O Le Taimi Lenei e Auauna Atu Ai i se Misiona!
O eria faatupu fiafia mo le galuega faamisiona i le lalolagi atoa, e faatagaina ai musumusuga a le Alii e valaauina ia alii ma tamaitai talavou ma ulugalii naunautai i tofiga faigata.
O le a faigata ona mafaufau i se isi mea e sili ona manaia, e fai e se alii ma se tamaitai talavou, po o se ulugalii i le lalolagi i aso nei, nai lo le avea ma se faifeautalai faamisiona mo le Ekalesia a Iesu Keriso o le Au Paia o Aso e Gata Ai. O le savali o le talalelei toefuataiina tatou te faasoaina atu e taua tele. E mai le Atua lo tatou Tama Faavavau mo Lana fanau uma i luga o le fogaeleele ma e taulai atu i Lona Alo Pele o Iesu Keriso. A malamalama ma ola ai i lena savali, e mafai ona suia faigata i le filemu, faanoanoa i le fiafia, ma maua ai tali i luitau faifaipea o le olaga.
Ua i ai sa tatou faatonuga sili ona manino mo le manuia o le galuega faafaifeautalai. Ua tuuina mai e le taiala o le Talai La’u Talalelei ma punaoa na faia e faaaoga faatasi ai. O lesona fou ua sili ona aoga e faavae i le aoao atu e ala i le Agaga, nai lo le taulotoina. Ua maoae ai le alualu i luma o le faasoaina atu ona talalelei i le lalolagi atoa. Na aoaoina ma le toto’a ia peresitene o misiona taitasi i le auala e faaaoga ai tusi fou. O le taunuuga, ua i ai se vaega o peresitene o misiona ua maoae le agavaa, faamaoni, ma naunau e musuia ma uunaia malosi a latou faifeautalai.
O le suesueina i le lalolagi atoa ma le faaaogaina o auala o loo i le Talai La’u Talalelei e faifeautalai uma lava, ua faamalosia ai lo tatou gafatia e folafola atu ai le savali o le Toefuataiga, e aoao atu le ata o le faaolataga, ma isi mataupu faavae o le talalelei. O le siitia o le tulaga o le agavaa ua maua ai ni taunuuga se tele. Ua faateleina auaunaga faamaoni i le galuega, ua malolosi atu mafutaga faalesoa, ua sili atu ona lelei le aoao atu, ma ua alualu i luma le faatumauina o tagata liliu mai.
O le taitaiga aoao ua tuuina atu e taulimaina ai le galuega faafaifeautalai e le mafaatusalia. Ua lagolagoina ai taumafaiga uma faafaifeautalai i le lalolagi atoa e ala atu i Au Peresitene o Eria, o Peresitene e toafitu o le Au Fitugafulu, o le Korama a le Toasefululua, ma le taula’i patino atu i ai o le Au Peresitene Sili.
O eria faatupu fiafia mo le galuega faamisiona i le lalolagi atoa, e faatagaina ai musumusuga a le Alii e valaauina ia alii ma tamaitai talavou ma ulugalii naunautai i tofiga faigata, e talafeagai ma manaoga ma gafatia o le tagata lava ia. E ese lo’u fiafia i le avanoa e auai ai i lenei taumafaiga maoae lea e matuai faamanuiaina ai le toatele o tagata o le lalolagi.
Ua mae’a atu le saunoaga a Elder M. Russell Ballard e uiga i le fausiaina o se aiga e fefaasoaai ai le talalelei. O le a ou talanoa atu i auala e saunia ai se faifeautalai faamisiona, o se alii, se tamaitai, po o se ulugalii foi.
