O Se Perisitua Tautupu

Peresitene James E. Faust

Fesoasoani Lua i le Au Peresitene Sili

E ui o le umiaina o le perisitua e aumaia ai faamanuiaga silisili, ae o loo tauaveina foi e le perisitua ni matafaioi maoae.

O’u uso pele, o se tofi sili ma se matafaioi taua tele i taimi uma le lauga atu i le au perisitua o le Ekalesia. Atonu o le potopotoga sili lea ona toatele i le talafaasolopito o le lalolagi. Ou te manao ou te tautala atu ia te outou na alii talavou e uiga i le faamanuiaina tele o outou, e umia le Perisitua Arona, lea foi ua lauiloa o le “perisitua maulalo.” Peitai o le upu maulalo, e le aveesea ai lona taua. E leai se mea e laitiiti ai—aemaise lava pe a ou vaai atu i le tetelē tele o tino o nisi outou alii talavou!

Ou te talitonu i lo outou sagisagi fiafia i le uluai taimi sa outou tufaina ai le faamanatuga. A o fesoasoani outou le au Perisitua Arona i le sauniuniga, faamanuiaina, faapaiaina ma le tufaina o le faamanatuga, ua outou fesoasoani foi i tagata uma o le au paia o e taumamafa ai e toe tautino atu ai i latou lava i le Alii, ma toe faafou lo latou faatuatua i le taulaga togiola a le Faaola. E taumamafa tagata o le ekalesia i le faamanatuga, e faamanatu atu ai e tauave i o latou lava luga le suafa o le Alo, ia manatua pea o Ia, tausi Ana poloaiga, ma saili ina ia maua Lona Agaga e faatasi ma i latou. Ou te faamoemoe o le a outou faatauaina le perisitua ua outou umia, ma ia faamamaluina e le aunoa o outou tiute o le perisitua.

Sa ou faitau talu ai nei i se tala e uiga i ni tiakono sa fai si o latou faatamala i o latou uiga faaalia i le tufaina o le faamanatuga. Sa amata ona latou mafaufau i le faamanatuga faapea o se fe’au, o se mea e leai se isi e manao e fai. Sa masani ona latou tuai mai, ma o nisi taimi e le fai faaleleia o latou lavalava. I se tasi Aso Sa sa ta’u atu ai ia te i latou e lo latou faufautua: “Aua tou te popole mai i le faamanatuga i le aso. O la ua uma ona tapena.”

O le mea moni, sa ofo i latou ina ua faalogo atu i lenei mea, peitai e pei lava ona masani ai, sa tuai mai i latou i le sauniga faamanatuga. Sa faaleano lava i latou, ma sa o atu i le taimi o le pese amata ma nonofo i le aofia. O iina na latou vaaia ai tagata la ua nonofo mai i le nofoa o tiakono—o lo latou faufautua ma le au faitaulaga sili o le uarota, ia na aofia ai tamalii sa galulue o ni epikopo ma le peresitene o le siteki. Sa tofu laei e i latou uma ni suti paauli ma ofutino papae ma fusiua. Ae o le mea na sili atu i lo lena, o lo latou matuai faaaloalo a o latou tauaveina atu fata o le faamanatuga mai lea atunofoa i lea atunofoa. Sa i ai se mea e sili atu ona loloto ma tulaga ese i le faamanatuga i lena aso. O na tiakono sa le mafaufau mamafa i o latou tiute, ua latou aoao e ala i faataitaiga, o le tufaina o le faamanatuga o se tofi paia ma o se tasi o faamamaluga silisili.¹ Sa amata ona latou iloaina, o le perisitua, e faapei ona ta’ua ai e le Aposetolo o Peteru, “o se perisitua tautupu.”²

O le mea masani lava, o le Perisitua Arona, i lalo o le taitaiga a le Au Epikopo, ua i ai le tiutetauave e faapaia ma tufatufa le faamanatuga. O la matou uarota iinei i le Aai o Sate Leki, e toatele tagata matutua faamaoni, ae toaitiiti le vaitausaga o le Perisitua Arona. Ua tele tausaga o o’u matauina nei faitaulaga sili ma toeaina, o ni tamalii o le faatuatua ma ua maoae mea ua latou ausia, ae latou te tufatufaina ma le lotomaulalo ma le migao le faamanatuga o le Talisuaga a le Alii. Sa umi se taimi o lenei vaega o le au perisitua e aofia ai le Faamasino sinia o le Malo, o se sui mo le tofi o le kovana o le setete o Iuta, ma isi tamalii lauiloa o tulaga maualuluga. Ae, sa fiafia lava i latou ma sa manino lo latou lagonaina o le faamanuiaga e faataunuuina ai lenei tiute paia faaleperisitua.

