Te u Maʻu Nai Mei Fē Ha Tohi ʻa Molomona ʻe Taha?
Ko ʻene toki ʻosi ia haʻama tukituki mo hoku hoá ʻi ha ngaahi matapā ʻi Puenosi ʻAealesi ʻi ʻĀsenitina he ʻaho kakato mo e ʻikai ha ola. ʻI heʻema tangutu ʻo tatali ki he pasí, ne kamata ke u ongoʻi fakaʻofaʻia pē au ʻiate au. Kuo māhina tolu ʻeni ʻeku ngāue ʻi he ʻēlia ko iá mo e ʻikai pē ha ola. Ne u ongoʻi kuo ʻikai te u fakahoko e finangalo ʻo e ʻEikí.
Ne u fakatokangaʻi atu he taimi pē ko iá ha tangata naʻe heka pasikala ʻo hangatonu mai kiate kimaua. Naʻá ne kaikaila mo taʻalo mai. Naʻá ma lue fakavave atu ki he pasí ke ʻoua naʻá ma fetaulaki mo e tangata ko ʻeni ne ngalingali ʻoku ʻitá. Naʻe fakaʻau ke fakapoʻuli pea ko ha feituʻu fakatuʻutāmaki ʻeni ʻi he ʻēlia naʻá ma ʻi aí. Ne ma fakaʻamu ke ma ʻuluaki aʻu ki he pasí ʻoku teʻeki aʻu ange ʻa e tangata fakailifia ko ʻení kiate kimaua.
Naʻe kaila ange e tangatá, “ʻOku ou fie fai atu ha fehuʻi kiate kimoua.” Ne tomuʻa aʻu ange e pasí he tangatá ko ia ne ma heka fakavave ki loto. Ko e taimi ia ne u ongoʻi ai e fehuʻi ʻa e tangatá: “Ko e hā ne hoko ki he ʻū lauʻi peleti koulá hili hono liliu ia ʻe Siosefa Sāmitá?” Ne u ʻohovale ʻaupito heʻene fehuʻí. Ne u loto ke u puna mei he pasí he kamata ke mavahe atú. Ka naʻá ku kaila hifo ki ai, “ʻOkú ke nofo ʻi fē?” mo hiki fakavave hono tuʻa-silá.
Ne ma ō ki he ʻapi ʻo e tangatá he ʻaho hono hokó. Ko hono hingoá ko Fāvio. Naʻá ne talamai kiate kimaua naʻe ʻoange ki ai ʻe hano kaumeʻa ha Tohi ʻa Molomona he māhino kuo ʻosí.
Naʻe pehē ʻe Fāvio, “Ne u saiʻia maʻu pē ke ʻilo kia Sīsū Kalaisi, ka ne teʻeki ai pē ke u fanongo ʻi ha toe fakamoʻoni ʻe taha kau ki Heʻene moʻuí. Ko e Tohi Tapú pē mo e ngāue fakafaifekau ʻa Kalaisi ʻi he ngaahi feituʻu ʻi he hahaké ne u ʻilo ki aí. Kuo teʻeki ai ke talamai ʻe ha taha kiate au naʻe hāʻele mai ʻa Kalaisi ki ʻAmelika! Ne u vēkeveke ke toe ʻilo lahi ange kiate Ia.”
Naʻe pau ke fakafoki ʻe Fāvio e tohí hili ha ngaahi uike siʻi mei ai. Naʻá ne pehē, “Naʻe ʻikai te u ʻilo pe ʻe toe maʻu mei fē ha tohi ʻe taha. Naʻe ʻikai mo ha toe meʻa te u fie maʻu lahi ange ka ke ʻiloʻi pe naʻe moʻoni ʻa e tohí. Ne u tūʻulutui ʻo kole ha tokoni mei he Tamai Hēvaní. Ne u pehē, ‘ʻE Tamai, kapau ʻoku moʻoni e Tohi ʻa Molomoná, fakamolemole ʻo ʻomai hano tatau ʻe taha kiate au kae lava ke hokohoko atu ʻeku ako ki aí.’ ”
ʻI he ʻaho ʻe taha naʻe ʻi ha tauʻanga lēlué ai ʻa Fāvio. Naʻá ne fakatokangaʻi atu ha tohi lanu pulū ʻoku lī mai he saitiuoká. ʻI heʻene aʻu atu ki aí, naʻá ne fakatokangaʻi e ngaahi mataʻitohi lanu koulá. Ko e tali ʻeni ʻa e Tamai Hēvaní.
Hili ha ngaahi uike mei hono maʻu ʻe Fāvio e Tohi ʻa Molomoná, naʻá ne sio kiate kimaua ʻi he tauʻanga pasí. Kuó ne ʻilo he taimi ko ʻení ʻa e moʻoni ʻo e tohí. ʻI he ngaahi uike hoko aí ne ma akoʻi e ngaahi tefitoʻi moʻoni ʻo e ongoongoleleí kia Fāvio mo fakalotolahiʻi ia ke kei hokohoko atu ʻene laukongá. ʻI he taimi kotoa pē ne ma ʻeke ange ai pe te ne fie tukupā ke moʻuiʻaki ha tefitoʻi moʻoni foʻou ʻo e ongoongoleleí, ko ʻene talí ʻeni, “ʻOku ou manavasiʻi au kapau he ʻikai te u fai ia.” Naʻe ʻikai fuoloa mei ai kuó ne papitaiso.
ʻI he taimí ni, ko e taimi kotoa pē ʻoku ou ongoʻi faingataʻaʻia ai ʻi ha ʻaho, ʻoku ʻikai te u ongoʻi fakaʻofaʻia pē ʻiate au, ka ʻoku ou manatuʻi ʻa Fāvio—ʻa e fehuʻi naʻá ne fai ki ha ongo faifekau kuó na loto-foʻi pea mo ʻene tukupā ki he ʻEikí hili ʻene maʻu ha talí.