Te tatarahaparaa, e haamaitairaa no te ti‘araa melo
Te tatarahaparaa… e ere te hoê ture paari… E ture maitai e te aroha ra teie.
E to‘u mau taea‘e here e, te oaoa nei au e te haehaa nei te aau i te mauraa i teie nei ti‘araa to‘u. No te mau tumu ta outou i ite, aita roa‘tu i tae noa‘e i roto i to‘u nei feruriraa e e tae mai teie huru piiraa ia‘u nei. Hoê matahiti i teie nei, i te taime a paturuhia‘i au, ua faaite papû te peresideni Hinckley i te taatoaraa o te Ekalesia e e ere na‘na i haamata i te rave‘a ma‘itiraa tei hope na roto i to‘u pii-raa-hia. Ua parau vau ia‘na i muri iho e au ra e o vau ana‘e te hui mana faatere i roto i te aamu o te Ekalesia tei paturuhia e te mau melo noa‘tu te parau a te peropheta !
Te mauruuru nei râ vau no ta outou patururaa, e te fafau nei au i te horo‘a i to‘u aau atoa no teie ohipa rahi mau. Aita i rava‘i te parau no te faaiteraa i to‘u mauruuru rahi no to‘u utuafare, no to‘u hoa faaipoipo e ta‘u mau tamarii, e no to‘u na metua maitai. Ua pohe to‘u metua vahine e piti matahiti ti‘a i teie nei, e piti noa mahana i muri a‘e i te amuiraa rahi. E mea na‘ina‘i oia i te faito o te tino, tera râ te ti‘a nei au i ni‘a i to‘na na tapono i te mau mahana atoa. E vai noa ta‘na faaururaa i ni‘a ia‘u nei e a muri noa‘tu. Eita e nehenehe ia‘u ia faahanahana au maitai ia‘na na roto i te mea ta‘u e parau, na roto ana‘e râ i te huru o to‘u oraraa.
Aita vau i ite eaha te parau no ni‘a i to‘u metua tane o te ore e faahaamâ ia‘na, maori râ te here nei au ia‘na, e te paturu nei au ia‘na. E faati‘a‘tu vau i te tahi parau no ni‘a ia‘u iho, a hi‘o ai au ia‘na i te paari-roa-raa, ua ho‘i atu to‘u mana‘o i te mau mahana e tamarii rii â matou, a tarava ai oia i ni‘a i te tahua e a taputo ai oia, e a ha‘uti ai oia e o matou, e a amo ai oia ia matou i roto i to‘na rima, e a tauahi, e a faakirikiri ai oia ia matou, aore râ a tuu ai oia ia matou i ni‘a i te ro‘i i piha‘i iho ia mama e ia‘na, ia ma‘ihia aore râ ia ri‘ari‘a matou i te pô. E riro to‘u haamana‘oraa ia‘na ei mau haamana‘oraa no te ata e te here ; no te tamau-noa-raa i ni‘a i te e‘a ti‘a, no te iteraa papû, no te ohipa tamau, no te faaroo e te haapa‘o maitai. E taata maitai e te paari oia, e ua haamaitai-rahi-hia vau no te mea te turu nei au ia‘na ei peropheta no‘u no teie taime o te oraraa tahuti nei, e te faariro atoa nei râ vau ia‘na ei metua tane no‘u i teie nei e a muri noa‘tu.
E rave rahi hebedoma i ma‘iri a‘enei ua anaanatae roa vau i te faarooraa i te parau a Elder Douglas L. Callister no te Hitu Ahuru a anihia‘i oia ia horo‘a mai i te hoê aamu poto no ni‘a i to‘na papa ruau, o LeGrand Richards. Taa ê atu i te tahi atu mau mea anaanatae mau ta‘na i faaite mai, teie ïa te hoê : I to Elder Richards riroraa ei episekopo apî roa, ua haere atu oia e farerei i te mau melo paruparu. Ua ani manihini atu oia ma te măta‘u ore ia ratou ia haere mai a a‘o i roto i te pureraa oro‘a no ni‘a i te parau tumu, « Eaha te auraa no‘u to‘u ti‘araa melo i roto i Te Ekalesia a Iesu Mesia i te Feia Mo‘a i te mau Mahana Hopea nei ». Te mea faahiahia, e rave rahi o ratou tei pahono i teie aniraa, e na te reira i tuu ia ratou i ni‘a i te e‘a no te itoito faahou mai i roto i te Ekalesia.
Te hinaaro nei au e paraparau i ni‘a i taua tumu parau ra i teie pô. Te ani nei au ia outou tata‘i tahi, te feia apî aore râ te feia paari, ia faataa i te hoê buka iti no te papa‘i i teie ihoa parau tumu. A papa‘i i ni‘a i te api matamua teie nei mau parau, « Eaha te auraa no‘u to‘u ti‘araa melo i roto i te Ekalesia a Iesu Mesia i te Feia Mo‘a i te mau Mahana Hopea nei ». I muri iho a tapa‘o i te mau mea tei tae mai i roto i te feruriraa. E tae mai â te tahi atu mau mana‘o, o ta outou e tuu faahou atu i ni‘a i ta outou tabula. Aita e maoro roa e noaa ia outou te hoê buka iti o te tupu noa i te rahi e o te faaî ia outou i te mauruuru e te oaoa no to outou meloraa i roto i te Ekalesia a te Fatu. E nehenehe te reira buka iti e riro ei rave‘a tauturu no te mau a‘oraa e nehenehe ta outou e anihia ia horo‘a i te mau mahana a muri a‘e.
