Ae Afai Ua Saunia Outou, O Le A Outou Le Matatau Ai Lava
O loo tatou ola i taimi fesouaiina. E masani lava ona le iloa po o fea o i ai le lumanai; o lea, e moomia ai ona tatou saunia mo mea e le mailoa.
O se avanoa mamalu mo a’u le tulai atu i o outou luma i lenei konafesi aoao a le Aualofa. Ua ou iloaina e faaopoopo atu ia te outou o e o loo potopoto i totonu o lenei Maota Autu mo Konafesi, le fia afe o loo maimoa ma faalogologo mai i taualumaga e ala i fesootaiga faasatelite.
A o o’u talanoa atu ia te outou i lenei afiafi, ua ou iloaina ona o a’u o se tamaloa e toatasi o loo vagavagaia e ni tamaitai se toatele e tatau ona ou faaeteete i a’u tala e fai. E tutusa lelei lava lo’u matamuli e pei o le alii mai tua lea na sau e asiasi mai i lona tausoga e nofo i se taulaga tele lava. Ua leva tausaga e le’i toe asiasi mai i ona aiga ma sa tau le mautonu ina ua tali atu e se tamaitiiti le tatagi o le logo o le faitotoa. Sa faaafe atu o ia i totonu e le tamaitiiti; ina ua la nonofo lelei i lalo, sa ia fesili atu, “A o ai la oe?”
Sa tali le tagata malaga, “O a’u o se tausoga i le itu o lou tama,” lea na tali atu ai loa le tamaiiti, “Alii, o totonu o le fale lenei, e sese le itu lena e te i ai!”
Ou te talitonu o lenei afiafi, i totonu o lenei fale, atonu o loo i ai a’u i le itu sa’o, o le itu lea a le Alii.
I tausaga ua mavae sa ou vaai ai i se ata o se vasega o le Aoga Sa i le Uarota Ono i le Siteki o Paionia i le Aai o Sate Leki. Sa pueina le ata i le 1905. O se teine lalelei, ma lona lauulu e fililua, sa faaali mai i le laina pito i luma. O lona igoa o Belle Smith. Mulimuli ane, ina ua avea ia Belle Smith Spafford ma peresitene aoao o le Aualofa, na ia tusia: “E le’i i ai muamua ni tamaitai e sili atu ona maoae a latou faataitaiga e pei ona i ai i le lalolagi i ona po nei. E le’i i ai lava muamua se taimi sa matua tatalaina ai faitotoa o avanoa [eseese] mo i latou nai lo le taimi nei. O se vaitau sili lenei ona faatosina, faagaeetia, faigata ma malolosi ona manaoga mo tamaitai. O se taimi ua sili ona tamaoaiga i taui pe afai tatou te ola e tusa ma mataupu faavae moni, aoaoina ia mea moni taua o le olaga, ma fuafuaina ma le atamai mea e tatau ona faamuamua.”1
Sa i ai lava se sini a le Faalapoto-potoga o le Aualofa ina ia foia le leiloa faitau ma tusitusi. O tatou o e mafai ona faitau ma tusitusi, tatou te le iloa le mafatia o e le mafai ona faitau, ma e le mafai ona tusitusi. Ua siomia i latou i se ao pogisa ua taofia ai lo latou alualu i luma, ua faanenefu ai o latou mafaufau ma faapogisaina ai o latou faamoemoega o le olaga. Tuafafine e o le Aualofa, e mafai ona outou aveesea lenei ao o le lotovaivai ma talia le malamalama mai le lagi a o susulu atu lea malamalama i o outou uso.
