i ai, ou te feiloai ai lava i o tatou faifeautalai. E matua faigofie lava ona latou fetuutuunai ma aoga tele. Latou te tuuina atu faamaoniga vaaia ma le mausali, o le Ekalesia a Iesu Keriso ua toefuatai mai i lona atoaga. O Ia lea na fetalai, “O atu ia outou i le lalolagi uma, ina tala’i atu ai le tala lelei i tagata uma lava.”1 E malosi le lagonaina o lenei poloaiga i loto o faifeautalai uma o ē molimau atu ia Iesu Keriso ma aoao atu Lana savali.
Pe a tatou mafaufau i faifeautalai, e masani ona mafaufau i alii talavou ofutino papae ma fusiua, faapea foi tamaitai talavou i o latou laei talafeagai ma le onomea. Peitai, o loo i ai foi ma faifeautalai toeaiina ma loomatutua o ē ua tali mai i le augani atu o perofeta ma aposetolo mo nisi ulugalii faafaifeautalai.2
Ou te faafetai atu i o tatou faifeautalai matutua. E talavou o latou agaga, e atamamai, ma naunau e galulue. Latou te onosa’ia faamatalaga mai a latou fanau taufaalilili, o ē atonu latou te suia le augani a Peresitene Spencer W. Kimball o le “Faauumi au Laa,” i le “Faatopetope le tatoso o ou vae.”3 O nei tagata faapelepele o le ekalesia e naunau e galulue ma faamalolosia olaga o isi.4 Tusa lava pe le iloa e nei toeaiina ma loomatutua le gagana i le mea e galulue ai, ae maoae lava mea latou te faataunuuina, ma e taua lo latou agaga o le ositaulaga.5
Faataitaiga o le Tautua a Faifeautalai Matutua
Mo se faataitaiga, ou te mafaufau ia Elder Lloyd Poelman ma lona faletua, o Sister Catherine Poelman. O ni matua o se fanau ua matutua e to’a 9 ma e 20 fanau a a la’ua fanau, o loo auauna atu nei i se nuu maotua o Chile, ma galulue i se tama’i paranesi. La te asiasi soo i tagata o le au paia ua le toaaga i lotu faapea foi aiga e le’i leva ona liliu mai i le Ekalesia. O nei asiasiga e maua ai e le au Poelman le avanoa e faitau faatasi ai ma na aiga, ma tuuina atu molimau e uiga i faamanuiaga o le malumalu. I paranesi o le latou misiona, ua la aoao atu ai foi ia tagata i le auala e ta’ita’ia ai musika ma ta ia fati faigofie o viiga i se tama’i piano feavea’i e alu i le eletise. Sa tusia talu ai nei e Elder ma Sister Poelman, “O le papatisoga ua na o le pau lea o le uluai laasaga i le liua. A oo ina tau fāi ifo le naunau ma ua faaauau pea ona feagai tagata faatoa liliu mai ma le tulaga manaomia e galulue mo ni taimi uumi ia tau lava ina maua ai meaai mo i latou ma o latou aiga, latou te manaomia isi e fesoasoani ia te i latou o ē ua maua le olioli i le talalelei. O le ma faapitoa lena. O se vaega o le ma galuega o le puipui—ia vavalalata ma tagata faatoa liliu mai. Ae peitai, o i latou o e seāseā auai i sauniga e lē i mamulu lo latou talitonuga ma e latou te taliaina ma le faafetai a matou savali. A o matou matauina ia suiga ua i ai olaga o i latou matou te asia, matou te lagona le faamanuiaina i le mauaina pea lava pea o aoaoga ma le fesoasoani mai le Alii i lenei galuega, e le gata foi i lea, o le iloaina o loo matou faasoaina ma tagata o o matou aiga o loo faamuli mai, lo ma valaauga e ala ia i ma’ua ma na faamanuiaga faapitoa.”6
E faapena ia ulugalii ofoofogia o loo punoua’i i le galuega o le toe laveai mai o agaga sa osi feagaiga muamua latou te tauave i o latou luga le suafa o Iesu Keriso.
