Ia Iloa le Iuga mai le Amataga
Afai e te faalagolago i le Alii ma usitai ia te Ia, … o le a Ia fesoasoani ia te oe ina ia e ausia mea sili e te gafatia ua Ia silafia o ia te oe.
O’u uso pele, o se tulaga matagofie ma le agamalu lo tatou mafuta ai i lenei alofi o e umia le perisitua i le lalolagi atoa. Ou te alofa ma ou manatu maualuga ia te outou. Ua ou lagona le faamamaluina i lo’u faitaulia ai o se tasi o outou. Ou te faalo atu ia te outou ua i ai le pule e galulue ai i le suafa o le Atua ma faataunuuina sauniga ua avea ma se punavai taua o le malosiaga faaleagaga ma le malosi mo le soifua sololelei o tagata.
O le a ou talanoa atu i le aso ia te outou alii talavou ofoofogia, o e ua sauniuni e faia se eseesega i le lalolagi—o outou ua faauuina i le Perisitua Arona ma outou foi ua maua le feagaiga ma le tautoga o le Perisitua Mekisateko. O le perisitua ua outou tauaveina o se malosi ofoofogia mo le lelei. Ua outou ola i se taimi o le tele o luitau ma avanoa. O outou o ni atalii agaga o ni matua faalelagi, ua outou saoloto e faia filifiliga tonu. E manaomia ai le galue malosi, loto pulea, ma se uiga talitonuina, o le a aumaia ai le olioli ma le saolotoga i lou olaga i le taimi nei ma le lumanai.
Na fetalai le Alii ia Aperaamo, “O lo’u igoa o Ieova, ma ua ou iloa le iuga mai le amataga; o le mea lea e i ou luga ai pea lo’u lima” (Aperaamo 2:8). A’u uo talavou pele, o le aso ou te fai atu ai ia te oe afai e te faalagolago i le Alii ma usitai ia te Ia, o le i ai Lona aao i ou luga. O le a Ia fesoasoani ia te oe ina ia e ausia mea sili e te gafatia ua Ia silafia o ia te oe, ma o le a fesoasoani foi o Ia ia te oe ia e iloa atu le iuga mai le amataga.
Faataga mai au se’i ou faasoa atu ia te outou so’u aafiaga i le taimi a o o’u laitiiti. Ina ua 11 o’u tausaga, sa tatau ona tuua faafuasei e lo matou aiga ia Siamani Sasae ae amatalia se olaga fou i Siamani Sisifo. Sa faia sina pisinisi laitiiti o se fale talavalava a o’u matua i si o matou tama’i taulaga, seia oo i le taimi e toe foi ai lo’u tama i lana galuega masani e faigaluega ai i le malo. Sa avea a’u ma tama e tilivaina tagamea. Ina ia mafai la ona fai lelei lena galuega, sa manaomia sa’u uila vilivae e toso ai le taavaletoso mamafa o tagamea. Ou te moemiti pea i taimi uma ina ia maua sa’u uila manaia, molemole, iila mumu, viligofie. Ae peitai, sa lei lava ni tupe e faataunuu ai lena miti. O le mea sa ou maua o se uila mamafa, mataga, uliuli, maaa pei se solofanua. Sa ou tilivaina tagamea i lena uila a o lei amataina aoga faapea foi ma le tuua o le aoga, mo ni nai tausaga. O le tele lava o taimi, ou te le’i matuai fiafia tele i le uila, o le taavaletoso, po o la’u galuega. O nisi taimi sa foliga ua mamafa tele le taavaletoso ma faavaivai tagata le galuega, ma ou manatu ai o le a papa o’u mama, ma e tele taimi ou te tu ai ae tau manava. Ae ui o lea, sa fai la’u vaega aua sa ou iloaina sa matua manaomia e lo matou aiga le tupe, ma o lo’u sao foi lea.
A na se’i ou iloaina i lena taimi le mea lea na faatoa ou iloaina ina ua mavae le tele o tausaga—a na sei faapea na mafai ona ou iloa o le iuga mai le amataga—semanu e ia te au se agaga talisapaia sili atu o nei aafiaga, ma atili ai ona faigofie la’u galuega.
I le tele o tausaga mulimuli ane, ina ua lata ona ave a’u i le militeli, sa tonu ia te au ou te ofo atu e auai i le Ea Fosi ina ia avea ma se pailate. Sa ou fiafia lava e lele ma ou manatu ai o le pailate o se mea tonu lava lea mo a’u.