I nai tausaga ua mavae, sa ou i ai i Monroe, Louisiana, i se konafesi faarisone. O se faatasiga matagofie tele. Ao o’u i ai i le malae o vaalele e sauni e toe foi i le aiga, sa faafeiloai a’u e se tamaitai Aferika-Amerika lalelei—o se tagata o le Ekalesia—o le na faapea mai ma laufofoga fiafia, “Peresitene Monson, ae ou te le’i auai i le Ekalesia ma avea ma se uso o le Aualofa, sa ou le mafai ona faitau ma tusitusi. E leai ma se tasi o lo’u aiga e mafaia. E te silafia, o matou uma lava o ni faifaatoaga matitiva. Peresitene, o o’u uso papa’e o le Aualofa—sa latou aoaoina la’u faitautusi. Sa latou aoaoina foi la’u tusitusi. O lea la ua ou aoaoina foi o’u uso papa’e ia iloa faitau ma tusitusi.” Sa ou mafaufau i le olioli sili atonu na oo i lona loto ina ua susue e ia lana Tusi Paia ma faitau ai mo le taimi muamua i afioga a le Alii:
“Ia outou o mai ia te a’u, o outou uma o e tigaina ma mafatia i avega, o a’u foi e malolo ai outou.
“Ia outou amoina la’u amo, ma ia outou faaa’oa’o ia te a’u, aua o a’u le agamalu ma le lotomaulalo: ona maua lea e outou o le malologa mo outou agaga.
“Aua e avegofie la’u amo, o la’u avega foi e mama ia.”2
I lena aso i Monroe, Louisiana, na ou maua ai se faamaoniga e ala i le agaga, i le maoae tele o lo outou faamoemoega mamalu o le Aualofa o le fesoasoani lea e tafiesea le leiloa faitau ma le leiloa tusitusi.
Na tusia e le tusi solo:
Atonu e te maua ni ‘oa se tele;
O pusa auro ma ma’a taua pele.
A e le mafai ona sili atu lou mau’oa ia te a’u
Aua sa ia te a’u se Tina na faitau mai ia te a’u.3
Na faaopoopo i ai e se tasi tusi solo lenei fuaiupu ootia:
Ae manatu i le taunuuga o se tamaitiiti e ese mai ai,
E agamalu, faamaualalo,
Ae peitai o loo i ai pea lena manaoga faapitoa,
Na fanau mai i se tina e le mafai ona faitau.4
O matua uma i soo se mea e popole lava mo a latou fanau ma lo latou fiafia faavavau. E atagia mai i le tala faamusika Fiddler on the Roof, o se tasi o tala faamusika e sili ona leva i fale faafiafia.
E ‘ata se tasi a o ia matauina le tamā o se aiga Iutaia i totonu o Rusia, a’o taumafai ma ana faiga faaanamua e faamasani i suiga fou o taimi sa aumaia faamalosi e lana fanau teine talavou lalelei.
O le fiafia o le siva, o le fati o le musika, ma le lelei o le faiga o vaega o le tala e tagata, e faaitiitia uma lo latou taua pe a tautala ia Tevye matua, ia te a’u lava ia o le autu lea o le tala. Na te faapotopoto mai ona afafine lalelei i ona tafatafa, ma i le siosiomaga matagofie o lona tulaga faatauvaa, e fautuaina i latou a’o mafaufau loloto i lo latou lumanai. Ia manatua, e lapatai atu ai Tevye, “i totonu o Anetevaka … ua outou iloa uma lava po o ai o ia, ma le mea ua faamoemoe le Atua na te faia.”5
O outou, o’u tuafafine pele e, ua outou iloa po o ai outou ma le mea ua faamoemoe le Atua tou te oo i ai. O lo outou luitau o le aumaia lea ia i latou uma o loo i la outou vaavaaiga se malamalama o lenei upumoni. O le Aualofa, o le Ekalesia lenei a le Alii, e mafai ona avea ma auala e ausia ai sea sini.
“O le avanoa muamua ma le aupito taua mo le aoao atu i totonu o le Ekalesia o loo i ai lea i totonu o le aiga,” o le manatu lea o Peresitene Tavita O. MaKei.6 “O se aiga Mamona moni, o se aiga lea afai e afio mai Keriso ma maua se avanoa e ulufale ai, o le a fiafia o Ia e nofonofo ma malolo ai.”7
O a mea o tatou faia ina ia mautinoa ai ua i ai o tatou aiga i lea tulaga? E le lava le na o le i ai o ni molimau malolosi a matua. Ua na o sina taimi lava e mafai ai ona faalagolago tamaiti i talitonuga maumaututu o matua.