O isi ulugalii faamisiona o loo galulue auauna i malumalu paia o le Ekalesia. Mo se faataitaiga, o Elder Kenneth ma Sister Barbara Willits, o loo galulue i le Malumalu o Accra Ghana. Ua la’ua atiina ae se alofa faapitoa mo tagata o Ghana, a o la galulue ai iina o ni faifeautalai i le silia ma le luasefulu tausaga ua mavae. O i la’ua o ni tagata liliu mai malolosi ma le naunautai mo le 50 tausaga, e toa 3 la la’ua fanau, ma a latou fanau e 16, ma fanau a a latou fanau e 12. La te faia sauniga o le faaeaga i le malumalu. O Brother Willits o se tagata fai faamauga. E tele taimi, e faate’ia ai i la’ua i le feiloai atu i uso sa latou feiloai muamua i la la’ua misiona muamua. Talu ai nei, sa faia ai e Elder Willits le faamauga o se alii ma lona toalua sa la aoaoina i le 1982, ma sa faamauina foi e Elder Willits i lena lava ulugalii a la’ua fanau e toafa ua maliliu. Sa tusia e Elder ma Sister Willits: “O lo ma naunau e tuua lo matou aiga ma le fale, sa faaosofia i feagaiga o le malumalu sa ma osia, ma lo ma’ua naunautaiga loloto e fia avea ma se aiga e faavavau. E matua lagolago atoa mai lo matou aiga a o ma galulue ai, ma ua latou maua foi le tele o faamanuiaga ua ma mauaina. Ma te faafetai ma le faamaulalo ona o le avanoa e fesoasoani ai i isi ia maua o latou faamanuiaga o le malumalu.”7
O ulugalii lototetele ma le alolofa e pei o Elder ma Sister Willits ua mafai ai ma ua manuia ai le galuega o loo faia i le tele o o tatou malumalu i vaega eseese o le lalolagi. O nisi, e pei o le Malumalu o Accra Ghana, e tutu i nuu o le toatele o tagata o le au paia e le’i maua muamua ni avanoa e o ai i se malumalu. O sauniga mo na uso, ua faaleleia atili e ulugalii ua lava le silafia o loo galulue o ni faifeau faamisiona i malumalu. Matou te tuuina atu foi ia te i latou la matou faafetai mai ta’ele o o matou loto.
I le amataga o le tausaga nei, sa ma i ai ma Elder Douglas L. Callister i Kiev, o le laumua o UkraiNifae Sa ma i ai iina e faavae le siteki muamua i le nuu sa avea muamua ma Union of Soviet Socialist Republics. Sa faafiafiaina i ma’ua ina ua vaaia sa matua’i saunia lelei le Itu o le Misiona a Kiev ina ia avea ma se siteki—e matua faatulagaina atoatoa—ma ua saunia e ofi atu i le saofaiga a siteki o Siona. Sa matou feiloai ai foi iina ma faifeautalai, ma e toatele foi ulugalii faamisiona faatuatua sa i ai. Sa ma faalogologo ma le toto’a i a latou saunoaga.
