“Ou Te Le Toe Manatua Lava Au Agasala”
E ala i le fuafuaga togiola a le Tama, o le a le “lafoaieseina ai e faavavau” i latou o e tautevateva ma pauu.
O la’u savali e faatatau i se tamā ma se atalii. O Alema, le tama, sa avea ma se perofeta; o lona atalii o Korianetona, sa avea ma se faifeautalai.
E toalua atalii o Alema—o Sepulona, ma Korianetona, le uii—na o atu i se misiona i sa Sorama. Sa matuai le fiafia Alema i le toilalo o lona atalii o Korianetona e ola i tulaga faatonuina a se faifeautalai. Na tuua e Korianetona lana galuega ae alu atu i le nuu o Sairona i le fafine talitane o Isapela (tagai Alema 39:3).
“E le se mea lea e faamagaloina ai oe, lo’u atalii e. Sa tatau ia te oe ona tausi i le galuega na tuuina atu ia te oe” (Alema 39:4).
Na ta’u atu e Alema i lona atalii e faapea na taitaieseina o ia e le tiapolo (tagai Alema 39:11). O le legavia ua “sili ona inosia i agasala uma, toe lava o le faamasaaina o le toto o lē ua le sala ma le faafiti i le Agaga Paia” (Alema 39:5).
“Seanoa ana e le faia lena agasala tele.” Ona ia faapea atu lea: “Ana le aoga ia te oe, po ua ou le tautala i au agasala e faaatuatuvale ai lou loto.
“Ae faauta, e le mafai ona e natia au agasala ai le Atua” (Alema 39:7–8).
Na ia poloai atu ma le malosi i lona atalii ina ia talia le fautuaga a ona uso matutua (tagai Alema 39:10).
Na ta’u atu e Alema ia te ia e faapea sa matuai tele lana amioletonu, aua na toe faaliliueseina ai tagata sailiili: “Ina ua latou vaaia lau amio, ua le mafafai ai i latou ona talitonu i a’u upu.
“O lenei foi, ua faapea mai le Agaga o le Atua ia te au: Ina poloai atu ia i lau fanau ia amiolelei, nei latou taitai ese loto o tagata e toatele i le malaia; o le mea lea, ou te poloai atu ai ia te oe, lo’u atalii e, ma le mata’u i le Atua, ia e aloalosā i au amioletonu” (Alema 39:11–12).
Ina ua mavae lenei aoaiga loloto, ona avea lea o Alema le tamā agalelei ma Alema le faiaoga. Na ia iloaina “ua aoga tele le talaiga o le upu i le taitaiina o le nuu e fai mea tonu—e moni, sa sili ona aoga ai i manatu o le nuu ai le pelu, po o se tasi mea” (Alema 31:5). O lea na aoaoina ai e Alema ia Korianetona.
Na ia talanoa atu muamua e uiga ia Keriso: “Lo’u atalii e, ou te fia fai atu ia te oe ni nai upu e uiga i le afio mai o Keriso. Faauta, ou te fai atu ia te oe, e moni, o ia lava e afio mai e aveese agasala a le lalolagi; ioe, e afio mai o ia e talai atu le talalelei o le olataga i lona nuu” (Alema 39:15).
Na fesili Korianetona pe tatau faapefea ona latou iloa e uiga i le afio mai o Keriso i se taimi mamao a o le’i oo i ai.
Na tali Alema, “Pe le tusa ea ona taua i le Atua se agaga i ona po nei ai le taua o se agaga i le aso o lona afio mai?” (Alema 39:17).
Na “atu le manatu [o Korianetona] e uiga i le toetu mai o e ua oti” (Alema 40:1).
Na fesili atu Alema i le Atua e uiga i le Toetu ma ta’u atu ia Korianetona e uiga i le Uluai Toetu ma isi toetutu. “Ua tuupoina le aso e toetutu mai ai tagata uma nai e ua oti” (Alema 40:4).
Na fesili atu o ia “po o fea le mea e nonofo ai agaga o tagata i le va o ona po o le oti ma ona po ua tuupoina ai le toetu” (Alema 40:7).
Ona ia ta’u atu lea ia Korianetona, “O agaga o tagata uma, pe lelei i latou pe leaga, ua aveina atu i latou e nonofo i le maota o le Atua, o Le na foai mai le ola ia te i latou” (Alema 40:11). O “e amiotonu i le mea e fiafia ai” (Alema 40:12), ma o le tiapolo e “avea faatagataotaua i le loto o le tiapolo” (Alema 40:13). O e amiotonu e tumau “i parataiso seia oo i le aso o lo latou toetu mai” (Alema 40:14).
