O Tatou Tupulaga Fai A’e
Ua agavaa o tatou tupulaga faia’e mo la tatou taumafaiga aupito sili e lagolago ma faamalolosia i latou i lo latou aga’iga’i atu i le tulaga faatagata matutua.
Talofa o’u uso pele o le perisitua. O le po nei i vaega eseese o le lalolagi, ua tatou potopoto latalata atu i malumalu o le Alii nai lo se isi taimi muamua i le talafaasolopito o le tagata. O le agalelei o lo tatou Faaola i le taitaiina o Ana perofeta, ua i ai nei malumalu e 122 mo le nuu o le folafolaga a le Alii, e maua ai o latou lava faamanuiaga faalemalumalusa ma faia ai sauniga taua mo o latou augatuaa ua mavae atu. Ma o loo i ai foi nisi ua uma ona fofogaina mai ma o le a oo mai! Matou te faafetai atu i lau susuga Peresitene Hinckley mo lau taitaiga musuia i lenei galuega tele.
I se uluai vaitau i le Tusi a Mamona, sa faapotopoto ai foi tagata o le Ekalesia e lata ane i se malumalu ina ia maua ai aoaoga mai lo latou perofeta ma lo latou taitai. I le tau faaiuiuga o lona soifua, sa taloina ai e le Tupu o Peniamina ia tamā e aumai faatasi o latou aiga, ina ia tuuina atu ia te i latou fautuaga ma apoapoaiga. I le Mosaea tatou te faitau ai:
“Ma ua oo ina ua o ae i latou i le malumalu, ua latou faatuina o latou fale ie e latalata ane i ai, e taitasi le tagata e tusa ma lona aiga… .
“… Ua tofu le tagata ma lona faleie ua faasaga atu le faitotoa i le malumalu, ina ia mafai ai ona latou nonofo i o latou faleie ma faalogologo i upu e fai atu e le Tupu o Peniamina ia te i latou” (Mosaea 2:5–6).
Ou te fiafia lava i le uiga faavaoli’a o nei fuaiupu. I se tulaga faavaoli’a uso e, pe o faatutu ea faitotoa o o tatou fale e faasaga i malumalu ia tatou te faamama’i i ai? Pe o tatou malaga soo ea i ai ina ia faaali atu ai ia tatou fanau e ala ia tatou faataitaiga, le taua ma le faapitoa o nei nofoaga paia?
E pei ona tusia i le Mosaea, sa maua ma le fiafia ma le naunautai e aiga le upu a le Alii mai lo latou perofeta. Sa matua ootia tagata i aoaoga a le Tupu o Peniamina, ma o lea na latou osia ai se feagaiga fou e mulimuli i le Alii o Iesu Keriso.
Peitai, e i ai se faaopoopoga faanoanoa i lenei tala. Ua tatou aoaoina i le Mosaea e uiga i fanau laiti sa i ai i faleie i le taimi o le lauga a le Tupu o Peniamina:
“O lenei, ua oo ina toatele o le tupulaga na le mafai ona latou lagona upu a le tupu o Peniamina, aua o tamaiti i latou i ona aso na tautala atu ai o ia i lona nuu; ua le talitonu i latou i upu a o latou tama” (Mosaea 26:1).
O le a le mea na tupu i lena tupulaga faia’e uso e? Aisea na le taliaina ai e tamaiti laiti ia tu ma aga amiotonu a o latou tama? E sili atu la ona taua, ua tatou i ai nei i seneturi mulimuli ane, i se vaitau ua tele malumalu ma taitaiga faaperofeta faifai pea, e faapefea la o tatou tupulaga faia’e? Pe i ai ea se mafuaaga e tatau ai ona tatou popole i ai? Ioe, e i ai!
O alii talavou ua mafuta mai iinei ma le lalolagi atoa, faapea foi ma tamaitai talavou, e matua taua tele. Na saunoa Peresitene Hinckley e faatatau ia i latou:
“Ua faatele ona ou fai atu, ou te talitonu ua i ai nei ia i tatou le augatupulaga aupito sili atu ona lelei o augatupulaga talavou uma i le Ekalesia… . Latou te taumafai e fai le mea sa’o. E atamamai ma gafatia, e mama ma felesi, e aulelei ma popoto… . Ua latou iloa le mataupu o le talalelei, ma o loo latou taumafai e ola ai, ma vaavaai atu i le Alii mo Lana taitaiga ma le fesoasoani” (“O Lou Tiute Maoae, O Se Tina,” Liahona, Ian. 2001, 113; Ensign, Nov. 2000, 97–98).