Tatou te manatuaina le tala ia Elder Rudi ma Sister Eva Hegewald, lea sa tutupu a’e i le mea sa iloa i lena taimi o Siamani i Sasae. I si faaleoga laitiiti ma le malu faaSiamani, sa la faamatalaina ai aso faigata o le Taua Lona II a le Lalolagi, ma galuega i le Rusia mulimuli aNifae Sa la ta’ua le tele o mea latou te le i maua. O le mauaina o le Ekalesia moni a le Alii ma malaga atu ai i Amerika mulimuli ane, sa faitaulia o ni faamanuiaga faapelepele. O tausaga na sosoo ai, na la maua ai ni fanau maloloina, faatasi ai ma le tamaoaiga faaletino ma le faaleagaga. Sa la lagonaina o le galulue i se misiona, o se auala lelei lea e faaali atu ai le faafetai i le Alii. Sa faaalia lo la faanaunauga loloto e galulue i Europa i Sasae. Sa oo mai lo la’ua valaauga e galulue i le Misiona a Ukraine Kiev. Sa tusia e Elder ma Sister Hegewald: “O lenei, i le taulalata atu i le faaiuina o le ma misiona i le laueleele sa avea muamua ma o ma’ua fili, ma te faafetai tele mo le avanoa e aoao atu ai ma le alofa i tagata o UkraiNifae A o ma auauna atu i le Alii, sa faamaloloina o ma’ua agaga, ma ua atili ai ona fusia faatasi lo matou aiga. Sa ma maua se aafiaga maoae moni ma le faamalieina, ma ua tele vavega iti ua ma vaai i ai.”8
Ia matauina na tusia uma e ulugalii e toatolu e uiga i o latou faamanuiaga. O le isi ulugalii sa faamatala mai faamanuiaga e maua i le galuega faafaifeautalai. Sa la tusia: “Sa suitulaga ni tagata lelei i la ma’ua galuega faamātua ma sa sili atu nai lo i ma’ua… . Afai e le foia se faafitauli faaleaiga i tatalo ma anapogi, e mafai ona e mafaufau e ave se misiona.”9
E leai se tagata matua faamisiona e faigofie ona alu. E le’i faigofie foi ia Iosefa po o Polika po o Ioane po o Uilifoti. Sa i ai foi a latou fanau ma fanau a fanau. Sa alolofa foi i latou i o latou aiga, e pei foi o outou, ae sa latou alolofa foi i le Alii ma mananao e auauna atu ia te Ia. E i ai se aso atonu o le a tatou feiloai ai ma nei alii faamaoni, o ē sa fesoasoani e faavae lenei tisipenisioNifae Ona tatou olioli ai lea, aua tatou te le’i taumafai e lalafi ina ua oo mai se valaau mo le galuega faafaifeautalai mai le perofeta, e oo lava i tausaga afu o o tatou olaga.
I le konafesi aoao ia Oketopa i le 1925, sa tuuina mai ai e Peresitene Heber J. Grant se valaau manino mo “alii ua matutua atu ma ua i ai le faautautaga, ua i ai le poto masani i le folafolaina atu o le talalelei, … ina ia o atu ma galulue i le talaiga.”10
O loo i ai pea lena tulaga manaomia. I le faasalalauga aupito lata mai i taitai perisitua i le lalolagi atoa, sa tuuina atu ai foi e Peresitene Gordon B. Hinckley se valaau faapena: “O loo matua moomia nisi ulugalii faamisiona,” na ia saunoa ai. “Latou te faatinoina se auaunaga maoae i le lalolagi atoa. [O outou taitai] e le tatau ona faatalitali se’i ofo atu ulugalii. O osigataulaga e o faatasi ma le auauna atu i le Alii mo le taimi atoa o le a matuai faamanuiaina ai lava ia ulugalii, o o latou aiga, faapea ma tagata latou te auauna atu i ai.”11
O Tulaga Agavaa mo le Galuega
E tatau foi i epikopo ona gauai atu i lena valaau faaperofeta, ma fesili atu i na uso o le au paia e mafai ona galulue [faamisiona]. E eseese ma tele naua avanoa mo toeaiina ma loomatutua e faamisiona ai.12 O o latou valaauga e auauna atu e faia i se tulaga aloaia pe a mae’a ona iloiloina ma le loto tatalo o latou tomai faigaluega, o gagana, ma mea e gafatia e le tagata lava ia.13 Mai agavaa uma e auauna atu ai, o se mana’o e auauna atu atonu o le mea sili lea ona taua. Ua fetalai mai le Alii:
“O outou e o atu i le galuega a le Atua, ia outou auauna atu ia te ia ma o outou loto atoa, manatu atoa ma le malosi atoa, ina ia mafai ona outou tutu ma le le pona i luma o le Atua i le aso gataaga.