O le Perisitua Arona o se meaalofa maoae o le mana faaleagaga, na faaee e le Alii i luga o Arona ma ona atalii.³ O loo i ai “ki o asiasiga ma galuega a agelu ma le talalelei sauniuni”⁴ ma e aofia ai foi “le talalelei o le salamo, ma le papatisoga i le faatofuina mo le faamagaloina o agasala.”⁵

Ou te fia fai atu se upu e uiga i asiasiga ma galuega a agelu. I ona po anamua faapea foi ona po nei, na faaali mai ai agelu ma tuuina mai faatonuga, o lapataiga, ma taitaiga, e manuia ai tagata sa latou asia. Tatou te le o magafagafa i le mamao e aafia ai o tatou olaga i asiasiga ma galuega a agelu. Na saunoa Peresitene Iosefa F. Samita, “I se tulaga fo’i faapena, o o tatou tamā ma tina, o uso, ma tuafafine ma uo, ua maliliu, sa faamaoni ma agavaa e olioli i nei aiā tatau ma tofi, e mafai ona i ai sa latou misiona e tuuina atu ia te i latou, e toe asiasi mai ai i o latou aiga ma uo i lenei lalolagi, ma aumaia mai le Afioaga paia ia savali o le alofa, o le lapataiga, o le aoaiga ma faatonuga, ia i latou sa alolofa i ai i le olaga nei,”⁶ E toatele i tatou ua tatou manatu na tatou oo i lenei aafiaga. O la latou galuega o se vaega taua o le talalelei. Sa asiasi agelu ia Iosefa Samita a o ia toefaatuina le talalelei i lona atoatoa.

Sa i ai se aafiaga patino o Alema le Itiiti i le asiasiga ma galuega a agelu. A o talavou o ia, sa tusia faatasi o ia ma le au le talitonu ma “na ia taitai ese ai nisi e toatele o le nuu e mulimuli atu ia te ia i ana amioletonu.” I se tasi aso, “a o fealuai o ia e faaumatia le ekalesia a le Atua,” faatasi ai ma atalii o Mosaea, sa “faaalia mai le agelu a le Atua ia te i latou; ua afio ifo o ia e peiseai ua i se ao, ma ua peiseai ua ia tautala ma le leo o le faititili, ua luluina ai le eleele.” Ona alaga atu ai lea o le agelu, “Alema e, ina tulai ia, ma ia tu mai, aua se a ea le mea ua e faasaua ai i le ekalesia a le Atua?”

Sa matua lofituina Alema i lenei aafiaga o lea sa ia matapogia ai ma sa aveina atu o ia i lona tama. Sa toe faafoisia le malosi atoatoa ia Alema, ina ua mavae ona anapopogi lona tama ma isi mo aso e lua. Ona ia tula’i ai lea ma tautino atu, “Ua ou salamo i a’u agasala, ma ua togiolaina a’u e le Atua; faauta, ua fanauina au i la le agaga.”⁷ Na alu atu Alema ma avea ma se tasi o faifeautalai sili ona maoae i le Tusi a Mamona. Ae peitai i le tele o ona tausaga i le auaunaga faafaifeautalai, na te lei tautala lava i le asiasiga a le agelu. Ae na ia filifili e molimau atu faapea o le Agaga Paia o le Atua na faailoa atu ia te ia le upu moni.

O le aoaoina e se agelu o se faamanuiaga sili lea. Ae peitai, e pei ona aoaoina i tatou e Alema, o lona liuaina faaiu ma le mulimuli na faatoa oo mai ina ua uma ona ia “anapogi ma tatalo mo aso e tele.”⁸ O lona liuaina atoatoa na oo mai le Agaga Paia, lea e avanoa mo i tatou uma pe afai tatou te agavaa.

