O Mea Malepelepe e Fonofonoina
Ina ua Ia fetalai atu i e matitiva i la le agaga, “O mai ia te au,” o lona uiga ua Ia silafia le auala i fafo ma ua Ia silafia le auala i luga.
O uluai upu lava na fetalai i ai Iesu i Lana Lauga mamalu i luga o le Mauga, na fai i le au atuatuvale, o le au lotovaivai ma le au faanoanoa. “Amuia e lotomaulalo,” na Ia fetalai ai, “aua e o latou le malo o le lagi.”1 E tusa pe o outou o ni tagata O Le Ekalesia a Iesu Keriso o le Au Paia o Aso e Gata Ai, pe o nisi o le fiasefulu afe o loo faalogologo mai i lenei taeao e le auai i lo tatou faatuatuaga, ou te tautala atu ia i latou o loo feagai ma tofotofoga faaletagata ma tauiviga faaleaiga, o i latou e feagai ma taua e tauina i o latou lava loto, o i latou o loo taumafai e tau taofiofi lologa faataumaoi o le faanoanoa ia e i ai nisi taimi e lofituina ai i tatou e pei o se galulolo faanoanoa o le agaga. Ou te fia tautala faapitoa atu lava ia te outou o e ua lagona o outou olaga, ua malepelepe, ma ua manatu e le mafai ona toe fonofonoina.
Ou te ofoina atu ia te outou uma na le vaifofo mautinoa ma le suamalie ua ou iloa. O loo maua lea i le valaau manino na tuuina mai e le Faaola lava Ia o le lalolagi. Na fetalai o Ia i le amataga o Lana galuega, ma sa Ia toe fetalai ai foi i le faaiuga. Sa fetalai atu ai o Ia i e na talitonu, ma sa Ia fetalai atu ai foi ia i latou e le’i matua mautinoa. Sa Ia fetalai atu i tagata uma, pe o a lava o latou faafitauli faaletagata o i ai:
“Ia outou o mai ia te au, o outou uma o e tigaina ma mafatia i avega, o a’u foi e malolo ai outou.
“Ia outou amoina la’u amo, ma ia outou faaa’oa’o ia te au; aua o a’u le agamalu ma le lotomaulalo; ona maua lea e outou o le malologa mo outou agaga.”2
I lenei folafolaga, e taua tele lena fuaitau tomua, “o mai ia te au.” O le ki lena i le filemu ma le malologa o loo tatou sailia. Ina ua tuuina atu e le Faaola toetu Lana lauga ia sa Nifae i le Malumalu i le Lalolagi Fou, sa Ia amataina, “Amuia e lotomaulalo o e o mai ia te au, aua e o latou le malo o le lagi.”3
Ina ua faatoa faalogo Anitelea ma Ioane i le Keriso, sa matua ootia i la’ua ma sa la mulimuli atu ia te Ia, a o maliu ese atu mai le motu o tagata. Ina ua ia lagona o loo tulituliloa atu o Ia, o lea sa faliu ai Iesu ma fesili atu i nei alii e toalua, “Se a ea la oulua feau?” Sa la tali atu, “O fea e te mau ai?” Ona fai atu lea o Iesu, “O mai ia ina matamata.” O le aso na sosoo ai sa Ia maua ai foi se isi soo, o Filipo, ma sa na ona fetalai atu lava ia te ia, “Mulimuli mai ia te au.”4 I sina taimi puupuu lava mulimuli ane, sa Ia valaau aloa’ia ai Peteru ma isi Aposetolo fou, i lea lava agaga e tasi o le valaaulia. “Ina mulimuli mai ia ia te au,”5 na Ia fetalai atu ai.
E foliga manino mai o le fatu o lo tatou tiute ma le faavae manaomia o lo tatou olaga faitino, ua maua mai i nei fuaitau pupuu mai soo se aofaiga o vaaiga i le galuega faaletino a le Faaola. O loo Ia fetalai mai ia i tatou, “Faatuatua ia te au, faaaoao ia te au, fai le mea ou te faia. Ma, afai e te savali i le mea Ou te alu i ai,” na Ia fetalai ai, “e mafai ona ta talanoa i le mea o loo e alu i ai, ma faafitauli o loo e feagai ma faigata o loo ia te oe. Afai o le a e mulimuli mai ia te au, o le a ou taitaieseina oe mai le pogisa.” Ua Ia folafola mai, “O le a ou tuuina atu tali i au tatalo. O le a ou tuuina atu le malologa i o outou agaga.”
