“O A’u o le Malamalama Tou Te Sii i Luga”
O a tatou galuega iti taitasi [faaKeriso], e mafai ona faasafua atu ai na o sina sulu itiiti, peitai a faaopoopo faatasi ona amata ai lea ona faia se suiga tele.
Ou te manatua se galuega su’ilima faigofie sa ou su’i lalagaiina a o avea a’u o se teineitiiti i le Peraimeri. Fai mai, “O le a ou aumaia le malamalama o le talalelei i lo’u aiga.” Sa ou tau manatu, “O le a lena malamalama?” Sa faamatalaina lelei e Iesu Keriso lava Ia, ina ua Ia aoao atu ia Sa Nifae. Na fetalai o Ia, “O le mea lea ia outou sisii ai i luga lo outou malamalama, ina ia pupula atu i le lalolagi.” Ona Ia faamalamalama mai lea, “O A’u le malamalama tou te sii i luga—o mea ua ou fai ua outou vaai i ai” (3 Nifae 18:24, ua faatusilima mea e faamamafa).
O a mea na vaai sa Nifae o Ia faia, ma pe faamata e mafai ona ou faia foi na mea i lo’u aiga? Ina ua mananao tagata ia te Ia e toe nofo teisi ma i latou, sa tumu Lona loto i le alofa mutimutivale ma sa toe nofo ai ma i latou. Ona Ia faamaloloina lea o i latou, tatalo faatasi ma i latou, aoao i latou, tagi faatasi ma i latou, faamanuia taitoatasi a latou fanau iti, fafaga i latou, ma auauna atu ma faia le faamanatuga ina ia mafai ai ona latou osifeagaiga ia manatua pea o Ia. O Lana galuega mo i latou, o le aoao atu lea ma le fetausiai o le tasi i le tasi, ma le faamaeaina o le galuega sa poloaiina ai o Ia e Lona Tama e fai. Sa leai se manatu mo Ia lava.
E le o se galuega faigofie lenei. O se olaga lelei lava faaleaiga, e masani ona le amanaiaina. Atonu e faigofie atu le “tulai ma susulu atu, ina ia faia lo outou malamalama ma tagavai mo atunuu” (MFF 115:5, ua faatusilima mea e faamamafa) nai lo le faia o lou malamalama ma tagavai mo o outou lava aiga. O nisi taimi e le iloa mai e isi o tatou faia ni mea lelei, ma faasoa o tatou malamalama i o tatou aiga taitasi. O le natura masani lava o le tagata soifua, o le manao ma le saili o viiga ma le gauai mai o tagata. Sa aoao atu e Helamana ona atalii o Nifae ma Liae ina ia faia galuega lelei a o la’ua tuaa ia o loo faaigoa ai i la’ua, “lua te le faia nei mea ina ia mitamita ai oulua, a ia faia nei mea e oulua ina ia teu ai mo oulua le mea taua i le lagi” (Helamana 5:8). E le tatau ona faia galuega lelei mo le faamoemoega ia maua ai se tulaga aloa’ia.
E i ai se tagata o loo ta’ua i le tusi o le Bleak House a Charles Dickens, e igoa ia Mrs. Jellyby, e i ai lona pona ua faaigoa ai o le “soona alofa.” E alu uma lona taimi e fesoasoani ai i ni tagata mafatia i se nuu mamao, ae le amanaia si ana lava tama ua unooa ma palapala na alu atu ia te ia e manaomia se faamafanafanaga. E manao Mrs. Jellyby ia mautinoa e viia ma lauiloa e tagata uma ana galuega lelei. (Tagai Charles Dickens, Bleak House [1985], 82–87.) Atonu e sili atu i nisi o i tatou ona fesoasoani atu i nisi e mafatia i afa nai lo le fesoasoani ia i latou i o tatou lava aiga. E taua uma na mea, peitai, o le fesoasoani i o tatou aiga o la tatou uluai matafaioi lea ma le faavavau. “Ua i ai i matua se tiute paia e tausia a latou fanau i le alofa ma le amiotonu, ma saunia mea latou te manaomia i le faaletino ma le faaleagaga” (O Le Aiga: O Se Folafolaga i le Lalolagi,” Liahona, Oke. 2004, 49).
O le isi tagata ou te manatua, e faafeagai ma le tagata o le tusi a Dickens. O Dorothea o le toa i se tasi o tusifaitau ou te fiafia lava i ai, o le Middlemarch. I le faaiuga o le tusi o loo manatuaina ai o ia i ana galuega lē leoa, ma le le manatu faapito i aiga ma uo. O loo faapea mai: “O lona lava natura … e faaalu i nofoaga e le iloa e tagata. Peitai, o lona aafiaga mo i latou sa siomia o ia, sa le mafuatiaina lona faasalalauina: aua o le faatupula’ia o le lelei i le lalolagi e faalagolago se vaega i nai faatinoga laiti; ma e le o afaina tele foi ia te outou ma a’u e pei o le tulaga semanu e oo i ai, ae o le isi mafuaaga, o tagata ia sa soifua faamaoni i se olaga e le taualoa, ma ua lagomau i tuugamau e le o asia lava e se tasi” (George Eliot, Middlemarch [1986], 682).