“Pe a oo ia te outou lena iuga matautia, tou te le mafai ona faapea atu, ou te salamo, ou te foi atu i lo’u Atua. E leai, tou te le mafai ona faapea; aua o lea lava agaga o i ai i o outou tino i le aso tou te tetea ai ma lenei olaga e toe foi atu i o outou tino i lena olaga faavavau” (Alema 34:34).
Na ta’u atu e Alema i lona atalii “e i ai le va i le oti ma le toetu mai o le tino, ma le tofia o agaga i le fiafia po o le faanoanoa, seia oo i le aso ua tuupoina e le Atua e toetutu mai ai o e ua oti, ma ia faatasia le agaga ma le tino, ma ia aumaia e tutu i luma o le Atua ia faamasinoina e tusa ma a latou galuega” (Alema 40:21).
“E toe tuuina atu le agaga”—o le agaga lea—”i le tino, ma le tino i le agaga” (Alema 40:23). Fai mai o ia, “o le toefuataiina lenei ua fetalaia mai i fofoga o le au perofeta” (Alema 40:24). Fai mai Alema “o i ai nisi ua faauigaese tusi paia, ma ua sese tele ona o lenei mea” (Alema 41:1).
Ona fai mai ai lea o Alema: “O lenei foi, lou atalii e, ou te iloa o i ai nisi mea o loo faaātuātu ai lou manatu, ua le mafai ona malamalama ia te oe—le amiotonu a le Atua i le faasalaina o tagata agasala; aua e te taumafai ona faapea, e le o le amiotonu lea e tuuina atu le agasala i le faanoanoa.
“O lenei, faauta lo’u atalii e, ou te faamatala atu lenei mea ia te oe” (Alema 42:1–2).
Na ia ta’u atu ia Korianetona e uiga i le Faatoaga o Etena ma le Pau o Atamu ma Eva: “Tou te iloa foi, ona o lenei mea sa vavaeeseina ai o tatou muai matua ai luma o le Atua, i le faaletino ma le faaleagaga; ua faapea foi ona tatou iloa na avea i la’ua ma tagata e gauai i o la’ua lava loto” (Alema 42:7).
“Sa tofia i tagata ia oti” (Alema 42:6).
Ona ia faamatalaina lea o le pogai e matuai alagatatau ai le oti: “Ana le seanoa le ala o le togiola, (faataatiaese) ina ua oti i latou, po ua faanoanoa loa o latou agaga, ona ua vavaeeseina i latou ai luma o le Atua” (Alema 42:11).
Na aoaoina e Alema ia Korianetona e uiga i le faamasinoga tonu ma le alofa tunoa: “E tusa ma le faamasinoga tonu, ua le mafai ai ona faataunuuina le toigola, seiloga e salamo tagata” (Alema 42:13).
Na ia faamalamalama atu e faapea “ua le mafai ona faataunuuina le ala o le alofa, seiloga ua faia le togiola, o le mea lea ua togiola ai e le Atua lava mo agasala a le lalolagi, ina ia faataunuuina le ala o le alofa, e faamalie ai iuga o le faamasinoga, ina ia sa’o ona lelei le Atua, o le Atua amiotonu, o le Atua foi ua finagalo alofa” (Alema 42:15).
Na ia aoaoina Korianetona e uiga i le tulaga mausali o tulafono e faavavau (tagai Alema 42:17–25).
Na tuusao lana faamalamalamaga i le pogai e tatau ai faasalaga: “O lenei, ua le mafai ona oo mai le salamo i tagata, seiloga ua i ai le sala faavavau, e tusa ma le ola o le agaga, e tu faafeagai ma le ala o le fiafia, e faavavau foi lea, e tusa ma le ola o le agaga” (Alema 42:16).
Na iloa lelei e Alema le tiga o le faasalaga ma le olioli o le salamo. Na faatiga tele foi o ia lava i lona lava tama i se tasi taimi, le tamamatua o Korianetona. Na faatuiese o ia ma fealuai ma “taumafai ona faaumatia le ekalesia” (Alema 36:6). Na taia o ia e se agelu, e le ona sa tatau ai mo ia, ae ona o tatalo a lona tama ma isi (tagai Mosaea 27:14).
Na lagona e Alema le tiga ma le tausalaina ma faapea mai: “Ua oo foi ina o faapea ona tigaina au i le puapuaga, ina o atuatuvale au i le manatu i a’u agasala e tele, faauta, sa ou manatua na ou faalogo i lo’u tama ua vavalo i le nuu e uiga i le afio mai o le toatasi, o Iesu Keriso, o le Alo o le Atua, e togiola agasala a le lalolagi.
