E taui ta oe misioni i te mau mea atoa
A haere mai e ia riro outou ei tufaa no te u‘i misionare rahi roa‘e i ore â i itehia‘e nei e to te ao.
Hoê matahiti i teie nei to‘u tururaahia i roto i te amuiraa rahi. Te vai nei to‘u mauruuru no teie matahiti e no te mau mea atoa o ta‘u i farii. Te here nei au i te Fatu e te mauruuru rahi nei au no Ta‘na tusia e no Ta‘na evanelia. Te here nei au i te peresideni Hinckley e te turu nei au ia‘na ei peropheta na te Fatu i ni‘a i te fenua nei. Ma te amui atu i te Feia Mo‘a i te mau vahi atoa, te faaite papû nei au no ni‘a i te mau peropheta e te mau aposetolo i to tatou anotau e te pûpû nei au i to‘u oraraa no Ta‘na ohipa.
I te tahi mau matahiti i ma‘iri a‘e nei, te uiui ra vau i te mau mionare. Te farara ra te hoê vero to‘eto‘e a haere mai ai e a haere atu ai te mau misionare i taua mahana ra. Ua taui te vero to‘eto‘e roa e ua riro mai ei hiona e ua taui faahou. Ua tae mai te tahi mau misionare no roto mai i te tahi mau oire tapiri na ni‘a mai i te pereo auahi e ua haere avae mai i te fare pureraa na roto i te vero. Ua taahi mai te tahi i to ratou pereo taataahi. Ua poupou e ua oaoa rahi roa te taatoaraa o ratou. E mau misionare ratou na te Fatu. Te vai ra To‘na Varua i roto ia ratou e te oaoa ra ratou i te Taviniraa Ia‘na noa‘tu te mau mea e tupu.
A hope ai te uiuiraa i te hoê misionare e to‘na hoa tata‘i tahi, e ore roa e mo‘e hia ia‘u i to‘u hi‘oraa ia ratou ia haere atu i rapae au i roto i te vero no te poro i te evanelia e ia rave i te mea o ta te Fatu i pii ia ratou ia rave. Ua ti‘a roa ia‘u ia ite i to ratou haapa‘o e to ratou itoito. Ua nehenehe roa ia‘u ia ite i to ratou here i te taata e i te Fatu. A hi‘o ai au ia ratou ia haere ê atu, ua tupu mai ia‘u te hoê here faito ore no ratou e no te ohipa o ta ratou e rave ra.
I muri mai i taua arui ra, ua tae atu vau i te hoê pureraa autahuaraa i roto ihoa i taua oire ra. Ua tamau noa te vero e hiona ana‘e i teie nei. I te taime no te himene matamua, ua tomo mai i roto i te fare pureraa te peresideni o te amaa na‘ina‘i roa ae te atea roa a‘e e to‘na nau tauturu e piti misionare, o Elder Warner e o Elder Karpowitz. A faaineine ai raua i te parahi, ua iriti teie nau misionare faahiahia mau e piti i to raua taupoo mahanahana e te rimarima. Ua iriti atoa i to raua pereue no rapae au. E i muri iho ua iriti atoa raua tata‘i tahi i te pitiraa o te pereue mahanahana e ua parahi ihora. E mai te au i te mau misionare i haere mai i taua mahana ra, ua oaoa teie mau misionare noa‘tu te huru o te reva. Ua farii ratou i te Varua o te Fatu i roto i to ratou oraraa. Na roto i te taviniraa i te Fatu, ua farii ratou i te hoê here e te mahanahana e te oaoa taa ê e mea fifi ia tatara.
A hi‘o ai au i teie mau misionare maitai roa i taua arui ra, Ua tupu te hoê mea faahiahia i ni‘a ia‘u. I roto i to‘u feruriraa, ua ite au i te mau misionare i roto i te misioni i te haereraa i rapae au i roto i taua pô to‘eto‘e ra. Te patoto ra te tahi i te mau opani e te faaruru ra ratou i te pato‘iraa a tamata ai ratou i te haapii atu i te evanelia a Iesu Mesia. Tei roto te tahi o ratou i te mau utuafare aore râ i te mau piha faaearaa, e te haapii ra i te mau taata e te mau utuafare. Noa‘tu te mau huru o ta ratou e farii ra, te faaitoito ra ratou i te haapii i te evanelia a Iesu Mesia i te feia o te hinaaro ra i te faaroo, e ua oaoa ratou. Ua tae mai i roto i to‘u aau te hoê mana‘o o ta‘u e ore e nehenehe e tatara.