O le faagasologa e amata lava i le aiga, ao le’i taitai oo i le matua e avea ai ma se faifeautalai, pe a fesoasoani matua e toto i mafaufau ma loto o tama talavou uma le manatu “i le aso ou te alu ai i le misiona,” ae le o le “pe a ou alu i le misiona.” E sili atu le aoaoina o fanau i upumoni o le talalelei i totonu o le aiga, lea e mafai ai ona fetuutuunai ai aoaoga e faatatau i le matua ma gafatia o tamaiti taitasi. O totonu o lê aiga e faafetaui lelei ai le ofutau atoatoa o le upumoni i uiga patino o tamaiti taitasi. O aoaoga faalematua e saunia ai fanau mo le olaga ma saunia ai foi alii talavou agavaa mo le fiafiaga o le galuega faafaifeautalai. I le aiga, e mafai e se tamaitai talavou ona malamalama i lana matafaioi sili o le avea ma se ava ma se tina. Ae, a oo i lena sauniuniga, atonu o loo i ai se avanoa e auauna atu ai o se faifeautalai faamisiona pe afai e mulimulitaia ia le fautuaga lata mai lenei a le Au Peresitene Sili: “O tamaitai nofofua agavaa o le vaitausaga e luasefulutasi ma matutua atu … e mafai ona fautuaina atu e auauna atu i ni misiona talai… . E mafai e nei tuafafine ona faia se saofaga taua … ae e le tatau ona faamalosia i latou e faamisiona tala’i. E le tatau i epikopo ona fautuaina mai i latou mo le galuega faamisiona pe afai o le a faalavelaveina ai se faaipoipoga ua loma.”1
E toatele matua ua latou faaaogaina ni vaega o le taiala Talai La’u Talalelei, e faamamafa atu ai aoaoga o le a faapea ona aoga, a o tuputupu ae molimau a a latou fanau ao faafaileleina i latou i o latou aiga. A’o e tama talavou, e mafai ona e aoao i auala e faataunuu ai lou tiute o se tasi e umia le perisitua i le lumanai. O le a tuuina atu fesoasoani ia te oe ia e malamalama ma faaaoga aoaoga taua a le Alii. O le a faamalosia oe e ola agavaa ina ia mafai ona e maua ia sauniga paia o le malumalu ma auauna atu i se misiona. O na aafiaga o le a atiina ae ai se faavae mo faamanuiaga e mulimuli mai o lou avea lea ma se tane ma se tamā malosi.
O ni vaega o le Talai La’u Talalelei, o le a e saunia ai o se tamaitai talavou e malamalama ma faaaoga aoaoga faavae mo lou tiute o se ava ma se tina. Afai o le a e filifili e auauna atu i se misiona, a ua i ai sou faavae mo le galuega. O polokalama o le seminare o le a fesoasoani ia te oe i le avea ai o se alii po o se tamaitai talavou, e faataatia se faavae mo le fiafia ma le faamanuiaina i le olaga. O loo i ai se vasega faapitoa i le polokalama o le inisititiuti, faapea foi ma Iunivesite e tolu a Polika Iaga, e mafai ona e tapenapena ai mo le galuega faafaifeautalai. Ua faavaeina i mataupu faavae o loo i ai i le Talai La’u Talalelei, ma e o faatasi ma lena punaoa malosi. O le a e vave tapena ai mo le taimi e valaauina ai oe e auauna atu.
O le lelei ma le aoga o le taiala Talai La’u Talalelei mo faifeautalai, taitai, tagata o le ekalesia ma matua e faaalia i le mea moni e faapea, ua i lalo ifo o le tasi miliona kopi ua uma ona tufatufaina atu. Pe o faamanuiaina ea oe i lau lava kopi?
I le avea ai o oe ma se epikopo po o se peresitene o le paranesi, e ala i faatalatalanoaga musuia, e mafai ai ona e faamanuiaina olaga o alii talavou uma o lau uarota, faapea foi ma ulugalii talafeagai, e ala i le uunaia o i latou e sauniuni mo ni misiona tala’i. O le a le gata ina e faamanuiaina ia na faifeautalai faamoemoeina, ae e mafai foi ona e tali i tatalo a matua, ua i ai se atalii ua matua ae le’i tautino lava o ia mo se misiona, e ui lava ia latou taumafaiga e uunaia lena manao. Mo se faataitaiga, mai lava i lona laitiiti e oo ina matua, na faalogo ai lo ma afafine o Mary Lee, i ona matua o talanoa e uiga i o la aafiaga faapelepele a o avea ma faifeautalai. Sa ma faamatalaina le auala na faatamaoaigaina ai e avanoa faigata o le misiona, o maolaga ma faataatia ai le faavae mo mea uma ma te faapelepele i ai i le olaga. Ae sa ma aoao atu, o lana lava filifiliga e auauna atu ai pe leai foi. I lona olaga tuputupu ae, sa manino lava lona faamoemoe e avea ma se faifeautalai. Peitai, ina ua oo i le matua e avea ai ma se faifeautalai, o ona aafiaga mananaia i le iunivesite na amata ai ona tuuina mai nisi filifiliga mananaia. O le taimi lava na ia taua ai lona tauivi ma lena lē mautonu, na fautuaina ai o ia e talanoa i lona epikopo. Na faafesootai se taimi la te feiloai ai. A o saofai o ia i luma o se epikopo lelei, sa ia fesili atu, “O le a sou finagalo i lo’u auauna atu o se faifeautalai faamisiona?” Na oso ese le epikopo mai lona nofoa, ma po ona lima i luga o le laulau, ma fai mai, “O le mea aupito sili lena e mafai ona ou mafaufau i ai mo oe.” O lena faamatalaga na maua ai le tonu.
