E I Ai Sou Tofi Tamalii

Julie B. Beck

Fesoasoani Muamua i le Au Peresitene Aoao o Tamaitai Talavou

E mafai ona e aoao atili e uiga i lou olaga ma lau misiona i le lalolagi, e ala i le saunia e maua ma suesue i lou faamanuiaga faapeteriaka.

O le tausaga na te’a nei sa ou vaaia ai le malamalama o le Atua o susulu mai i foliga o outou na tamaitai talavou i le tele o taimi. Sa ou vaaia i ni faigalotu tetele mai Brazil i le Dominican Republic. Sa ou vaaia a o outou tuleia taavaletosolima i alasopo faapaionia. Sa ou vaaia lo outou susulu a o tatou pepese ma taaalo faatasi i le tolauapiga. Sa ou vaaia lena malamalama o le Atua o susulu i foliga o teine i vaipapatiso o malumalu o Mekisiko e oo mai i Iuta. O lo outou malamalama ua faia ai se suiga mo a’u ma le toatele o isi. Ua ia te outou le malamalama, aua o outou moni lava o ni afafine agaga o le Atua, o fanau a ni matua ua faaeaina¹ ua i ai se natura paia ma se taunuuga e faavavau.² Na outou mauaina la outou uluai lesona i le lalolagi o agaga mai o outou matua faalelagi.³ Sa auina mai outou i le lalolagi e faata’ita’i ai outou lava.⁴

Ua outou i ai i se vaitau o o outou olaga o le a e faia ai nisi o au filifiliga aupito taua. Talu ai ona ua lofituina outou i le tele o savali sese e uiga po o ai oe, o lea e te manaomia ai nisi taitaiga faaopoopo. E mafai ona e aoao atili e uiga i lou olaga ma lau misiona i le lalolagi ma le malamalama o loo i totonu ia te outou, e ala i le saunia ia maua ma suesue i lou faamanuiaga faapeteriaka.

E le faapea ua e laitiiti tele e te amata ai ona aoao e uiga i faamanuiaga faapeteriaka.⁵ Ua ou fiafia ona sa maua lo’u faamanuiaga a o le’i oo ina matua ta’a’ina a’u i savali fenumiai ma le le sa’o a le lalolagi. Na ou sau mai lena aafiaga ma le faamautinoaga mafanafana e alofa le Alii ia te au ma silafiaina au, ma mai lava i lena aso, na amata ai ona ou mafaufau e le aunoa i tulaga o le faavavau nai lo le lauiloa.

O le vaitau lenei mo tamaitai talavou e sauniuni ai ma maua ai o latou faamanuiaga faapeteriaka. E mafai ona fesoasoani atu lou epikopo ma ou matua e filifili po o le fea le taimi e talafeagai mo oe, aua o le matua ma le saunia e eseese lava i tagata taitoatasi.⁶ A e malamalama i le uiga ma le faamoemoega o se faamanuiaga faapeteriaka, ma i ai se naunau moni e faia le galuega a le Alii, ua tatau ona lava lou matua mo le mauaina o lou faamanuiaga.⁷ O nisi taimi e faatalitali ai tagata mo se taimi umi nai lo le taimi manaomia mo le mauaina o o latou faamanuiaga, ma le manatu e tatau ona latou agavaa mo lea faamanuiaga i se ala faapitoa. Afai e mafai ona e agavaa mo le mauaina o se pepa faataga e faia ai papatisoga i le malumalu, o lona uiga ua tatau foi ona mafai ona e agavaa mo se faamanuiaga faapeteriaka. E taua lou saunia mo lou faamanuiaga i le anapogi ma le tatalo ina ia faamaulaloina ma aoaoina gofie lou agaga. O au lava sauniuniga patino e matuai taua lava.

A maua lou faamanuiaga, e maua sina vaaiga o le faavavau. E le iloa e le peteriaka e tuuina atu lou faamanuiaga, pe o le a lou faamanuiaga seia vagana ua ia tuuina atu. E faalagolago o ia i le Agaga e ta’uina atu ia te ia mea e ta’u atu ia te oe. I lou faamanuiaga e ta’uina atu ai ia te oe lou tupuaga i le aiga o Isaraelu. O lou gafa faaleaiga lena ma o nisi taimi e ta’ua ai lou gafa faaleaiga o se ituaiga. O ituaiga uma lava e tau lava i tua i le peteriaka maoae o Aperaamo. E taua lou gafa. O lona uiga, e aofia ai oe i folafolaga na tuuina atu ia Aperaamo e faapea, o ia o le a faamanuiaina ai nuu uma o le lalolagi.⁸