Na roto i te hoê horo‘araa maere a te Varua, ua farii au i To‘na aroha, te aroha mau o te Fatu o te vai ra ia‘na no te mau misionare haapa‘o maitai i te mau vahi atoa e ua taui te reira i to‘u oraraa e a muri noa‘tu. Ua papû ia‘u te faufaa rahi o te misionare tata‘i tahi i mua Ia‘na. Ua ite au i te hoê hoho‘a o ta te mau peropheta i faaite no ni‘a i te « u‘i faahiahia roa a‘e o te mau misionare » i ore â i itehia a‘enei e to te ao (hi‘o M. Russell Ballard, « Te u‘i faahiahia roa a‘e o te mau misionare », Liahona, Novema 2002, 47). Ua haamata vau i te taa maitai no te aha e ti‘a roa ia faateiteihia te titauraa ia nehenehe i te mau misionare i te mau vahi atoa ia noaa te parururaa, te arata‘iraa e te oaoa o te apee atu i te Varua o te Fatu. Ua haamata atoa vau i te taa maitai e no te aha, ei mau metua, ei mau episekopo, ei mau peresideni tĭtĭ e te tahi atu feia faatere, e ti‘a roa ia tatou ia rave i te mau mea atoa no te tauturu i te feia apî o te Ekalesia ia farii i te mau haamaitairaa o te ohipa misionare.
Ua faaite te peresideni Hinckley i te mea e tupu i roto i te mafatu o te misionare tata‘i tahi o te faatusia i to‘na oraraa e ta‘na ohipa no te Fatu a faahiti ai oia i te mau ohipa o tei tupu i roto i ta‘na iho tau misioni. I te pae matamua o ta‘na misioni ua paruparu to‘na mana‘o. E mea paari roa te ohipa e aita te taata e farii i te haapiiraa. Tera râ, ua tae mai te hoê taime e ua riro te mana‘o paruparu ei mana‘o faaotiraa. No‘na, ua haamata te reira na roto i te hoê rata no ô mai i to‘na metua tane o te faaite ra e : « E Gordon, ua farii au i ta oe rata… Hoê noa ta‘u e parau atu : A haamo‘e ia oe e a rave i te ohipa ». No te faaite i te ohipa i tupu i muri mai, ua parau oia e : « Ua tuturi au i roto i taua piha taotoraa ra… e ua rave au i te faaotiraa e tamata vau i te horo‘a ia‘u iho i te Fatu.
« Ua taui te ao taatoa. Ua maramarama te mau mea. Ua tupu mai te maramarama e te oaoa i roto i to‘u oraraa. Ua vai mai te hoê anaanatae apî. Ua ite au i te nehenehe o teie fenua. Ua ite au i te maitai rahi o te nunaa… Te mau mea maitai atoa o tei tupu i ni‘a ia‘u mai te reira mai taime no roto mai ïa i taua faaotiraa ra i ravehia i roto i taua fare na‘ina‘i ra » (i roto Mike Cannon, « Missionary Theme Was Pervasive during Visit of President Hinckley », Church News, 9 no tetepa 1995, 4).
Ua tamau te peresideni hinckley i te parauraa e, « E hinaaro outou ia oaoa ? A haamo‘e ia outou iho e a horo‘a ia outou i roto i teie ohipa rahi mau, a haamau i ta outou mau tautooraa i ni‘a i te tautururaa i te taata » (i rotoi te Church News, 9 no tetepa 1995, 4).
I te feia apî tamaroa tata‘i tahi te parau atu nei au, te hinaaro anei oe ia oaoa ? Mai te mea e, e, a haere mai e a amui mai ia matou nei, e 52.000 misionare e te rahi noa‘tu â, e a tavini i to taata tupu ei misionare na te Fatu. A faaoti ia horo‘a e piti matahiti o to oe oraraa no te Fatu. E taui te reira i te mau mea atoa. E roaa ia oe te oaoa. E maramarama te mau mea atoa. E noaa te here ia oe i te peu tumu e i te mau taata o ta oe i piihia ia tavini. E mea paari te ohipa, e noaa mai atoa râ te mauruuru e te oaoa a tavini ai oe. Mai te mea e haapa‘o maitai oe i roto i ta oe misioni e i muri a‘e, e hi‘o ïa oe i muri i to oe oraraa ma te parau e te peresideni Hinckley e, « te mau mea maitai atoa o tei tupu ia‘u mai te reira mai taime no roto mai ïa i taua faaotiraa ra ia tavini i te hoê tau misioni e ia horo‘a i to‘u oraraa i te Fatu ».