Ina ia talia la i le polokalama e tatau ona ou pasia ni suega e aofia ai se suesuega auiliili faaletino. Sa fai si popole o fomai i i’uga ma sa toe faia nisi suesuega faafomai. Ona latou faasilasila mai ai lea, “O loo i ai ni ma’ila i ou mama o loo ta’u mai ai se faama’i o mama i popofou o lou olaga, peitai o lea ua manuia i le taimi nei.” Sa tau mafaufau fomai pe o le a le ituaiga togafitiga sa faia mo a’u ua fo’ia ai le faama’i. E oo mai lava i le aso o lena suesuega, ou te lei iloaina lava se faama’i na lavea ai o’u mama. Ona faafuasei ai lea ona manino mai ia te au o a’u faamalositino masani o se tama tiliva tagamea i le ea fou o le mea taua tele lena na faamaloloina ai a’u mai lenei ma’i. A na leai le isi galuega o le viliina o lena uila mamafa i aso uma, ma toso le taavaletoso o le tagamea i luga ma lalo o magaala o lo matou taulaga, semanu ou te le avea lava ma se avevaalele tau ma se kapeteni o se vaalele 747 mulimuli ane.
Tatou te le iloa i taimi uma ia auiliiliga o lo tatou lumanai. Tatou te le iloa le mea o loo faatalitali mai i luma. O loo tatou ola i se taimi o le le mautinoa. O loo siomia i tatou i luitau i soo se itu. E i ai taimi e ono tolotolo mai ai le lotovaivai; e ono oo mai foi le le mautonu; atonu o le a ulufale mai foi le masalosalo i le taua o la tatou galuega. O taimi pogisa nei e musumusu mai ai Satani, o le a le mafai lava ona tatou manuia, e maimau foi la tatou taumafaiga, ma o le a leai lava se eseesega ona o si a tatou tama’i vaega. O ia, o le tama o pepelo uma, o le a taumafai e taofiofi i tatou mai le iloa o le iuga mai le amataga.
O le mea e sili ai, o outou na o talavou ua umia le perisitua O Le Ekalesia a Iesu Keriso o le Au Paia o Aso e Gata Ai ua aoaoina e perofeta, tagatavaai, ma talifaaaliga o o tatou taimi. Ua saunoa mai le Au Peresitene Sili: “Ua i ai lo matou talitonuga tele ia te outou. O outou o agaga filifilia… . Ua outou i ai nei i le amataga o la outou faigamalaga i lenei soifuaga faaletino. E finagalo lo outou Tama Faalelagi ina ia olioli o outou olaga ma ia toe taitaiina atu outou i Lona afioaga. O faaiuga tou te faia i le taimi nei, o le a fuafua ai le tele o mea o le a mulimuli mai i o outou olaga faapea foi ma le faavavau” (Mo Le Malosi o le Autalavou [2001], 2). “Ua i ai sa outou tiutetauave e aoao ai pe o a mea e finagalo le Tama Faalelagi tou te faia ona faia ai lea o le mea sili tou te mafaia e mulimuli ai i Lona finagalo” (Perisitua Arona: Faataunuuina o O Tatou Tiute i le Atua [2002], 4).
E matua loloto lo’u agaga faafetai i le taitaiga musuia a Peresitene Gordon B. Hinckley, le Perofeta a le Atua i o tatou taimi, faapea foi ona fesoasoani tamalii. E fesoasoani lo latou silafia faaperofeta tou te iloa ai le faaiuga mai le amataga.
E alofa le Alii ia te outou; o le ala lea ua Ia tuuina atu ai ia te outou ia poloaiga ma upu a perofeta e taialaina ai outou i la outou faigamalaga i le olaga. O nisi o taiala e sili ona taua mo le olaga, o loo maua i le tamaitusi Mo Le Malosi o le Autalavou. O foliga o lena tamaitusi ua fetaui lelei ai mo le faaupuga faatusi paia, “O mea iti foi e tutupu mai ai mea tetele” (MFF 64:33). O le tamaitusi lava ia e le tele sona tau, atonu e na o ni nai sene. Ae o aoaoga faavae ma mataupu faavae o loo tuuina mai ai, o se ’oa e le mafaatauina. O alii talavou ua atoa le 18 pe matutua atu foi, afai ua le o toe i ai sau tamaitusi lenei, ia mautinoa nei ua maua sau tusi, ia tausia, ma faaaoga. E matua taua tele lenei tamaitusi mo soo se vaitausaga; o loo i ai tulaga faatonuina, o ni faatusa paia o lo tatou auai i le Ekalesia.
