NGAAHI FAKAKAUKAU MAʻÁ E EFIAFI FAKAFĀMILI ʻI ʻAPÍ

ʻE lava ke fakaʻaongaʻi ʻa e ngaahi fokotuʻu fakafaiakó ni ʻi he loki akó pea ʻi ʻapi foki. Te ke lava pē fulihi e ngaahi fakakaukaú ni ke feʻunga ki ho fāmilí pe kalasí.

“Vaheʻi Hao Taimi ke Ke Māʻoniʻoni Ai,“ p. 20: ʻOkú ne akoʻi mai ʻa e fakakaukau ko ia ke tuku ha taimi ke fai ai e ngaahi meʻa ʻoku mahuʻingá ʻaki hano fai ʻo e ʻekitivitī ko ʻení. Fakaʻaliʻali ange ki ho fāmilí ha ʻaiʻangameʻa ʻoku hala ha meʻa ʻi loto, mo ha ʻoneʻone, makamaka iiki/maka lei (pebbles) mo ha ngaahi foʻi maka. Lingi e ʻoneʻoné ki he ʻaiʻangameʻá, hoko ai e makamaka īkí/maka leí pea toki hoko hifo e ngaahi foʻi maká. (ʻUluaki fakafuofuaʻi hono lahi ʻo e ʻū meʻa ko ʻení koeʻuhí ke ʻoua ʻe hao kotoa e ngaahi foʻi maká ki loto.) Fakamatalaʻi ange kuo pau ke tau palaniʻi ha taimi ki he ngaahi meʻa ʻoku mahuʻingá. Toe fai e foʻi ʻekitivitií, ʻo fuofua ʻai ki loto e ngaahi foʻi maká, hoko atu ki ai e makamaka īkí pea toki fakafonu atu e ʻoneʻoné ʻi he konga ʻoku toé. Fakaʻaongaʻi e fakamatalá ʻo mou aleaʻi pe ko e hā e “ngaahi foʻi maká,” pe ngaahi meʻa mahuʻinga ʻoku ʻi heʻetau moʻuí pea ʻe anga fēfē ʻa hono tuku ha taimi ki ai.

ʻKo ha Uiuiʻi ke Tupulaki Ai” p. 28: Lau leʻolahi ʻa e konga “Ko ha Lēsoni ʻi he Fakamoʻoní.” Aleaʻi e founga ne maʻu ai ʻe ʻEletā Soalisi ʻene fakamoʻoní pea mo e founga naʻe tokoniʻi ai ia ʻe heʻene fakamoʻoní ke ne moʻuiʻaki e ngaahi tuʻunga moʻui ʻo e ongoongoleleí. Hiki fakahokohoko e ngaahi meʻa ko ia ʻe lava ke tau fai ke fakamālohia ai ʻetau ngaahi fakamoʻoní. ʻE tokoniʻi fēfē kitautolu ʻe ha fakamoʻoni ke tau moʻuiʻaki ʻa e ongoongoleleí?

“Aʻusia ʻo ha Liliu ʻo e Lotó,” p. 39: Hiki ʻi ha foʻi haati ngaohi mei he pepá ʻa e ngaahi foʻi lea ko e “tui,” “anga-māʻoniʻoni,” “ʻofa” mo e “ikunaʻi ʻa māmani” (vakai ki he “Ngaahi Tāpuaki ʻo e Toe Fanauʻi Foʻoú”). Mou aleaʻi e founga ʻe lava ke tokoniʻi takitaha ai ʻe he ngaahi tefitoʻi moʻoni ko ʻeni ʻe faá ʻa e kau mēmipa ʻo e fāmilí ke nau aʻusia ha liliu ʻo e lotó. Fakatātaaʻi e liliu ko ʻení ʻaki hano fai ʻo e talanoa kia ʻAivení. Hiki fakahokohoko ʻi he tafaʻaki ʻe taha ʻo e haati pepá ʻa e ngaahi meʻa ʻe lava ke fai ʻe homou fāmilí ke moʻuiʻaki e ngaahi tefitoʻi moʻoni ko ʻení.

“Ko e Tui ki he ʻOtuá,” p. K8: Fakaafeʻi e kau mēmipa ʻo e fāmilí ke nau haʻihaʻi nima taha pē honau suú. Mou aleaʻi hono ʻuhinga ʻoku faingataʻa ai hono fai ʻení. Fekau he taimí ni ke nau fehaʻiʻaki honau suú. Aleaʻi pe ʻoku hanga fēfē ʻe he ngāue fakatahá ʻo ʻai ke faingofua ange e ngāué. Lau e fakamatalá pea aleaʻi pe ʻe fakamālohia fēfē ʻa hoʻomou tui ki he ʻOtuá ʻi hoʻomou ngāue fakataha ke fakakakato e polokalama ko ʻení. Fili ha ʻekitivitī mei he tohi fakahinohino Tui ki he ʻOtuá ke mou ngāue fakataha ki ai ʻi he uike ka hoko maí.