ONGOONGO NOUNOU MEI MĀMANI

Fakalāngilangiʻi ʻe he Kolosi Kulá ʻa e Siasí ʻi Pōkotā

Naʻe fakalāngilangiʻi ʻa e Siasi ʻe he Kolosi Kula ʻo Pōkotā ʻi Kolomupiá ʻi Nōvema 2007 ʻi heʻenau fokotuʻu ha lekooti ʻi he feinga totó, ʻa ia ne foaki ai ʻe ha kau ngāue tokoni ʻe toko 879 ha foʻi milemila toto ʻe 605, meimei ko e liunga tolu ia ʻo e ngaahi foʻi milemila toto ʻoku faʻa maʻu ʻi he feinga toto ʻoku lahi hono fakahoko ʻi Pōkotaá. Naʻe taimi totonu pē ʻa e ʻofa ko ʻení he ko e taimi ko ia ne fai ai e feinga totó, ko e taimi ia ʻoku siʻi taha ai e huhu totó, ka ʻoku lahi taha ai ʻa e fie maʻu totó.

Fakataha ha Toʻu Tupu mei he Siteiki ʻe Fā ʻi he ʻApitanga ʻo e ʻOtu Moʻungá

Naʻe feʻunga mo ha kau talavou mo e finemui ʻe meimei toko 150 mo ha kau taki ʻe meimei toko 50 mei ha ngaahi siteiki ʻe fā ʻi he kauʻāfonua ʻo Suisalani mo Falaniseé, ne nau fakataha hake ki ha konifelenisi fakavahaʻa siteiki ʻaho ʻe fā ʻi Suasī (Anovai ʻUliʻulí) ʻi Suisalani, ʻi he fakaʻosinga ʻo e 2007. Naʻe fakatahatahaʻi mai ʻe he ngaahi tā fakatātā ʻo e temipalé, fakataha akó, ngaahi ʻekitivitií mo ha hulohula pea mo ha ngaahi fakamoʻoni naʻe fai, ki he ʻOtu Moʻunga Suisalaní, ha toʻu tupu mei he ngaahi siteiki Siniva Suisalaní, Lōsane Suisalaní, Lioni Falaniseé pea mo e siteiki Nenisī Falaniseé.

Fakamanatu ʻe he Kāingalotu ʻi Sipeiní ʻa e Hisitōlia ʻo e Siasí

ʻE fakahoko ʻe he kāingalotu ‘o e Siasí ʻi Sipeiní hano fakamanatua lōloa ʻa e Lao Tauʻatāina ʻo e Lotú ʻi Sipeiní (naʻe tali ʻi Sune 1967), mei ʻOkatopa 2008 ki Mē 2009, ka ne tali fakalao ai e Siasí ʻi ʻOkatopa 1968, pea mo hono fakatapui ʻo Sipeini ke malangaʻi ai e ongoongoleleí he ʻaho 20 ʻo Mē 1969. Naʻe ʻoatu ki Sipeini ʻa e kau fuofua faifekau ʻe toko faá ʻi Sune ʻo e 1969.

Tokoni e FamilySearch ke Fakahū ki he ʻInitanetí Ha Ngaahi ʻĀkaivi ʻo e Fakamatala Fakafonuá

ʻE hanga ʻe he Kautaha Pule ʻo e Lekōtí mo e ʻĀkaivi Fakafonua ʻo e ʻIunaiteti Siteití (NARA) pea mo e FamilySearch ʻo fakafikefika, fakahokohoko fakamotuʻalea pea mo fakahū ki he ʻInitanetí ha konga lahi ʻo e ngaahi lekooti lahi faufaua ʻa e NARA. ʻE kau he ngaahi faile ʻe 1.28 miliona ko ʻení ha ngaahi meʻa fakapepa mei he fakamaauʻangá, tafaʻaki fakakautaú, kelekelé pea mo ha ngaahi fakamatala fakapuleʻanga kehe pē, ʻo kamata mei he taʻu 1754 ʻo aʻu mai ki he ngaahi taʻu ʻo e 1990. ʻE hanga ʻe he FamilySearch ʻo fakaʻatā taʻetotongi atu e ngaahi fakahokohoko fakamotuʻalea ko ʻení ʻi he ʻInitanetí.