Ou te faatepa outou i le mea moni faapea o le Mo Le Malosi o le Autalavou, o le Tusitaiala mo Matua ma Taitai o le Autalavou ma le pepa faataga o le malumalu a le Ekalesia, o loo i ai se ata o le Malumalu o Sate Leki ua lolomi ai i luma. O le malumalu o le sootaga lea i le va o augatupulaga, i le olaga nei ma le faavavau. Ua faapaiaina malumalu uma mo le faamoemoega e tasi: ina ia fesoasoani i le faataunuuina o le galuega paia ma le mamalu o le Atua, lo tatou Tama Faavavau, “ia faataunuu le faaofuina o le tagata i le tino ola pea ma le ola faavavau” (Mose 1:39). O nei malumalu o ni maota paia e tali ai fesili o le faavavau, e aoao ai upumoni, ma faia ai sauniga ina ia mafai ai ona tatou ola ma se malamalamaaga i lo tatou tofi paia o ni fanau a le Atua ma se malamalama e mafai ona avea i tatou ma tagata faavavau. E fesoasoani le maota o le Alii tou te iloa ai le iuga mai le amataga.
E faapei lava ona paia o malumalu o le Atua, e faapena foi o outou tino faaletino. Fai mai le Aposetolo o Paulo:
“Tou te le iloa ea, o lo outou tino o le malumalu lea o le Agaga Paia ua i totonu ia te outou, o loo ua ia te outou mai le Atua, e le aia foi outou ia te outou?
“Aua ua faatauina outou i le tau; o lenei, ia outou vivii atu i le Atua i o outou tino ma o outou agaga, o mea a le Atua ia” (1 Korinito 6:19–20).
O’u uso pele o e ua umia le perisitua o vaitausaga uma i vaega uma i lenei lalolagi atoa, ina tatou faaaoga ia o tatou manatu, o o tatou mafaufau ma loto, ma o tatou tino faatasi ai ma le migao ma le mamalu ua tatau ai mo se malumalu paia ua tuuina mai mo i tatou e lo tatou Tama Faalelagi.
Ua folafola atu ia te outou e perofeta o o tatou vaitaimi, a’u uo e, afai tou te tausisia tulaga faatonuina o loo tuuina atu i le Mo Le Malosi o le Autalavou ma “ola i upumoni o loo i tusitusiga paia, o le a mafai ona e faia i le poto ma le tomai e sili atu ia galuega o lou olaga ma onosaia tofotofoga i se lototele e sili atu. O le a e maua le fesoasoani a le Agaga Paia… . O le a e agavaa e alu atu i le malumalu mo le mauaina o sauniga paia. E mafai ona e maua nei faamanuiaga atoa foi ma isi faamanuiaga e tele” (Mo Le Malosi o le Autalavou, 2–3).
Ua tatou iloa e tausia e le Atua Ana folafolaga. E ao ona faataunuu la tatou vaega ina ia maua ai Ana faamanuiaga. Na aoao mai e le Perofeta o Iosefa Samita, “Pe a tatou maua foi soo se faamanuiaga mai le Atua, e maua i le usiusitai i le tulafono lea e autu ai” (MFF 130:21).
O tagata uma o le au paia e fia o i le malumalu, tusa lava pe o le a le matua, e ao ona sauniuni mo lenei aafiaga paia. O le a i ai fesili patino e fesili atu ai lou epikopo ma le peresitene o le siteki, o e o loo umia ia ki o le pule o le perisitua ma o faamasino i le Ekalesia. O nei fesili taua e aofia ai: O e faamaoni? O e ola mama? O e tausia le Upu o le Poto? O e tausia le tulafono o le sefuluai? Pe e te lagolagoina taitai o le Ekalesia? O tali i nei fesili, e atagia mai ai ou uiga faaalia ma au faatinoga.
Outou na alii talavou laiti, atonu tou te le o iloa o tulaga faatonuina ua faia e le Alii i fesili o le pepa faataga o le malumalu, e toeitiiti lava tutusa lelei ma fesili i tulaga o loo maua i le Mo Le Malosi o le Autalavou. O taimi e taugalemu ai ma taimi foi o tofotofoga pito i maoa’e, o le a fesoasoani ai nei tulaga faatonuina ma le taitaiga a le Agaga Paia e te faia ai filifiliga tonu e uiga i lau a’oga, o au uo, ofu ma foliga vaaia, o mea faafiafia, faasalalauga ma le initoneti, o lau gagana, tafaoga faamasani, mama atoatoa i tulaga feusuai, faamaoni, tausia o le aso Sapati, ma le auauna atu i isi. O le auala e te faaaogaina ai nei tulaga faatonuina, o le a ta’u atu ai pe o ai oe ma le ituaiga o tagata o loo e saili ia avea ai oe.