Ua faahamana‘o mai te peresideni Hinckley ia tatou e ere ana‘e te mau misionare apî o te farii i teie mau haamaitairaa. Te tavini maitai nei te mau tane e to ratou mau hoa faaipoipo e te hinaaro rahi roa hia nei ratou. Noa‘tu aita i titauhia i te mau tuahine ia tavini, ua parau te peresideni Hinckley e : « Te hinaaro nei matou i te tahi mau tuahine apî. E rave ratou i te hoê ohipa faahiahia » (« I te mau episekopo o te Ekalesia », Haapiipiiraa na te feia faatere no te ao atoa nei, 19 no tiunu 2004, 27). Ua ite atoa tatou e, no vetahi, no te ‘ea e aore râ, no te tahi atu mau tumu, e haamauruuruhia‘tu ratou i teie taviniraa. Ua here matou ia ratou e ua ite matou e e horo‘a mai te Metua i te Ao ra i te mau haamaitairaa ei mono i roto i to ratou oraraa a tavini ai ratou i roto i te tahi atu mau pi‘iraa e ia ora faaroo noa.
Hoê matahiti i ma‘iri a‘e nei, ua ani o Elder Ballard ia haa amui te mau metua, te mau episekopo e te mau peresideni amaa e ia tauturu â i te hoê atu â tamaroa apî, taa ê noa‘tu i te feia o te faaineine-tamau-hia nei no te tavini, ia riro mai ei mea ti‘amâ e ia piihia mai roto mai i te paroita e te amaa tata‘i tahi o te Ekalesia (hi‘o « Hoê a‘e toe », Liahona, Me 2005, 71). Mea rahi roa tei pahono i teie piiraa. Tatou e te feia faatere, e ti‘a ia tatou paatoa ia faaoti faahou â ia pee i teie aniraa faauruhia.
E te mau taea‘e e te mau tuahine, e rave rahi mau episekopo tei rave tamau i te mea ta Elder Ballard i ani maoro. E toru ahuru maono matahiti i teie nei, ua niuniu mai te Episekopo Frank Matheson i te fare e ua ani mai ia‘u ia haere atu i ta‘na piha ohipa. No te huru o te mau ohipa e tupu ra i roto i te ao, ua taoti‘ahia te rahiraa misionare no roto mai i te mau paroita atoa, tera râ ua vata mai te hoê ti‘araa, e ua titauhia ia‘na ia faahaere hoê faahou â misionare. Ua na ô mai oia ia‘u e ua pure oia e to‘na nau tauturu. Ua parau mai oia e ua faauruhia oia e o teie te taime ta te Fatu i hinaaro ia‘u ia tavini i ta‘u misioni. Ua maere roa vau. Aita â te hoê taata i parau mai ia‘u na mua a‘e e te vai ra te tahi ohipa ta te Fatu e hinaaro ia‘u ia rave. Ua farii au i te Varua o te Fatu o te faaite ia‘u e e ti‘a ia‘u ia haere, e ia haere i teie nei. Ua na ô atu vau i te Episekopo, « Mai te mea e hinaaro te Fatu ia‘u ia tavini i te hoê misioni, e haere ïa vau ».
No‘u nei, ua taui te mau mea atoa. Ua maramarama mau vau e ua tae mai te oaoa e te poupou i roto i to‘u oraraa Na roto anei i te hoê rave‘a aore râ te tahi atu rave‘a ê, te mau mea atoa tei tupu mai te reira mai mahana ua tae mai ïa na roto i te faaotiraa i ravehia no te tavini i te Fatu e i ta‘na mau tamarii e ia horo‘a e piti matahiti o to‘u oraraa no te taviniraa Ia‘na.
Te parau faahou nei au, « A amui mai ia matou. Haere mai e ia ti‘amâ outou. A haere mai e ia oaoa outou. A haere mai e ia ite i te mea o ta te Fatu i parau e « ei faufaa rahi a‘e » (PH&PF 15:6) no outou i teie taime o to outou oraraa. A haere mai e ia riro outou ei tufaa no te u‘i misionare rahi roa‘e i ore â i itehia‘e nei e to te ao ».
E ohipa teie na te Fatu. Te ora nei to Tatou Metua i te Ao ra e te arata‘i nei e te faatere nei Ta‘na Tamaiti, o Iesu Mesia i teie ohipa i teie mahana. Te faaite papû nei au i te reira, i roto i te i‘oa o Iesu Mesia ra, amene.