A’u uo pele, ou te le iloa lava se isi auala e faamanuiaina ai i tatou pe saogalemu ai mai le tele o lualoto ma faigata o le olaga. Ou te le iloa lava se isi auala e tauaveina ai a tatou avega po o le mauaina o le mea na ta’ua e Iakopo i le Tusi a Mamona e faapea “o lena olioli ua saunia mo le au paia.”6
E faapefea la e se tasi ona “sau ia Keriso” i le tali atu i lenei valaaulia faifaipea? O loo tuuina mai i tusitusiga paia le anoanoai o faataitaiga ma auala eseese. Ua outou masani lelei i le tele o faataitaiga masani. O faataitaiga sili ona faigofie ma vave e oo mai lea i le manao o o tatou loto, le ituaiga faatuatua masani lena tatou te iloa. “Afai tou te le mafaia se mea e sili i le manao i le fia faatuatua,” fai mai Alema, “ma faaaoga [na o] sina faatuatua itiiti lava, … tuu atu sina vaega itiiti mo folafolaga a le Atua e sailia se apitaga—ua lava lena e amata ai.7 O le na o le talitonu, o le na ona i ai o “sina iota” o le faatuatua—o le faamoemoe lea mo mea e le o vaaia i o tatou olaga, ae ua moni lava8—lena laasaga faigofie, pe a taulai atu i le Alii o Iesu Keriso, ua avea ma o le a avea pea lava ma uluai mataupu faavae o Lana talalelei faavavau, le laasaga muamua e alu ese ai mai le faanoanoa.
Lona lua, e tatau ona tatou suia soo se mea e mafai ona tatou suia lea e mafai ona avea ma se vaega o le faafitauli. I le faapuupuuga e tatau ona tatou salamo, atonu o le upu sili lea ona faamoemoe i ai ma faamalosiauina ai i le gagana faaKerisiano. Tatou te faafetai i lo tatou Tama o i le Lagi ona ua faatagaina i tatou ina ia suia. Tatou te faafetai ia Iesu ua mafai ona suia i tatou, ma e faatoa mafai lava ona tatou faia i le na o le La fesoasoaniga mai le lagi. E mautinoa lava e le o mea uma tatou te tauivi ai o se taunuuga lea o mea tatou te faia. E masani lava o le taunuuga o mea e faia e isi po o mea lava e tutupu i le olaga. Ae o mea uma e mafai ona tatou suia e tatau ona suia, ma e tatau ona tatou faamagaloina le isi toatele. O le auala lenei o le a le mataofia ai lo tatou sao atu i le Togiola a le Faaola, a o faapea ona mafai ona tatou faia faatasi ai ma o tatou le atoatoa. O le a Ia faaauau atu mai iina.
Lona tolu, i le tele lava o auala e mafai ai, tatou te taumafai ai e tauave i o tatou luga Lona tagata, ma e tatou te amataina lea i le tauaveina i o tatou luga o Lona suafa. O lena igoa e tuuina atu aloaia e ala i se feagaiga i sauniga faaola o le talalelei. O na feagaiga e amataina i le papatisoga ae faaiu i feagaiga o le malumalu, faatasi ai ma le tele o isi, e pei o le taumamafa i le faamanatuga, ua faasalalauina i o tatou olaga atoa e avea o ni faamanuiaga faaopoopo ma faamanatu. I le aoaoina atu i tagata o ona vaitaimi le savali ua matou tuuina atu i lenei taeao, na saunoa ai Nifae, “Mulimuli atu i le Alo, ma le loto atoa, … ma le loto faamaoni, … tauave i o outou luga le suafa o Keriso… . Ia outou faia mea ua ou fai atu ia te outou ua ou vaaia e fai e lo outou Alii ma lo outou Togiola [o le a] faia.”9
