O Lau Misiona O Le a Suia ai Mea Uma
O mai ma ia avea ma vaega o le augatupulaga o faifeautalai e sili ona maoae ua iloa e le lalolagi.
Ua atoa nei le tausaga talu ona lagolagoina au i le konafesi aoao. Ou te faafetai tele mo lenei tausaga ma mea uma ua ou iloaina ai. Ou te alofa i le Alii ma ou te matuai faafetai mo Lana taulaga ma Lana talalelei. Ou te alofa ia Peresitene Hinckley ma lagolagoina o ia o se perofeta a le Alii i le lalolagi. Faatasi ai ma le Au Paia faamaoni i soo se mea, ou te molimau e uiga i perofeta ma aposetolo i o tatou taimi ma ou te ofoina atu lo’u ola i Lana galuega.
I nai tausaga ua mavae, sa ou faatalanoaina ai faifeautalai. Na agi atu se matagi aisa a o agai mai ma foi atu faifeautalai i le aso atoa. Na suia le matagi mai le timu aisa i le kiona ma toe liua foi. Na taunuu atu nisi faifeautalai i nofoa afi mai taulaga taulalata ane ma savavali atu i le falesa i le matagi. O isi na tietie atu i a latou uila vilivae. E toetoe lava o i latou uma sa tiotio ma fiafia. O i latou o faifeautalai a le Alii. Sa ia i latou Lona Agaga ma sa latou lagonaina le olioli i Lana galuega e ui lava i tulaga sa latou feagai.
A o faamaeaina e soa taitasi a latou faatalanoaga, o le a le galo lava ia te au le vaai atu ia i latou a o latou toe foi atu i le matagi e talai atu le talalelei ma faia le mea na valaauina ai i latou e le Alii e fai. Sa mafai ona ou iloaina lo latou naunautai ma le maelega. Sa mafai ona ou lagonaina le alofa sa ia i latou mo tagata ma mo le Alii. A o o’u vaavaai a o latou tuumuli atu, sa oo ifo ia te au se alofa lofituina mo i latou mo le mea o loo latou faia.
I se taimi mulimuli ane i lena po, sa ou auai atu ai i se sauniga perisitua i lena lava taulaga. Sa faaauau pea le matagi ma ua toetoe lava a kiona faasoloatoa. I le taimi o le pese amata, sa ulufale atu ai i le falelotu le peresitene o le paranesi pito i laitiiti ma aupito mamao faapea ma ona fesoasoani faifeautalai e toalua, o Elder Warner ma Elder Karpowitz. Ina o le a latou nonofo i lalo, sa faapea ona toese e nei faifeautalai lelei e toalua o la pulou ma totinilima o le taumalulu. Sa la toese o la ofu mafanafana ma nonofo i lalo. E pei o faifeautalai sa matou feiloai muamua i lena aso, e ui lava i le tau ae sa fiafia lava nei faifeautalai. Sa latou lagonaina le Agaga o le Alii i o latou olaga. O le auauna atu i le galuega a le Alii, sa latou lagonaina ai se alofa mautinoa ma le mafanafana o le olioli lea e faigata ona faamatalaina.
A o o’u vaavaai atu i nei faifeautalai talavou ma le maoae i lena afiafi, sa ou matauina ai se aafiaga tulaga ese. I la’u vaai faalemafaufau, sa ou vaaia ai faifeautalai i le misiona atoa o o atu i lena po malulu. O nisi o i latou sa tu’itu’i i faitotoa ma sa teenaina a o latou taumafai e aoao atu le talalelei a Iesu Keriso. O nisi sa i fale po o fale mautotogi o loo aoaoina tagata taitoatasi ma aiga. E ui i tulaga sa latou feagai, ae sa latou faia le mea sa latou mafaia ina ia aoao atu ai le talalelei a Iesu Keriso ia i latou o e o le a faalogo i ai, ma sa latou fiafia. Na oo mai i lo’u loto se faalogona lea e le mafai ona ou faamatalaina atoatoa.
