O Le Maua Atili o le Ola
O loo mafai lava ona tatou au atu i le ola atili, pe afai o le a na ona tatou feinu lava mai le vaiola, ia faatumuina o tatou loto i le alofa, ma foafoaina ai i o tatou olaga se ata e sili ona maoae.
Na tuai atu Harry de Leyer i le tauofoga i lena aso kiona i le 1956, ma ua uma ona faatauese atu ia solofanua lelei. O nai solofanua na totoe ai ua matutua ma ua le lavava ma na faatauina e se kamupani o le a laveaiina i latou.
E sauni loa Harry, o se faiaoga tomai e aoaoina le tietie solofanua i se aoga a teine i Pennsylvania, e aluese ae tau atu loa lana vaai i se tasi o nei solofanua—e le o tausiaina, e lanu efuefu ma ua uma ona fofo ma o loo i ai ni manu’anu’a mataga i ona vae. O loo i ai pea i le tino o le meaola ia faailoga o galuega mamafa ma le olaga faigata sa ola ai. Ae sa i ai se mea sa ia te ia na taulai atu i ai le manatu o Harry ma ia ofoina atu ai loa le $80 e faatau ai.
Sa toulu le kiona i le taimi na faatoa vaai ai le fanau a Harry i le solofanua, ma ona o le mafiafia o le kiona i le papatua o le solofanua, o lea na faaigoa ai e tamaiti ia “Snowman.”
Sa tausi faalelei e Harry le solofanua, lea na iu ina avea ma uo agamalu ma faatuatuaina—o se solofanua e fiafia teineiti e tietie ai aua e to’a lelei ma e le tafitifiti e pei o le tele o isi. O le mea moni lava, na vave ona tele se alualu i luma o Snowman ma o lea na faatauina ai loa o ia e se tuaoi i le tau e faaluaina le tau na uluai faatau mai ai e Harry.
Ae na o le fai lava ma leiloa ia Snowman mai le fanua o le tuaoi—o nisi taimi e oo atu ai i toga pateta e sosoo ane ai, o isi taimi ua toe foi ia Harry. Na pei na oso le solofanua i luga o pa i le va o fanua, ae na foliga mai e le mafai ona tupu lena mea—e lei vaai lava Harry ia Snowman o oso i luga o soo se mea e maualuga atu nai lo se ogalaau pala.
Ae na iu lava ina ua uma le onosai o le tuaoi ma ia tauanauina loa ia Harry e toe ave le solofanua.
Mo le tele o tausaga, sa avea ai ma miti a Harry lona koleniina o se solofanua e siamupini i le oso i luga. Sa tau feoloolo lona faamanuiaina i tausaga ua mavae, ae ina ia mafai ona tauva i tulaga sili ona maualuluga, na ia silafia ai e tatau ona ia faatauina se solofanua tonu lava na fofoaina faapitoa mo le oso maualuga. Ma o lena ituaiga o le a matuai taugata atu nai lo le mea na te mafaia.
Ua faasolo ina matua Snowman—na faatauina o ia e Harry i le 8 o ona tausaga—ma sa leaga le tausiga o ia. Ae, na manino mai, sa manao Snowman e oso i luga ma o lea na fuafua ai Harry sei vaai po o le a le mea e mafai ona fai e le solofanua.
O le mea na vaaia e Harry na oso ai lona manatu faapea atonu e i ai se avanoa o lana solofanua e tauva ai.
I le 1958, na faaulu ai e Harry ia Snowman i lana tauvaga muamua. Sa tutu faatasi ai Snowman ma isi solofanua siamupini o ituaiga mananaia, na foliga mai ai e leai sona avanoa. O isi au fai solofanua na latou faaigoaina ia Snowman o se “solofanua efuefu e utufitia.”
Ae na i ai se mea ofoofogia, e le talitonuina na tupu i lena aso.
Na manumalo ia Snowman!
Sa faaauau pea ona faaulu e Harry ia Snowman i isi tauvaga ma faaauau ai pea ona manumalo ia Snowman.
E matuai tapua’ia e le au maimoa ia taimi uma e manumalo ai Snowman i se tauvaga. Na avea o ia ma se faailoga o le tulaga sili atu e mafai ona oo i ai se solofanua taatele. Na vaaia o ia i luga o le televise. Sa tusia tala ma tusi e uiga ia te ia.
A o faaauau ona manumalo o ia, sa ofo atu e se tasi tagata faatau le $100,000 mo le solofanua toeaina, ae lei faatauina atu e Harry. I le 1958 ma le 1959 na faaigoa ai Snowman o le “Solofanua o le Tausaga.” Na iu lava ina ua taliaina le solofanua po’a efuefu—lea na faatau mai i se ofo maualalo—i le Lisi o Solofanua Lauiloa i le tuuoso i luga.1
Mo le toatele, o Snowman sa sili atu nai lo na o se solofanua. Na avea o ia ma se faataitaiga o malosiaga natia e le o faaaogaina, ia o loo i totonu o i tatou taitoatasi.
