O Le Fuafuaga Sili o le Fiafia

Elder Earl C. Tingey

O Le Au Peresitene o le Au Fitugafulu

E ala mai i le Togiola e le iu, ua saunia ai e le Atua se ala e mafai ai ona ta lafoaia a ta’ua agasala ma ia toe mama atoatoa

Na fesili le perofeta o Iakopo, “Se a le mea e le talatala ai i le togiola a Keriso, ma maua le malamalama atoatoa ia te ia?”¹

Ou te avea lena fesili ma autu o la’u lauga—se a le mea e le talatala ai i le Togiola a Iesu Keriso?

Na ta’ua e Alema le Togiola “o le ala sili o le fiafia.”² O le a ou faaaogaina lena fuaitau e faamatala ai le aoaoga faavae matagofie ua tatou ta’ua o le Togiola a Iesu Keriso.

Na folafola mai e Peresitene Hugh B. Brown i se tasi taimi: “E le o toe umi po o se taimi mulimuli ane e i ai le taimi e fesoasoani ai tulaga fesuisuiai o le olaga, tatou te malamalama ai i lenei mataupu taua … o le tino ola pea o le tagata, ma le faiā a le tagata ma le Atua… . O i tatou uma taitoatasi, po o le a lava le lanu, talitonuga, po o le atunuu, ua i ai lo tatou taimi atofaina i le aafiaga ua tatou ta’ua o le oti.”³

O le toatele o i tatou, sa tatou tutu faaaloalo i se tuugamau o se tasi e pele ia i tatou, i le faanoanoa ma le le mautonu, ma tuufesili, “E i ai ea se fiafia i le oti?”

Na tali e se perofeta o le Tusi a Mamona lenei fesili mo i tatou i lona faaalia fiafia o le faafetai mo le Togiola a Iesu Keriso, lea ua laveaiina ai i tatou mai le oti: “E! O le poto o le Atua, o lona alofa mutimutivale ma le alofa tunoa! … E! O le silisiliese ma le amiotonu a lo tatou Atua!”⁴

Sei ou faasoa atu ni upumoni se lima o le fuafuaga sili o le fiafia, na aumaia lenei ituaiga o fiafia ia te au.

Muamua: O se malamalama e uiga i le fuafuaga sili o le fiafia ua faamaonia ai, o loo i ai se Atua ma e i ai Lona Alo o Iesu Keriso. O le Tama ma le Alo e atoatoa. E afifio i le lagi, ma e i ai ni o La tino faamamaluina o agaga, aano ma ivi.

Na faaalia mai nei upumoni ia i tatou i lenei tisipenisione ina ua tootuli le taulealea o Iosefa Samita i le tatalo faamaulalo ma mulimuli ane ona tautino mai ai: “Sa ou vaaia ni Tagata se toalua, e le mafaamatalaina lo laua mamalu ma lo laua pupula, o tutu mai i ou luga ae i le ea. Sa fetalai mai se tasi o i laua ia te au, ma sa ia ta’u lo’u igoa ma fetalai mai a o tusi ane lona aao i le tasi—O Lo’u Atalii Pele lenei. Faalogo ia te Ia!”⁵

Lua: O le iloaina o le faasinomaga o le Tama ma le Alo, e fesoasoani tatou te iloa ai, ua tuuina mai i tatou uma i luga o le fogaeleele ina ia maua se tino faaletino, maua le poto masani, ma faamaonia lo tatou agavaa e toe foi atu i lo tatou Tama Faalelagi. O tulafono e taitaiina lo tatou olaga faaletino i le lalolagi. A tatou solia le tulafono, ua tatou agasala. A tatou agasala, ua tatou solia tulafono e faavavau; o le tulafono o le faamasinoga tonu e manaomia ai se faasalaga.

O le agasala ma le tatau ona salamo, e mafai ona faatusaina i se tagata e alu malaga. O lona toe foi mai na tau ai i se taga lapoa e leai se mea na i ai. Mai lea taimi i lea taimi, na te aumaia ai se maa ua faatusaina o le solia o le tulafono. Na te tuuina le maa i totonu o le taga ona alu lea ma amo. I le gasologa o taimi, ua tumu le taga. Ua mamafa. E le mafai ona faaauau le malaga a le tagata. E tatau lava ona i ai se auala e sasaa ai le taga ma aveese ia maa. E na o le Faaola lava e ala i le Togiola.