Sa ou lagonaina e ala i se meaalofa maoae a le Agaga, Lona alofa, le alofa mama o Keriso lea sa ia te Ia mo faifeautalai faamaoni i soo se mea ma na suia ai au e faavavau. Sa ou malamalama i le taua o faifeautalai taitoatasi ia te Ia. Sa ou mauaina se malamalamaaga o le mea na faamatalaina e perofeta e faapea o le augatupulaga sili lenei ona maoae o faifeautalai ua iloa e le lalolagi (tagai M. Russell Ballard, “O Se Tupulaga Sili Ona Maoae o Faifeautalai,” Liahona, Nov. 2002, 46). Sa amata ona ou malamalama i le mafuaaga e moomia ai ona sii i luga le fua ina ia mafai ai e faifeautalai i soo se mea ona maua le aia i le puipuiga, taitaiga ma le fiafia lea e o mai faatasi ma le Agaga o le Alii. Sa amata foi ona ou malamalama i le mafuaaga e tatau ai ona tatou faia mea uma i le avea ai ma matua, epikopo, peresitene o siteki ma isi taitai ina ia fesoasoani ai i tagata talavou o le Ekalesia ia agavaa mo faamanuiaga o le auaunaga faafaifeautalai.
Na faamatalaina e Peresitene Hinckley le mea e tupu i le loto o soo se faifeautalai e tautino atu lona ola ma ana galuega i le Alii ina ua ia talanoa i ona lava aafiaga faafaifeautalai i le amataga. O taimi amata o lana misiona sa ia lagona ai le lotovaivai. Sa faigata le galuega ma sa le fia faalogo tagata. Ae peitai, na oo mai se taimi na liua ai le lotovaivai e avea ma tautinoga. Ia te ia, o le amataga na mafua mai lea i se tusi mai lona tama lea na ia faitauina, “Le Pele Gordon, ua ou mauaina lau tusi… . E na o le tasi lava la’u fautuaga: Ia faagalo oe ae alu e galue.” I le faamatalaina o le mea lea na sosoo ai, na ia faapea mai ai:
“Sa ou tootuli i o’u tulivae i totonu o lena tamai potumoe … ma folafola atu e faapea o le a ou taumafai e tuuina atu lo’u tagata i le Alii. Na suia le lalolagi atoa. Na mavae atu le puao. Na amata ona toe susulu le la i lo’u olaga. Sa i ai so’u naunautaiga fou. Sa ou vaaia le matagofie o le atunuu. Sa ou vaaia le maoae o tagata. O mea uma na tutupu ia te au talu mai lena taimi sa lelei lava ma e tau uma atu lava i lena faaiuga na ou faia i totonu o lena tamai fale” (i le Mike Cannon, “Missionary Theme was Pervasive During Visit of President Hinckley,” Church News, Sept. 9, 1995, 4.)
Na faaauau le saunoaga a Peresitene Hinckley i le faapea mai: “E te manao ia e fiafia? Ia faagalo lou tagata ma ia e tuu atu uma oe lava i lenei galuega tele, ma lolo atu au taumafaiga i le fesoasoani atu i tagata” (i le Church News, Sept. 9, 1995, 4).
Ou te fia faapea atu i alii talavou uma, tou te mananao ina ia fiafia? Afai o lea, o mai ma auai faatasi ma i matou le au malolosi e 52,000 ma auauna atu i o outou uso a tagata i le avea ai ma se faifeautalai mo le Alii. Ia faia se tautinoga e tuuina atu le lua tausaga o lou olaga i le Alii. O le a suia ai mea uma. O le a e fiafia ai. O le a mavae atu ai le puao. O le a e fiafia ai i le aganuu ma tagata o le a valaauina oe e auauna atu i ai. O le a faigata le galuega, ae o le a tele foi le faamalieina ma le olioli a o e auauna atu. Afai e te faamaoni i le taimi o lau misiona ma mulimuli ane, o le a e toe tepa i tua i lou olaga ma faapea atu faatasi ma Peresitene Hinckley, “O mea lelei uma na tutupu ia te au talu mai lena taimi e mafai ona tau uma atu i lena faaiuga ina ia auauna atu i se misiona ma tuuina atu lo’u ola i le Alii.”