Ua ou maua le avanoa e feiloai ma faamasani atu ai i le tele o tagata lelei mai le tele o ituaiga olaga. Ua ou iloaina nisi o e mauoa ma e matitiva, o e lauiloa ma e faaleogalua, o e atamamai ma e vaivai.
O nisi sa lofituina i faanoanoaga, o isi na atagia mai ai se filemu moni i totonu. O nisi sa feita i se tiga e le matineia, ae o isi sa susulu mai ai le olioli e le mataofiofia. O nisi na foliga mai ua faatoilaloina ae o isi—e ui i faigata—ae sa faatoilaloina lava le lotovaivai ma le faanoanoa.
Ua ou faalogo i nisi o faapea mai, atonu e faatalasua se isi vaega, e faapea e na o le pau tagata e fiafia, o i latou ia e le o malamalama lelei i le mea o loo tupu i o latou autafa.
Ae ou te le talitonu ai.
Ua ou iloaina le toatele o e savavali i le olioli ma faaalia mai ai le fiafia.
Ua ou iloaina le toatele o e ola i ni olaga e tumu i le lelei.
Ma ua ou talitonu ua ou iloa le mafuaaga.
O le aso, ou te fia lisiina atu ai ia uiga e tutusa uma ai tagata sili ona fiafia ua ou iloa. O ni uiga e mafai ona suia ai se olaga masani, i se olaga fiafia e tumu i le lelei.
Muamua, latou te matuai feinu i le vaiola.
Na aoao mai le Faaola e faapea, “a o se inu i le vai ou te avatu ia te ia … e le toe fia inu ia; … [aua] e avea i totonu ia te ia o le vaipuna, e puna i luga i le ola e faavavau.” 2
Afai e malamalama atoatoa se tagata ma taliaina, e faamaloloina e le talalelei a Iesu Keriso ia loto ua nutimomoia, e tuuina atu le uiga i olaga, e fusia faatasi ai e pele i noataga lea e faaauau i tala atu o le olaga faaletino, ma aumaia ai le olioli sili i le olaga.
Na saunoa Peresitene Lorenzo Snow, “E lei tuuina mai e le Alii le talalelei ia i tatou ina ia tatou faavauvau ai i aso uma o o tatou olaga.”3
O le talalelei a Iesu Keriso e le o se talitonuga faalelotu e faavauvau ma faanoanoa ai. O le faatuatuaga o o tatou tama o se faatuatuaga o le faamoemoe ma le olioli. E le o se talalelei e taofiofia ai ae o se talalelei e agaigai ai i luma.
O le taliaina atoatoa, o le faatumulia lea i mea e ofo ai ma savali ma uunaiga faaleagaga. Na folafola mai e lo tatou Faaola, “Ua ou sau ina ia latou maua le ola, ia maua atili ai lava.”4
Pe e te sailia le filemu o le mafaufau?
Ia matuai inu i le vaiola.
Pe e te sailia ea le faamagaloga? Filemu? Malamalama? Olioli?
Ia matuai inu i le vaiola.
O le ola atili o se ola faaleagaga lea. Ua toatele naua i latou e le o matuai taumamafa i le laoai o le talalelei a Iesu Keriso ae ua na o sina tofo i taumafa ua laulauina atu i o latou luma. Ua na ona latou faia o mea ua latou faia e aunoa ma se alofa—e auai i a latou fonotaga, vaavaai i tusitusiga paia, o le faia o tatalo ua faisoo—ae o o latou loto ua matuai taumamao lava. Afai e faamaoni i latou, o le a latou tautino mai faapea ua sili atu lo latou naunau i talaave i le vaiaai, o suiga i fefaatauaiga, ma ata e sili ona fiafia i ai i le TV nai lo mea sili e ofo ai ma galuega lelei a le Agaga Paia.
E te fia tofo i lenei vaiola ma iloa ai o loo puna pea i totonu ia te oe e oo i le ola faavavau?
Ona aua lea e te fefe. Ia talitonu ma o outou loto atoa. Ia atiina ae se faatuatua e le maluelue i le Alo o le Atua ma tuu atu o outou loto ina ia aapa atu i le tatalo faatauanau. Ia faatumu o outou mafaufau i le malamalama ia te Ia. Ia faagalo ou vaivaiga. Ia savali i le paia ma le ogatasi ma poloaiga.
Ia matuai inu mai le vaiola o le talalelei a Iesu Keriso.