“Ina o taofi a’u e lo’u loto i lenei manatu, sa ou tagi ifo i lo’u loto: Iesu e, le Alo o le Atua, ia e alofa mai ia te au o loo i le au oona, ma ua noanoatia i filifili o le oti faavavau.
“O lenei foi, faauta, ina o ou manatu i lenei mea, ua le toe mafai ona ou manatua o’u tiga; ioe, ua ou le toe atuatuvale i le mata’u i a’u agasala.
“Ioe, ua maeu lava le olioli, ma le malamalama ofoofogia na a’u vaaia; ioe, sa faatumuina lo’u agaga i le olioli matua tele, e tusa ma le tele o lo’u tiga!
“Ioe, ou te fai atu ia te oe, lo’u atalii e, sa le mafai se tasi mea ona silisili ma oona tusa ma ou tiga. Ioe, ou te toe fai atu foi ia te oe, lou atalii e, o le tasi mea, e le mafai ona silisili ma malie se tasi mea e tusa ma lo’u olioli… .
“Ioe, e afua i lea aso e oo mai i nei ona po, ua ou galue e le aunoa, ina ia ou taitai mai agaga i le salamo; ina ia ou taitaiina mai foi i latou e tofotofo i le olioli silisili na ou tofotofoina; ina ia fanauina foi i latou i la le Atua, ma ia faatumuina i latou i le Agaga Paia” (Alema 36:17–21, 24).
Na fesili atu Alema ia Korianetona, “Oi! fa’i ea e mafai le alofa ona fao mea ai le faamasinoga?” (Alema 42:25). Sa ia faamalamalama atu e faapea, ona o le Togiola a Keriso, ua mafai ai ona faamalieina nei vaega uma e ala i le tulafono e faavavau.
I le “uunaiina e le Agaga Paia” (MFF 121:43; tagai foi Alema 39:12), na ia aoaiina malosi ai Korianetona. Ma, ina ua uma ona [ia] aoaoina atu i le manino ma le faapalepale ia nei mataupu faavae taua o le talalelei, ona oo mai lea o se alofa faateleina.
Na aoaoina ia le Perofeta o Iosefa Samita e ala i faaaliga e faapea “e le tatau ona faatumauina se mana po o se uunaiina o le pule o le perisitua, tau lava i le tauanau atu, i le faapalepale, le agalelei, ma le agamalu, ma le alofa faamaoni;
“I le agalelei, ma le malamalama mama, e matua faalauteleina ai le agaga e aunoa ma le pepelo, e aunoa ma le faaoleole—
“I le aoai faamalosi atu i aso e tatau ai, pe a uunaiina e le Agaga Paia; a e faaali atu mulimuli le alofa faateleina i le ua e aoaiina, ina nei fai oe e ia mona fili;
“Ina ia na iloa ai o lou faamaoni e sili atu ona malosi i lo noataga o le oti” (MFF 121:41–44).
Fai mai Alema: “Lo’u atalii e, ou te loto ina ia e le toe faafitia le amiotonu a le Atua. Aua e te taumafai ona tauamiotonuina oe i se mea aupito faatauvaa ona o au agasala, e faafiti ai le amiotonu a le Atua; ae peitai, ia e tuu atu i le amiotonu a le Atua ma lona alofa, ma lona faapalepale e pule aoao i lou loto; ia e tuu i ai foi e aveina ifo oe i le efuefu i le loto faamaulalo” (Alema 42:30).
O le tamamatua o Korianetona, na igoa foi ia Alema, o se tasi o faitaulaga na auauna atu i le Tupu amioleaga o Noa. Na faalogo o ia i a Apinati le perofeta o molimau atu e uiga ia Keriso, ma na liliu ai o ia. Ina ua faasalaina i le oti, na sola ai o ia mai le faamasinoga a le tiapolo ina ia aoao atu e uiga ia Keriso. (Tagai Mosaea 17:1–4.)
O lenei la, ua pei foi Alema o lona tama, na augani atu i lona atalii o Korianetona ina ia salamo.
Ina ua maea ona aoaiina malosi lona atalii, ma aoaoina atu ma le faapalepale ia aoaoga faavae o le talalelei, ona faapea atu lea o Alema le tama agalelei, “O lenei foi, lo’u atalii e, ou te loto ina ia e le toe atu i nei mea e faaatuatuvale ia te oe, a ia na o au agasala e te atu ai i lena atuatuvale e mafai ona faamaulaloina ai oe e oo i le salamo” (Alema 42:29).