O mea faavavega na tutupu e lei faapea o se pogai lea o le liuaina. Mo se faataitaiga, ina ua leaga ona fai e Lamana ma Lemuelu o la uso laiti, sa faaali atu se agelu ma lapata’ia i la’ua e taofi. Na faamautinoa atu foi e le agelu i uso uma faapea o le a tuuina atu Lapana i o latou lima. O Nifae, sa talitonu ma sa ia mauaina mai papatusi apamemea mai ia Lapana. Ae o Lamana ma Lemuelu, sa le talitonu ma e lei suia foi a la amio ona o se asiasiga a le agelu. E pei ona faamanatu mai e Nifae, “Pe faapefea ona galo ia te oulua o mea tetele ua faia e le Atua mo i tatou, i le laveaiina o i tatou ai lima o Lapana, ma lea foi ina ia tatou maua ai le tusi?”⁹

O outou alii talavou o loo fausia a outou molimau. E faamalosia lea e ala i faamautinoaga faaleagaga e ala mai le Agaga Paia i mea masani e tutupu i le olaga. E ui o nisi faaaliga ofoofogia e mafai ona faamalosi ai lau molimau, ae foliga mai e le faapena le auala e oo mai ai.

E ui o le umiaina o le perisitua e aumaia ai faamanuiaga silisili, ae o loo tauaveina foi e le perisitua ni matafaioi maoae.

O i latou uma ua umia le perisitua e moomia ona faalauteleina o latou valaauga, ia galulue i le suafa o le Alii i le mea e gata ai o latou tofi ma faatagaina ai e le valaauga. Tatou te faalauteleina o tatou valaauga e ala i le mulimuli i le taitaiga a le au peresitene o le korama, o le epikopo, ma le fautua o la tatou korama. O lona uiga o le sauniaina, faamanuiaina, ma le tufaina o le faamanatuga e pei ona poloaiina ai i tatou e fai. O lona uiga foi o le faataunuuina o isi tiutetauave o le Perisitua Arona, e pei o le faamamaina o falelotu o la tatou Ekalesia, faatulagaina o nofoa mo konafesi a le siteki ma isi sauniga a le Ekalesia, ma le faia o isi tiute e pei ona tofia ai.
O e umia le Perisitua Arona, po o le Perisitua sauniuni, e ao ona agavaa mo le perisitua maualuga ma ia maua aoaoga mo tiutetauave silisili i le galuega a le Ekalesia.
O le umiaina o le Perisitua Arona o loo tauaveina ai ma le matafaioi o le avea ma faataitaiga lelei, faatasi ai ma manatu mama ma amioga talafeagai. Tatou te maua nei uiga a o tatou faataunuuina o tatou tiute faaleperisitua.
O le a outou fegalegaleai i lau korama faapea isi gaoioiga faatasi ma alii talavou o e tutusa o outou faatulagaga. E mafai ona outou fefaamalosia’i ai.
E mafai ona e suesueina tusitusiga paia ma aoao i mataupu faavae o le talalelei ina ia fesoasoani e saunia ai oe mo se misiona.
E mafai ona e aoao e tatalo ma iloa tali i tatalo.

O loo faamatalaina mai i le Mataupu Faavae ma Feagaiga ia ituaiga eseese o pule lea e faatatau i le Perisitua Arona. Muamua, o le faauuina i le perisitua e tuu atu ai le pule e faia ai sauniga ma umia ai le mana o le Perisitua Arona. O le au epikopo o le au peresitene lea o le perisitua Arona i le uarota.¹⁰ Lona lua, o loo i ai i totonu o lenei perisitua ni tofi eseese, e tofu lava ma tiute ma avanoa. I le avea ai ma se tiakono, e ao ona e leoleo i le Ekalesia i le avea ma auauna tumau.¹¹ I le avea ai ma se aoao, e faaopoopo atu i le vaaia o le Ekalesia, o oe e te “faatasi atu ma faamalosia i latou.”¹² I le avea ai ma se ositaulaga o oe e te “talai atu, aoao, folafola, apoapoai, ma papatiso, ma faamanuia le faamanatuga, ma asiasi atu i aiga taitasi o le au paia.”¹³ O lou epikopo, o loo umia le tofi o le faitaulaga sili, o ia foi o le peresitene o le korama a ositaulaga ma taitaia le galuega a le korama.

A o e aga’iga’i atu i luma mai le isi tofi o le Perisitua Arona i le isi tofi, o le a e taofia pea lava le pule o le tofi sa i ai muamua. Mo se faataitaiga, o outou o e o loo ositaulaga o loo i ai pea le pule e faia ai mea uma na outou faia a’o avea ma tiakono ma aoao. O le mea moni, e tusa lava pe faauuina oe i le Perisitua Mekisateko, o le a e tausia pea ma galue i tofi o le Perisitua Arona. O le Susuga a Elder LeGrand Richards o le ua maliu, sa avea ma se sui o le Korama a le Toasefululua mo le tele o tausaga, na matuai malamalama lelei i lenei mataupu faavae. E masani ona ia saunoa mai, “Ua na o au o se tiakono ua matua.”