O lou gafa o se “sootaga i le toto.”⁹ O le mea lena ua avea moni ai outou o “fanau a le au perofeta”¹⁰ ua i ai faatasi ma se tofi tamalii. O le mafuaaga lena e masani ai ona matou fai atu o outou o le “tupulaga o tofi tamalii”¹¹, ma o se “augatupulaga tautupu, ma le filifilia.”¹²

Fai mai sa’u uo: “Ina ua ou auai i le Ekalesia i le 16 o o’u tausaga, sa amata ona ou aoaoina lo’u faasinomaga. Sa maua lo’u faamanuiaga faapeteriaka ma sa ta’u mai ai o a’u o se tasi o le aiga o Isaraelu. O le taimi lena, ou te le i iloaina le uiga o lena mea, peitai ina ua mavae tausaga sa ou aoaoina ai, ua ia te au se faamanuiaga sili ou te tupuga sa’o mai i le au perofeta. E i ai so’u tupuaga taua ma ni avanoa silisili.”

E pei foi o Aperaamo, e te sailia se faamanuiaga ina ia mafai ona e maua le malamalama sili atu ma maua faatonuga mai le Alii.¹³ A oo ina maua lou faamanuiaga, o le a e iloa ai e silafia oe e le Alii i lou igoa. I ona popofou o le Ekalesia, e toatele tagata sa mananao ia Iosefa Samita e fesili atu i le Alii mo se taitaiga faapitoa i o latou olaga. O nisi o na faaaliga ua avea nei ma vaega o le Mataupu Faavae ma Feagaiga. E faapei foi o uluai tagata o le Au Paia, e mafai ona e manatu i lou faamanuiaga faapeteriaka, o lau lava “tusi paia patino.”¹⁴ E tatau ona e tausia i le paia ma aua nei e faamatalaina i fafo atu o lou lava aiga patino.¹⁵

E mafai e le peteriaka ona mua’i vaai i le gasologa ma tulaga o lou olaga, ma e mafai foi ona ia tuuina atu se faamanuiaga e faatatau i na tulaga. Sa faamatala mai e se tasi tamaitai talavou ia te au, “sa i ai mea na ta’ua i lo’u faamanuiaga e faatatau ia te au, e oo lava i o’u matua la te le iloa.” Fai mai Peresitene James E. Faust, o faamanuiaga faapeteriaka taitasi, o se faaaliga musuia ma le “patino mai le Atua.” O se “fetu e mulimuli ai, … o se taula foi mo o tatou agaga.” E faaalia mai ai o tatou tomai ma mea tatou te gafatia.¹⁶

Fai mai Peresitene Packer o o tatou faamanuiaga o se “[parakalafa] mai le tusi o mea [tatou] te gafatiaina.”¹⁷ E faaigoa e Peresitene Monson o tatou faamanuiaga “o se Liahona o le malamalama.”¹⁸

Talu ai o le faamanuiaga faapeteriaka e le o se valoaga o mea uma o le a tutupu i le olaga o le tagata e ona le faamanuiaga, o lea e e tatau ai ona tatou saili e mulimuli i le taitaiga a le Agaga Paia ina ia maua ai se malamalama sili atu mo o tatou olaga. O aoaoga o le talalelei, o se taiala lea e le aunoa mo se malamalama atoa i lo tatou taunuuga ma avanoa. Mo se faataitaiga, atonu o le a le ta’ua i faamanuiaga faapeteriaka faapea o le a faaipoipo se tagata po o le a i ai se fanau [a se tagata], peitai ua aoaoina i tatou i le talalelei e faaipoipo i le malumalu ma ia fai ni o tatou aiga. E mafai ona tatou mulimuli lava tatou ia i nei aoaoga o le talalelei, e aunoa ma se taitaiga patino faaletagata.

A o ou i ai i le aoga maualuga, sa faalau mai e se faufautua ia togi o a’u suega ma fai mai, na te le’i manatu o le a ou mafaia le aoga i le kolisi. Peitai, ina ua maea ona ou suesue ma le agaga tatalo i lo’u faamanuiaga faapeteriaka, sa ou lagonaina e le tatau ona ou lafoa’ia la’u sini o le olaga. O lea, talu ai sa i ai so’u malamalamaaga i le fuafuaga a le Alii mo au, sa i ai le faamoemoe i lo’u loto ma sa mafai ai ona ou agai atu pea i luma ma le mautinoa. Sa ou iloa sa mafai ona faamanuiaina a’u i lena tulaga, ma maua ai lo’u tipeloma i le iunivesite. A tatou iloa pe o ai i tatou, ma pe o le a foi le mea e tatau ona tatou fai, ona faigofie lea ona faia o faaiuga taua e uiga i a’oga, o galuega, ma faaipoipoga. E faigofie atu ona faasusulu atu o tatou malamalama i o tatou aiga, o a tatou uo, ma isi nofoaga uma.