Na auauna atu Mary Lee i se misiona sili ona mataalia i Sepania, lea na aliali ae ai ni agavaa na natia, na faamatua ai lona faaleagaga ma mafua ai ona fuga mai ia agavaa ua faamanuiaina ai o ia o se ava ma se tina. O le epikopo sa faapea ona i ai se aafiaga loloto i le olaga o lo’u afafine o J. Willard Marriott, Jr., o loo avea nei ma se Fitugafulu Eria. Ae e sili ona matou manatua o ia ona o le mea na ia faia mo lo ma afafine o Mary Lee. O lenei la, i lona lava aiga faatasi ai ma faataitaiga malolosi a se tama ma se tina ua maea misiona, ua faapea foi ona faataunuuina e se atalii ma se afafine ni misiona faamanuiaina. O le atalii o loo totoe o le a manino lava le avea ma se faifeautalai, ma o le a faia foi e le afafine mulimuli le filifiliga tatau. O se isi tama a le ma tama ua mulimuli foi i tulaga vae o lona tama, na valaauina talu ai nei e auauna atu i le Misiona fou o Mekisiko Cuernavaca.
Epikopo ma peresitene o paranesi, e mafai ona outou faia lena aafiaga malosi i olaga o faifeautalai tou te uunaia ma saunia, ma e faapena foi i olaga o a latou fanau. Faaaoga ta’ita’i o lau korama o le Perisitua Arona ma faufautua, faapea foi ma taitai o faitaulaga sili, toeaina, ma tamaitai e fesoasoani ia te outou e saunia ina ia valaauina ni faifeautalai agavaa se toatele e mafai ona maua. Mai le faaaogaina o punaoa fou a faifeautalai, o le toatele o isi faifeautalai tou te fautuaina mai, ua taunuu mai i le galuega ua sili atu ona saunia ma matuai faaosofia e auauna atu. Talu ai ona o le toatele lava o faifeautalai faamoemoeina e itiiti lava se taumafaiga e manaomia e saunia ai, ae o nisi lava e manaomia ni fetuutuunaiga tetele i o latou olaga ina ia avagaa ai. O le lagolago a matua o le a fesoasoani latou te ausia ai ia tulaga.
Ia tatalo po o ai ulugalii e mafai ona uunaia e tuuina mai [o latou] pepa mo se valaauga e auauna atu i le galuega faifeautalai faamisiona. O loo matuai manaomia vave i latou.
Ou te maofa pea i le fetaui lelei o le taitaiga a le Agaga Paia ma uiga ma manaoga o faifeautalai ma ulugalii taitasi i le tele o tulaga eseese o le galuega faafaifeautalai i le lalolagi atoa. Ua ou matauina ia nisi o alii ma tamaitai faifeautalai sili ona malolosi ma agavaa e valaauina i le Iunaite Setete ma Kanata, ina ia faatumauina le malolosi o aa o le Ekalesia iina. Ua ou vaai i faifeautalai ua foi mai valaauga i nofoaga e le masani ai, e pei o le faamasani i aganuu moni a Atumotu o le Pasefika, Monokolia, po o nofoaga maualuluga o Kuatemala, ia pe galulue foi ma le tau leai o se fesootaiga patino ma le peresitene o le misiona, ma matua atiina ae lelei ai agavaa patino e le’i iloaina muamua.
O lenei la, ou te fia talanoa atu mai i lo’u loto, i le uiga o se misiona mamalu ia te au lava ia. Na ou ola ae i se aiga e ese le lelei o matua, ae e le’i avea lo’u tama ma se tagata o le ekalesia, ma sa le toaga foi lo’u tina. Ina ua uma la’u misiona, na faapea loa ona suia na mea uma. Na avea i laua o ni tagata malolosi ma faamaoni [o le ekalesia], ma sa auauna atu ma le faamaoni i le malumalu—o [tama] o se fai faamauga, o [tina] o se tagata galue i sauniga. Ae i le avea ai ma se alii talavou, e pei foi o le toatele o outou i le taimi nei, na leai se avanoa ou te faamasinoina ai e a’u lava le taua o se misiona. Na ou alofa i se tamaitai talavou sili ona lelei. I se taimi taua o le ma faamasaniga, sa ia matuai faamanino mai ai e faapea, e na o le malumalu lava e faaipoipo ai i se faifeautalai ua mae’a sana misiona. Na fetaui foi ma le uunaia o au, na ou faamisiona ai i Uruguay.
