Ma‘u atu ha Tohi Tufa mo e DVD ‘o e Ako Fakatakimu‘a Fakaemāmani Lahí

ʻE pulusi atu ʻa e fakaikiiki ʻo e ngaahi lea ne fai ʻi he Fakataha Ako Fakatakimuʻa Fakaemāmani Lahi he ʻaho 9 ʻo Fēpueli 2008, ʻi ha kiʻi tohi tufa pea fakafolau fakataha atu ia mo e makasini Ensign mo e Liahona ʻo Suné. ʻE maʻu atu e tohi tufá ʻi ha lea fakafonua ʻe 23. ʻE lava foki ke maʻu atu hono fakamatalá ʻi ha lea fakafonua ʻe 77 mei he tuʻasila ʻinitaneti ko e LDS.org.

ʻE maʻu atu foki ʻa e fakamafolá ʻi he DVD ʻi ha lea fakafonua ʻe 16, mei he ngaahi senitā tufakiʻanga nāunaú.

Naʻe fakamafola e akó ni ki he funga ʻo e māmaní ki he kau mēmipa lalahi kotoa pē ʻo e Siasí ʻoku taʻu 18 pe motuʻa angé. Naʻe fakatefito e fakatahá ʻi hono fokotuʻu hake ʻo ha hako anga māʻoniʻoni. Naʻe fakaʻosi ʻe Palesiteni Tōmasi S. Monisoni ʻa e fakatahá ʻaki ha ngaahi fakahinohino ʻe tolu ki hono ngaohi ʻo ʻapi ke hoko ko ha ungaʻanga ʻo e fiefiá: ʻa ia ko hono fai ʻo e “lotu fakafāmilí,” faʻu ʻo ha “laipeli ʻo e akó,” pea mo fokotuʻu ʻo ha “tukufakaholo ʻo e ʻofá” ʻo fakafou ʻi he tā sīpingá.

Naʻe toe fakamanatu foki ʻe Palesiteni Poiti K. Peeka, ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻa e “Ko e Fāmilí: Ko ha Fanongonongo ki Māmani” (Liahona, ʻOkatopa 2004, 49) pea mo hono mahuʻingá.

Naʻe fakafeʻiloaki mai ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻa e kaveinga ʻo e fakatahá peá ne toe kau foki ki ha fealēleaʻaki fakatokolahi ʻo fekauʻaki mo hono ʻohake ʻo ha hako anga māʻoniʻoní, fakataha mo ʻEletā Tāleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá; Suli B. Peki ko e palesiteni lahi ʻo e Fineʻofá; Sūsana W. Tena ko e palesiteni lahi ʻo e Kau Finemuí pea mo Seli C. Lani ko e palesiteni lahi ʻo e Palaimelí.