O i tatou uma lava e aafia faatasi ma nei talavou, ua iloa le moni o upu a Peresitene Hinckley.
Peitai, na tuuina mai e Elder Henry B. Eyring o le Korama a Aposetolo e Toasefululua se lapataiga faamālumālu, ina ua saunoa e uiga i le autalavou:
“E toatele i latou e maoae lo latou tulaga matutua faaleagaga ma lo latou faatuatua. Peitai, e oo lava i e aupito sili o i latou, e matua tofotofoina lava. Ma e oo lava ina matua matautia ia tofotofoga” (“We Must Raise Our Sights,” Ensign, Sept. 2004, 14).
O lenei lapataiga faapea “e oo lava ina matua mata’utia ia tofotofoga” ua tautu atu i ai la’u vaai. Ua agavaa o tatou tupulaga faia’e mo la tatou taumafaiga aupito sili e lagolago ma faamalolosia i latou i lo latou aga’iga’i atu i le tulaga faatagata matutua.
I nei taimi o faigata, a o feagai o tatou tupulaga talavou ma mafatiaga faateleina, e mafai ona tatou aoao mai i isi. I autau faaauupegaina, aemaise lava i fuavaa uma i le lalolagi atoa, e malamalama seila uma i le fuaitau e tasi, o se alaga leotele mo se fesoasoani faatopetope, tusa lava po o le a sana mea o fai, pe o fea foi o le vaa o i ai. O le alaga o le “lipoti seila uma i tiute.” O le tele o taua i le sami sa manumalo pe faia’ina foi ona o le tali atu i lenei valaau.
O i tatou—o tagata o le Ekalesia, o taitai o le autalavou, o tamā atuatuvale ma tamamatutua popole—e ao ona tali atu i le alaga o le “ia lipoti au perisitua uma i tiute” e faatatau tonu i o tatou talavou laiti ma talavou nofofua matutua. E ao lava ona tatou taufai sailia avanoa ina ia faamanuiaina ai le autalavou, tusa pe o tatou galulue vavalalata ma i latou i le taimi nei pe leai foi. E ao lava ona tumau pea lo tatou aoao atu ma faamalolosia tama ma tina i o latou matafaioi paia ua tuu atu i ai mo a latou fanau i le aiga. E ao ina tatou fesili ifo ia i tatou lava e le aunoa, pe sili atu le taua o lena taaloga faaopoopo, lena gaoioiga faaopoopo, po o le feau i fafo atu o le aiga, nai lo le mafuta faatasi o aiga i le fale.
O le taimi lenei uso e, i a tatou taga taitasi e fai, o nofoaga uma tatou te o i ai, o talavou taitasi o le Au Paia o Aso e Gata Ai tatou te feiloai i ai, e ao ina faateleina lo tatou iloa o tulaga manaomia mo le faamalosiauina, faafaileleina ma le avea ma se uunaiga mo le lelei i o latou olaga.
I totonu o lo matou lava aiga, sa i ai so matou aafiaga matagofie ma ni taitai perisitua mataala. Ina ua faatoa tofia a’u i ni nai tausaga talu ai e avea ma se Fitugafulu, sa tofi i matou ina ia masii atu i Solihull, i Egelani e tautua ai i le Au Peresitene o le Eria. Sa ma aveina ma Sister Rasband la ma’ua fanau laiti e toalua i lenei valaauga. O lo ma afafine o se talavou matua a o lo ma atalii e 17 tausaga ma sa fiafia tele i lakapi faaAmerika, ma e lelei ai foi lana taalo. Sa matua’i o ma popole mo i la’ua. Sa leai ni uo, leai nisi o le aiga lautele, leai se lakapi faaAmerika! Sa ou mafaufau, “Mata o le a avea lenei aafiaga fou ma se tofotofoga tuga mo lo matou aiga?”