I le tiga ma le faalumaina, na aveina “ifo ai [Korianetona] i le efuefu i le loto faamaulalo” (Alema 42:30).
O Alema, o le tama o Korianetona ma o lona taitai perisitua foi, ua faamalieina nei i le salamo o Korianetona. Na ia sii ese le avega matautia o le tausalaina lea na tauaveina e lona atalii, ma toe auina atu o ia i le misiona: “O lenei foi, lo’u atalii e, ua valaauina oe e le Atua e talai atu le upu i lenei nuu… . Alu ia oe, ia e talai atu le upu ma le faamaoni ma le faautauta… . Ia alofa le Atua ia te oe, e tusa ma a’u upu” (Alema 42:31).
Na faatasi atu Korianetona i ona uso o Helamana ma Sepulona, o e na i ai faatasi ma taitai perisitua. I le luasefulu tausaga mulimuli ane i le laueleele i matu, na galue ai pea o ia ma le faamaoni i le talalelei. (Tagai Alema 49:30; 63:10.)
O se lalolagi matuai amioleaga, amioleaga tele o loo tatou ola ai, ma o lea e tatau ai ia tatou fanau ona sailia lo latou auala. O luitau o ponokarafi, o le fenumiai o itupa, ola le mama, sauaina o fanau, o le vaisu o fualaau oona, ma isi mea uma ua i ai i soo se mea. E leai se auala e sosolaese ai mai a latou faatosinaga.
O nisi e taitaiina atu e le fia iloa e oo atu i le faaosoosoga, sosoo ai ma le faata’ita’i i ai, ma maileia ai lava nisi ma fai ai ma vaisu. E le toe i ai so latou faamoemoe. E seleseleina e le fili lana seleselega ma fusifusia ia mau.
O Satani o le taufaasese, o le faaumatia, ae le tumau lona manumalo.
E faatalitonuina e agelu a le tiapolo ia nisi e faapea ua latou fananau mai i se olaga e le toe mafai ai ona latou sosolaese ma ua faamalosia ai e ola i le agasala. O le pepelo e aupito sili ona amioleaga e faapea e le mafai ona toe suia i latou pe salamo ma o le a le faamagaloina foi i latou. E le moni lena mea. Ua latou faagaloina le Togiola a Keriso.
“Aua faauta, o le Alii lo oulua Faaola na maliu tiga i le tino; o le mea lea na tigaina ai o ia i le tiga o tagata uma, ina ia salamo tagata uma lava ma o mai ia te ia” (MFF 18:11).
O Keriso o le Foafoa, o le Faamalolo. O mea na Ia faia, e mafai ona Ia toe faaleleia. O le talalelei a Iesu Keriso o le talalelei o le salamo ma le faamagaloga (tagai 2 Nifae 1:13; 2 Nifae 9:45; Iakopo 3:11; Alema 26:13–14; Moronae 7:17–19).
“Ia manatua e taua tele le aoga o agaga i le silafaga a le Atua” (MFF 18:10).
O le tala e uiga i lenei tama agalelei ma se atalii le usiusitai, na aumaia mai le Tusi a Mamona: O Se Tasi Molimau ia Iesu Keriso, o se ituaiga, o se mamanu, o se faataitaiga.
O loo ia i tatou uma se Tama agalelei oi le Lagi. E ala i le fuafuaga togiola a le Tama, o le a le “lafoaieseina ai e faavavau” i latou o e tautevateva ma pauu (Itulau autu o le Tusi a Mamona).
“Faauta i le silisili o lona olioli i le agaga ua salamo!” (MFF 18:13).
“E le mafai e le Alii ona vaai atu i le agasala ma faatagaina ai sina mea itiiti lava; ae ui i lea” (MFF 1:31–32), na fetalai le Alii, “o le ua salamo i ana agasala, e faamagaloina o ia, ma o Au, le Alii ou te le toe manatua lava” (MFF 58:42).
Pe mafai ea ona i ai nisi upu e sili atu ona suamalie pe sili atu ona faamafanafanaina ai, e sili atu ona tumu i le faamoemoe, nai lo na afioga mai tusitusiga paia? “O au le Alii, ou te le toe manatua lava [a latou agasala]” (MFF 58:42). O le molimau lena a le Tusi a Mamona, ma o lau molimau foi lena ia te outou, i le suafa o Iesu Keriso, amene.