Toe ʻa e Uike ʻe Taha pea Toki Hoko ʻa e ʻAho Vahé
Ne ma faingataʻaʻia mo hoku husepānití ʻi hono fua atu ʻema ongo kiʻi tamaikí, pea naʻá ma maʻu ha tēpile naʻe ʻataʻatā ʻi he falekai ʻo e ʻapiakó. Naʻá ma toʻo hake ʻema sanuisi naʻe ngaohi mei ʻapí peá ma talanoa ki homa tuʻunga fakapaʻangá.
Naʻe ʻikai haʻama paʻanga pea naʻe toe ʻa e uike ʻe taha pea toki hoko e ʻaho vahé. Naʻe ʻikai fie kole tokoni ha taha ia ʻiate kimaua ki heʻema mātuʻá. Naʻe ʻi ai pē ʻema kaati fakamoʻua, ka kapau te ma kamata ngāueʻaki ia, ʻe anga fēfē haʻama toe taʻofi ia? Kuó ma totongi totonu ʻema vahehongofulú, pea naʻá ma ʻamanaki ʻe tāpuakiʻi kimaua ʻe he Tamai Hēvaní.
ʻI heʻema fakakaukau ki he ngaahi meʻa ke ma faí, ne u fakatokangaʻi atu ha tangata ʻi ha tēpile mamaʻo atu meiate kimaua ʻokú ne katakata mai. Kuó u ʻosi anga au ki hono siofi kimaua ʻe he kakaí tupu mei he longoaʻa mo e hohaʻa ʻa ʻema fānaú. Naʻe ʻikai te u tokanga au pe fakakaukau ki he tangatá ni ka ne taʻe ʻoua ʻene luelue mai kiate kimauá. Naʻá ne tuku mai ʻi he funga tēpilé ha laʻipepa kuo pelu-ua peá ne tātaaʻi e tuʻa hoku husepānití peá ne malimali mo pehē mai, “ʻOku hā mai ʻoku lahi ʻaupito hoʻo ngaahi meʻa ke faí.”
Hili iá naʻá ne ʻalu ʻo pulia atu he kakaí. Naʻá ma folahi hake ʻa e laʻipepá pea naʻe tohiʻi ai ʻeni, “ʻOfa ke mo monūʻia! Kuó mo fakahoko e ngāue lelei ʻo aʻu mai ki he taimí ni.” Naʻe tuku hake ai ha paʻanga feʻunga ke mau moʻuiʻaki ʻi he uike hokó pea kei toe pē.
Ne u fakatē loʻimata ʻi heʻeku ongoʻi ʻa hono fakapapauʻi mai ʻe he Laumālié ko ha tali ʻeni ki heʻema ngaahi lotú pea mo ha tāpuaki ʻo ʻema totongi vahehongofulú. Ne u ʻiloʻi ʻi he momeniti pē ko iá naʻe ʻafioʻi lelei ʻe he Tamai Hēvaní homa kiʻi fāmilí pea he ʻikai te Ne liʻaki kimautolu.
Ne u tauhi e kiʻi tohí pea kuó u toutou lau ia ʻi he ngaahi taʻu kuo hilí. ʻOku ou ʻilo fakapapau naʻe ʻikai mahino kakato ki he tokotaha angalelei ko ʻení ʻa e ʻaonga ʻo e meʻa naʻá ne faí. Ka naʻe hoko e meʻa ko ʻení ko ha liliuʻanga ki homau fāmilí—ko ha liliu ʻo talangofua, tui mo loto houngaʻia lahi ange.
Kuo faitāpuekina hoku fāmilí ki he taʻengatá ʻe ha ueʻi fakalaumālie, ʻe ha tangata naʻe ʻikai ke mau maheni ka naʻe loto fie tokoni pea mo ha kiʻi tohi naʻe tokoni mo ʻaonga.