Na oo mai le tali i se tofiga muamua lava na ou maua. Na talosagaina a’u ou te lauga i le Nofoaga Autu e Aoao ai Faifeautalai i Preston, i Egelani. Sa ou telefoni ia Peresitene White o le ofisa, ma sa ou fiafia ina ua ou faalogo ua ia iloa le tulaga o i ai lo matou aiga. Sa ia fautua mai ia aofia ai ma la ma fanau i la ma asiasiga i Preston. Ina ua matou taunuu iina, sa ia valaaulia lo ma afafine ma lo ma atalii e lauga i faifeautalai! E maeu lo la’ua fiafia ina ua la i ai ma lagona ua aofia ai i la’ua i le faasoaina atu o a la molimau i le galuega a le Alii!
Ina ua uma, ma ina ua mae’a ona faatofa ma le lotomomomo i na faifeautalai, sa matou asiasi loa i le Malumalu matagofie o Preston England, lea e latalata atu i le Nofoaga Autu e Aoao ai Faifeautalai. A o matou savavali atu i autafa o le faitotoa pito i luma, sa tutu mai ai iina Peresitene Swanney ma lona Faletua, le peresitene o le malumalu ma le faatina. Sa la faafeiloa’ia i matou ma sa amata i le faapea mai, “Elder Rasband, faamata e mananao lo outou aiga e faia ni papatisoga mo e ua maliliu?” Oka se manaia o le manatu! Sa matou taufai tilotilo atu le tasi i le isi, ma talia ma le agaga faafetai. Ina ua mae’a ona fai ia sauniga ma a o ma i ai pea ma lo’u atalii i le vai faatasi ma o ma’ua loimata o le fiafia, sa tuu mai lona lima i lo’u tauau ma fesili mai, “Tama, aisea na tatou le faia ai muamua lenei mea?”
Sa ou mafaufau i taaloga lakapi uma ma tifaga uma sa matou o faatasi ai, o taimi uma sa matou faatasitasi ai ma fiafia—o taimi fiafia uma ma tu ma aga taua tele e ao ona faatupula’ia.
Peitai, sa ou iloaina ua matou maua se avanoa e faaopoopo ai nisi aafiaga ‘anoa faaleagaga faatasi ma la ma’ua fanau e faapei o le mea lea sa matou oo i ai i Preston i lena aso. Faafetai i na taitai perisitua alolofa ma le mataala, sa ou iloa ai i lena taimi o le a manuia lo matou aiga i Europa. E ese lo matou faafetai i le tele o taitai o le perisitua ma Tamaitai Talavou, o e sa mataala pea ma alolofa i la ma fanau faapea foi a outou fanau.
I le vaavaai atu i se isi vaitaimi i le Tusi a Mamona: sa ola Nifae i se tulaga sa faigata ai i nisi o lona aiga ona usitai, agamalu, ma faamaoni. Sa ia matua’i malamalama lava i le taua o le gaua’i atu ma le loto i fanau o augatupulaga faia’e. Fai mai a ia i se taimi taufaaiuiu o lona soifua:
“Ua matou tautalatala ia Keriso, ua matou olioli ia Keriso, ua matou tala’i atu Keriso, ua matou vavalo atu foi ia Keriso, ua matou tusitusi e tusa ma a matou valoaga, ina ia iloa e a matou fanau le mea latou te faamoemoe ai mo le faamagaloina o a latou agasala” (2 Nifae 25:26).
Ou te tatalo a o avea ai ma ni e o umia le perisitua a le Atua, ia taitasi i tatou ma faia mea uma tatou te mafaia e aoao atu ai o tatou talavou, i le punavai e mafai ona latou liliu atu i ai mo se faamagaloga o a latou agasala, o le Alii ia o Iesu Keriso. Ia taitasi i tatou ma tali atu ma a tatou taumafaiga silisili ona faamaoni, ina ia “lipoti tagata uma i tiute” e tusa ai ma le laveaiina o o tatou lava tupulaga faia’e—e matuai aoga lava i ai a tatou taumafaiga aupito silisili.
Ou te molimau atu o le Ekalesia moni lenei ma ola a le Alii, o loo taitai e Ia e ala i lo tatou perofeta pele, o Gordon B. Hinckley, o ia o lē ou te alofa i ai ma lagolagoina. I le suafa o Iesu Keriso, amene.