I nei tausaga sauniuni, e tele naua taimi o outou na tamaitai talavou e faaalu i a’oga po o galuega na tou te maua ai viiga, o faamamaluga, o taui, o lipine, po o ipu. A oo ina outou see atu mai lena laasaga i le tulaga faatina talavou, o le a matua faaitiitia viiga ma taui mai nisi tagata. Ae e leai se isi matafaioi, e sili atu avanoa e tautua ai ma le le manatu faapito e pei ona faia e Keriso e ala i le taulimaina i aso taitasi o le fiaselau o manaoga faaletino, o lagona, ma le faaleagaga. O le a outou avatua le malamalama o le talalelei i totonu o outou aiga—e le ina ia iloa mai e isi, ae ia fausia ai isi—alii ma tamaitai o le malosiaga ma le malamalama.
O aiga foi o ni nofoaga tumaoti, ae paga lea e tele taimi tatou te faatalale ai i ai. I totonu o o tatou aiga ma o tatou auaiga, o nisi taimi e tele ina tatou le faia lelei tagata e sili ona taua i o tatou olaga. Ou te manatua lelei se tasi taeao a o 14 o’u tausaga. Ae ou te le i alu i le aoga, sa ou ita ma faalii i o’u matua ma o’u tuagane. Ina ua ou tuua le fale, sa ou faaaloalo i le avepasi, ma ou agalelei foi i a’u uo. Sa ou lagonaina le eseesega o a’u aga, ma sa oo mai ia te au se lagona tele o le salamo. Sa ou faanoi i le faiaoga pe mafai ona faataga mai ni nai minute se’i ou telefoni ai i le fale. Sa ou faatoese atu i lo’u tina ona o la’u amio, ma sa ou ta’u atu ia te ia ou te alofa tele ma talisapaia o ia, ma sa ou folafola atu foi i ai o le a ou faia le mea sili e faaali atu ai.
E faigata mo le toatele o i tatou ona ola ai e oo lava i se aso se tasi i totonu o o tatou aiga, e aunoa ma le tauaimisa. O le malo o sa Nifae, sa avea o se nuu e atoatoa lelei mo le 200 tausaga “ua leai ni finauga i le nuu… . Ua leai foi se matau’a, po o se finauvale, po o se faanunununu, po o se faitaaga, po o le pepelo, po o le fasioti tagata, po o se mea faamataitu e tasi; e moni lava, e leai se isi nuu e sili atu ona fiafia i nuu uma ua faia e le aao o le Atua” (4 Nifae 1:15–16).
O nisi o i tatou ua fananau mai i ni aiga e i ai faafitauli faigata tele. E oo lava foi i aiga lelei e tele foi o latou luitau. E tatau ona tatou taumafai e faia i totonu o o tatou aiga, le mea sa faia e Keriso i tagata Sa Nifae. E pei ona aoao mai e le folafolaga i le aiga, “E mafai ona maua le fiafia i le olaga faaleaiga pe a faavae i aoaoga a le Alii o Iesu Keriso” (Liahona, Oke. 2004, 49). E tatau ona avea i tatou ma malamalama e fesoasoani ai i o tatou aiga ia faatoilalo le agasala, o le ita, loto matau’a, ma le tauaimisa. E mafai ona tatou tatalo faatasi, tagi le tasi mo le isi, faamalolo e le tasi le manu’a o le isi, ma fealofani ma auauna le tasi i le isi ma le le manatu faapito.
O outou na tamaitai talavou, ua sauniuni nei ina ia faamalolosia o outou aiga ma auaiga i le lumanai, e ala i le aumaia o le malamalama o le talalelei i totonu o outou aiga ma auaiga o loo i ai nei. O nai mea laiti, ma le matua faatauvaa lava e mafai ona outou faia ai se suiga tele. Sa ou faitau e uiga i ni anufe fe’ilafi e maua i anapapa i Niu Sila. E tofu lava le anufe ma si ona tama’i malamalama e faasusulu mai. Peitai, a oo ina taitasi ma taufai susulu mai le faitau miliona i se anapapa, e lava lelei lava le malamalama latou te aumaia e mafai ai e se tagata ona faitau tusi ai. E faapena foi a tatou galuega iti taitasi, e mafai ona faasafua atu ai na o sina sulu itiiti, peitai a faaopoopo faatasi ona amata ai lea ona faia se suiga tele. O le a faamanatu mai i le po nei e le aufaipese, le taua o le faasoa atu o o tatou sulu laiti pe a latou lagiina le “Susulu Pea”:
Ua faatauvaa lo’u sulu nei,
Ae ui lava i lea;
Ua fia faamumu pea nei,
Ia malamalama pea.
E le mafai ona nana o lou sulu nei;
Ua foaiina ia te au, o mea e lelei.
Mu pea, mu pea, ia iloa ai le ala;
Mu pea, mu pea, seia sau le ao.