E mafaia lenei mea pe a tatou faatuatua ia Iesu Keriso, lafoai agasala, ma osifeagaiga e ala i sauniga o le talalelei. A tatou tumau ma le faamaoni seia oo i le iuga, ona mafai lea ona tatou toe foi atu ma nonofo faatasi ma lo tatou Tama Faalelagi ma Lona Alo o Iesu Keriso.

Tolu: E ala mai i le Togiola e le iu, ua saunia ai e le Atua se ala e mafai ai ona ta lafoai a ta’ua agasala ma ia toe mama atoatoa. Ua mafai lenei tulaga ona o le tulafono e faavavau o le alofa tunoa. O le alofa tunoa e faamalieina ai le manaomia o le faamasinoga tonu e ala i lo tatou salamo ma le mana o le Togiola. A aunoa ma le mana o le Togiola ma lo tatou salamo atoatoa, e aafia i tatou i le tulafono o le faamasinoga tonu.

Na aoao mai Alema e faapea “ua pule foi le alofa i le salamo”⁶ ma “ua le mafai ai ona faataunuuina le togiola, sei iloga e salamo.”⁷

Na aoao mai le perofeta maoae o Amoleka, “E faapefea foi ona mafai le alofa ona faamalie iuga o le faamasinoga, ma siosiomia ai i lima o le mamalu, a o lē le faaaoga le faatuatua e oo i le salamo, e oo ia te ia le tulafono uma i iuga o le faamasinoga; o lenei, ua na o le faatuatua e oo i le salamo e oo i ai le ala o le faaolataga sili ma le faavavau.”⁸

O o tatou uluai matua o Atamu ma Eva, na solitulafono ma na tuliesea ai mai le Faatoaga matagofie o Etena. Na aoaoina Atamu ma Eva i le fuafuaga sili o le Faaolataga, ina ia mafai ona la maua le fiafia i lenei olaga.⁹

Fai mai Atamu, “Aua ua pupula o’u mata ona o la’u solitulafono, ma o le a ou maua le olioli i le olaga nei, ma o le a ou toe vaai i le Atua i le tino.”¹⁰

E faapena foi le lagona fiafia na faaalia e Eva: “Ana le seanoa la ta solitulafono, semanu ta te le maua ni fanau, ma lē iloa le lelei mai le leaga, ma le olioli o le togiolaina.”¹¹

Fa: O le Pau o Atamu ma Eva ua oo mai ai ni oti se lua. E oo uma i tatou i na oti. O le oti faaletino o le tuueseeseina o le agaga mai le tino faaletino. Ona o le Pau o Atamu, o le a mafatia ai tagata uma i le oti faaletino.

O le oti lona lua e faaleagaga. O le vavaeeseina lea mai le afioaga o le Atua. Sa saoloto le fesootai a Atamu ma Eva i le Atua i le Faatoaga o Etena. Ina ua la solia le tulafono, sa la le toe maua lena avanoa. Mai lena taimi, o fesootaiga mai le Atua faatoa oo mai lava i le faatuatua ma le ositaulaga, faatasi ai ma le ole atu ma le loto momomo.

O le taimi nei, o loo tatou i ai uma i le tulaga o le oti faaleagaga. Ua vavaeeseina i tatou mai le Atua. O loo afio o Ia i le lagi; o loo tatou nonofo i le fogaeleele. Tatou te mananao ina ia tatou toe foi atu ia te Ia. E mama ma atoatoa o Ia. Tatou te eleelea ma le atoatoa.

O le mana o le Togiola a Keriso ua faatoilaloina ai na oti e lua.

Ina ua mavae Lona Faasatauroga ma lona falelauasiga i se tuugamau na nonoina, na toetu mai ai Keriso i le aso tolu. O lenei Toetu na toe faatasia ai le tino faaletino o Keriso ma Lona agaga.

O le Toetu mai le oti o se vaega aupito sili ona matagofie o le Togiola, ma o se vaega moni o le fuafuaga o le fiafia; o le Toetu e mo tagata uma ma e agavaa i ai le fanauga atoa a tagata. O le a tatou toetutu. Ou te molimau atu i lena mea moni ma le upumoni. O se meaalofa le faatuaoia lenei mai le Atua.