O le uiga lona lua o i latou o e ola i ni olaga ua maua atili e tutumu o latou loto i le alofa.
O le alofa o le ute lea o le talalelei ma o le poloaiga sili o poloaiga uma. Na aoao mai le Faaola e faapea o isi poloaiga uma ma aoaoga faaperofeta e faalagolago uma i ai.5 Na tusia e le Aposetolo o Paulo e faapea, “aua ua atoatoa le tulafono uma lava i le upu e tasi o lenei; Ia e alofa atu i le lua te tuaoi, ia pei o oe lava ia te oe.”6
E masani ona tatou leiloaina le mamao o le mea e oo atu i ai sina gaoioiga faatauvaa o le agalelei. Na avea le perofeta o Iosefa Samita ma se faataitaiga o le agaalofa ma le alofa. I se tasi aso, na taunuu atu ai i le fale o le perofeta i Navu se vaega e toavalu o tagata Aferika Amerika. Sa latou faimalaga atu mai o latou aiga i Buffalo, Niu Ioka, pe tusa ma le 800 maila le mamao ese ina ia mafai ona latou faatasi ma le perofeta a le Atua ma le Au Paia. E ui sa saoloto i latou, ae sa faamalosia i latou e lalafi mai ia i latou o e na manatu o i latou o ni pologa ua sosola ese. Sa latou onosaia le malulu ma faigata, masaesae seevae e oo i totini seia oo lava ina ua latou savavali i lalo i o latou alofivae e tau atu i le Aai o Iosefa. Ina ua latou taunuu i Navu, sa faafeiloaia i latou e le Perofeta i lona fale ma fesoasoani e saili se mea e faamautu i ai i latou uma taitoatasi.
Ae sa i ai se teineitiiti e igoa ia Jane, sa leai se mea e alu i ai ma sa tagi o ia i le leiloa po o le a le mea a fai.
“E leai ni o matou loimata iinei,” sa fai atu ai Iosefa ia te ia. Sa ia faliu atu ia Ema ma faapea atu i ai, “Ua fai mai lenei teineitiiti e leai sona aiga. Pe e te manatu ea o loo i ai sona aiga iinei?”
Sa malie i ai Ema. Mai lava i lena aso, sa nofo ai Jane o se tagata o le aiga.
I tausaga ina ua mavae le Maturoina o le Perofeta ma ina ua maea ona auai atu o ia i paionia ia sa faia le malaga umi i Iuta, sa fai mai ai Jane faapea e i ai nisi o taimi “e ala a’e ai o ia i le leva o le po ma mafaufau ai lava ia Tuagane Iosefa ma Uso Ema ma lo la agalelei [sa i ai] ia te ia. O Iosefa Samita,” na fai mai ai Jane, “O le alii sili lea ona lelei ua ou vaai i ai i le Lalolagi.”7
Na saunoa Peresitene Gordon B. Hinckley e faapea o i latou o e aapa atu e siitia ma auauna atu i isi, “o le a latou iloaina le fiafia … lea e lei iloaina muamua… . Ua silafia e le lagi o loo tele, ma tele naua tagata i lenei lalolagi o e o loo moomia le fesoasoani. Oi, e matuai … toatele naua. Sei o tatou aveesea ia lena uiga leaga o le manatu faapito mai o tatou olaga, o’u uso e ma tuafafine, ma tutu ia maualuga atu teisi ma aapa teisi atu i luga e auauna atu i isi.”8
Tatou te pisi uma lava. E faigofie ona saili ni ’alofaga mo le le aapa atu i isi, ae ou te manatu o le a pei e le logolelei i lo tatou Tama Faalelagi e pei o le tamaitiiti aoga tulagalua, na ia ave i lona faiaoga se tusi e faanoi mai ai o ia mai le aoga mai le aso 30 o Mati e oo i le aso 34.
O i latou o e tuuina atu o latou ola i le sailiga o o latou lava tuinanauga manatu faapito ae le aofia ai isi o le a iloaina, i le faaiuga, o lo latou olioli e papa’u ma o le a leai foi se uiga o o latou olaga.
I luga o le maa tuugamau o se tasi o tagata faapea na vaneina ai faaupuga nei:
O loo taoto iinei se tagata faaputu oa sa ola mo ia lava,
Ma sa le popole i se mea ae na o le oa,
O lenei, o fea o i ai o ia, ae faapefea foi ona malaga,
E leai se tasi e iloa ma e leai se isi e popole i ai.9
Tatou te matuai fiafia pe a fesootai atu o tatou olaga i isi e ala i le alofa ma le auaunaga e le manatu faapito. Na aoao atu Peresitene J. Reuben Clark e faapea, “e leai se isi faamanuiaga e sili atu, leai se isi olioli ma se fiafia e sili atu nai lo lea e maua mai le faamamaina o faanoanoaga o isi.”10
O le uiga lona tolu o i latou ua ola atili, latou te atiina ae faatasi ma le fesoasoani a lo latou Tama Faalelagi se tulaga maoae o o latou olaga.