Na faailoa mai e Peresitene Heber J. Grant: “O lo tatou tiute o le aoao lea o a tatou fanau a o talavou… . E mafai ona ou iloa e moni le talalelei, e mafai foi e lo’u toalua; ae ou te fia ta’u atu ia te outou, o le a le mafai ona iloa e a tatou fanau e moni le talalelei, sei iloga latou te suesue i ai, ma maua ai se molimau mo i latou lava.”8
O le alofa mo le Faaola, o le ava i Lona suafa, ma le faaaloalo moni o le tasi i le isi o le a maua ai se siosiomaga lafulemu mo se molimau e tuputupu ae ai.
E le o se mea faigofie le aoaoina o le talalelei, ma le tuuina atu o se molimau, faapea foi ma le taitaiina o se aiga. O le faigamalaga o le olaga e i ai ni maagao, ma galu fafati—o gaogaosa ia ma to’atuga o o tatou olaga.
I ni nai tausaga ua mavae, ina ua ou asiasi atu i le au paia ma faifeautalai i Ausetalia, sa ou vaai ai i se faataitaiga faaeaina o le mafai e le oa o le molimau ona faamanuiaina ma faapaiaina se aiga. Sa ma malaga ma le peresitene o le misiona, o Horace D. Ensign, i le vaalele mai Sini e agai i Darwin, lea sa fuafua ou te suatia ai le eleele mo lo tatou uluai falesa i lena aai. A o malaga le vaalele, sa i ai le fuafuaga e afe e utu, ma sa afe ai i le aai maotua e i ai le maina e ta’u o Mt. Isa. Ina ua ma taunuu atu i le tamai malae vaalele, sa faafeiloai i ma’ua e se tuafafine ma lana fanau laiti e toalua. Sa ia fai mai, “o a’u o Judith Louden, o se tagata o le Ekalesia, ma o la’u fanau lea e toalua. Sa matou iloa o loo e malaga mai i le vaalele lea, ma ua matou o mai ai tatou te feiloai i la oulua malologa puupuu.” Sa ia faamatala mai e le auai lana tane i le Ekalesia, ma na o ia lava ma lana fanau ia tagata o le Ekalesia i le nuu atoa lena. Sa matou fetufaai ni lesona ma fefaasoaa’i a matou molimau.
Sa vave le taimi. A o ma sauni o le a ma toe malaga, sa foliga faanoanoa lava ia Tuafafine Louden, i le na o ia ma si ana fanau. Sa ia pulunaunau mai, “E le tatau ona lua o; ua ou matua misia lava le Ekalesia.” E le’i pine ae faasalalau mai i le faaleotele leo o le a tuai ona alu le vaa i le isi 30 minute ona o se faafitauli. Sa musumusu mai Tuafafine Louden, “O lea ua tali mai la’u tatalo.” Ona fesili mai lea po o se a se mea e mafai ona ia faia e faatosina mai ai lona toalua ia fiafia i le talalelei. Sa ma fautuaina o ia ina ia faaauai o ia i a latou lesona o le Peraimeri i vaiaso taitasi i le fale, ma ia avea i latou ma molimau ola o le talalelei ia te ia. Sa ou fai atu ia te ia o le a matou auina atu mo i latou le mekasini o le Children’s Friend ma isi fesoasoani faaopoopo e fai ai a latou aoga i le fale. Sa ma uunaia o ia ina ia aua lava nei faavaivai i lona toalua.
Sa ma tuua ia Mt. Isa, o se aai ou te le’i toe foi atu i ai. Peitai, o le a avea pea ma mea e pele ia te au le manatuaina o lena tina lelei ma si ana fanau peleina, ma le maligi o o latou loimata i le alolofa a o latou talotalo faatofa mai ma le faafetai.