O le mulimuli i ai i nei aoaoga faavae silisili, o sootaga matagofie ma Keriso e tatalaina mai ai ia i tatou le anoanoai o auala e le mafaitaulia: o le tatalo ma le anapogi ma le mafaufau loloto i Ona faamoemoega, talisapaiaina o tusitusiga paia, tuuina atu le auaunaga i isi, “fesoasoani i e vaivai, ia sii a’e lima o loo tautau i lalo, … ma faamalosia tulivae vaivai.”10 Ma le mea silisili i lo mea uma, ia alofa atu i le “alofa mama o Keriso,” lena meaalofa lea “e le uma,” lea e “faatoatoa i mea uma, e talitonu i mea uma, e faamoemoe i mea uma, ma onosai i mea uma.”11 E le pine, ae tatou iloaina o o tatou olaga e tele auala eseese e tau atu ai i le Matai, peitai, o taimi uma lava tatou te aapa atu ai, e tusa po o le a lo tatou vaivai mo Ia, tatou te iloaina ai sa Ia taumafai lava e oo mai ia i tatou. O lea tatou te laa ai i luga, tatou te tauivi, tatou te saili ma aua nei fiu.12
O lo’u manao i lenei aso e mo i tatou uma lava—e le na o i latou o e “matitiva i la le agaga” ae o i tatou uma lava—ina ia tatou tofu maua uma ni aafiaga patino i faataitaiga a le Faaola. O nisi taimi ua faatafatafa ai lo tatou saili i le lagi, ua taulai atu i polokalama po o le talaafaasolopito po o aafiaga o isi. E taua mea na ae le taua tele e pei o aafiaga faaletagata lava ia, ia avea ma soo moni, ma le malosi lea e maua mai aafiaga tuusao o le silisiliese o Lona pa’i mai.
Pe o oulua tauivi ea ma se temoni o mea ua fai ma vaisū—tapaa po o fualaau oona po o le taalo faitupe, po o le tai fana’e o le mala faatafuna o ponokarafi? Pe o faaletonu ea lau faaipoipoga po o pagatia ea sau tamaitiiti? Pe o e le mautonu ea i le faasinomaga o itupa po o le sailia o lagona lelei ia te oe lava? Pe o oe—po o se tasi e te alofa i ai—o loo feagai ma se faama’i po o se faanoanoaga po o le oti? Po o a lava ia isi laasaga e mafai ona e uia ina ia foia ai ni popolega, ia sau muamua lava ia Keriso. Faatuatua i Ana folafolaga. I lena tulaga, o le molimau a Alema o la’u molimau foi lena: “Ua ou mautinoa o i latou uma o e faalagolago i le Atua, e lagolagoina i latou i o latou tofotofoga, ma o latou tiga, ma o latou puapuaga.”13
O lenei faalagolago i le natura alofa tunoa o le Atua o loo i le totonugalemu o le talalelei na aoaoina e Keriso. Ou te molimau atu o le Togiola a le Faaola e siieseina ai mai ia i tatou e le gata o avega o a tatou agasala, ae faapena foi i avega o o tatou mafatiaga ma faanoanoaga, o o tatou lototiga ma o tatou lē fiafia.14 Mai lava i le amataga o le faatuatua i se fesoasoani faapena o le a tuuina mai ai ia i tatou e le gata i le mafuaaga ma se auala e faaleleia ai, ae o se faamalosiauga ina ia tuuese a tatou avega ae tauave lo tatou faaolataga. E mafai ona i ai ma o le a tele foi faigata i le olaga. Ae ui i lea, o le agaga e sau ia Keriso, o le na te iloa Lona siufofoga, ma tauivi ina ia faia e pei ona Ia faia, e mauaina se malosi, e pei ona fai mai le viiga, “e sili atu nai lo [ia] lava.”15 Ua faamanatu mai e le Faaola ia i tatou faapea ua Ia “togitogi i [tatou] i alofilima o [Ona] lima.”16 Mafaufau i le le mafuatiaina o le tau o le Faasatauroga ma le Togiola, ou te folafola atu ia te outou o le a Ia le fuli mai Lona tua ia i tatou i le taimi nei. Ina ua Ia fetalai atu i e matitiva i la le agaga, “O mai ia te au,” o lona uiga ua Ia silafia le auala i fafo ma ua Ia silafia le auala i luga. Ua Ia silafiaina aua sa savali ai o Ia i le ala. Ua Ia silafia aua o Ia o le ala.