Ua roa a‘ena ta‘u tabula, ua ma‘iti râ vau i te hoê no roto mai i teie buka iti no te paraparau atu i teie nei pô.
E paraparau atu vau no ni‘a i te tumu parau no te tatarahaparaa. Auê au i te mauruuru no to tatou ite no teie nei ture faahiahia. E ere te hoê ture paari, mai ta‘u i mana‘o i to‘u apîraa. E ture maitai e te aroha ra teie. Te auraa no te aa hebera no teie ta‘o o teie ïa, « fariu »,1 aore râ ho‘i faahou i te Atua… Ua taparu o Iehova i te mau tamarii no Iseraela, « A ho‘i mai na… e ore ho‘i au e hi‘o riri atu ia outou : e aroha ho‘i to‘u… e ore ho‘i au e tape‘a tamau i te riri e a muri noa‘tu. E fa‘i noa mai oe i ta oe hara, e ua taiva oe i to Atua ra ia Iehova ».2
Ia ite ana‘e tatou i ta tatou mau hara, e ia fa‘i e ia faaru‘e ana‘e tatou i te reira e ia fariu atu i te Atua ra, e faaore ïa Oia i ta tatou mau hara.
I to‘u taviniraa iho nei ei peresideni misioni, ua ani mai e piti o ta matou mau misionare ia farerei au i te hoê vahine, e imi nei i te parau mau, tei opuahia i te bapetizo i te mahana i muri mai. E mau uiraa ta‘na tei ore i noaa i te pahonohia e raua. Ua tere atu matou i to‘na ra fare, i reira to‘u farereiraa i te hoê vahine ivi apî e hau atu i te 25–30 matahiti i te paari e te hoê tamarii rii. Ua pohe ta‘na tane faaipoipo i roto i te hoê ati poromu tau na matahiti na mua‘tu. E mea feruri-maite-hia ta‘na mau uiraa, e e mea farii roa oia. I muri a‘e i te tatararaahia to‘na mau mana‘o pe‘ape‘a, ua ani au e, te vai ra anei te tahi atu â mau mana‘o pe‘ape‘a to‘na. Ua faaite mai oia e, ua hinaaro oia ia paraparau maua ana‘e. Ua ani au i te mau orometua ia haere atu i rapae au e ia ti‘a i ni‘a i te matie ia nehenehe ia raua e ite mai ia maua na roto i te hoê haamaramarama rahi. I muri noa iho i te piriraa‘tu te mau uputa i muri mai i te mau misionare, ua haamata oia i te ta‘i. Ua haamana‘o oia i te mau matahiti o oia ana‘e, tei î i te mauiui e te oto. Ua rave oia i te tahi mau hape rahi i roto i taua mau matahiti ra. Ua ite oia, mai te au ta‘na i parau mai, ua ere râ oia i te puai no te ma‘iti i te e‘a afaro e tae noa‘tu i te taime ua farerei oia i ta matou mau misionare. I roto i te mau hebedoma i haapiihia‘i oia, ua taparu oia i te Fatu ia faaore mai i ta‘na mau hara. Ua imi oia na roto atu ia‘u i te haapapûraa e na roto i ta‘na tatarahaparaa e na roto i te mau oro‘a no te bapetizoraa e te fariiraa i te Varua Maitai e nehenehe ia‘na ia tamâhia e ia riro ei taata ti‘amâ no te riroraa ei melo i roto i te Ekalesia. Ua haapii au ia‘na mai roto atu i te mau papa‘iraa mo‘a, e ua faaite atu ia‘na i to‘u iteraa papû no ni‘a i te ture no te tatarahaparaa e te taraehara.
I te mahana i muri iho ua haere atu vau e to‘u hoa faaipoipo i to‘na bapetizoraa e te bapetizoraa a ta‘na tamahine iti. Ua î roa te piha i te mau hoa no ta‘na paroita, tei ineine e tei hinaaro mau i te ti‘a i piha‘i iho ia‘na i roto i to‘na ti‘araa melo apî o te Ekalesia. A faaru‘e atu ai maua i taua oro‘a bapetizoraa ra, ua î roa vau i te mauruuru no te ture faahiahia no te tatarahaparaa, e no te taraehara tei faatupu i te reira ; no te semeio no te faafariuraa e no teie Ekalesia faahiahia e to‘na mau melo e no ta tatou mau misionare.
Eaha te auraa no‘u to‘u ti‘araa melo i roto i Te Ekalesia a Iesu Mesia i te Feia Mo‘a i te mau Mahana Hopea nei ? Te mau mea atoa ïa. Na te reira e faaûrû, e faaora, e faaô i te mau vahi atoa, e e horo‘a i te tumu e te auraa i te mau mea atoa i roto i te oraraa o te mea faufaa rahi no‘u : oia ho‘i te taatiraa e vai ra i rotopu ia‘u e te Atua, to‘u Metua Mure Ore, e Ta‘na Tamaiti Mo‘a ra, te Fatu, o Iesu Mesia. Na te reira e haapii nei ia‘u e na roto i te haapa‘oraa i te mau ture e te mau oro‘a no te evanelia, e ite ïa vau i te hau e te oaoa i roto i teie nei oraraa, e e anihia vau ia ora i mua i te aro o te Atua, e to‘u utuafare, i roto i te oraraa i muri mai i te oraraa tahuti, i reira To‘na aroha e faaore ai i te mau titauraa a te parau faautu‘a, e e haati ai ia‘u e to‘u utuafare, e ia outou e to outou utuafare, i roto i te rima o te ora.3 Te faaite papû nei au i te reira, i te i‘oa o Iesu Mesia, amene.