Ua faamanatu mai e Peresitene Hinckley ia i tatou e faapea e le na o alii faifeautalai talavou e aia i nei faamanuiaga. E maoae foi le tautua a ulugalii ma o loo matuai manaomia lava. E ui o tuafafine talavou e le o faamalosia, ae na saunoa le Peresitene: “Matou te manaomia ni tamaitai talavou. E maoae se galuega latou te faia” (“Mo Epikopo o le Ekalesia,” Fonotaga Faaleaoaoga a Taitai i le Lalolagi Atoa, 19 Iuni, 2004, 27). Matou te iloa foi e i ai nisi o e, ona o le soifua maloloina po o nisi mafuaaga, ua tuusaunoa aloa’ia ai mai le auaunaga. Matou te alolofa ia i latou ma iloa o le a saunia e le Tama Faalelagi ia faamanuiaga e tauia ai i latou i o latou olaga a o latou tautua atu i isi ala ma faamaoni i o latou olaga.
I le tausaga talu ai, na talosaga atu ai Elder Ballard i matua, epikopo ma peresitene o paranesi ina ia galulue faatasi ma fesoasoani i se alii talavou se toatasi, e faaopoopo atu ia i latou o e ua masani ona saunia, ina ia faaagavaaina ma ia valaauina mai uarota ma paranesi taitasi o le Ekalesia. (tagai i le “Toe Tasi,” Liahona, Me 2005, 69) E toatele na tali atu. I le avea ai ma taitai, e tatau ona tatou toe ta’utino atu i tatou lava i lenei talosaga.
Uso e ma tuafafine, e toatele epikopo lelei sa latou faia le mea na talosaga atu ai Elder Ballard mo se taimi umi. I le tolusefuluono tausaga talu ai, na telefoni atu ai Epikopo Matheson i lo matou fale ma valaaulia au i lona ofisa. Talu ai ona o tulaga i le lalolagi, sa faatapulaaina ai le aofai o faifeautalai e mafai e soo se uarota ona auina atu, ae sa i ai se avanoa faaopoopo sa i ai, ma sa ia te ia le tiutetauave e fautuaina atu ai se isi faifeautalai se toatasi. Sa ia ta’u mai ia te au faapea sa latou tatalo ma ona fesoasoani. Sa ia ta’u mai ia te au sa faagaeetia lava o ia e faapea o le taimi lenei ua finagalo ai le Alii ina ia ou auauna atu i la’u misiona. Sa ou te’i. E lei i ai lava se tasi muamua na faapea mai ia te au o loo i ai se mea o loo finagalo le Alii ou te faia. Sa ou lagonaina le Agaga o le Alii o molimau mai ia te au faapea e tatau ona ou alu, ma e tatau nei ona ou alu. Sa ou faapea atu i le epikopo, “Afai e manao le Alii ia te au ou te auauna i se misiona, o le a ou alu.”
Mo a’u, na suia mea uma. Na mavae moni lava le puao ma oo mai ai le fiafia ma le olioli i lo’u olaga. Po o fea lava le itu, ae o mea lelei uma na tupu talu mai lena aso na oo mai talu le tautinoga na faia ina ia auauna atu i le Alii ma lana fanau ma tuuina atu le lua tausaga o lo’u olaga i Lana galuega.
Ou te toe faapea atu: O mai ma aufaatasi ma i matou. O mai ma ia mama. O mai ma ia fiafia. O mai ma tofo i le mea tonu lava na fetalai ai le Alii o le “mea sili ona aoga” (MFF 15:6) ia te oe i lenei taimi o lou olaga. O mai ma ia avea ma vaega o se tupulaga sili ona maoae o faifeautalai ua iloa e le lalolagi.
O le galuega lenei a le Alii. O loo soifua lo tatou Tama o i le Lagi, ma o Lona Alo o Iesu Keriso, o loo taitaia ma faatonutonuina lenei galuega i le taimi nei. Ou te molimau atu ai i nei mea, i le suafa o Iesu Keriso, amene.