Peitai o le mafai ona toetutu e le faatoilaloina ai le oti lona lua. Ina ia maua le ola e faavavau ma nonofo ai i le afioaga o le Tama ma le Alo, e ao lava ona tatou salamo ma ia agavaa mo le alofa tunoa, lea o le a faamalieina ai le faamasinoga tonu.

Ua aoao mai faaaliga:

“E tatau i tagata ona sauniuni i lenei olaga e fetaiai ma le Atua.”¹²

“Aua tou te faatuai le aso o lo outou salamo.”¹³

“O lea lava agaga o i ai i o outou tino i le aso tou te tetea ai ma lenei olaga, e i ai le pule i lea lava agaga e toe foi atu i o outou tino i lena olaga faavavau.”¹⁴

Lima: Na soifua mai Iesu Keriso i se tina faalelalolagi o Maria. Mai ia te ia, ua Ia maua ai le tino faaletino ma e mafai ona oti.

O Iosefa o Lona fautua faalelalolagi. O le Atua i le lagi o Lona Tama lea. Mai ia te Ia, ua Ia maua ai le tino ola pea, ma le mana e faatoilaloina ai le oti faaletino.

I le avea ai ma le na filifilia e faataunuuina ia tulaga manaomia o le Togiola, o lea na faamaulaloina ai e Iesu Keriso Ia lava ina ia afio mai i le lalolagi ma ia soifua mai o se pepe meamea ia Maria. Na ia faamaulaloina Ia lava ina ia faaosoosoina, tofotofoina, amusia, faamasinoina, ma faasatauroina, e ui ina sa ia te Ia lava le mana ma le pule e taofia ai na faiga faapena.

Na faamalamalama e Peresitene Ioane Teila le faamaulaloina o Keriso i upu matagofie nei: “Sa sili atu ona manaomia Lona alu ifo maualalo i mea uma, ina ia mafai ona Ia siitia isi i luga ae o mea uma; aua ana faapea e le mafai ona ia faatuina mai o Ia lava, ma faaeaina e ala i na mataupu faavae na ala mai ai le togiola, semanu e le mafai ona Ia faatuina ae isi; e le mafai ona Ia faia mo isi, le mea e le mafai ona Ia faia mo Ia lava.”¹⁵

O le puapuagatia o Keriso i le Faatoaga o Ketesemane o se faataitaiga atoatoa lea o le uiga aupito sili ona mataina o uiga uma o Keriso, o Lona alofa atoatoa. Ua mafai ona tatou iloa ai, e alofa moni o Ia ia i tatou uma.

Na tusia e se failotu Egelani e faatatau i lenei mea na tupu, i tusitusiga o le seneturi lona sefuluiva: “O mea uma e mafai e lena tino atoa ona onosaia o puapuaga sa faaputuina i luga o Lona tino vaivai … . O le tiga aupito matuitui, o le faalumaina i ona tulaga sili ona faalealofa, o avega uma … o agasala … —o le mea lenei e ao ona fetaiai ma Ia.”¹⁶

I le faamatalaina o Lona puapuagatia, na fetalai mai ai le Alii i faaaliga i aso nei: “O le tiga lea na faagateteina ai au lava, o le Atua, le silisiliese i mea uma, ona o le tiga, ma na maligi ai le toto mai pu laiti uma lava o le tino, ma na tiga le tino atoa ma le agaga.”¹⁷

O le Togiola o se taunuuga e mafai ai e i tatou ona lelei ma le Atua. O le upu togiola, po o le “ia-faa-lelei,” o lona uiga o le toefuatai po o le toe foi mai. I aiga, o lona uiga o le toe faatasia o le tasi ma le isi faapea ma le Atua ma Lona Alo o Iesu Keriso. O lona uiga o le faanoanoa e ala i le tuueseeseina o le a avea ma se fiafiaga e ala i le toe faatasia.

I le faaiuga, ou te faasoa atu ai upu a Peresitene Boyd K. Packer:

“Afai e te malamalama i le fuafuaga sili o le fiafia ma e mulimuli ai, o mea o loo tutupu i le lalolagi o le a le faalagolago i ai lou fiafia.”¹⁸

Ou te molimau atu i lena upumoni ma le alofa na faaalia e lo tatou Alii ma le Faaola o Iesu Keriso mo i tatou e ala lea i le sauniaina o le Togiola, le fuafuaga sili o le fiafia, mo i tatou uma. I le suafa o Iesu Keriso, amene.