Ua fetalai mai le Faaola: “E moni, e moni, ou te fai atu ia te outou, ou te tuuina atu ia te outou e fai ma malamalama o lenei nuu. E le mafai ona lilo le aai ua tu i luga o le mauga.

“Faauta, pe tutuina le lamepa e tagata ma tuu ai i lalo o le mea e fua a’i saito? E leai, a e tuu i luga o le tuugalamepa ia pupula atu ai i e o i le fale uma;

“O le mea lea ia faapea ona pupula atu ai lo outou malamalama i luma o lenei nuu, ina ia latou iloa a outou galuega lelei, ma vivii atu ai i lo outou Tama o i le lagi.”¹⁹

A e iloaina pe o ai oe ma pe o le a foi le mea e tatau ona e faia i lou olaga, o le a e le manao e nana lou malamalama.

Mo se faataitaiga, o le a e le manao e nana lou malamalama e ala i le faia o lavalava e tuuitiitia ai ou tulaga gafatia tamalii. O le a e le faaaogaina le gagana po o ni tala e le lelei, pe faamataga lou tino i ni pe’a po o isi faiga ta’uvalea mo se afafine o se aigatupu. O le a e le faata’uvaleaina foi lou tofi e ala i lou tuuina i totonu o lou tino o soo se fualaau oona e faatama’ia ai. O le a e le matamata foi pe auai i soo se amioga e le mama, ma ta’ufaatauvaaina ai lou tulaga tamalii. O le a outou sailia mea uma e logoleleia ma mama ma matagofie ma tauleleia²⁰ aua ua outou iloa o loo ia te outou se tofi tamalii.

O outou o fanau faapelepele o le folafolaga. Afai tou te tausia tulafono ma poloaiga a le Alii ma usitai atu i Lona siufofoga, ua Ia folafola mai o le a Ia faasilisiliina outou i nuu uma lava i le viiga ma le mamalu ma le faaneetaga.²¹ E tatau ona musuia oe e lou faamanuiaga faapeteriaka, ina ia faia suiga i lou olaga pe a manaomia ai. O loo i ai folafolaga ia e na o lou faamaoni e mafai ai ona e maua. Afai e te le faamaoni, e le mafai ona e fuafua e faataunuuina lou faamanuiaga.

O nisi taimi e manatu ai tamaitai talavou faapea, talu ai ona ua latou faia ni mea sese, ua le agavaa i latou e maua se faamanuiaga faapeteriaka pe ua latou le faaagavaaina i latou lava mai faamanuiaga ua uma ona tuuina atu ia te i latou. Ia manatua, o le aoaoga faavae lava a le Alii o Iesu Keriso, o le faatuatua lea ia te Ia ma Lona mana e togiola mo a tatou agasala. “E manao satani ia e mafaufau e le mafai ona e salamo, peitai e matua sese lava lena mea.”²² A tatou aai ma feinu i le faamanatuga i vaiaso taitasi, tatou te tautino atu e suia o tatou olaga ia sili atu. E tatau ona tatou taumafai e le aunoa e avea ma se tagata fou, ua avea atili e faapei o lo tatou Faaola o Iesu Keriso. Ua ta’ua e le Aposetolo o Paulo lenei mea o le “[savavali] i le ola toefuataiina.”²³ Afai ua e faia ni mea sese ogaoga e ono aveesea ai oe mai lou tofi tamalii, ia e naunau e ave atu ou loimata o le faanoanoa i lou epikopo. O ia o lau uo i le faagasologa o le salamo ma ua vaetofia e fai ma faamasino iinei i le lalolagi e fai ma sui o le Faaola, o le Faamasino e Faavavau. O le salamo e faapei o se titina [eraser], ma e mafai ona tape ai se vaitusi! E le faigofie, ae e mafai.²⁴ Ua fetalai mai le Alii, “O le ua salamo i ana agasala, e faamagaloina o ia, ma o a’u, le Alii, ou te le toe manatua lava.”²⁵

Tamaitai talavou, o le a fesoasoani lou faamanuiaga faapeteriaka e te iloa ai e i ai sou tofi tamalii. A oo ina e matua, o le a e vaaia le tino mai o valoaga o lou faamanuiaga i lou olaga. O loo i ai mea taua ma le matagofie a le Alii tou te faia. O lo outou taimi lenei tou te “tutula’i ai ma susulu atu, ina ia faia [lo outou] malamalama ma tagavai mo atunuu.”²⁶ “O le mea lea ia faapea ona pupula atu ai lo outou malamalama i luma o lenei nuu, ina ia latou iloa a outou galuega lelei, ma vivii atu ai i lo outou Tama o i le lagi.”²⁷ I le suafa o Iesu Keriso, amene.