E finagalo le Alii ia te outou, a’u uo talavou e, ina ia outou naunau ma o outou loto atoa e tausia ma ola ai i nei upumoni o le talalelei o loo maua i tusitusiga paia. A outou faia lenei mea, o le a mamao atu la outou vaai nai lo le taimi nei, ma o le a outou iloa atu ai o outou lumanai matagofie ma le ofoofogia faatasi ai ma avanoa ma tiutetauave. O le a outou naunau e galulue malosi ma onosai mo se taimi umi, ona outou maua ai lea o se uiga faaalia lelei mo le olaga. O le a e iloa ai o lou auala i le olaga, o le a e tau atu ai muamua i le maota o le Alii ona e auauna atu ai lea o se faafaifeautalai faamisiona, e avea ma sui o le Faaola i soo se mea o le a Ia auina atu i ai oe. A maea lau misiona, o le a e faatulagaina ma fuafua lou olaga e faavae i faatulagaga lava na. O le mea lea, i lou lava mafaufau o le a e iloa atu ai lou ulufale atu i le maota o le Alii mo se faaipoipoga ma se aiga e faavavau. O le a suia mea e te faamuamua o le olaga e faafetaui i mea e faamuamua ua tuuina mai e le Faaola ia i tatou. Ma o le a faamanuiaina oe e le Atua ma tatalaina mata o lou malamalama ina ia mafai ona e iloa atu ai le iuga mai le amataga.
O le ola ai i tulaga ua faatonuina mai i le Mo Le Malosi o le Autalavou, o le a e maua ai lagona lelei mo oe lava. Ia tusia na tulaga i lou loto ma lou mafaufau, ma ia ola e tusa ai. Ia faatusatusa na faatulagaga taitasi i le mea lena ua e i ai i le taimi nei. Faalogo i le Agaga, o ia lē aoao atu ia te oe le mea e ao ona e faia ina ia avea atili ai e faapei o Iesu. Afai e te iloa se tulaga e manaomia ona sui, ia sui loa; aua le faatuutuu. Faaaoga le salamo moni ma le meaalofa ma le mana o le Togiola a Iesu Keriso, e tafi ese ai na mea o loo faalavelave i lou taunuu atu i le mea tonu e te gafatia. Afai e foliga mai e faigata lenei taumafaiga ia te oe, toe taumafai; e aoga lava. Ua i ai se folafolaga a le Alii e faapei foi ona Ia faia mo le Perofeta o Iosefa: “Ia e iloa lo’u atalii e, e tuuina atu ia te oe le poto masani ona o ia mea uma, e avea mou lelei” (MFF 122:7).
O lenei, o’u tamamatutua pele, tamā, uso o tama ma tuagane o tina, uso, ma uo a o tatou tagata talavou, e mafai ona avea i tatou ma fesoasoani tele i lenei taumafaiga. Sa aoao mai e le Tupu o Peniamina, a oo ina liua moni ia matua, o le a latou “aoao [a latou fanau] ia savavali i ala o le upumoni ma le faautauta [ma] latou te aoao atu foi ia te i latou ia fealofani, ma auauna le tasi i le tasi” (Mosaea 4:15). Sa ta’ua e faapea, “O le aoao atu e ala i faataitaiga o se tasi lea auala e aoao atu ai.” Ou te fai atu, “O le aoao atu e ala i faataitaiga o le auala sili lea e aoao atu ai.”
Faamolemole ia aoao o tatou tupulaga talavou e ala i au faataitaiga o se tasi e umia ma le agavaa le perisitua. O lou soifua lelei, o lou alofa i le Atua ma ou uso a tagata, o lou faaaogaina o le molimau i le talalelei toefuataiina a Iesu Keriso, o se mana malosi e tosina mai ai o tatou talavou, ma o le a fesoasoani ai ia latou iloa atu ai le iuga mai le amataga.
A’u uo talavou e, faamolemole ia faaatoatoaina o outou olaga i le ola ai i nei tulaga faatonuina ua tuuina mai e perofeta o o tatou taimi. A o outou faia lenei mea, o lea laasaga ma lea laasaga, o lea aso ma lea aso, o le a e faamamaluina ai le perisitua ma o le a e saunia foi e faia se suiga i le lalolagi. O le a e i ai foi i le ala sa’o e toe foi atu ai ma le mamalu i lo tatou Tama Faalelagi.
O’u uso a auauna e i le perisitua, ou te folafola atu ia te outou i le aso e faapea afai tou te mulimuli ai i lenei faatulagaga, o le a fesoasoani le Alii ia te outou ina ia tele atu mea tou te ausia i o outou olaga. O le a fesoasoani o Ia ia te outou ina ia outou iloa atu ai le iuga mai le amataga!
Ou te molimau atu ai i nei mea o se Aposetolo a le Alii, lo tatou Faaola, i le suafa paia o Iesu Keriso, amene.