Sa le’i faigofie. Na tuuina mai e le Alii ia te au ni luitau se tele lea na avea ma auala na fesoasoani ai i lo’u lava tuputupu ae. O iina na ou maua ai se molimau e moni lava na faaali le Atua le Tama ma Lona Alo Pele, o Iesu Keriso, ia Iosefa Samita ina ia amataina se toefuataiga o le upumoni, pule o le perisitua ma le Ekalesia moni i luga o le fogaeleele. Na ou maua ai se molimau o Iosefa Samita o se perofeta maoae. Na ou aoaoina ai aoaoga faavae taua. Na ou iloa ai le uiga o le taitaiina e le Agaga. E tele ni po na ou ala ai a o moe lava la’u soa e sasaa atu lo’u loto i le Alii mo se taitaiga ma faatonuga. Na ou augani atu mo le agavaa e faailoa lelei atu ai i tagata ua ou alofa i ai, la’u molimau ma le upumoni na ou aoaoina i le faaSipaniolo. O na tatalo na faatele ona taliina mai. O le taimi lava foi lena, na foafoaina ai foi lau soa e faavavau o Jeanene, e avea ma se ava ma se tina tulagaese e lana lava misiona.
O le mea pito i sili ona taua, o mea uma ua ou faapelepeleina i le olaga, na amata ona atiina ae i totonu o le misiona. Ana le uunaia au e avea ma faifeautalai, semanu ou te le maua se soa e faavavau po o se aiga pele, lea ou te alofa tele i ai. Ua ou talitonu, semanu ou te le mauaina ni avanoa faapolofesa na faalautele ai mea uma sa ou gafatia. Semanu ou te le maua ni valaauga paia ma ni avanoa e auauna atu ai, lea e faavavau ona ou faafetai ai. E le mafuatia le faamanuiaina o lo’u olaga aua sa ou auauna atu i se misiona.
O lenei la, ua outou malamalama i le mafuaaga ou te matuai naunau ai e uunaia outou uma taitoatasi alii talavou ia avea o se faifeautalai agavaa? Ua outou malamalama i le pogai ou te uunaia ai outou o se ulugalii matutua ina ia fuafua, pe a fetaui ma le soifua maloloina, e auauna atu i le Alii o ni faifeautalai? Ua outou silafia la le mafuaaga ua ou fautua atu ai i nisi o outou tamaitai talavou, pe afai o i ai le manao ma o le a le aafia ai se faaipoipoga o loma, ina ia mafaufau loloto e auauna atu ai i le Alii o se faifeautalai? Ua matuai faamanuiaina lo matou aiga ona o se ava ma se tina o le na filifili e auauna atu i se misiona talai i le vaitaimi na ou auauna atu ai.
Afai o oe o se alii talavou o loo mafaufau pe tatau ona e faia se misiona talai, aua nei e taulimaina lena filifiliga i lou lava poto toatasi. Saili le fautuaga a ou matua, o lou epikopo, po o le peresitene o le siteki. I au tatalo ia ole atu ina ia faailoa atu le finagalo o le Alii ia te oe. Ou te iloa o se misiona o le a e maua ai faamanuiaga tulagaese mo oe i le taimi nei ma lou olaga atoa. Ou te uunaia outou ia aua nei e tatalo pe tatau ona e alu; ae ia ole atu i le Alii e taitai oe i soo se mea e alagatatau, e avea ai ma se faifeautalai faamisiona agavaa ma malosi. O le a e le salamo lava i lou auauna atu i se misiona, ae atonu o le a e salamo i le le faia pe afai o lau filifiliga lena.
Ou te iloa o Iesu o le Keriso, ma o Lana Ekalesia ma le atoatoaga o Lana talalelei ua toefuataiina mai i le fogaeleele, e ala i se perofeta e uiga ese lona taua o Iosefa Samita. Ou te molimau atu o le auaunaga faafaifeautalai faamisiona faamaoni o se punavai o le fiafia tele ma faamanuiaga e tele, e le gata ia i latou o e faalogo i le savali ae faapea foi i latou o e o loo tuuina atu, i lalo o le taitaiga a le Agaga. I le suafa o Iesu Keriso, amene.