I ni nai tausaga mulimuli ane, a o o’u lauga atu ai i se fonotaga faaleautaitai o le perisitua i Brisbane i Ausetalia, sa ou faamamafaina le taua o le aoaoina o le talalelei i totonu o le aiga ma le taua o le ola ai i le talalelei ma avea ma faataitaiga lelei o le upumoni. Sa ou faasoa atu i alii sa faatasi ai i le sauniga, le tala ia Tuafafine Louden ma le aafiaga o lona faatuatua ma lona naunautai ia te a’u. A o taufaai’ui’u la’u lauga, sa ou fai atu, “Ou te leiloa pe na auai le tane a Tuafafine Louden i le Ekalesia, ae na te le mauaina se isi faataitaiga sili ona lelei e mulimuli ai nai lo lona lava toalua.”
Sa sii se lima o se tasi o taitai, ona tulai lea ma tautino mai, “Uso Monson, o a’u o Richard Louden. O le fafine na e saunoa i ai o lo’u toalua lena. O tamaiti sa i ai [na gatete lona leo] o le ma fanau. Ua avea nei i matou ma se aiga e faavavau, o se mea ou te faafetai ai i le mauai ma le onosai o lo’u toalua pele. O ia ua mafua ai nei mea uma.” Sa leai se isi na toe gagana. Na uma le leai o se pisa ae na o le fogifogi isu ma le loimata maligi na vaaia.
O loo tatou ola i taimi fesouaiina. E masani lava ona le iloa po o fea o i ai le lumanai; o lea, e moomia ai ona tatou saunia mo mea e le mailoa. Ua faaalia i fuaitau faafuainumera faapea e i ai nisi o taimi, ona o nisi o mafuaaga, tou te oo ai i le matafaioi o le galue mo le sailiga o le seleni. Ou te uunaia outou ina ia outou aooga ma aoaoina ni tomai aoga, ina ia tulai mai se tulaga faapea, ae ua outou saunia e tausi o outou aiga.
O le nafa a tamaitai e tupito. O le tusitala, tusisolo, ma le tausi talafaasolopito lauiloa a Amerika, o Washington Irving, na ta’ua: “O loo i ai se tasi i le lalolagi e sili atu le tiga o lona faanoanoa mo lē o loo faanoanoa, nai lo le tiga o lē o loo faanoanoa mo ia lava; o loo i ai se tasi e matuai naunau i le atoatoa o le isi ae aua ne’i aumaia le mamalu ia te ia ae tau lava o le fiafia; o loo i ai se tasi e faamaoni i le nanaina o le lē atoatoa o le isi nai lo lona lava lē atoatoa; na te nanaina ia le atoatoa o le isi ma le faamaoni nai lo ia lava; o loo i ai se tasi e galo uma ona lagona mo ia lava ona ua ave uma ona lagona o le agalelei, agamalu, ma le alofa faamaoni i se isi. O ia lena o se tamaitai.”
Na saunoa Peresitene Gordon B. Hinckley: “Na totoina e le Atua i totonu o tamaitai se uiga paia lea e aliali mai ai le malosi le leoa, i le tauagafau, i le filemu, i le lelei, i le mama, i le faamaoni, i le alofa. Ma o nei uiga ofoofogia uma e maua lo latou faailoaina moni ma le faamalieina i le avea ma se tina.”9
O le avea ma se tina e le’i faapea lava o se matafaioi faigofie. O nisi o tusitusiga ua leva i le lalolagi o loo apoapoaiina ai i tatou ina ia aua ne’i tuulafoaiina upu a o tatou tina, ua poloaiina i tatou o le tama valea e faanoanoa ai lona tina ma lapataiina i tatou ina ia aua ne’i inoino i o tatou tina pe a loomatutua i latou.10
Ua faamanatu mai foi e tusitusiga paia ia i tatou e faapea o mea tatou te aoaoina mai o tatou tina e aofia ai mea sili ona tatou faatauaina, e pei o atalii totoa e 2,000 o Helamana, o e “na aoaoina e o latou tina, pe afai latou te le masalosalo, e laveaiina i latou e le Atua.”11 Ma na Ia laveaiina i latou!