E tusa lava po o le a lo tatou matutua, tulaga, po o gafatia, e mafai e i tatou uma taitoatasi ona faia se mea ofoofogia i lona olaga.
Na vaai Tavita ia te ia o se leoleo mamoe, ae na silasila le Alii ia te ia o se tupu o Isaraelu. Na auauna Iosefa o Aikupito o se pologa, ae na silasila le Alii ia te ia o se tagatavaai. Na ofu e Mamona le ofutau o se fitafita, ae na silasila le Alii ia te ia o se perofeta.
O i tatou o atalii ma afafine o se Tama o i le Lagi e ola pea, alofa, ma silisiliese lona mana. O i tatou o ni tagata faavavau e pei ona foafoaina i tatou mai le efuefu o le eleele. E tofu i tatou uma ma se malosiaga e toetoe a le mafai ona tatou mafaufauina.
Na tusia e le Aposetolo o Paulo, “O mea e lei vaaia e mata, e lei lagona foi e taliga, e lei oo foi i le loto o se tagata, o mea ia ua saunia e le Atua mo i latou o e alolofa ia te ia.”11
E mafai la faapefea e le toatele o isi ona vaai ifo ia i latou ua na o se solofanua toeaina efuefu e le tele sona tau? O loo i ai se aloiafi o le maoae i totonu o i tatou uma taitoatasi—o se meaalofa mai lo tatou Tama Faalelagi faavavau alofa. E pule lava i tatou po o le a le mea tatou te faia i lena meaalofa.
Ia alofa i le Alii ma lou loto atoa, manatu atoa, mafaufau atoa, ma le malosi atoa. Ia auai i galuega mamalu ma le taualoa. Ia foafoaina i o outou fale ni malutaga o le paia ma le malosi. Ia faalautele o outou valaauga i le Ekalesia. Ia faatumuina o outou mafaufau i aoaoga. Ia faamalolosia a outou molimau. Ia aapa atu i isi.
Ia fatuina i lou olaga se galuega autu o lou olaga.
Uso e ma tuafafine, o le maua atili o le ola e le oo mai ia i tatou i se afifi ua uma ona saunia. E le o se mea e mafai ona tatou okaina ma faamoemoe e tiliva mai i le meli o le aoauli. E le oo mai e aunoa ma faigata po o le faanoanoa.
E oo mai e ala i le faatuatua, faamoemoe, ma le alofa. E oo mai ia i latou o e, e ui lava i faigata ma le faanoanoa, ae malamalama i upu a le tasi tusitala o le na faapea mai, “I le maatiati o le taumalulu, na iu ina ou aoaoina ai o loo i totonu ia te au se taumafanafana lē mafaatoilaloina.”12
O le ola e maua atili e le o se mea tatou te taunuu atu i ai. Ae o se faigamalaga matagofie lea na amataina, i aso lava la ua leva ma o le a le muta lava.
O se tasi o faamafanafanaga sili o le talalelei a Iesu Keriso o le malamalama lea faapea o lenei olaga faaletino e pei o le emo o le mata i le vaai a le faavavau. E tusa pe faatoa tatou amataina la tatou faigamalaga faaletino pe ua taufaaiuiuina, o lenei olaga e na o le tasi lava le laasaga—le laasaga puupuu e tasi.
O la tatou sailiga mo le ola ia maua atili e faaofuina e le gata i ofu talaloa o lenei tino faaletino; o le taunuuga moni lea e mafai ona faamalamalamaina ai mai le vaai a le faavavau lea e le mailoa le mea e gata ai i o tatou luma.
Uso e ma tuafafine, o le sailiga o le ola atili tatou te maua ai lo tatou taunuuga.
E pei ona faamatalaina i le tala o anamua, o se solofanua sa tuulafoaiina o loo i ai i totonu ia te ia se agaga o se siamupini, o loo i ai foi i totonu o i tatou taitoatasi se aloiafi faalelagi o le silisiliese. O ai na te iloa po o le a le mea tatou te gafatia pe afai e na ona tatou taumafai? O loo mafai lava ona tatou au atu i le ola atili, pe afai o le a na ona tatou feinu lava mai le vaiola, ia faatumuina o tatou loto i le alofa, ma foafoaina ai i o tatou olaga se ata e sili ona maoae.
Ia faapea ona tatou faia, o la’u tatalo lea i le suafa o Iesu Keriso, amene.