(Tusipese a Tamaiti, 96)
E mafai ona tatou susulu atu e ala i le tausia ma vaaia se tuagane pepe, aai faatasi ma sou uso i le faleaiga o le aoga, fai feau i le fale, musu e faatupu se misa, fiafia le tasi i mea e manuia ai le isi, fetufaai se mea manaia, tausi i se tasi e ma’i, tuu i luga o le aluga i le po se pepa e tusia ai lau faafetai i se tasi o ou matua, faamagalo i se tasi na faaitaina oe, ma le tuuina atu o a tatou molimau.
I Romania sa ma feiloai ai ma Raluca, o se tamaitai talavou ua 17 tausaga le matua, sa faatoa auai mai i le Ekalesia. O se mea fiafia lona papatisoga, aua e ui lava i nisi mea, ae sa auai uma lona aiga. Sa lagonaina ai iina e lona tina ma lona uso laitiiti le Agaga, ma sa mananao ai foi e fai a la’ua lesona e faifeautalai. Sa popole ai le tama i lea tulaga, aua sa manatu o ia o le a goto atu uma lona aiga i lenei lotu e le masani ai. O lea sa ia le faatagaina ai, ma sa umi se taimi o i ai se lagona feteenai i totonu o lo latou aiga. Peitai, sa manatua e Raluca sa ia osia se feagaiga i le papatisoga, na te tauaveina i ona luga le suafa o Iesu Keriso. Sa ia taumafai e tuu i luga Lona malamalama e ala lea i le faia i totonu o lona aiga, o mea e faia e Ia. Sa avea o ia ma faatupu filemu. Sa avea o ia ma faataitaiga. Sa avea o ia ma faiaoga. Sa avea o ia ma taulasea.
Na iu lava ina faamaluluina le loto o lona tama, ma sa ia faatagaina ai isi e aoao atili e uiga i le Ekalesia. Sa papatisoina foi i latou. Ma mulimuli ane ai, sa fiafia tagata uma, aua sa auai foi le tama o le aiga i le Ekalesia. I le papatisoga [o le tama], sa ta’ua e ia i lana lauga, o lo latou aiga sa umi se taimi o pei o ni fatu se lua e tata ae eseese lo la’ua saosaoa i totonu o le aiga e tasi. Peitai, o lea ua tasi nei lo latou faatuatuaga ma le papatisoga e tasi, ua fusia faatasi foi o latou loto i le lotogatasi ma le alofa. Sa ia faafetai atu i faifeautalai ma le au paia sa fesoasoani atu ia i latou. Ona ia tuuina atu lea o se saafiafiga faapitoa i lona afafine o Raluca ona o ona uiga faaKeriso i lo latou aiga i lena vaitaimi faigata, ma lona avea ai o se faatupu filemu, o se taulasea, o se faiaoga, o se faataitaiga, ma se malamalama lea na iu ai ina aumaia lo latou aiga atoa i le Ekalesia a Iesu Keriso.
E tofu outou taitoatasi ma se malamalama. A o ou vaavaai atu i o outou foliga i lenei po, ma a ou manatuaina o outou foliga sa ou vaai i ai a ou malaga taamilo i le lalolagi, ou te vaaia le malamalama o susulu mai i o outou mata, “e pei o fofoga o agelu”(Helamana 5:36). I se lalolagi ua ufitia i le pogisa o le agasala, o foliga o Nifae ma Liae, o atalii o Helamana, sa “matuai pupula tele” (Helamana 5:36). Sa mananao foi i latou sa siomia i la’ua, i lena lava malamalama ma o lea sa latou fesili ai, “Se a se mea matou te faia ina ia aveeseina ai lenei ao o le pogisa ai le faamalumaluina o i matou?” (Helamana 5:40). Sa aoaoina i latou ina ia salamo ma faatuatua ia Iesu Keriso. Ina ua latou faia lena mea, ona tafieseina ai lea o le ao o le pogisa ma sa siosiomia i latou i le malamalama, o se afi faaniutu, ma ua faatumulia i le olioli e le mata’uta’ua mai le Agaga Paia (tagai Helamana 5:43–45).
A outou faasoa atu lo outou malamalama, o le a maua foi e isi le malamalama sili atu. Pe o i ai ea nisi e manaomia lo outou malamalama e faapei ona manaomia e o outou aiga? Ua ou vaai atu ia te outou tamaitai talavou ofoofogia, ma o outou foliga susulu, o ni malosiaga ma o le faamoemoega foi o outou aiga ma le Ekalesia i le taimi nei ma le lumanai.
O Iesu Keriso o le malamalama lea e tatau ona tatou sii i luga. “O Ia o le malamalama, o le ola, ma le faamoemoega o le lalolagi. O Lona ala o le ala e tau atu i le fiafia ma le ola faavavau i le lalolagi a sau” (“O le Keriso Soifua: O le Molimau a le Au Aposetolo,” Liahona, Ape. 2000, 2–3). Ia tatou taufai susulu atu ma Lona malamalama, i le suafa o Iesu Keriso, amene.