E toatele sui o le Aualofa e le o i ai ni tane. O le maliu, tetea po o le le maua o le avanoa e faaipoipo ai, i le tele lava o tulaga, ua tatau ai i se tamaitai ona tu na o ia. E faaopoopo atu i ai, e i ai i latou o e faatoa o ese mai le polokalama a Tamaitai Talavou. O le mea moni lava, e le moomia ona tuua na o se tasi, aua o le a i ai i ona tafatafa se Tama Faalelagi alofa e tuuina atu le taitaina i lona olaga ma tuuina atu le filemu ma le faamautinoaga i na taimi toamalie lea e tuua toatasi ai ma moomia ai le faamafanafanaga. E le gata foi i lea e tulaga ese foi le tutu faatasi o tamaitai o le Aualofa o ni uso. Ia outou i ai pea iina e fetausiai le tasi i le isi, ia iloa manaoga o isi. Ia outou nofouta i tulaga o uso taitasi, i le iloaina lea o nisi tamaitai o loo feagai ma ni luitau patino, ae o tamaitai uma lava o se afafine taua o lo tatou Tama Faalelagi.
A o o’u faaiuina o’u manatu, ou te fia faasoa atu ia te outou se aafiaga o tausaga ua mavae lea e atagia ai le malosiaga o outou tuafafine pele i totonu o le Aualofa.
I le gasologa o le 1980, le selaulimasefulu tausaga o le faavaeina o le Ekalesia, sa talosagaina ai sui taitasi o le aufono a le Aulofa aoao e tusia se tusi e ave i tuafafine o le Ekalesia i le tausaga e 2030—50 tausaga i le lumanai. O se vaega lenei mai le tusi na tusia e Tuafafine Helen Lee Goates:
“O lo matou lalolagi o le 1980 ua matuai faatumulia i le le mautonu, ae ua ou naunau e ola i aso taitasi i le faatuatua ae le o le fefe, ia faalagolago i le Alii ma mulimuli i fautuaga a lo matou perofeta o aso nei. Ou te iloa o loo soifua le Atua, ma ou te alofa ia te ia ma lo’u agaga atoa. Ou te faafetai lava ona ua toefuatai mai le Talalelei i le 150 tausaga talu ai ma ua mafai ona ou olioli ai i faamanuiaga o le avea ma tagata auai i lenei Ekalesia maoae. Ou te faafetai mo le perisitua a le Atua, i le lagonaina o lona mana i lo’u olaga atoa.
“O loo o’u maua le filemu i lo’u lalolagi, ma tatalo ina ia mafai ona lagolagoina outou i lo outou lalolagi e ala i molimau ma talitonuga mausali i le talalelei a Iesu Keriso.”12
Na maliu ia Helen Lee Goates ia Aperila o le tausaga 2000. A o le’i maliu o ia ona o le kanesa, sa ma asiasi atu ma Tuafafine Monson ia te ia faapea lona toalua ma le aiga. Sa foliga mai sa toamalie ma filemu o ia. Na ia ta’u mai ia i ma’ua ua ia sauni e alu ma tulimatai atu e toe feiloai ma ona matua ma isi e pele na muamua atu ia te ia. Sa faaalia e Tuafafine Goates i lona olaga le mamalu o tamaitai o le Au Paia o Aso e Gata Ai. I lona maliu, sa ia faailoatino mai ai lava la outou anava: “Ae afai ua saunia outou, o le a outou le matatau ai lava.”13
Ou te tuuina atu ia te outou, o o’u tuafafine pele, la’u molimau faapea o loo soifua le Tama Faalelagi, o Iesu o le Keriso, ma o loo taitaiina i tatou i aso nei e se perofeta mo o tatou taimi—o Peresitene Gordon B. Hinckley. Ia manuia le faigamalaga a o outou malaga ai i le olaga, ou te ole atu ai, i le suafa o Iesu Keriso, amene.