“O le mea lea, afai o ia te outou le mana’o e auauna atu i le Atua, ua valaauina outou i le galuega.”14
E toatele tagata lotomaualalo o le Au Paia o Aso e Gata Ai e popole e le o agavaa mo le galuega faamisiona. Peitai, ua tuuina mai e le Alii i faifeautalai ua faamoemoeina le faamautinoaga lenei: “O le faatuatua, faamoemoe, agaalofa, ma le alofa, ma le manatu tasi i le mamalu o le Atua e faaatoatoa ai o ia mo le galuega.”15
O Tapulaa e Afua Ona o le Matua ma le Soifua Maloloina
A o o’u faaviivii atu i le galuega a faifeautalai matutua, ua ou iloa e toatele atu isi e fia auauna atu, ae e le mafai. O tapulaa e afua i le matua po o le faaletonu o le soifua maloloina, e tatau i ai se iloiloga patino, e faapei foi o tulaga manaomia taua o tagata o le aiga. A oo ina mumu le mana’o i le loto [e auauna atu], e ui lava ina i ai na tapulaa, ae e mafai lava ona e tuuina atu lau auaunaga e ala atu i isi. E mafai ona avea i latou ma ou lima ma vae, ae mafai ona e saunia tupe o loo manaomia. Ae e mafai lava e isi ona foai atu taimi ma taleni e galulue ai faamisiona ae nonofo lava i o latou aiga. 16 O soo se ituaiga auaunaga lava, o le a fiafia i ai le Alii, ma o le a tofu viia foi e Ia.
O Le Talalelei
E mafai e i tatou uma lava ona folafola atu le talalelei e ala i a tatou upu ma faatinoga. O le upu talalelei o lona uiga “o tala e lelei.” O tala e lelei o le Alii o Iesu Keriso ma Lana savali o le faaolataga. 17 Ua faatusa e Iesu le talalelei i Lana misiona ma Lana galuega i le olaga nei. I le faaupuga o Lona faamoemoega, na fetalai ai Iesu:
“O le tala lelei lenei ua ou tuuina atu ia te outou—na ou sau i le lalolagi e fai le finagalo o lo’u Tama, aua na auina mai a’u e le Tama.
“Na auina mai a’u e le Tama ina ia siitia a’u i luga o le satauro.”18
O le misiona a le Faaola i le olaga nei, ua tatou iloaina o le Togiola.
O le galuega a le Faaola i le olaga nei e aofia ai isi mea uma sa Ia faia—o Ana aoaoga, o le faaalia o le alofa, silasila toto’a i sauniga, o mamanu o tatalo, filigā, ma isi. Sa soifua o Ia ina ia avea ma o tatou faataitaiga, lea foi na Ia faatusa i le talalelei i le faaupuga e faatatau i Lana galuega: “O la’u tala lelei lenei,” na Ia fetalai mai ai, “… aua o galuega na outou vaai i ai ua ou faia, ia faia foi e outou.”19 O le mea lea, o le faatuatua; salamo; papatisoga i le vai, afi, ma le Agaga Paia; o le faapotopotoina o e ua filifilia; ma le tumau e oo i le iuga, o vaega uma ia o le talalelei.20 E mafai uma lava e i tatou ona mulimuli i le faataitaiga a le Alii, tusa lava pe o le a le matua, tulaga o le olaga, po o fea foi tatou te nonofo ai.
I le avea ai ma se tasi o “molimau faapitoa i le suafa o Keriso i le lalolagi atoa,”21 ou te tautino atu o Ia o le Alo o le Atua soifua, o lo tatou Faaola ma le Togiola. O Lana Ekalesia lenei, ua toefuataiina mai i nei aso e gata ai, e faataunuu ai lona taunuuga paia. O Lana perofeta i le taimi nei o Peresitene Gordon B. Hinckley. Ou te molimau atu ai i le suafa o Iesu Keriso, amene.