Uso e ma tuafafine, po o le a lava lou faanoanoaga o i ai faamolemole aua e te fiu ma faamolemole aua e te tuu atu i le fefe. E masani ona ou ootia i le tala faapea, a o tuuvaaese atu lona atalii mo lana misiona i Egelani, sa tuu atu ai e Uso Bryant S. Hinckley i le taulealea o Gordon se opo faamavae ma momono atu ia te ia se faaupuga sa tusilima ai ni upu mai le mataupu e lima o le tusi a Mareko: “Aua e te mata’u, tau lava ina e faatuatua.”17 Ou te mafaufau lava i lena po a o faanatinati atu Keriso e fesoasoani i Ona soo ua fefefe, sa Ia savali i luga o le vai, ma valaau a o Ia agai atu, “Aua tou te matatau; o au lava.” Sa tali atu Peteru, “Le Alii e, afai o oe, ia e fetalai mai ia te au, ou te alu atu ia te oe i luga o le vai.” O le tali a Keriso ia te ia e pei lava ona i ai i taimi uma, “Ina sau ia,” sa Ia fetalai atu ai. Na vave lava, e pei o lona natura, ona faataalise atu Peteru i luga o le vaa ma savali i luga o le vasa galuā. A o taulai atu ona mata i le Alii, atonu sa lelea lona lauulu i le matagi ma atonu sa susu lona ofu i le pisi, ae sa lelei mea uma—sa ia alu atu ia Keriso. Ana le maluelue lava lona faatuatua ma ua pule ai le fefe, ana le aveesea lava lana vaai mai le Matai ae tepa ifo i le fafati o galu ma le uliuli patoi o le alititai, o lea na amata ai loa ona ia magoto ifo i le sami. O lona fefe na alaga atu ai, “Le Alii e, ia e faaola mai ia te au.”
E le masalomia le i ai o sina faanoanoaga, a o faaloaloa atu le aao o le Matai e i ai tali i faanoanoaga ma le lotovaivai ma popolega uma, ma uu mai le soo o le a malemo, ma fai atu sina aoa’iga malu, “O oe na le faatuatua itiiti, se a le mea ua e masalosalo vale ai?”18
Afai o loo tuua na o oe, faamolemole ia iloa e mafai ona e maua le faamafanafaga. Afai ua e lotovaivai, faamolemole ia iloa e mafai ona e maua le faamoemoe. Afai o loo e mativa i la le agaga, faamolemole ia iloa e mafai ona faamalosia oe. Afai o e lagona lou nutimomoia, faamolemole ia iloa e mafai ona toe faaleleia oe.
I Nasareta, le ala vaapiapi,
Lea e eeva ai vae ma tau le maua ai se manava,
E sopoia ai le nofoaga sa avea ma malutaga
O le Kamuta o Nasareta.
I le a’ea’e ma le ifoifo o le ala pefu
E masani ona malaga ai tagata o le nuu;
Ma o luga o le fata, i Ona autafa o loo taatitia ai
Ia mea malepelepe mo ia e fonofonoina.
O le teineitiiti ma le pepe taalo sa ia gagauina,
O le fafine ma le nofoa gau,
O le tamaloa ma le palau po o le suo ua gau,
Ua faapea atu, “E mafai ona e fonoina, Kamuta?”
Ma sa taufai maua e i latou mea sa ia sailia,
I le suo, palau, nofoa, po o le pepe taalo;
O mea malepelepe na latou aumaia
Ua toe faafoi atu ua atoatoa.
O lea, i luga o le mauga i le gasologa o tausaga,
I le savali ua eeva ma mata ua faanoanoa,
Sa sailia ai e agaga ua mafatia,
Ma tuufesili uma ai i le fesili faanoanoa:
“Le Kamuta e o Nasareta,
O lenei loto ua le mafai ona toe faaleleia,
O lenei olaga ua toe ina a oo i le oti,
Pe mafai ona e fonoina, Kamuta?”
O Lona agalelei ma le naunau e fesoasoani,
O Lona soifua tauleleia ua lalagaina
I o tatou olaga nutimomoia, seia oo ina tulai mai
O Se Foafoaga Fou—“o mea fou uma.”
“O mea e pala ma lē aoga o lo’u loto,
O manaoga, faanaunauga, faamoemoega, ma le faatuatua,
Ia e faaatoatoaina,
Le Kamuta e o Nasareta!”19
Ia mafai e i tatou uma, aemaise o e matitiva i la le agaga, ona o mai ia te Ia ma ia faaatoatoaina ai, ou te ole atu ai, i le suafa o Iesu Keriso o Nasareta, amene.