E pei ona ou matauina, o le aoao atu o se tasi lea o tiute taua o le Perisitua Arona. O le avanoa mo outou le autalavou e aoao atu ai, e masani ona oo mai i le avea ai ma se soa o faiaoga o aiga i lou tama po o se tasi o loo umia le Perisitua Mekisateko. O le vaaia o manaoga i se auala faaletino ma le faaleagaga o se vaega taua lea o le leoleo i le Ekalesia.

Na tuuina atu e le Perofeta o Iosefa Samita le faamuamua maualuga i aoaoga i aiga. O Brother Oakley sa avea ma faiaoga o aiga o le Perofeta, ma e soo se taimi lava e alu atu ai Brother Oakley e faia lana aoaoga faaleaiga i le aiga o Samita, “e valaauina faatasi e le Perofeta lona aiga ma tuuina atu lona nofoa ia Oakley, ma ta’u atu i lona aiga” ina ia faalogo ma le toto’a ia Brother Oakley.¹⁴

O outou alii talavou o le Perisitua Arona e moomia ona i ai le Agaga e faatasi ma outou i o outou lava olaga e faapea foi i aoaoga i aiga, sauniaina po o le tufaina o le faamanatuga, po o isi gaoioiga faaleperisitua. O le a moomia ai ona outou aloese mai ni maa e tautevateva ai. O se tasi o ia maa e tautevateva ai o mea ia ua fai ma vaisu.

Ou te fautua atu ia te outou uma uso e ina ia aloese mai soo se ituaiga o mea ua fai ma vaisu. O le taimi lenei o loo faapologaina ai e Satani ma ana au nisi o o tatou tagata talavou sili ona lelei e ala i le fai o le ava malosi ma vaisu, o ituaiga o fualaau oona, ponokarafi, tapaa, taaloga faitupe, ma isi amioga le taupulea. O nisi tagata e foliga mai na fananau mai ma se vaivaiga i nei mea lea e na o sina faataitai lava e tasi i ai ma oo atu ai loa ina fai ma se vaisu ua le toe taofiofia. O nisi vaisu ua suia ai lava le mafaufau ma faatupuina ai se naunauga lea e olopalaina ai le mafaufau lelei ma le faamasinoga tatau. O nei vaisu ua le gata e faaleagaina ai olaga o i latou o e le teenaina ae faapea foi i o latou matua, taitoalua, ma fanau. E pei ona tagiaue mai le perofeta o Ieremia, “O tupu o le lalolagi ma i latou uma o nonofo i le atulaulau, sa le manatu i latou e mafai ona sao mai i faitotoa ia fili ma e na ita mai.”¹⁵

O le Alii i Lona atamai ua lapataiina ai i tatou faapea o mea faapena e le lelei mo i tatou, o lea e tatau ai ona tatou matuai aloese mai ai. Ua lapataiina i tatou ina ia aua nei inuina le inumaga muamua, pe ulaina le sikareti muamua, pe faaaogaina foi le fualaau oona muamua. O le fiailoa ma le uunai mai a uo o ni mafuaaga manatu faapito ia e taumafai ai se tasi e faataitai ia mea ua avea ma vaisu. E tatau ona tatou tuu ma mafaufau i taunuuga atoatoa, e le mo na o i tatou lava ma o tatou lumanai, ae faapea foi i e pele ia i tatou. O nei taunuuga e faaletino, ae latou te aveeseina ai foi le Agaga ma mafua ai ona tatou pauu atu ia Satani.

Ou te molimau atu i le aafiaga faamamā, faaleagaga, faamafanafana, faamalosiau, ma le puipuia a le perisitua ua i ai i lo’u olaga. Ua ou ola ai i ona aafiaga faaleagaga i lo’u olaga atoa—i totonu o le fale o lo’u tama matua, i totonu o le fale o lo’u tama, ma totonu o lo’u lava fale. O se lagona faamaualalo le faaaogaina o le mana silisili o le perisitua e faamanaina ai isi ma ia faamalolo ma faamanuia ai. Sei o tatou ola agavaa ia i le umiaina o le pule o le perisitua ina ia galulue ai i le suafa o le Atua, ou te tatalo atu ai i le suafa o Iesu Keriso, amene.